Nehemías 3 - Li Santil hu

Queꞌxtiquib xyi̱banquil li tzꞌac li sutsu cuiꞌ li tenamit Jerusalén

¹ Laj Eliasib li xyucuaꞌil aj tij rochbeneb li jun chꞌol chic laj tij queꞌoc chi cꞌanjelac. Queꞌxyi̱b cuiꞌchic li oqueba̱l bar queꞌnumeꞌ cuiꞌ li carner. Queꞌxqꞌue li puerta ut queꞌxyi̱b li tzꞌac toj cuan cuiꞌ li torre Hamea xcꞌabaꞌ ut toj cuan cuiꞌ li torre Hananeel xcꞌabaꞌ.

² Ut li tzꞌac cuan chixcꞌatk li queꞌxyi̱b laj tij, aꞌan queꞌxyi̱b eb li cui̱nk aj Jericó. Ut laj Zacur ralal laj Imri quixyi̱b li tzꞌac li cuan chixcꞌatk aꞌan.

³ Eb li ralal xcꞌajol laj Senaa queꞌxyi̱b li oqueba̱l bar nequeꞌxcꞌayi cuiꞌ li car. Queꞌxqꞌue li cheꞌ saꞌ li tzꞌac queꞌxyi̱b cuiꞌ li puerta. Queꞌxqꞌue li puerta ut queꞌxqꞌue ajcuiꞌ li chꞌi̱chꞌ re nak ta̱tzꞌapo̱nk chi us.

⁴ Ut li tzꞌac cuan chixcꞌatk, aꞌan quixyi̱b laj Meremot li ralal laj Urías. Laj Urías, aꞌan ralal laj Cos. Ut li tzꞌac li cuan chixcꞌatk li quixyi̱b laj Meremot, aꞌan quixyi̱b laj Mesulam, li ralal laj Berequías. Laj Berequías, aꞌan li ralal laj Mesezabeel. Ut li tzꞌac li cuan chixcꞌatk li quixyi̱b laj Mesulam, aꞌan quixyi̱b laj Sadoc, li ralal laj Baana.

⁵ Ut li tzꞌac li cuan chixcꞌatk li quixyi̱b laj Sadoc, aꞌan queꞌxyi̱b eb li cuanqueb Tecoa. Abanan eb li cuanqueb xcuanquil saꞌ li naꞌajej aꞌan incꞌaꞌ queꞌraj oque̱nc saꞌ lix cꞌanjel li Ka̱cuaꞌ.

⁶ Laj Joiada ralal laj Paseah rochben laj Mesulam ralal laj Besodías queꞌxyi̱b li najter oqueba̱l. Queꞌxqꞌue li cheꞌ saꞌ li tzꞌac queꞌxyi̱b cuiꞌ li puerta. Queꞌxqꞌue li puerta ut queꞌxqꞌue ajcuiꞌ li chꞌi̱chꞌ re nak ta̱tzꞌapo̱nk chi us.

⁷ Li tzꞌac li cuan chixcꞌatk li queꞌxyi̱b laj Joiada ut laj Mesulam, aꞌan queꞌxyi̱b laj Melatías rochbeneb li cui̱nk aj Gabaón ut laj Jadón aj Meronot rochbeneb laj Mizpa. Lix tenamiteb aꞌan cuanqueb rubel xcuanquil li nataklan jun pacꞌal li nimaꞌ Éufrates.

⁸ Li tzꞌac li cuan chixcꞌatk li queꞌxyi̱b laj Joiada ut laj Mesulam, aꞌan quixyi̱b laj Uziel ralal laj Harhaía xcomoneb laj tenol plata. Ut li tzꞌac li cuan chixcꞌatk aꞌan, quixyi̱b laj Hananías ralal li cui̱nk li nayi̱ban sununquil ban. Joꞌcaꞌin nak queꞌxyi̱b li tzꞌac li sutsu cuiꞌ li tenamit Jerusalén. Quicuulac toj cuan cuiꞌ li tzꞌac nim ru.

⁹ Ut li tzꞌac li cuan chixcꞌatk li quixyi̱b laj Hananías, aꞌan quixyi̱b laj Refaías li ralal laj Hur li quicuan chi takla̱nc saꞌ xbe̱neb yijach li tenamit Jerusalén.

¹⁰ Ut li tzꞌac li cuan chixcꞌatk li quixyi̱b laj Refaías li cuan saꞌ xcaꞌyaba̱l li rochoch laj Jedaías li ralal laj Harumaf, aꞌan quixyi̱b laj Jedaías. Ut li cuan chixcꞌatk aꞌan, quixyi̱b laj Hatús li ralal laj Hasabnías.

¹¹ Ut li tzꞌac li cuan chixcꞌatk li quixyi̱b laj Hatús, aꞌan queꞌxyi̱b laj Malquías li ralal laj Harim ut laj Hasub li ralal laj Pahat-moab. Ut queꞌxyi̱b ajcuiꞌ li torre li cuan cuanqueb cuiꞌ li horno.

¹² Ut li tzꞌac li cuan chixcꞌatk li queꞌxyi̱b laj Malquías ut laj Hasub, aꞌan quixyi̱b laj Salum li ralal laj Halohes li nataklan saꞌ xbe̱neb li yijach chic li tenamit li cuanqueb Jerusalén. Ut queꞌtenkꞌan ajcuiꞌ lix rabin.

¹³ Li puerta li na-iloc saꞌ li ru takꞌa, aꞌan queꞌxyi̱b laj Hanún rochbeneb li cuanqueb saꞌ li naꞌajej Zanoa. Queꞌxqꞌue li puerta ut queꞌxqꞌue ajcuiꞌ li chꞌi̱chꞌ re ta̱tzꞌapo̱nk chi us. Cuib ciento riqꞌuin mero ciento metro li tzꞌac li queꞌxyi̱b. Quicuulac toj saꞌ li oqueba̱l bar nequeꞌrisi cuiꞌ li mul.

¹⁴ Li oqueba̱l li nequeꞌrisi cuiꞌ li mul, aꞌan quixyi̱b laj Malquías li ralal laj Recab li nataklan saꞌ li naꞌajej Bet-haquerem. Ut quixqꞌue li puerta ut quixqꞌue ajcuiꞌ li chꞌi̱chꞌ re ta̱tzꞌapo̱nk chi us.

¹⁵ Li oqueba̱l li cuan cuiꞌ li yuꞌam haꞌ, aꞌan quixyi̱b laj Salum li ralal laj Colhoze li nataklan saꞌ li naꞌajej Mizpa. Quixqꞌue li cheꞌ saꞌ li tzꞌac quixyi̱b cuiꞌ li puerta. Quixqꞌue li puerta ut quixqꞌue ajcuiꞌ li chꞌi̱chꞌ re ta̱tzꞌapo̱nk chi us. Ut quixyi̱b ajcuiꞌ li tzꞌac li cuan cuiꞌ li pila Siloé li cuan nachꞌ riqꞌuin li naꞌajej li nequeꞌrau cuiꞌ li rutzꞌuꞌuj li rey nak quicuan. Li tzꞌac li quixyi̱b quicuulac toj cuan cuiꞌ li gradas re lix tenamit laj David nak quicuan.

¹⁶ Li tzꞌac li cuan chixcꞌatk li quixyi̱b laj Salum, aꞌan quixyi̱b laj Nehemías, li ralal laj Azbuc li nataklan saꞌ xbe̱neb yijach li tenamit li cuanqueb Bet-sur. Li tzꞌac li quixyi̱b quicuulac toj saꞌ xcaꞌyaba̱l li bar quimukeꞌ cuiꞌ laj David ut quicuulac cuan cuiꞌ li pila li yi̱banbil, ut toj cuan cuiꞌ li xnaꞌajeb li soldado nak quicuan.

¹⁷ Li tzꞌac li cuan chixcꞌatk li quixyi̱b laj Nehemías, aꞌan queꞌxyi̱b eb laj levita. Laj Rehum li ralal laj Bani, aꞌan li quicꞌamoc be chiruheb. Li tzꞌac li cuan chixcꞌatk aꞌan quixyi̱b laj Hasabías li nataklan saꞌ xbe̱neb yijach li tenamit li cuanqueb saꞌ li naꞌajej Keila. Li cꞌanjel aꞌan quixba̱nu saꞌ xcꞌabaꞌ lix tenamit.

¹⁸ Li tzꞌac li cuan chixcꞌatk li quixyi̱b laj Hasabías, aꞌan quixyi̱b laj Bavai rochbeneb li rech tenamitil. Laj Bavai, aꞌan li ralal laj Henadad li nataklan saꞌ xbe̱neb li yijach chic li tenamit Keila.

¹⁹ Li tzꞌac li cuan chixcꞌatk li quixyi̱b laj Bavai, aꞌan quixyi̱b laj Ezer li ralal laj Jesúa li nataklan saꞌ xbe̱neb li cuanqueb saꞌ li tenamit Mizpa. Li tzꞌac li queꞌxyi̱b cuan saꞌ xcaꞌyaba̱l li naꞌajej li nequeꞌxxoc cuiꞌ chixjunil li chꞌi̱chꞌ li nacꞌanjelac re pletic. Li tzꞌac li queꞌxyi̱b quicuulac toj saꞌ xuc.

²⁰ Li tzꞌac li cuan chixcꞌatk li quixyi̱b laj Ezer, aꞌan quixyi̱b laj Baruc li ralal laj Zabai. Laj Baruc cau quicꞌanjelac. Li tzꞌac li quixyi̱b quiticla saꞌ xuc ut quicuulac toj saꞌ li oqueba̱l re li rochoch laj Eliasib li xyucuaꞌil aj tij.

²¹ Li tzꞌac li cuan chixcꞌatk li quixyi̱b laj Baruc, aꞌan quixyi̱b laj Meremot li ralal laj Urías. Laj Urías, aꞌan li ralal laj Cos. Li tzꞌac li quixyi̱b laj Meremot quiticla saꞌ li oqueba̱l re li rochoch laj Eliasib ut quicuulac toj bar coxrakeꞌ cuiꞌ li rochoch.

²² Li tzꞌac li cuan chixcꞌatk li quixyi̱b laj Baruc, aꞌan queꞌxyi̱b eb laj tij li cuanqueb saꞌ li ru takꞌa.

²³ Li tzꞌac li cuan chixcꞌatk li queꞌxyi̱b eb laj tij, aꞌan queꞌxyi̱b laj Benjamín rochben laj Hasub. Li tzꞌac li queꞌxyi̱b cuan saꞌ xcaꞌyaba̱l li rochocheb. Ut li cuan chixcꞌatk, aꞌan quixyi̱b laj Azarías li ralal laj Maasías. Laj Maasías, aꞌan li ralal laj Ananías. Li tzꞌac li quixyi̱b laj Azarías, aꞌan nachꞌ cuan riqꞌuin li rochoch.

²⁴ Li tzꞌac li cuan chixcꞌatk li quixyi̱b laj Azarías, aꞌan quixyi̱b laj Binúi li ralal laj Henadad. Li tzꞌac li quixyi̱b laj Binúi quiticla cuan cuiꞌ li rochoch laj Azarías ut quicuulac toj saꞌ xuc.

²⁵ Li tzꞌac li cuan chixcꞌatk li quixyi̱b laj Binúi, aꞌan quixyi̱b laj Palal li ralal laj Uzai. Li tzꞌac li quixyi̱b quiticla saꞌ xuc bar cuan cuiꞌ li torre li cuan saꞌ xbe̱n li rochoch li rey nak quicuan. Aꞌan nachꞌ cuan riqꞌuin li neba̱l re li tzꞌalam. Li tzꞌac li cuan chixcꞌatk li quixyi̱b laj Palal, aꞌan quixyi̱b laj Pedaías li ralal laj Faros.

²⁶ Li tzꞌac li cuan chixcꞌatk li quixyi̱b laj Faros, aꞌan queꞌxyi̱b li nequeꞌcꞌanjelac saꞌ li templo li cuanqueb saꞌ li tzu̱l Ofel xcꞌabaꞌ. Li tzꞌac li queꞌxyi̱b quicuulac toj saꞌ xcaꞌyaba̱l li oqueba̱l bar nequeꞌnumeꞌ cuiꞌ li nequeꞌbelan haꞌ. Nacana saꞌ li este li na-el cuiꞌ li sakꞌe. Nachꞌ cuan riqꞌuin li torre li quicuan saꞌ xbe̱n li rochoch li rey.

²⁷ Li tzꞌac li cuan chixcꞌatk li quixyi̱b laj Pedaías, aꞌan queꞌxyi̱b eb laj Tecoa. Li tzꞌac li queꞌxyi̱b quiticla saꞌ xcaꞌyaba̱l li nimla torre ut quicuulac toj cuan cuiꞌ li naꞌajej Ofel.

²⁸ Li tzꞌac li cuan chixcꞌatk li queꞌxyi̱b laj Tecoa, aꞌan queꞌxyi̱b eb laj tij. Li tzꞌac li queꞌxyi̱b quiticla saꞌ li oqueba̱l li cuan nachꞌ riqꞌuin lix naꞌajeb li cacua̱y. Chixju̱nkaleb laj tij queꞌxyi̱b li tzꞌac li cuan chiru li rochocheb.

²⁹ Li tzꞌac li cuan chixcꞌatk li queꞌxyi̱b laj tij, aꞌan quixyi̱b laj Sadoc, li ralal laj Imer. Li tzꞌac li quixyi̱b cuan saꞌ xcaꞌyaba̱l li rochoch. Li tzꞌac li cuan chixcꞌatk li quixyi̱b laj Sadoc, aꞌan quixyi̱b laj Semaías li ralal laj Secanías. Laj Semaías, aꞌan li quicꞌacꞌalen re li oqueba̱l li cuan saꞌ li este li na-el cuiꞌ li sakꞌe.

³⁰ Li tzꞌac li cuan chixcꞌatk li quixyi̱b laj Semaías, aꞌan quixyi̱b laj Hananías li ralal laj Selemías rochben laj Hanún li xcuak ralal laj Salaf. Li tzꞌac li cuan chixcꞌatk li queꞌxyi̱b laj Hananías ut laj Hanún, aꞌan quixyi̱b laj Mesulam li ralal laj Berequías. Li tzꞌac li quixyi̱b laj Mesulam aꞌan li cuan saꞌ xcaꞌyaba̱l li rochoch.

³¹ Li tzꞌac li cuan chixcꞌatk li quixyi̱b laj Mesulam, aꞌan quixyi̱b laj Malquías li ralal laj tenol plata. Li tzꞌac li quixyi̱b quicuulac toj cuanqueb cuiꞌ li rochocheb li nequeꞌcꞌanjelac saꞌ li templo ut quicuulac bar cuanqueb cuiꞌ li rochocheb laj cꞌay. Li tzꞌac aꞌan cuan saꞌ xcaꞌyaba̱l li oqueba̱l li nequeꞌrocsi cuiꞌ li xul li nequeꞌxmayeja. Li tzꞌac aꞌan nachꞌ cuan riqꞌuin li cab li cuan saꞌ xbe̱n li tzꞌac saꞌ xuc.

³² Ut li tzꞌac li queꞌxyi̱b laj tenol plata ut eb laj cꞌay, aꞌan naticla saꞌ xuc cuan cuiꞌ li cab li cuan saꞌ xbe̱n li tzꞌac ut quicuulac toj bar cuan cuiꞌ li oqueba̱l li nequeꞌnumeꞌ cuiꞌ li carner.