Nehemías 12 - Li Santil hu

¹ Aꞌaneb aꞌin laj tij ut eb laj levita li queꞌsukꞌi Jerusalén rochben laj Zorobabel li ralal laj Salatiel ut laj Jesúa li xbe̱nil aj tij. Aꞌaneb aꞌin laj tij: laj Seraías, laj Jeremías, laj Esdras,

² laj Amarías, laj Maluc, laj Hatús,

³ laj Secanías, laj Rehum, laj Meremot,

⁴ laj Iddo, laj Gineto, laj Abías,

⁵ laj Mijamín, laj Maadías, laj Bilga,

⁶ laj Semaías, laj Joiarib, laj Jedaías,

⁷ laj Salú, laj Amoc, laj Hilcías, ut laj Jedaías. Aꞌaneb aꞌin li queꞌcꞌamoc be saꞌ xya̱nkeb chixjunileb laj tij saꞌ eb li cutan nak quicuan chokꞌ xbe̱nil aj tij laj Jesúa.

⁸ Aꞌaneb aꞌin laj levita: laj Jesúa, laj Binúi, laj Cadmiel, laj Serebías, laj Judá ut laj Matanías. Eb aꞌan li queꞌcꞌamoc be chi bicha̱nc re lokꞌoni̱nc.

⁹ Ut eb laj Bacbuquías ut laj Uni li rech aj bichanelil cuanqueb chi ubej ut yo̱queb chixtenkꞌanquileb riqꞌuin li bicha̱nc. Nequeꞌxsume rib nak nequeꞌbichan laj bichanel.

¹⁰ Laj Jesúa aꞌan lix yucuaꞌ laj Joacim. Ut laj Joacim, aꞌan lix yucuaꞌ laj Eliasib. Ut laj Eliasib, aꞌan lix yucuaꞌ laj Joiada.

¹¹ Laj Joiada, aꞌan lix yucuaꞌ laj Jonatán. Ut laj Jonatán, aꞌan lix yucuaꞌ laj Jadúa.

¹² Saꞌ eb li cutan nak quicuan laj Joiacim chokꞌ aj tij, eb laj tij li queꞌjolomin reheb li junju̱nk cabal, aꞌaneb aꞌin: laj Meraías, aꞌan li quijolomin reheb li ralal xcꞌajol laj Seraías: ut laj Hananías, aꞌan li quijolomin reheb li ralal xcꞌajol laj Jeremías.

¹³ Laj Mesulam, aꞌan li quijolomin reheb li ralal xcꞌajol laj Esdras. Ut laj Johanán, aꞌan li quijolomin reheb li ralal xcꞌajol laj Amarías.

¹⁴ Ut laj Jonatán, aꞌan li quijolomin reheb li ralal xcꞌajol laj Melicú. Ut laj José, aꞌan li quijolomin reheb li ralal xcꞌajol laj Sebanías.

¹⁵ Laj Adna, aꞌan li quijolomin reheb li ralal xcꞌajol laj Harim. Ut laj Helcai, aꞌan li quijolomin reheb li ralal xcꞌajol laj Meraiot.

¹⁶ Laj Zacarías, aꞌan li quijolomin reheb li ralal xcꞌajol laj Iddo. Ut laj Mesulam, aꞌan li quijolomin reheb li ralal xcꞌajol laj Ginetón.

¹⁷ Laj Zicri, aꞌan li quijolomin reheb li ralal xcꞌajol laj Abías. Ut laj Piltai, aꞌan li quijolomin reheb li ralal xcꞌajol laj Miniamín ut eb li ralal xcꞌajol laj Moadías.

¹⁸ Laj Samúa, aꞌan li quijolomin reheb li ralal xcꞌajol laj Bilga. Ut laj Jonatán, aꞌan li quijolomin reheb li ralal xcꞌajol laj Semaías.

¹⁹ Laj Matenai, aꞌan li quijolomin reheb li ralal xcꞌajol laj Joiarib. Ut laj Uzi, aꞌan li quijolomin reheb li ralal xcꞌajol laj Jedaías.

²⁰ Ut laj Calai, aꞌan li quijolomin reheb li ralal xcꞌajol laj Salai. Ut laj Eber, aꞌan li quijolomin reheb li ralal xcꞌajol laj Amoc.

²¹ Ut laj Hasabías, aꞌan li quijolomin reheb li ralal xcꞌajol laj Hilcías. Ut laj Natanael, aꞌan li quijolomin reheb li ralal xcꞌajol laj Jedaías.

²² Saꞌ eb li cutan nak queꞌcuan laj Eliasib, laj Joiada, laj Johanán ut laj Jadúa toj chalen nak qui-oc laj Darío chokꞌ xreyeb laj Persia, queꞌtzꞌi̱ba̱c xcꞌabaꞌeb laj levita ut eb laj tij li queꞌjolomin reheb li junju̱nk cabal.

²³ Eb li ralal xcꞌajol laj Leví li queꞌjolomin reheb li junju̱nk cabal, quitzꞌi̱ba̱c xcꞌabaꞌeb saꞌ li hu li tzꞌi̱banbil cuiꞌ retalil chixjunil li cꞌaꞌru na-uxman saꞌ li tenamit chalen toj saꞌ eb li cutan nak quicuan chokꞌ aj tij laj Johanán li ralal laj Eliasib.

²⁴ Eb li cuanqueb saꞌ xcuanquil saꞌ xya̱nkeb laj levita, aꞌaneb aꞌin: laj Hasabías, laj Serebías, ut laj Jesúa li ralal laj Cadmiel. Eb li rech aj cꞌanjelil cuanqueb chi ubej ut yo̱queb chi lokꞌoni̱nc ut chi bantioxi̱nc. Nequeꞌxsume rib nak nequeꞌbichan laj bichanel joꞌ queꞌchakꞌrabi̱c cuiꞌ junxil xban li rey David laj cꞌanjel chiru li Dios.

²⁵ Ut eb li queꞌcꞌacꞌalen reheb li oqueba̱l, aꞌaneb aꞌin: laj Matanías, laj Bacbuquías, laj Obadías, laj Mesulam, laj Talmón ut laj Acub.

²⁶ Eb aꞌan queꞌcuan chi cꞌanjelac saꞌ eb li cutan nak quicuan chokꞌ xbe̱nil aj tij laj Joiacim, li ralal laj Jesúa. Laj Jesúa, aꞌan li ralal laj Josadac. Ut saꞌ eb ajcuiꞌ li cutan aꞌan laj Nehemías quicuan chokꞌ gobernador ut laj Esdras laj tij, aꞌan li quicꞌutuc re li chakꞌrab.

Queꞌxkꞌaxtesi saꞌ rukꞌ li Dios li tzꞌac li sutsu cuiꞌ li tenamit Jerusalén

²⁷ Nak quicuulac xkꞌehil nak teꞌxkꞌaxtesi saꞌ rukꞌ li Dios li tzꞌac li sutsu cuiꞌ li tenamit Jerusalén, queꞌxtakla xbokbaleb chixjunileb laj levita li cuanqueb saꞌ li junju̱nk chi tenamit. Queꞌbokeꞌ Jerusalén re xsulbal li tzꞌac re nak teꞌxqꞌue sahil chꞌo̱lej riqꞌuin li bicha̱nc ut riqꞌuin xchꞌeꞌbal li cuajb, li arpa, li címbalos, ut li salterios.

²⁸ Ut queꞌxchꞌutub ribeb Jerusalén chixjunileb laj levita li nequeꞌbichan, eb li cuanqueb nachꞌ riqꞌuin Jerusalén joꞌ eb ajcuiꞌ li cuanqueb saꞌ li cꞌaleba̱l Netofa.

²⁹ Ut cuanqueb ajcuiꞌ li queꞌchal chak saꞌ li tenamit Gilgal ut saꞌ eb li cꞌaleba̱l xcue̱nt Geba ut Azmavet, bar queꞌxyi̱b cuiꞌ li rochocheb laj bichanel. Eb li naꞌajej aꞌan cuanqueb nachꞌ riqꞌuin Jerusalén.

³⁰ Ut eb laj tij ut eb laj levita queꞌxba̱nu joꞌ naxye saꞌ li chakꞌrab. Queꞌxsantobresi ribeb ut queꞌxsantobresiheb ajcuiꞌ li tenamit joꞌ ajcuiꞌ li tzꞌac ut eb li oqueba̱l.

³¹ Ut quinye ajcuiꞌ reheb li nequeꞌtaklan saꞌ li tenamit Judá nak teꞌtakekꞌ saꞌ xbe̱n li tzꞌac. Ut quincꞌu̱b ajcuiꞌ ruheb cuib ni̱nki chꞌu̱taleb laj bichanel. Li jun chꞌu̱tal yo̱queb chi xic chi tzoltzo saꞌ xbe̱n li tzꞌac li nacana saꞌ li nim saꞌ xjayal li oqueba̱l bar nequeꞌnumeꞌ cuiꞌ laj tzꞌekol mul.

³² Ut chirixeb aꞌan yo̱queb chi xic laj Osaías rochbeneb yijach li nequeꞌtaklan saꞌ li tenamit Judá.

³³ Joꞌcan ajcuiꞌ laj Azarías, laj Esdras, ut laj Mesulam,

³⁴ joꞌqueb ajcuiꞌ laj Judá, laj Benjamín, laj Semaías, ut laj Jeremías.

³⁵ Ut cuanqueb ajcuiꞌ laj tij li cuanqueb xtrompeta nak yo̱queb chi xic. Aꞌaneb aꞌin: laj Zacarías li ralal laj Jonatán. Laj Jonatán, aꞌan li ralal laj Semaías. Ut laj Semaías, aꞌan li ralal laj Matanías. Ut laj Matanías, aꞌan li ralal laj Micaías. Ut laj Micaías, aꞌan li ralal laj Zacur. Ut laj Zacur, aꞌan li ralal laj Asaf.

³⁶ Ut eb li i̱tzꞌinbej yo̱queb ajcuiꞌ chi xic. Aꞌaneb laj Semaías, laj Azareel, laj Milalai, laj Gilalai, laj Maai, laj Natanael, laj Judá ut laj Hanani. Yo̱queb chixcꞌambal lix cuajbeb saꞌ rukꞌeb joꞌ quiyeheꞌ reheb junxilaj xban li rey David laj cꞌanjel chiru li Dios. Ut laj Esdras laj tzꞌi̱b, yo̱ chi cꞌamoc be chiruheb.

³⁷ Ut saꞌ li oqueba̱l cuan cuiꞌ li yuꞌam haꞌ queꞌtakeꞌ saꞌ xbe̱n li tzꞌac li quicuan cuiꞌ lix naꞌaj li rey David. Queꞌnumeꞌ cuan cuiꞌ li tzꞌac li najt xteram li cuan chiru li quicuan cuiꞌ li rochoch li rey David, ut queꞌcuulac cuan cuiꞌ li oqueba̱l bar nequeꞌnumeꞌ cuiꞌ li nequeꞌbelan haꞌ, li cuan saꞌ li este li na-el cuiꞌ li sakꞌe.

³⁸ Ut eb laj bichanel jun chꞌu̱tal chic yo̱queb chi xic saꞌ xbe̱n li tzꞌac saꞌ li tzꞌe. Ut la̱in yo̱quin chi xic chirixeb cuochbeneb li yijach chic li tenamit. Co-el cuan cuiꞌ li torre li cuan nachꞌ riqꞌuineb li horno ut co̱o cuan cuiꞌ li tzꞌac li nim ru.

³⁹ Ut conumeꞌ saꞌ xbe̱n li oqueba̱l Efraín xcꞌabaꞌ ut conumeꞌ ajcuiꞌ saꞌ xbe̱n li najter oqueba̱l ut saꞌ xbe̱n li oqueba̱l li bar nequeꞌxcꞌayi cuiꞌ li car, ut conumeꞌ ajcuiꞌ cuan cuiꞌ li torre Hananeel xcꞌabaꞌ ut conumeꞌ ajcuiꞌ cuan cuiꞌ li torre Hamea xcꞌabaꞌ. Ut conumeꞌ ajcuiꞌ saꞌ xbe̱n li oqueba̱l li nequeꞌnumeꞌ cuiꞌ li carner, ut coxoxakli̱k cuan cuiꞌ li oqueba̱l li cuan nachꞌ riqꞌuin li tzꞌalam.

⁴⁰ Ut eb li cuib chꞌu̱taleb laj bichanel queꞌcuulac saꞌ lix templo li Dios. Ut quincuulac ajcuiꞌ la̱in cuochbeneb li yijach chic li nequeꞌtaklan saꞌ xbe̱neb li tenamit.

⁴¹ Ut queꞌcuulac ajcuiꞌ eb laj tij. Aꞌaneb aꞌin lix cꞌabaꞌeb: Laj Eliacim, laj Maaseías, laj Miniamín, laj Micaías, laj Elioenai, laj Zacarías ut laj Hananías. Ut cuanqueb lix trompeta riqꞌuineb.

⁴² Ut queꞌcuulac ajcuiꞌ laj bichanel. Aꞌaneb aꞌin lix cꞌabaꞌeb: laj Maasías, laj Semaías, laj Eleazar, laj Uzi, laj Johanán, laj Malquías, laj Elam ut laj Ezer. Yo̱queb chi bicha̱nc chi cau xya̱b xcuxeb. Laj Izrahías, aꞌan li yo̱ chi cꞌamoc be chiruheb.

⁴³ Nabaleb li xul xkamayeja saꞌ li cutan aꞌan. Cꞌajoꞌ nak quisahoꞌ saꞌ kachꞌo̱l xban nak li Dios quixqꞌue jun sahil chꞌo̱lejil ke. Eb li ixk ut eb li cocꞌal queꞌsahoꞌ ajcuiꞌ saꞌ xchꞌo̱leb. Ut toj chi najt qui-abi̱c chak nak cꞌajoꞌ xsahil saꞌ kachꞌo̱l Jerusalén.

⁴⁴ Saꞌ eb li cutan aꞌan queꞌxakaba̱c laj ilol re li cab bar naxocman cuiꞌ chixjunil li mayej li naqꞌueman re li templo, joꞌ li tumin, joꞌ li xbe̱n ru li acui̱mk, joꞌ ajcuiꞌ li junju̱nk saꞌ xlaje̱tkil. Queꞌxcꞌul chixjunil li joꞌ qꞌuial queꞌxqꞌue saꞌ eb li cꞌaleba̱l joꞌ tzꞌi̱banbil saꞌ li chakꞌrab. Li joꞌ qꞌuial li queꞌxcꞌul quiqꞌueheꞌ reheb laj tij ut reheb laj levita. Eb li ralal xcꞌajol laj Judá saheb saꞌ xchꞌo̱l riqꞌuineb laj tij ut eb laj levita li cuanqueb saꞌ xcꞌanjel.

⁴⁵ Eb aꞌan queꞌxba̱nu chi tzꞌakal re ru lix cꞌanjel li Dios. Ut queꞌxba̱nu chixjunil li tento xba̱nunquil re nak ta̱ru̱k teꞌxpatzꞌ xcuybal xma̱queb. Joꞌcan ajcuiꞌ queꞌxba̱nu laj bichanel ut eb li queꞌcꞌacꞌalen re li oqueba̱l. Queꞌxba̱nu joꞌ quiyeheꞌ reheb junxil xban li rey David ut xban ajcuiꞌ laj Salomón li ralal.

⁴⁶ Chalen najter nak quicuan chokꞌ rey laj David ut nak quicuan laj Asaf chokꞌ aj cꞌamol be reheb laj bichanel, ut toj anakcuan cuanqueb li ani nequeꞌcꞌamoc be chi bicha̱nc re xlokꞌoninquil li Dios ut re bantioxi̱nc.

⁴⁷ Saꞌ eb li cutan nak queꞌcuan laj Zorobabel ut laj Nehemías, chixjunileb laj Israel queꞌxqꞌue li cꞌaꞌru reheb laj bichanel joꞌqueb ajcuiꞌ li nequeꞌcꞌacꞌalen re li oqueba̱l re nak teꞌxnumsi li cutan junju̱nk. Ut queꞌxqꞌue ajcuiꞌ reheb laj levita li joꞌ qꞌuial xcꞌulubeb xcꞌulbal. Ut eb laj levita queꞌxqꞌue ajcuiꞌ reheb laj tij, li ralal xcꞌajol laj Aarón.