Nehemías 6 - Li Santil hu

Queꞌxyoꞌob a̱tin chirix laj Nehemías re xjitbal

¹ Nak queꞌrabi laj Sanbalat, laj Tobías ut laj Gesem laj árabe, ut eb lix comon li xicꞌ nequeꞌiloc ke nak la̱in xinyi̱b li tzꞌac li sutsu cuiꞌ li tenamit ut ma̱ bar chic teto re, ut usta toj ma̱jiꞌ ninqꞌue lix puertil li oqueba̱l saꞌ li cutan aꞌan,

² laj Sanbalat ut laj Gesem queꞌxtakla chak inbokbal ut queꞌxye cue: —Cha̱lkat re takachꞌutub kib saꞌ li cꞌaleba̱l Ono, chanqueb. Abanan eb aꞌan quineꞌxbok yal re teꞌxba̱nu ma̱usilal cue.

³ Joꞌcan nak la̱in quintaklaheb lin takl riqꞌuineb chixyebal reheb nak incꞌaꞌ ta̱ru̱k tinxic riqꞌuineb xban nak latzꞌ cuu xba̱nunquil jun nimla cꞌanjel. —Incꞌaꞌ naru nincanab xba̱nunquil li cꞌanjel yal re nak tinxic aran e̱riqꞌuin, chanquin reheb nak quintakla li resil.

⁴ Ca̱hib sut queꞌxtakla inbokbal, ut joꞌcan cuiꞌchic quebinsume cuiꞌ.

⁵ Saꞌ roꞌ sut laj Sanbalat quixtakla cuiꞌchic jun lix mo̱s cuiqꞌuin ut quixcꞌam jun li hu chi teto.

⁶ Joꞌcaꞌin naxye saꞌ li hu li quixtakla: —X-el resil saꞌ eb li tenamit nak la̱at ut eb la̱ cuech tenamitil yo̱quex chixcꞌu̱banquil chanru nak te̱risi e̱rib rubel xcuanquil li rey. Xban aꞌan nak yo̱quex chixyi̱banquil li tzꞌac li sutsu cuiꞌ le̱ tenamit. Ut xkabi ajcuiꞌ resil nak la̱at ta̱cuaj oc chokꞌ xreyeb. Ut laj Gesem xye nak ya̱l li cꞌaꞌru yo̱queb xyebal.

⁷ Ut x-el ajcuiꞌ resil nak ac xaxakabeb li profeta re teꞌxye resil Jerusalén nak la̱at chic tat-oc chokꞌ rey aran Judá. Ut chixjunil aꞌan naru nacuulac resil riqꞌuin li rey Artajerjes. Joꞌcan nak yo̱quin chixyebal a̱cue nak tatcha̱lk cuiqꞌuin re nak takacꞌu̱b ru cꞌaꞌru takaba̱nu, chan cue.

⁸ Ut la̱in quintakla cuiꞌchic xyebal re chi joꞌcaꞌin: —Chixjunil li cꞌaꞌru yo̱cat chixyebal, aꞌan moco ya̱l ta. Yal la̱at nacatcꞌoxlan re chixjunil aꞌan, chanquin re.

⁹ Chixjunil li cꞌaꞌru xeꞌxba̱nu ke, aꞌan yal re kaseꞌbesinquil. Eb aꞌan xeꞌxcꞌoxla nak ta̱chꞌina̱nk kachꞌo̱l ut takacanab xba̱nunquil li cꞌanjel ut incꞌaꞌ takachoy xyi̱banquil li tzꞌac. Joꞌcan nak quintijoc ut quinye: —At kaDios, chaqꞌue taxak xcacuilal kachꞌo̱l re takachoy li cꞌanjel.—

¹⁰ Ut chirix aꞌan co̱in saꞌ li rochoch laj Semaías li ralal laj Delaía. Laj Delaía, aꞌan ralal laj Mehetabel. Laj Semaías aꞌan tzꞌaptzꞌo saꞌ li rochoch. Aꞌan quixye cue: —Anakcuan chiru li kꞌojyi̱n aꞌin teꞌcha̱lk cha̱camsinquil. Takachꞌutub kib saꞌ lix templo li Dios. Ocako aran ut takatzꞌap kib toj chi saꞌ, chan.

¹¹ Ut la̱in quinchakꞌoc ut quinye re: —Junak cui̱nk joꞌ la̱in, ¿ma naru ta biꞌ ta̱xucuak chiruheb aꞌan? ¿Ma tinxic ta biꞌ saꞌ li templo chixmukbal cuib yal re xcolbal rix lin yuꞌam? La̱in incꞌaꞌ tin-oc saꞌ li templo chixmukbal cuib, chanquin re.

¹² La̱in quinqꞌue retal nak ma̱cuaꞌ li Dios li quitaklan re chixyebal li cꞌaꞌru quixye cue. Quixye cue chi joꞌcan xban nak laj Sanbalat ut laj Tobías queꞌxtumina ru chixyebal chi joꞌcan.

¹³ Queꞌxtumina ru aꞌan yal re tineꞌxseꞌbesi ut re nak tinma̱cobk. Ut riqꞌuin aꞌan ta̱e̱lk resil nak incꞌaꞌ us yo̱quin ut incꞌaꞌ chic tineꞌxqꞌue saꞌ ruheb li tenamit.

¹⁴ —At inDios, chaqꞌue taxak retal li raylal li yo̱queb chixba̱nunquil cue laj Sanbalat ut laj Tobías. Ut misach taxak saꞌ a̱chꞌo̱l li quixba̱nu lix Noadías li profeta ixk rochbeneb li jun chꞌol chic profetas li queꞌajoc xqꞌuebal inxiu.—

Queꞌxchoy xyi̱banquil li tzꞌac li sutsu cuiꞌ li tenamit Jerusalén

¹⁵ Kachoy xyi̱banquil li tzꞌac li sutsu cuiꞌ li tenamit saꞌ li o̱b xcaꞌcꞌa̱l xbe li po Elul. Cablaju roxcꞌa̱l cutan quiya̱loꞌ cuiꞌ.

¹⁶ Queꞌrabi nak ac xya̱loꞌ li cꞌanjel. Chixjunileb li xicꞌ nequeꞌiloc ke queꞌxucuac, joꞌqueb ajcuiꞌ li tenamit li cuanqueb chi nachꞌ kiqꞌuin. Xuta̱nal queꞌel xban nak queꞌxqꞌue retal nak li Ka̱cuaꞌ, aꞌan li quitenkꞌan ke chixyi̱banquil li tzꞌac.

¹⁷ Saꞌ eb li cutan aꞌan nak yo̱co chixyi̱banquil li tzꞌac, cuanqueb li nequeꞌtaklan saꞌ xbe̱neb laj Judá queꞌtzꞌi̱bac riqꞌuin laj Tobías. Joꞌcan nak laj Tobías naxtakla cuiꞌchic lix hu aran Judá.

¹⁸ Nabaleb li cuanqueb aran Judá queꞌoquen chirix laj Tobías xban nak laj Tobías aꞌan lix hiꞌ laj Secanías li ralal laj Ara ut xban ajcuiꞌ nak laj Johanán quixcꞌam chokꞌ rixakil lix rabin laj Mesulam, li ralal laj Berequías.

¹⁹ Ut chicuu nequeꞌxye nak laj Tobías, aꞌan kꞌaxal us naxba̱nu. Ut li cꞌaꞌru ninye, nequeꞌxye cuiꞌchic re laj Tobías. Ut riqꞌuin li cꞌaꞌru nayeheꞌ re, laj Tobías naxtakla cuiꞌchic nabal li hu cuiqꞌuin re inseꞌbesinquil.