Nehemías 8 - Li Santil hu

Laj Esdras quiril xsaꞌ li Santil Hu chiruheb li tenamit

¹ Saꞌ xcuuk li po eb laj Israel queꞌxchꞌutub ribeb chixjunileb aran Jerusalén saꞌ li neba̱l li cuan chiru li oqueba̱l bar nequeꞌnumeꞌ cuiꞌ li nequeꞌbelan haꞌ. Queꞌxtzꞌa̱ma chiru laj Esdras laj tzꞌi̱b nak tixcꞌam chak li hu li tzꞌi̱banbil cuiꞌ li chakꞌrab li quiqꞌueheꞌ re laj Moisés xban li Dios chokꞌ reheb laj Israel.

² Saꞌ xbe̱n li cutan re li xcuuk li po laj Esdras laj tij quixcꞌam chak li hu li tzꞌi̱banbil cuiꞌ li chakꞌrab re ta̱ril xsaꞌ chiruheb chixjunileb li chꞌutchꞌu̱queb aran, joꞌ cui̱nk, joꞌ ixk ut joꞌ ajcuiꞌ chixjunileb li teꞌru̱k xtaubal ru lix ya̱lal li a̱tin li ta̱ril saꞌ li hu.

³ Ut laj Esdras quiril xsaꞌ li hu chiruheb chixjunileb li cuanqueb saꞌ li neba̱l li cuan chiru li oqueba̱l bar nequeꞌnumeꞌ cuiꞌ li nequeꞌbelan haꞌ. Quixtiquib rilbal saꞌ li hu tzꞌi̱banbil cuiꞌ li chakꞌrab chalen ekꞌela toj quicuulac cuaꞌleb chiruheb chixjunileb li cuanqueb aran, joꞌ cui̱nk, joꞌ ixk, ut joꞌ ajcuiꞌ chiruheb li queꞌru xtaubal ru. Ut chixjunileb queꞌxcanab rib chirabinquil li cꞌaꞌru naxye saꞌ li chakꞌrab.

⁴ Laj Esdras, li nacꞌutuc re li chakꞌrab chiruheb li tenamit, xakxo saꞌ xbe̱n li tusbil cheꞌ li queꞌxyi̱b re ta̱xakli̱k cuiꞌ. Ut eb li cui̱nk aꞌin xakxo̱queb chixcꞌatk saꞌ lix nim ukꞌ laj Esdras: laj Matatías, laj Sema, laj Anías, laj Urías, laj Hilcías, ut laj Maasías. Ut saꞌ lix tzꞌe xakxo̱queb laj Pedaías, laj Misael, laj Malquías, laj Hasum, laj Hasbadana, laj Zacarías ut laj Mesulam.

⁵ Chixjunileb li tenamit li cuanqueb aran queꞌril nak laj Esdras quixte li hu li tzꞌi̱banbil cuiꞌ li chakꞌrab xban nak najt xteram li naꞌajej li xakxo cuiꞌ. Nak quixte li hu, chixjunileb li tenamit queꞌxakli.

⁶ Laj Esdras quixlokꞌoni li Ka̱cuaꞌ li nimajcual Dios ut chixjunileb li tenamit queꞌxtaksi li rukꞌeb ut queꞌxye: —¡Joꞌcan taxak! ¡Joꞌcan taxak!— Queꞌxcubsi ribeb chiru li Ka̱cuaꞌ ut queꞌxxulub lix jolomeb, ut queꞌxlokꞌoni li Dios.

⁷ Ut eb laj levita yo̱queb chixchꞌolobanquil xya̱lal li chakꞌrab chiruheb li tenamit. Ut eb li tenamit queꞌxqꞌue xchꞌo̱l chirabinquil. Eb laj levita, aꞌaneb aꞌin: laj Jesúa, laj Bani, laj Serebías, laj Jamín, laj Acub, laj Sabetai, laj Hodías, laj Maasías, laj Kelita, laj Azarías, laj Jozabed, laj Hanán ut laj Pelaía.

⁸ Eb aꞌan yo̱queb chirilbal xsaꞌ li hu li tzꞌi̱banbil cuiꞌ li chakꞌrab chi tzꞌakal re ru ut queꞌxchꞌolob xya̱lal re nak li tenamit teꞌxtau ru chi us.

⁹ Nak queꞌrabi cꞌaꞌru naxye saꞌ li chakꞌrab queꞌoc chi ya̱bac. Ut laj Nehemías li gobernador, ut laj Esdras laj tij, ut laj tzꞌi̱b, ut eb laj levita li yo̱queb chixchꞌolobanquil lix ya̱lal reheb li tenamit, queꞌxye reheb: —Miyotꞌeꞌ e̱chꞌo̱l ut mexya̱bac xban nak li cutan aꞌin kꞌaxal lokꞌ chiru li Ka̱cuaꞌ li kaDios.—

¹⁰ Ut queꞌxye ajcuiꞌ reheb: —Chenima ru li cutan aꞌin xban nak li cutan aꞌin kꞌaxal lokꞌ chiru li Ka̱cuaꞌ. Mirahoꞌ e̱chꞌo̱l. Tzacahomak li cha̱bil tzacae̱mk ut ucꞌumak li cha̱bil vino li quiꞌ ut qꞌuehomak xtzacae̱mk li ma̱cꞌaꞌ cuan reheb yi̱banbil. Ut chisahokꞌ taxak saꞌ e̱chꞌo̱l xban nak li sahil chꞌo̱lej li naxqꞌue li Ka̱cuaꞌ, aꞌan naxqꞌue xcacuil kachꞌo̱l.—

¹¹ Eb laj levita yo̱queb ajcuiꞌ xcꞌojobanquil xchꞌo̱leb li tenamit ut queꞌxye reheb: —Mirahoꞌ chic le̱ chꞌo̱l. Canabomak ya̱bac xban nak li cutan aꞌin kꞌaxal lokꞌ chiru li Ka̱cuaꞌ, chanqueb.

¹² Ut chixjunileb li tenamit queꞌxninkꞌei ru li cutan. Queꞌco̱eb chi cuaꞌac ut chi ucꞌac ut queꞌxqꞌue ajcuiꞌ xcuaheb li ma̱cꞌaꞌ cuan reheb. Ut cꞌajoꞌ nak queꞌsahoꞌ saꞌ xchꞌo̱leb xban nak queꞌxtau ru li a̱tin li quiyeheꞌ saꞌ xxiqueb.

Queꞌoc cuiꞌchic xba̱nunquil li ninkꞌe li nequeꞌxba̱nu saꞌ eb li cocꞌ muheba̱l

¹³ Ut joꞌ cuulajak chic queꞌxchꞌutub ribeb riqꞌuin laj Esdras laj tzꞌi̱b, eb laj levita ut eb laj tij joꞌqueb ajcuiꞌ chixjunileb li nequeꞌjolomin re li junju̱nk cabal re xtaubal ru chi us li naxye saꞌ li chakꞌrab.

¹⁴ Ut queꞌxtau retalil tzꞌi̱banbil saꞌ li chakꞌrab li quiqꞌueheꞌ re laj Moisés xban li Ka̱cuaꞌ nak eb laj Israel teꞌxyi̱b lix cocꞌ muheba̱leb re teꞌcua̱nk cuiꞌ nak teꞌninkꞌei̱k saꞌ xcuuk li po.

¹⁵ Ut queꞌxtakla resil saꞌ eb li tenamit joꞌ ajcuiꞌ Jerusalén ut queꞌxye reheb: —Ayukex saꞌ eb li tzu̱l ut te̱sicꞌ chak rukꞌeb li cheꞌ Olivo, li cheꞌ mirto, li cheꞌ palma ut li chaj joꞌ ajcuiꞌ chixjunileb li cheꞌ li cuan xxak chi us re xyi̱banquil le̱ cocꞌ muheba̱l joꞌ tzꞌi̱banbil saꞌ li chakꞌrab, chanqueb.

¹⁶ Joꞌcan nak co̱eb chixjunileb li tenamit ut queꞌxsicꞌ rukꞌeb li cheꞌ re teꞌxyi̱b lix cocꞌ muheba̱leb. Cuan queꞌxyi̱b lix cocꞌ muheba̱leb saꞌ li neba̱l li cuan saꞌ xbe̱n li rochocheb. Ut cuan queꞌxyi̱b saꞌ li neba̱l re li rochocheb. Ut queꞌxyi̱b ajcuiꞌ saꞌ li neba̱l re lix templo li Dios. Ut queꞌxyi̱b ajcuiꞌ saꞌ li neba̱l li cuan cuiꞌ li oqueba̱l bar nequeꞌnumeꞌ cuiꞌ li nequeꞌbelan haꞌ ut queꞌxyi̱b ajcuiꞌ cuan cuiꞌ li oqueba̱l Efraín xcꞌabaꞌ.

¹⁷ Chixjunileb li queꞌsukꞌi cuiꞌchic Jerusalén queꞌxyi̱b lix cocꞌ muheba̱leb ut aran queꞌcuan chi saꞌ nak yo̱queb chi ninkꞌei̱c. Chalen saꞌ eb li cutan nak quicuan laj Josué li ralal laj Nun, ma̱ jun sut queꞌxba̱nu chi joꞌcan. Ut cꞌajoꞌ nak queꞌsahoꞌ saꞌ xchꞌo̱leb laj Israel.

¹⁸ Laj Esdras rajlal cutan quiril xsaꞌ li hu li tzꞌi̱banbil cuiꞌ li chakꞌrab li quiqꞌueheꞌ reheb xban li Dios. Saꞌ li xbe̱n cutan quixtiquib rilbal xsaꞌ li hu chiruheb li tenamit toj quirakeꞌ li ninkꞌe. Ut saꞌ lix cuakxak li cutan queꞌxchꞌutub ribeb re xlokꞌoninquil li Ka̱cuaꞌ joꞌ cꞌaynakeb xba̱nunquil.