Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Nehemías 1 - Li Santil hu


Laj Nehemías natijoc chirix li tenamit Jerusalén

1 Aꞌan aꞌin li a̱tin li quixtzꞌi̱ba li profeta Nehemías, li ralal laj Hacalías. Ac yo̱ chic junmay chihab roquic chokꞌ rey laj Artajerjes saꞌ li po Quisleu nak cuanquin saꞌ li tenamit Susa bar nacuan cuiꞌ chi takla̱nc li rey.

2 Quicuulac cuiqꞌuin li cuas laj Hanani rochbeneb cuib oxib li cui̱nk aj Judá. Quinpatzꞌ reheb chanru cuanqueb laj judío li queꞌcꞌameꞌ Babilonia ut queꞌsukꞌi cuiꞌchic Jerusalén. Ut quinpatzꞌ ajcuiꞌ chanru cuan li tenamit Jerusalén.

3 Ut eb aꞌan queꞌxye cue nak eb laj judío li queꞌsukꞌi Jerusalén cuanqueb saꞌ raylal ut xuta̱nal yo̱queb chixcꞌulbal. Juqꞌuinbil li tzꞌac li sutsu cuiꞌ li tenamit joꞌ ajcuiꞌ li oqueba̱l ut cꞌatbil lix puertil.

4 Nak quicuabi resil cꞌaꞌru yo̱queb chixcꞌulbal, cꞌajoꞌ nak quirahoꞌ inchꞌo̱l. Quinchunub cuib ut quin-oc chi ya̱bac. Quintijoc chiru lin Dios cuan saꞌ choxa ut quinba̱nu in-ayu̱n cuib oxib cutan.

5 Ut quinye: —At Ka̱cuaꞌ, at inDios, li cuancat saꞌ choxa, kꞌaxal nim a̱cuanquil ut xiu xiu a̱cuu. Nintzꞌa̱man cha̱cuu xban nak la̱at junelic nacaba̱nu li cꞌaꞌru cayechiꞌi xba̱nunquil saꞌ li contrato li caba̱nu riqꞌuineb la̱ tenamit. Nacacuuxta̱na ruheb li nequeꞌrahoc a̱cue ut eb li nequeꞌba̱nun re li cꞌaꞌru naxye saꞌ la̱ chakꞌrab.

6 Nintzꞌa̱ma cha̱cuu nak ta̱cuabi taxak ut chaqꞌue taxak retal li cꞌaꞌru yo̱quin chixtzꞌa̱manquil cha̱cuu, la̱in aj cꞌanjel cha̱cuu. Chi kꞌek chi cutan yo̱quin chixtzꞌa̱manquil xcuybaleb xma̱c eb li ralal xcꞌajol laj Israel laj cꞌanjeleb cha̱cuu. Ya̱l nak xoma̱cob cha̱cuu, la̱in joꞌqueb ajcuiꞌ chixjunileb li ralal xcꞌajol lin yucuaꞌ.

7 Junes ma̱usilal yo̱co chixba̱nunquil cha̱cuu. Incꞌaꞌ yo̱co chixba̱nunquil li naxye la̱ chakꞌrab. Yo̱co ban chixkꞌetbal la̱ chakꞌrab li caqꞌue re laj Moisés laj cꞌanjel cha̱cuu.

8 La̱at jultic a̱cue li cꞌaꞌru caye chak chikix junxil nak caye chak re laj Moisés nak cui la̱o toma̱cobk cha̱cuu, la̱at ta̱chaꞌchaꞌi ku saꞌ eb li junju̱nk chi tenamit.

9 Abanan caye ajcuiꞌ nak cui tosukꞌi̱k cuiꞌchic a̱cuiqꞌuin ut cui takaba̱nu li cꞌaꞌru caye saꞌ la̱ chakꞌrab, toa̱cꞌam cuiꞌchic saꞌ li tenamit li casicꞌ ru chokꞌ a̱naꞌaj, usta ac chaꞌchaꞌinbil ku saꞌ eb li najtil tenamit.

10 Joꞌcan ut, at Ka̱cuaꞌ, misach saꞌ a̱chꞌo̱l xban nak la̱o aj cꞌanjel cha̱cuu. La̱o la̱ cualal a̱cꞌajol li coa̱col riqꞌuin la̱ cuanquilal ut riqꞌuin la̱ metzꞌe̱u.

11 Joꞌcan nak nintzꞌa̱ma cha̱cuu, at Ka̱cuaꞌ, chasume taxak lin tij. Chacuabi taxak li cꞌaꞌru nequeꞌxtzꞌa̱ma laj cꞌanjel cha̱cuu. La̱o takaj xqꞌuebal a̱lokꞌal. China̱tenkꞌa re nak us ta̱e̱lk chicuu li cꞌaꞌru tintzꞌa̱ma chiru li rey. Chiruxta̱na taxak cuu li rey, chanquin nak quintijoc. Saꞌ eb li cutan aꞌan, la̱in aj qꞌuehol rucꞌa li rey nak quincuan.

© 2019, Wycliffe Bible Translators. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ