Nehemías 5 - Li Santil hu

Laj Nehemías quixkꞌuseb li biom re nak incꞌaꞌ teꞌxrahobtesiheb li nebaꞌ

¹ Saꞌ eb li cutan aꞌan eb li cui̱nk joꞌqueb ajcuiꞌ li ixk queꞌoc chixcuechꞌbal rixeb li rech tenamitil.

² Cuan queꞌyehoc re: —La̱o nabalo ut nabaleb ajcuiꞌ li kalal kacꞌajol ut tzaca̱nc teꞌraj. Tento takasicꞌ bar takatau katrigo re tocuaꞌak ut incꞌaꞌ toca̱mk.—

³ Ut cuan ajcuiꞌ queꞌyehoc re: —Xban li cueꞌej xkaqꞌue chi prenda li kachꞌochꞌ joꞌ ajcuiꞌ li kacui̱mk ut li kochoch re ta̱ru̱k takalokꞌ katrigo re tocuaꞌak.—

⁴ Ut cuan cuiꞌchic queꞌyehoc re: —La̱o xkapatzꞌ katumin chi toꞌ re ta̱ru̱k takatoj li tento xtojbal re li rey. Ut xkaqꞌue li kachꞌochꞌ chi prenda joꞌ ajcuiꞌ li kacui̱mk, chanqueb.

⁵ —La̱o kacomon kib riqꞌuineb li biom. Ut li kalal kacꞌajol juntakꞌe̱teb ajcuiꞌ riqꞌuineb li ralal xcꞌajol eb aꞌan. Moco jalaneb ta chic aꞌan chiku la̱o. Abanan la̱o tento nak takacꞌayiheb li kalal kacꞌajol chokꞌ xmo̱seb aꞌan. Cuanqueb karabin ac xkacꞌayiheb chokꞌ xmo̱seb aꞌan ut incꞌaꞌ chic naru nakisiheb riqꞌuineb xban nak ma̱cꞌaꞌ chic cuan ke. Li kachꞌochꞌ ut li kacui̱mk jalan chic aj e, chanqueb.

⁶ Ut la̱in, cꞌajoꞌ nak quichal injoskꞌil nak quicuabi li cꞌaꞌru queꞌxye.

⁷ Quincꞌoxla chi us cꞌaꞌru tinba̱nu. Ut quinkꞌuseb li biomeb ut li nequeꞌtaklan saꞌ xbe̱neb li tenamit ut quinye reheb: —¿Ma us nak nequepatzꞌ ral li tumin li nequetoꞌoni reheb le̱ rech tenamitil?— Ut quinye ajcuiꞌ reheb nak teꞌxchꞌutub ribeb re nak takacꞌu̱b ru cꞌaꞌru takaba̱nu.

⁸ Ut quinye reheb: —Xkisiheb rubel xcuanquil li jalan tenamit li kech tenamitil. Xkaba̱nu li joꞌ qꞌuial coru xba̱nunquil. Ut la̱ex chic yo̱quex chi rahobtesi̱nc reheb li kech tenamitil. Ut anakcuan, ¿ma toj takisiheb cuiꞌchic rubel e̱cuanquil la̱ex? chanquin reheb. Ut ma̱ jun reheb quichakꞌoc xban nak incꞌaꞌ chic queꞌxtau cꞌaꞌru queꞌxye.

⁹ Ut quinye ajcuiꞌ reheb: —Li cꞌaꞌru yo̱quex chixba̱nunquil, aꞌan incꞌaꞌ us. La̱ex incꞌaꞌ nequexucua ru li Dios. Yo̱quex ban chixba̱nunquil joꞌ nequeꞌxba̱nu li jalan tenamit li xicꞌ nequeꞌiloc ke, re nak incꞌaꞌ texrahobtesi̱k xban eb aꞌan.

¹⁰ La̱in ut eb li cuechꞌalal joꞌqueb ajcuiꞌ li nequeꞌcꞌanjelac chicuu yo̱co ajcuiꞌ chixqꞌuebaleb xtrigo ut xtumineb chi toꞌ. Abanan nintzꞌa̱ma che̱ru nak incꞌaꞌ chic takapatzꞌ reheb lix cꞌaseb.

¹¹ Ut nintzꞌa̱ma ajcuiꞌ che̱ru nak anakcuan ajcuiꞌ te̱kꞌaxtesi cuiꞌchic reheb lix chꞌochꞌeb, li racui̱mkeb uvas ut olivos, joꞌ ajcuiꞌ li rochocheb. Ut te̱kꞌaxtesi ajcuiꞌ reheb li ral li tumin li ac xecꞌul joꞌ ajcuiꞌ li trigo, li aceite ut li uvas li ac xecꞌul.—

¹² Ut eb aꞌan queꞌchakꞌoc ut queꞌxye: —Takakꞌaxtesi reheb chixjunil li ac xkacꞌul ut incꞌaꞌ chic takapatzꞌ reheb. Takaba̱nu joꞌ xaye ke, chanqueb. Joꞌcan nak quinbokeb laj tij re nak chiruheb aꞌan teꞌxye riqꞌuin juramento nak teꞌxba̱nu li cꞌaꞌru ac xeꞌxye.

¹³ Ut quinchikꞌ ru li cuakꞌ chiruheb ut quinye reheb: —Joꞌcaꞌin taxak tixba̱nu li Ka̱cuaꞌ Dios nak ta̱risi saꞌ rochoch ut saꞌ lix cꞌanjel li ani incꞌaꞌ ta̱ba̱nu̱nk re li cꞌaꞌru xye. Chi-isi̱k ta chi ma̱cꞌaꞌ chic cuan re, chanquin reheb. Ut chixjunileb li tenamit queꞌxye: —Joꞌcan taxak ta̱uxma̱nk, chanqueb. Ut chixjunileb li tenamit queꞌxba̱nu joꞌ queꞌxye ut queꞌxlokꞌoni li Ka̱cuaꞌ.

¹⁴ Ac yo̱ chic junmay chihab roquic laj Artajerjes chokꞌ rey nak quinixxakab chi takla̱nc saꞌ xbe̱neb laj Judá. Chalen saꞌ li cutan aꞌan toj quicuulac li cablaju xcaꞌcꞌa̱l (32) chihab roquic chokꞌ rey, chi moco la̱in, chi moco li cuechꞌalal kacꞌul li tzacae̱mk li kacꞌulub raj xtzacanquil joꞌ queꞌxtzaca li nequeꞌtaklan. Chiru li cablaju chihab nak cuanquin chi takla̱nc incꞌaꞌ quinpuersi li tzacae̱mk incꞌulub raj xcꞌulbal.

¹⁵ Eb li queꞌcuan chi takla̱nc saꞌ xbe̱neb li tenamit nak toj ma̱jiꞌ nin-oc la̱in, kꞌaxal cuiꞌchic nabal li tumin queꞌxpatzꞌ reheb li tenamit. Rajlal cutan numenak caꞌcꞌa̱l chi tumin plata queꞌxpatzꞌ re xcuaheb ut xvino. Ut eb li nequeꞌcꞌanjelac chiruheb queꞌxrahobtesi li tenamit. Abanan la̱in incꞌaꞌ quinba̱nu chi joꞌcan xban nak ninxucua ru li Dios.

¹⁶ Ut la̱in quinqꞌue inchꞌo̱l chi cꞌanjelac riqꞌuin xyi̱banquil li tzꞌac li sutsu cuiꞌ li tenamit. Ut eb li nequeꞌtrabajic chicuu queꞌxqꞌue ajcuiꞌ xchꞌo̱leb chi oque̱nc saꞌ li cꞌanjel. Ut incꞌaꞌ kacꞌoxla xlokꞌbal kachꞌochꞌ.

¹⁷ Jun ciento riqꞌuin mero ciento laj judío li nequeꞌcuaꞌac saꞌ li cuochoch. Saꞌ xya̱nkeb aꞌan cuanqueb li nequeꞌcꞌamoc be saꞌ li tenamit. Ut ma̱cꞌaꞌeb saꞌ ajl li nequeꞌchal chak saꞌ eb li tenamit li cuanqueb chi nachꞌ kiqꞌuin.

¹⁸ Chixjunil li nasachman rajlal cutan re li katzacae̱mk, aꞌan aꞌin xqꞌuial: jun cuacax, cuakib cha̱bil carner xcomoneb li sicꞌbil ruheb, ut queꞌxyi̱b ajcuiꞌ caxlan. Rajlal laje̱b cutan nequeꞌxcꞌam chak chi nabal li vino. Usta nabal li nasachman, abanan ma̱ jun sut xinpatzꞌ reheb li tenamit li cꞌaꞌru tento raj xincꞌul la̱in, joꞌ li queꞌxcꞌul li queꞌcuan chi takla̱nc saꞌ li tenamit nak kꞌaxal nabal li i̱k cuan saꞌ xbe̱neb li tenamit.

¹⁹ Chinjulticokꞌ taxak a̱cue, at inDios, riqꞌuin li joꞌ qꞌuial li us li xinba̱nu reheb li tenamit aꞌin.