Nehemías 11 - Li Santil hu

Aꞌaneb aꞌin chixjunileb li ralal xcꞌajol laj Israel

¹ Eb li nequeꞌtaklan saꞌ xya̱nkeb laj Israel queꞌcana chi cua̱nc saꞌ li santil tenamit Jerusalén. Ut li joꞌ qꞌuial chic queꞌbu̱lic re rilbal ani na reheb teꞌcana̱k chi cua̱nc aran Jerusalén. Ju̱nk cabal saꞌ xya̱nk li laje̱tk cabal queꞌcana aran ut eb li bele̱tk cabal chic queꞌco̱eb chi cua̱nc saꞌ eb li tenamit li cuanqueb xcue̱nt Jerusalén.

² Ut eb li tenamit queꞌxbantioxi chiruheb li junju̱nk cabal li queꞌala saꞌ xchꞌo̱leb cana̱c Jerusalén.

³ Nabaleb laj Israel, joꞌ eb laj tij, eb laj levita, eb li nequeꞌcꞌanjelac saꞌ li templo ut eb li ralal xcꞌajol li queꞌcꞌanjelac chiru laj Salomón, queꞌcana chi cua̱nc saꞌ eb li tenamit xcue̱nt Judá. Ac saꞌ xnaꞌajeb queꞌcana li junju̱nk. Ut eb laj Israel li queꞌtaklan, li queꞌcana chi cua̱nc Jerusalén, aꞌaneb aꞌin:

⁴ Saꞌ xya̱nkeb li queꞌcana Jerusalén, cuanqueb li ralal xcꞌajol laj Judá ut eb li ralal xcꞌajol laj Benjamín. Eb li ralal xcꞌajol laj Judá, aꞌaneb aꞌin: laj Ataías li ralal laj Uzías. Ut laj Uzías, aꞌan li ralal laj Zacarías. Ut laj Zacarías, aꞌan li ralal laj Amarías. Ut laj Amarías, aꞌan li ralal laj Sefatías. Ut laj Sefatías, aꞌan li ralal laj Mahalaleel. Ut laj Mahalaleel, aꞌan xcomoneb li ralal xcꞌajol laj Fares.

⁵ Ut joꞌcan ajcuiꞌ laj Maasías, li ralal laj Baruc. Ut laj Baruc, aꞌan li ralal laj Colhoze. Ut laj Colhoze, aꞌan li ralal laj Hazaías. Ut laj Hazaías, aꞌan li ralal laj Adaías. Ut laj Adaías, aꞌan li ralal laj Joiarib. Ut laj Joiarib, aꞌan li ralal laj Zacarías. Ut laj Zacarías, aꞌan li ralal laj Siloni.

⁶ Chixjunil li ralal xcꞌajol laj Fares li queꞌcana Jerusalén, aꞌan ca̱hib ciento riqꞌuin cuakxaklaju xca̱cꞌa̱l (478) chi cui̱nk kꞌaxal cauheb rib.

⁷ Aꞌaneb aꞌin li ralal xcꞌajol laj Benjamín: Laj Salú, li ralal laj Mesulam. Ut laj Mesulam, aꞌan li ralal laj Joed. Ut laj Joed, aꞌan li ralal laj Pedaías. Ut laj Pedaías, aꞌan li ralal laj Colaías. Ut laj Colaías, aꞌan li ralal laj Maasías. Ut laj Maasías, aꞌan li ralal laj Itiel. Ut laj Itiel, aꞌan li ralal laj Jesaías.

⁸ Ut cuanqueb ajcuiꞌ laj Gabai ut laj Salai. Bele̱b ciento riqꞌuin cuakxakib xcaꞌcꞌa̱l (928) chixjunileb aꞌan.

⁹ Laj Joel li ralal laj Zicri, aꞌan li nataklan saꞌ xbe̱neb li tenamit. Ut laj Judá, li ralal laj Senúa, aꞌan li quitenkꞌan re chi takla̱nc saꞌ xbe̱neb.

¹⁰ Ut saꞌ xya̱nkeb laj tij cuan laj Jedaías li ralal laj Joiarib, ut laj Jaquín.

¹¹ Ut laj Seraías li ralal laj Hilcías. Ut laj Hilcías, aꞌan li ralal laj Mesulam. Ut laj Mesulam, aꞌan li ralal laj Sadoc. Ut laj Sadoc, aꞌan li ralal laj Meraiot. Ut laj Meraiot, aꞌan li ralal laj Ahitob, li xbe̱nil aj tij saꞌ lix templo li Dios.

¹² Eb laj tij li queꞌcꞌanjelac saꞌ li templo, aꞌan cuakxakib ciento riqꞌuin cuib xcaꞌcꞌa̱l (822). Laj Adaías, aꞌan li ralal laj Jeroham. Ut laj Jeroham, aꞌan li ralal laj Pelalías. Ut laj Pelalías, aꞌan li ralal laj Amsi. Ut laj Amsi, aꞌan li ralal laj Zacarías. Ut laj Zacarías, aꞌan li ralal laj Pasur. Ut laj Pasur, aꞌan li ralal laj Malquías.

¹³ Ut eb li rechꞌalal li nequeꞌjolomin re li junju̱nk cabal, aꞌan cuib ciento riqꞌuin cuib roxcꞌa̱l (242). Aꞌaneb aꞌin: laj Amasai li ralal laj Azareel. Ut laj Azareel, aꞌan li ralal laj Azai. Ut laj Azai, aꞌan ralal laj Mesilemot. Ut laj Mesilemot, aꞌan li ralal laj Imer.

¹⁴ Ut eb li rechꞌalal, li junes cui̱nk li cauheb rib, aꞌan jun ciento riqꞌuin cuakxakib xcaꞌcꞌa̱l (128). Laj Zabdiel li ralal laj Gedolim, aꞌan li nataklan saꞌ xbe̱neb.

¹⁵ Ut saꞌ xya̱nkeb laj levita, cuan laj Semaías li ralal laj Hasub. Ut laj Hasub aꞌan li ralal laj Azricam. Ut laj Azricam, aꞌan li ralal laj Hasabías. Ut laj Hasabías, aꞌan li ralal laj Buni.

¹⁶ Ut cuanqueb ajcuiꞌ laj Sabetai ut laj Jozabad, li queꞌtaklan saꞌ xbe̱neb laj levita, li queꞌcꞌanjelac chirix li templo.

¹⁷ Ut cuan ajcuiꞌ laj Matanías li ralal laj Micaía. Ut laj Micaía, aꞌan li ralal laj Zabdi. Ut laj Zabdi, aꞌan li ralal laj Asaf. Laj Matanías, aꞌan li quicꞌamoc be chiruheb li nequeꞌbichan re xlokꞌoninquil ut re bantioxi̱nc chiru li Dios. Ut cuan ajcuiꞌ laj Bacbuquías li natenkꞌan re laj Matanías. Ut cuan ajcuiꞌ laj Abda li ralal laj Samúa. Laj Samúa, aꞌan li ralal laj Galal. Ut laj Galal, aꞌan li ralal laj Jedutún.

¹⁸ Chixjunileb laj levita li queꞌcana saꞌ li santil tenamit, aꞌan cuib ciento riqꞌuin ca̱hib roꞌcꞌa̱l (284).

¹⁹ Ut eb li queꞌcꞌacꞌalen re li oqueba̱l, aꞌaneb aꞌin: laj Acub ut laj Talmón rochbeneb li rechꞌalal. Eb li queꞌcꞌacꞌalen re li oqueba̱l, aꞌan jun ciento riqꞌuin cablaju xca̱cꞌa̱l (172).

²⁰ Ut li joꞌ qꞌuial chic laj Israel, li incꞌaꞌ queꞌcana Jerusalén, joꞌ eb laj tij ut eb laj levita, queꞌco̱eb chi cua̱nc saꞌ eb li tenamit xcue̱nt Judá. Ac saꞌ xnaꞌajeb queꞌcana li junju̱nk.

²¹ Eb li mo̱s li queꞌcꞌanjelac saꞌ li templo queꞌcana chi cua̱nc Ofel. Laj Ziha ut laj Gispa queꞌtaklan saꞌ xbe̱neb aꞌan.

²² Laj Uzi li ralal laj Bani, aꞌan li quitaklan saꞌ xbe̱neb laj Levitas li queꞌcana Jerusalén. Laj Bani, aꞌan li ralal laj Hasabías. Ut laj Hasabías, aꞌan li ralal laj Matanías. Ut laj Matanías, aꞌan li ralal laj Micaía, xcomoneb li ralal xcꞌajol laj Asaf. Aꞌaneb li nequeꞌbichan nak nequeꞌlokꞌonin saꞌ lix templo li Dios.

²³ Ac yebil reheb xban li rey nak ta̱qꞌuehekꞌ reheb li cꞌaꞌru tento teꞌxcꞌul re xnumsinquil li cutan junju̱nk.

²⁴ Laj Petaías, aꞌan li ralal laj Mesezabeel, xcomoneb li ralal xcꞌajol laj Zera li ralal laj Judá. Laj Petaías aꞌan li xakabanbil xban li rey chokꞌ ru̱chil chiruheb laj Israel riqꞌuin chixjunil li cꞌaꞌru nequeꞌxcꞌu̱b ru.

²⁵ Aꞌaneb aꞌin li tenamit li queꞌcana cuiꞌ li ralal xcꞌajol laj Judá: Quiriat-arba, Dibón ut Jecabseel. Cuan li queꞌcana saꞌ tenamit ut cuan ajcuiꞌ li queꞌco̱eb saꞌ cꞌaleba̱l.

²⁶ Ut cuanqueb ajcuiꞌ li queꞌco̱eb chi cua̱nc saꞌ eb li tenamit Jesúa, Molada, ut Bet-pelet.

²⁷ Ut cuanqueb ajcuiꞌ li queꞌco̱eb chi cua̱nc saꞌ li tenamit Hazar-sual, ut Beerseba. Ut cuanqueb ajcuiꞌ li queꞌco̱eb saꞌ cꞌaleba̱l.

²⁸ Ut cuan cuiꞌchic li queꞌcana saꞌ li tenamit Siclag ut Mecona, ut cuanqueb li queꞌco̱eb saꞌ cꞌaleba̱l.

²⁹ Ut cuanqueb ajcuiꞌ li queꞌco̱eb chi cua̱nc saꞌ eb li tenamit En-rimón, Zora ut Jarmut.

³⁰ Ut cuanqueb ajcuiꞌ li queꞌco̱eb chi cua̱nc saꞌ eb li tenamit Zanoa ut Adulam. Ut cuanqueb li queꞌco̱eb saꞌ li cꞌaleba̱l. Ut cuanqueb ajcuiꞌ li queꞌco̱eb Laquis ut Azeca. Ut cuanqueb ajcuiꞌ li queꞌco̱eb saꞌ li cꞌaleba̱l. Queꞌco̱eb laj Israel chi cua̱nc saꞌ li tenamit Beerseba nacuulac toj saꞌ li ru takꞌa re Hinom.

³¹ Ut eb li ralal xcꞌajol laj Benjamín queꞌcana chi cua̱nc saꞌ eb li tenamit Geba, Micmas, Aía, ut Bet-el joꞌ ajcuiꞌ saꞌ eb li cꞌaleba̱l.

³² Ut cuan ajcuiꞌ li queꞌcana saꞌ eb li tenamit Anatot, Nob ut Ananías.

³³ Ut cuan ajcuiꞌ li queꞌcana saꞌ eb li tenamit Hazor, Ramá ut Gitaim.

³⁴ Ut cuan ajcuiꞌ li queꞌcana saꞌ eb li tenamit Hadid, Seboim, ut Nebalat.

³⁵ Ut cuanqueb ajcuiꞌ li queꞌcana saꞌ eb li tenamit Lod ut Ono saꞌ li ru takꞌa cuanqueb cuiꞌ laj tenol chꞌi̱chꞌ.

³⁶ Ut cuanqueb aj levita queꞌco̱eb chi cua̱nc saꞌ xya̱nkeb li ralal xcꞌajol laj Judá ut cuanqueb li queꞌco̱eb chi cua̱nc saꞌ xya̱nkeb li ralal xcꞌajol laj Benjamín.