Números 13 - Li Santil hu

Laj Moisés quixtaklaheb laj qꞌuehol etal chirilbal li naꞌajej Canaán

¹ Li Dios quia̱tinac riqꞌuin laj Moisés ut quixye re:

² —Ta̱taklaheb li cui̱nk chixqꞌuebal retal li naꞌajej Canaán, li tinqꞌue reheb laj Israel. Ta̱taklaheb li cui̱nk li cuanqueb xcuanquil, li nequeꞌcꞌamoc be chiruheb li junju̱nk xte̱paleb laj Israel, chan li Dios.

³ Joꞌcan nak laj Moisés quixtaklaheb li cui̱nk nak cuanqueb chak saꞌ li chaki chꞌochꞌ Parán joꞌ quiyeheꞌ re xban li Dios. Chixjunileb li cui̱nk li queꞌtakla̱c, aꞌaneb li nequeꞌcꞌamoc be chiruheb li junju̱nk xte̱paleb laj Israel.

⁴ Aꞌan aꞌin lix cꞌabaꞌeb li queꞌtakla̱c: Saꞌ lix te̱paleb li ralal xcꞌajol laj Rubén quitakla̱c laj Samúa li ralal laj Zacur.

⁵ Ut saꞌ lix te̱paleb li ralal xcꞌajol laj Simeón quitakla̱c laj Safat li ralal laj Hori.

⁶ Ut saꞌ lix te̱paleb li ralal xcꞌajol laj Judá quitakla̱c laj Caleb li ralal laj Jefone.

⁷ Ut saꞌ lix te̱paleb li ralal xcꞌajol laj Isacar, quitakla̱c laj Igal li ralal laj José.

⁸ Ut saꞌ lix te̱paleb li ralal xcꞌajol laj Efraín quitakla̱c laj Oseas li ralal laj Nun.

⁹ Ut saꞌ lix te̱paleb li ralal xcꞌajol laj Benjamín quitakla̱c laj Palti li ralal laj Rafú.

¹⁰ Ut saꞌ lix te̱paleb li ralal xcꞌajol laj Zabulón quitakla̱c laj Gadiel li ralal laj Sodi.

¹¹ Ut saꞌ lix te̱paleb li ralal xcꞌajol laj Manasés quitakla̱c laj Gadi li ralal laj Susi. Ut laj José, aꞌan lix xeꞌto̱nil yucuaꞌeb.

¹² Ut saꞌ lix te̱paleb li ralal xcꞌajol laj Dan quitakla̱c laj Amiel li ralal laj Gemali.

¹³ Ut saꞌ lix te̱paleb li ralal xcꞌajol laj Aser quitakla̱c laj Setur li ralal laj Micael.

¹⁴ Ut saꞌ lix te̱paleb li ralal xcꞌajol laj Neftalí quitakla̱c laj Nahbi li ralal laj Vapsi.

¹⁵ Ut saꞌ lix te̱paleb li ralal xcꞌajol laj Gad quitakla̱c laj Geuel li ralal laj Maqui.

¹⁶ Aꞌin lix cꞌabaꞌeb li cui̱nk li queꞌtakla̱c xban laj Moisés chixqꞌuebal retal li naꞌajej Canaán: laj Oseas li ralal laj Nun quiqꞌueheꞌ aj Josué chokꞌ xcꞌabaꞌ xban laj Moisés.

¹⁷ Nak quixtaklaheb li cui̱nk laj Moisés chixqꞌuebal retal chanru li naꞌajej Canaán, quixye reheb: —Ayukex saꞌ li naꞌajej Neguev ut texnumekꞌ saꞌ li naꞌajej li tzu̱l ru.

¹⁸ Te̱qꞌue chak retal chi us li tenamit li cuan aran. Ut te̱qꞌue retal eb li cristian li cuanqueb aran ma cauheb rib malaj ut incꞌaꞌ. ¿Ma nabaleb malaj ut incꞌaꞌ qꞌuiheb?

¹⁹ Te̱qꞌue chak retal li chꞌochꞌ li cuanqueb cuiꞌ ma cha̱bil malaj ut incꞌaꞌ. Te̱qꞌue chak retal chi us lix tenamiteb aꞌan. ¿Ma yi̱banbileb riqꞌuin tꞌicr lix muheba̱leb malaj ut yi̱banbil riqꞌuin tzꞌac?

²⁰ Ut te̱qꞌue ajcuiꞌ retal ma cha̱bil li chꞌochꞌ li cuanqueb cuiꞌ malaj ut incꞌaꞌ. ¿Ma na-el li acui̱mk chi us saꞌ li chꞌochꞌ malaj ut ma̱cꞌaꞌ na-el chiru? ¿Ma qꞌuicheꞌ ru malaj ut incꞌaꞌ? Mexxucuac chi oc saꞌ li naꞌajej aꞌan. Ut nacuaj ajcuiꞌ nak te̱cꞌam chak caꞌchꞌinak li ru li acui̱mk li na-el saꞌ li naꞌajej aꞌan, chan. Ac yo̱ xkꞌehil li uvas nak queꞌco̱eb li cui̱nk chixqꞌuebal retal li naꞌajej aꞌan.

²¹ Eb li cui̱nk li queꞌco̱eb chixqꞌuebal retal li naꞌajej queꞌxtiquib chak xqꞌuebal retal saꞌ li chaki chꞌochꞌ Zin. Ut queꞌcuulac toj saꞌ li tenamit Rehob, li cuan nachꞌ riqꞌuin Hamat.

²² Queꞌco̱eb saꞌ li naꞌajej Neguev ut queꞌcuulac saꞌ li tenamit Hebrón. Aran cuanqueb li cui̱nk laj Ahimán, laj Sesai ut laj Talmai. Aꞌaneb li ralal xcꞌajol laj Anac. Cuukub chihab xyi̱banquil li tenamit Hebrón nak queꞌxyi̱b li tenamit Zoán aran Egipto.

²³ Eb laj qꞌuehol etal queꞌcuulac cuan cuiꞌ li rok haꞌ Escol xcꞌabaꞌ. Aran queꞌxset jun rukꞌ li uvas cuan jun cu̱t li ru ut queꞌxpako saꞌ cuibal chi tuytu chiru jun li cheꞌ. Ut queꞌxcꞌam ajcuiꞌ li ru li granadas ut li higos.

²⁴ Joꞌcan nak queꞌxqꞌue Escol chokꞌ xcꞌabaꞌ li ru takꞌa aꞌan xban nak aran queꞌxyocꞌ li jun cu̱t chi uvas eb laj Israel.

²⁵ Ut eb li cui̱nk li queꞌco̱eb chixqꞌuebal retal li naꞌajej Canaán queꞌsukꞌi chak chiru caꞌcꞌa̱l cutan.

²⁶ Queꞌcuulac saꞌ li chaki chꞌochꞌ Parán li cuan cuiꞌ li tenamit Cades. Aran cuanqueb laj Moisés, laj Aarón ut chixjunileb laj Israel. Ut queꞌxserakꞌi reheb chixjunil li queꞌril chak saꞌ li naꞌajej. Ut queꞌxcꞌut chiruheb li ru li quiꞌil kꞌe̱n li queꞌxcꞌam chak.

²⁷ Ut queꞌxye reheb: —Xocuulac chak chirilbal li naꞌajej li xoa̱takla cuiꞌ. Relic chi ya̱l li naꞌajej kꞌaxal cha̱bil. Aran na-el nabal li sahil echej. Aꞌan aꞌin li ru li quiꞌil kꞌe̱n li xkacꞌam chak saꞌ li naꞌajej aꞌan.

²⁸ Abanan eb li cristian li cuanqueb aran kꞌaxal cauheb rib. Ut li tenamit ni̱nkeb ut yi̱banbil chi cha̱bil ut sutsu riqꞌuin tzꞌac. Ut moco caꞌaj cuiꞌ ta aꞌin. Xkil ajcuiꞌ chak ruheb li ralal xcꞌajol li mamaꞌ cui̱nk aj Anac.

²⁹ Saꞌ li naꞌajej Neguev cuan laj Amalec. Ut eb laj heteo, eb laj jebuseo ut eb laj amorreo cuanqueb saꞌ li naꞌajej li tzu̱l ru. Eb laj cananeo cuanqueb chire li palau ut chire li nimaꞌ Jordán, chanqueb.

³⁰ Ut laj Caleb quixye reheb nak teꞌxcanab a̱tinac riqꞌuin laj Moisés. Quixye reheb: —Tento toxic chi pletic riqꞌuineb. La̱o cau kib chiruheb aꞌan. La̱o naru nake̱chani li naꞌajej aꞌan, chan.

³¹ Abanan eb li cui̱nk li queꞌcuulac chak chi qꞌuehoc etal rochben laj Caleb queꞌxye: —La̱o incꞌaꞌ naru toxic chi pletic riqꞌuineb li tenamit aꞌan xban nak eb aꞌan kꞌaxal cauheb rib chiku la̱o, chanqueb.

³² Eb li cui̱nk aꞌan incꞌaꞌ us queꞌxye reheb laj Israel chirix li naꞌajej Canaán. Queꞌxye nak li ani nequeꞌxic chi cua̱nc saꞌ li naꞌajej aꞌan nequeꞌcam xban nak incꞌaꞌ cha̱bil li chꞌochꞌ. Ut eb li cui̱nk li cuanqueb aran kꞌaxal ni̱nkeb rok.

³³ Ut queꞌkil ajcuiꞌ chak li ni̱nki cui̱nk li ralal xcꞌajol laj Anac. La̱o chanchano laj sa̱cꞌ nak nocoeꞌril eb aꞌan xban nak kꞌaxal cocꞌo chiruheb, chanqueb.