Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Nehemías 13 - Li Santil hu


Laj Nehemías quicꞌamoc be chiruheb laj Israel re nak teꞌcua̱nk saꞌ ti̱quilal

1 Saꞌ jun li cutan qui-ileꞌ chiruheb li tenamit li hu li quixtzꞌi̱ba laj Moisés. Ut saꞌ li hu aꞌan tzꞌi̱banbil retalil nak eb laj amonita ut eb laj moabitas incꞌaꞌ ta̱ru̱k teꞌcua̱nk saꞌ xya̱nkeb laj Israel, lix tenamit li Dios.

2 Incꞌaꞌ naru teꞌcua̱nk saꞌ xya̱nkeb xban nak junxil eb laj amonita ut eb aj moabitas incꞌaꞌ queꞌxcꞌul saꞌ usilal li kaxeꞌto̱nil yucuaꞌ nak queꞌnumeꞌ saꞌ lix tenamiteb ut incꞌaꞌ queꞌxqꞌue xcua rucꞌaheb. Queꞌxtumina ban ru laj Balaam re nak tixbok ma̱usilal saꞌ xbe̱neb. Abanan li Ka̱cuaꞌ Dios quixsukꞌisi li ma̱usilal chokꞌ usilal chokꞌ reheb.

3 Caꞌaj cuiꞌ queꞌrabi li cꞌaꞌru quixye saꞌ li chakꞌrab, queꞌoc risinquil saꞌ xya̱nkeb li jalaneb xtenamit.

4 Junxil nak ac cuan chokꞌ xyucuaꞌil aj tij laj Eliasib, li nataklan saꞌ xbe̱n li cab li naxocman cuiꞌ li cꞌaꞌak re ru re lix templo li Ka̱cuaꞌ, aꞌan qui-oc chokꞌ rechꞌalal laj Tobías li ma̱cuaꞌ aj Israel.

5 Ut laj Eliasib quixqꞌue ajcuiꞌ chokꞌ xnaꞌaj laj Tobías li nimla cuarto li cuan saꞌ li templo li nequeꞌxxoc cuiꞌ li mayej, li incienso, li secꞌ, li trigo li junju̱nk saꞌ xlaje̱tkil, joꞌ ajcuiꞌ li vino ut li aceite, li tento xqꞌuebal reheb laj levita, reheb laj bichanel, ut reheb li nequeꞌcꞌacꞌalen re li oqueba̱l. Ut nequeꞌxxoc ajcuiꞌ saꞌ li cuarto aꞌan li mayej li tento xqꞌuebal reheb laj tij.

6 Nak quicꞌulman chixjunil aꞌin, ac ma̱ anihin chic Jerusalén xban nak co̱in cuiꞌchic Persia riqꞌuin li rey Artajerjes nak ac yo̱ chic cablaju xcaꞌcꞌa̱l (32) chihab roquic chokꞌ rey. Abanan incꞌaꞌ ajcuiꞌ najt quincuan aran nak quixqꞌue cuiꞌchic inlese̱ns li rey re tinsukꞌi̱k Jerusalén.

7 Ut nak quincuulac Jerusalén, quinqꞌue retal nak incꞌaꞌ us li quixba̱nu laj Eliasib nak quixqꞌue li nimla cuarto li cuan saꞌ lix templo li Dios chokꞌ xnaꞌaj laj Tobías yal re xba̱nunquil usilal re.

8 Cꞌajoꞌ nak quirahoꞌ saꞌ inchꞌo̱l chirilbal li quixba̱nu laj Eliasib. Joꞌcan nak quinchap li cꞌaꞌru re laj Tobías ut quicuisi chirix cab.

9 Ut la̱in quintakla xsabesinquileb li cuartos li quicuan cuiꞌ laj Tobías. Ut quinye ajcuiꞌ reheb nak teꞌxqꞌue cuiꞌchic saꞌ xnaꞌaj li secꞌ re lix templo li Dios, joꞌ ajcuiꞌ li mayej ut li incienso.

10 Ut queꞌxye ajcuiꞌ cue nak eb laj levita incꞌaꞌ queꞌxcꞌul li cꞌaꞌru eb re li tento raj queꞌqꞌueheꞌ reheb re xnumsinquil li cutan junju̱nk. Joꞌcan nak eb laj levita ut eb laj bichanel li nequeꞌba̱nun re li cꞌanjel, queꞌel Jerusalén ut queꞌco̱eb chi xju̱nkaleb saꞌ lix cꞌaleba̱leb.

11 Ut la̱in quinjoskꞌoꞌ ut quinchꞌilaheb li nequeꞌtaklan saꞌ xbe̱neb li tenamit ut quinye reheb: —¿Cꞌaꞌut nak yo̱quex chixtzꞌekta̱nanquil lix templo li Dios? chanquin reheb. Ut quinchꞌutub ajcuiꞌ ruheb laj tij ut eb laj levita ut quebinxakab cuiꞌchic chi xju̱nkaleb saꞌ lix cꞌanjeleb.

12 Ut chixjunileb laj Judá queꞌoc cuiꞌchic xqꞌuebal li junju̱nk saꞌ xlaje̱tkil re li trigo, re li vino ut re li aceite. Ut coxeꞌxcanab saꞌ li cab li nequeꞌxxoc cuiꞌ li mayej.

13 Ut la̱in quinxakabeb chokꞌ merto̱m laj Selemías laj tij, laj Sadoc laj tzꞌi̱b, ut laj Pedaías xcomoneb laj levita. Eb aꞌan teꞌilok reheb li cab li naxoqueꞌ cuiꞌ chixjunil li mayej. Ut quinxakab ajcuiꞌ laj Hanán li ralal laj Zacur chixtenkꞌanquileb. Laj Zacur, aꞌan li ralal laj Matanías. Quinxakabeb li cui̱nk aꞌin xban nak ti̱queb xchꞌo̱l. Ut aꞌaneb ajcuiꞌ li teꞌjeqꞌui̱nk re li mayej reheb li rech aj cꞌanjelil re nak cua̱nk cꞌaꞌru reheb re xnumsinquil li cutan junju̱nk.

14 —At inDios, chijulticokꞌ taxak a̱cue li joꞌ qꞌuial li us ninba̱nu. Ut misach taxak saꞌ a̱chꞌo̱l chixjunil li us ninba̱nu chokꞌ re la̱ templo ut re la̱ cꞌanjel.—

15 Saꞌ eb li cutan aꞌan quinqꞌue ajcuiꞌ retal nak cuanqueb laj Judá yo̱queb chi cꞌanjelac saꞌ li hiloba̱l cutan. Cuan yo̱queb chi yatzꞌoc uvas. Ut cuan yo̱queb chixqꞌuebal chi i̱ka̱nc lix bu̱reb. Nequeꞌxcꞌam Jerusalén lix trigo, lix vino, lix uvas, lix higo ut chixjunil li ru li racui̱mkeb saꞌ li hiloba̱l cutan. Ut la̱in quebinkꞌus ut quinye reheb nak incꞌaꞌ teꞌcꞌayi̱nk saꞌ li hiloba̱l cutan.

16 Ut cuanqueb Jerusalén xcomoneb laj Tiro nequeꞌxcꞌam Jerusalén li car joꞌ ajcuiꞌ li cꞌaꞌak chic re ru re teꞌxcꞌayi reheb laj Judá saꞌ li hiloba̱l cutan.

17 La̱in quebinkꞌus li nequeꞌcꞌamoc be saꞌ xya̱nkeb laj Judá ut quinye reheb: —Incꞌaꞌ us yo̱quex chixba̱nunquil xban nak yo̱quex chixmuxbal ru li hiloba̱l cutan.

18 ¿Ma ma̱cuaꞌ ta biꞌ joꞌcan queꞌxba̱nu chak le̱ xeꞌto̱nil yucuaꞌ junxil? Ut, ¿ma ma̱cuaꞌ ta biꞌ xma̱c aꞌan nak li Dios quixqꞌue chak chixjunil li raylal aꞌin saꞌ kabe̱n la̱o ut saꞌ xbe̱n li katenamit? ¿Ma toj te̱raj ajcuiꞌ xchikꞌbal xjoskꞌil li Dios saꞌ xbe̱n li tenamit Israel riqꞌuin xmuxbal ru li hiloba̱l cutan? chanquin reheb.

19 Ut quinye ajcuiꞌ reheb nak acak cuulac re xcutanquil li hiloba̱l cutan nak teꞌxtzꞌapeb li oqueba̱l re li tenamit nak toj ma̱jiꞌ nakꞌojyi̱noꞌ chi us. Ut incꞌaꞌ teꞌxte toj ta̱numekꞌ li hiloba̱l cutan. Ut quinxakabeb li mo̱s saꞌ eb li oqueba̱l ut quebinye re nak ma̱ jun teꞌrocsi riqꞌuineb ri̱k saꞌ li hiloba̱l cutan.

20 Eb laj yaconel ut eb laj cꞌay cꞌaꞌak re ru queꞌxnumsi li kꞌojyi̱n chirix li tenamit cuib oxib sut.

21 Ut la̱in quebinkꞌus ut quinye reheb: —¿Cꞌaꞌut nak nequexcana chixnumsinquil li kꞌojyi̱n chirix li tzꞌac? Cui te̱ba̱nu cuiꞌchic aꞌan texinchap ut texinqꞌue saꞌ tzꞌalam, chanquin reheb. Ut chalen nak quinye chi joꞌcan reheb incꞌaꞌ chic queꞌcuulac chi cꞌayi̱nc saꞌ li hiloba̱l cutan.

22 Chirix aꞌan quinye ajcuiꞌ reheb laj levita nak teꞌxsantobresi ribeb joꞌ naxye saꞌ li chakꞌrab. Ut quinye ajcuiꞌ reheb nak teꞌxcꞌacꞌaleheb li oqueba̱l re li tenamit re nak ma̱ ani ta̱muxuk re li hiloba̱l cutan. —At inDios, riqꞌuin aꞌin chijulticokꞌ taxak a̱cue li joꞌ qꞌuial li us ninba̱nu ut chacuy taxak inma̱c xban xnimal la̱ cuuxta̱n.—

23 Ut quinqꞌue ajcuiꞌ retal nak cuanqueb laj Israel li queꞌsumla riqꞌuineb li ixk aj Asdod, ut aj amonita ut eb laj moabitas.

24 Ut cuanqueb li ralal xcꞌajoleb queꞌa̱tinac saꞌ ra̱tinoba̱leb laj Asdod ut incꞌaꞌ queꞌxnau a̱tinac saꞌ ra̱tinoba̱leb laj Israel. Joꞌcan nak nequeꞌa̱tinac saꞌ ra̱tinoba̱leb jalan tenamit.

25 La̱in quincuechꞌiheb ut quinbok raylal saꞌ xbe̱neb. Cuan quinsaqꞌueb ut cuan quinmichꞌeb chi rismal ut quinpuersiheb nak teꞌxye riqꞌuin juramento nak incꞌaꞌ chic teꞌxqꞌue li ralal xcꞌajoleb chi sumla̱c riqꞌuineb li ralal xcꞌajoleb li jalaneb xtenamit, chi moco teꞌxcꞌam rixakileb saꞌ xya̱nkeb li jalaneb xtenamit, chanquin reheb.

26 La̱in quinye ajcuiꞌ reheb: —¿Ma ma̱cuaꞌ ta biꞌ aꞌan li quiqꞌuehoc re chi ma̱cobc laj Salomón li quicuan chokꞌ xreyeb laj Israel junxil? Ma̱ ani chic rey quicuan xcuanquil joꞌ aꞌan. Li Dios quirahoc re ut aꞌan ajcuiꞌ li quixakaban re saꞌ xbe̱neb chixjunileb laj Israel. Abanan, eb li ixk li jalaneb xtenamit queꞌqꞌuehoc re chi ma̱cobc li rey Salomón.

27 Joꞌcan nak ¿ma yal takacuy ta biꞌ nak yo̱kex chi ma̱cobc chiru li Dios riqꞌuin xsicꞌbal le̱ rixakil saꞌ xya̱nkeb li jalaneb xtenamit? chanquin reheb.

28 Laj Joiada, aꞌan li ralal laj Eliasib li xbe̱nil aj tij. Jun li ralal laj Joiada quixcꞌam chokꞌ rixakil lix rabin laj Sanbalat laj horonita. Joꞌcan nak quicuisi aꞌan saꞌ li tenamit Jerusalén.

29 At inDios, chaqꞌue taxak retal eb laj tij li xeꞌxmux ru lix cꞌanjeleb ut queꞌxkꞌet li contrato li caba̱nu riqꞌuineb laj tij ut riqꞌuineb laj levita.

30 Joꞌcan nak quicuisiheb saꞌ xya̱nkeb laj tij chixjunileb li jalaneb xtenamit. Ut quinqꞌue xcꞌanjeleb laj tij ut eb laj levita. Ac xcꞌanjel xcꞌanjel li junju̱nk.

31 Ut quinxakabeb ajcuiꞌ li ani teꞌcꞌamok chak li siꞌ saꞌ xkꞌehil. Ut quinye reheb li tenamit nak teꞌxkꞌaxtesi li xbe̱n ru li racui̱mkeb saꞌ xkꞌehil. —At inDios, chaqꞌue taxak retal chixjunil li us li xinba̱nu ut ta̱cuuxta̱na taxak cuu.—

© 2019, Wycliffe Bible Translators. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ