Nehemías 4 - Li Santil hu

Eb laj Israel incꞌaꞌ quichꞌinan xchꞌo̱leb xbaneb li xicꞌ nequeꞌiloc reheb

¹ Cꞌajoꞌ nak quichal xjoskꞌil laj Sanbalat nak quirabi nak yo̱co cuiꞌchic chixyi̱banquil li tzꞌac ut xban xjoskꞌil qui-oc chikahobbal la̱o aj judío.

² Ut quixye reheb li rochben ut reheb li soldado aj Samaria: —¿Cꞌaꞌru yo̱queb chixba̱nunquil eb laj judío? ¿Ma cuan ta biꞌ xmetzꞌe̱u eb aꞌan? ¿Cꞌaꞌru yo̱queb chixcꞌoxlanquil? ¿Ma nequeꞌxcꞌoxla ta biꞌ nak ta̱ru̱k teꞌxqꞌue cuiꞌchic lix mayejeb? ¿Ma teꞌxchoy ta biꞌ xyi̱banquil li tzꞌac chiru jun cutan? ¿Ma ta̱ru̱k ta biꞌ teꞌrisi saꞌ li poks li pec ut teꞌxyi̱b cuiꞌchic li tzꞌac riqꞌuin li pec li ac xcꞌat? chan.

³ Ut laj Tobías, Amón xtenamit, cuan rochben laj Sanbalat. Quixye re: —Ilomak li tzꞌac li yo̱queb chixyi̱banquil riqꞌuin li pec. Cui ta̱takekꞌ raj junak yac saꞌ xbe̱n, yal aꞌan raj ta̱tꞌanok re, chan.

⁴ La̱in quintijoc ut quinye re li Dios: —At Ka̱cuaꞌ at inDios chacuabi taxak chanru nak yo̱queb chikahobbal ut yo̱queb chikatzꞌekta̱nanquil. Li tzꞌekta̱na̱nc li yo̱queb chixba̱nunquil ke chisukꞌi̱k taxak saꞌ xbe̱neb. Cheꞌchapekꞌ ta xbaneb li xicꞌ nequeꞌiloc reheb ut cheꞌcꞌamekꞌ ta saꞌ jalan tenamit.

⁵ Incꞌaꞌ taxak ta̱cuy xma̱queb ut incꞌaꞌ taxak ta̱sachk saꞌ a̱chꞌo̱l li ma̱usilal li yo̱queb chixba̱nunquil ke xban nak yo̱queb xjoskꞌil saꞌ kabe̱n nak yo̱co chixyi̱banquil li tzꞌac, chanquin.

⁶ Quicuulac yitok xteram li tzꞌac kayi̱b xban nak li tenamit queꞌxqꞌue xchꞌo̱l chi cꞌanjelac.

⁷ Cꞌajoꞌ nak queꞌjoskꞌoꞌ laj Sanbalat ut laj Tobías nak queꞌrabi nak ma̱ bar chic teto re li tzꞌac li sutsu cuiꞌ li tenamit Jerusalén. Ut queꞌjoskꞌoꞌ ajcuiꞌ eb laj árabes, eb laj amonita ut eb laj Asdod.

⁸ Chixjunileb queꞌxjunaji ribeb chixcꞌu̱banquil chanru nak ta̱ru̱k teꞌcha̱lk chi pletic kiqꞌuin re kaqꞌuebal saꞌ chꞌaꞌajquilal.

⁹ Joꞌcan nak cotijoc chiru li kaDios ut kaxakabeb laj cꞌacꞌalenel chi kꞌek ut chi cutan re rilbaleb nak teꞌcha̱lk.

¹⁰ Eb laj Judá queꞌxye: —Ma̱cꞌaꞌeb chic xmetzꞌe̱u laj i̱kanel. Incꞌaꞌ chic nequeꞌxcuy ut toj cuan li tzꞌac li puqꞌuinbil isi̱c ta̱raj. Incꞌaꞌ chic ta̱ru̱k takayi̱b li tzꞌac, chanqueb.

¹¹ Li xicꞌ nequeꞌiloc ke queꞌxcꞌoxla nak la̱o incꞌaꞌ takaqꞌue retal li cꞌaꞌru yo̱queb chixcꞌoxlanquil saꞌ kabe̱n. Saꞌ xchꞌo̱leb aꞌan nak incꞌaꞌ takil nak teꞌoc saꞌ li katenamit chikacamsinquil re nak takacanab xba̱nunquil li cꞌanjel aꞌin.

¹² Abanan eb laj judío li cuanqueb nachꞌ riqꞌuineb li xicꞌ nequeꞌiloc ke queꞌrabi cꞌaꞌru yo̱queb chixcꞌu̱banquil saꞌ kabe̱n ut coleꞌxye ke nabal sut bar teꞌoc chak nak teꞌcha̱lk chi pletic kiqꞌuin.

¹³ La̱in quebintakla li junju̱nk cabal re nak teꞌxakli̱k chirix li tzꞌac bar cubenak cuiꞌ xteram joꞌ ajcuiꞌ saꞌ xya̱nk li tzꞌac li toj ma̱jiꞌ naxcꞌul rib. Cua̱nkeb xchꞌi̱chꞌ re camsi̱nc, cua̱nkeb xla̱ns ut cua̱nkeb ajcuiꞌ xtzimaj saꞌ rukꞌeb.

¹⁴ Ut nak queꞌcuil nak cuanqueb saꞌ xnaꞌajeb, quinxakli chiruheb ut quina̱tinac riqꞌuineb li queꞌtaklan ut eb li queꞌcꞌamoc be joꞌqueb ajcuiꞌ chixjunileb li tenamit. Quinye reheb: —Mexxucuac chiruheb. Julticak e̱re nak li Ka̱cuaꞌ li nakaxucua ru, aꞌan kꞌaxal nim xcuanquil. Pletinkex re xcolbaleb le̱ rech tenamitil, ut le̱ ralal e̱cꞌajol ut re ajcuiꞌ xcolbal rix le̱ rixakil joꞌ ajcuiꞌ le̱ jun cablal, chanquin reheb.

¹⁵ Ut eb li xicꞌ nequeꞌiloc ke queꞌrabi resil nak la̱o kaqꞌue retal li cꞌaꞌru queꞌxcꞌu̱b ru saꞌ kabe̱n. Ut queꞌxqꞌue ajcuiꞌ retal nak li Dios quixpoꞌ ru li cꞌaꞌru queꞌxcꞌoxla xba̱nunquil ke. Ut nak ac xcꞌulman aꞌan co-oc cuiꞌchic chikajunilo chixyi̱banquil li tzꞌac.

¹⁶ Chalen saꞌ li cutan aꞌan yijach li nequeꞌcꞌanjelac chicuu yo̱queb chixyi̱banquil li tzꞌac ut li yijach chic cuanqueb xchꞌi̱chꞌeb re camsi̱nc, cuanqueb xla̱ns, ut cuanqueb ajcuiꞌ lix tzimaj saꞌ rukꞌeb. Ut cuanqueb ajcuiꞌ xchꞌi̱chꞌ re xcolbal ribeb. Ut eb li nequeꞌtaklan saꞌ li tenamit Judá cuanqueb aran ut yo̱queb chi oque̱nc.

¹⁷ Ut eb li yo̱queb chi yi̱ba̱nc re li tzꞌac joꞌ ajcuiꞌ li yo̱queb chi i̱ka̱nc riqꞌuin jun li rukꞌ yo̱queb chi cꞌanjelac ut riqꞌuin li rukꞌ jun chic chapcho lix chꞌi̱chꞌeb re pletic.

¹⁸ Ut eb li yo̱queb chi yi̱ba̱nc re li tzꞌac bacꞌbo lix chꞌi̱chꞌeb re pletic saꞌ xcꞌa̱mal xsaꞌeb nak yo̱queb chi cꞌanjelac. Ut li naya̱basin re li trompeta, aꞌan cuan chincꞌatk.

¹⁹ Ut quinye reheb li queꞌtaklan ut eb li queꞌcꞌamoc be joꞌqueb ajcuiꞌ chixjunileb li tenamit: —Li cꞌanjel aꞌin kꞌaxal nim ut kꞌaxal nabal. Ut la̱o nak yo̱co chixyi̱banquil li tzꞌac najt kaya̱nk chikajunju̱nkal.

²⁰ Li bar te̱rabi cuiꞌ chi ecꞌa̱nc li trompeta, aran texxic chixchꞌutubanquil e̱rib kiqꞌuin. Ut li Ka̱cuaꞌ li kaDios, aꞌan ta̱tenkꞌa̱nk ke chi pletic, chanquin reheb.

²¹ Joꞌcaꞌin nak quiru kaba̱nu li cꞌanjel aꞌin. Yijach laj cꞌanjel cuanqueb xchꞌi̱chꞌeb re pletic saꞌ rukꞌeb chalen ekꞌela toj nocox-ecuu̱k.

²² Ut quinye ajcuiꞌ reheb li tenamit nak chixjunileb teꞌcana̱k saꞌ li tenamit Jerusalén, joꞌ li nequeꞌtaklan, joꞌqueb ajcuiꞌ li nequeꞌtenkꞌan reheb. Chi kꞌek teꞌxcꞌacꞌale li tenamit ut chi cutan teꞌxyi̱b li tzꞌac.

²³ La̱in incꞌaꞌ quicuisi li cuakꞌ chicuix nak oc cue chi cua̱rc. Chi moco eb li cuechꞌalal, chi moco li queꞌtenkꞌan cue, chi moco li soldado li queꞌchal chicuix queꞌrisi li rakꞌeb. Caꞌaj cuiꞌ nak noco-atin nakisi li kakꞌ chikix.