Nahum 3 - Li Santil hu

¹ Ra cha̱lel saꞌ xbe̱n li tenamit Nínive xban nak aj camsineleb. Numtajenak aj ticꞌtiꞌeb ut aj e̱lkꞌeb. Ut incꞌaꞌ nequeꞌraj xcanabanquil li ma̱usilal nequeꞌxba̱nu.

² Abihomak chanru nak yo̱queb chi cha̱lc li teꞌnumta̱k saꞌ e̱be̱n la̱ex aj Nínive. Yo̱queb chixsacꞌbal lix cacua̱yeb re nak teꞌcha̱lk chi junpa̱t. Cau nequeꞌecꞌan chak li rok nak yo̱queb chi cha̱lc. Ut eb lix carruajeb nequeꞌpojloc ut nequeꞌpiscꞌoc chak chi cha̱lc.

³ Nak yo̱queb chi cha̱lc chi camsi̱nc chirix lix cacua̱yeb, cꞌajoꞌ nak nalemtzꞌun lix la̱nseb ut lix chꞌi̱chꞌeb nak nequeꞌxtaksi. Numtajenak cuiꞌchic nabal li tochꞌoleb ut kꞌaxal cuiꞌchic nabaleb li camenak. Nequeꞌxtich li rokeb chiruheb li camenak li yo̱queb chi pletic.

⁴ Li tenamit Nínive yo̱ chixcꞌulbal li raylal aꞌin xban nak xnumta li ma̱usilal xeꞌxba̱nu. Chanchaneb jun li ixk aj yumbe̱t. Xban xchꞌinaꞌusal naxbalakꞌiheb li tenamit. Aꞌan tzꞌakal aj tu̱l. Naxkꞌunbesiheb li tenamit toj retal nare̱chaniheb.

⁵ Li nimajcual Dios quixye: —La̱in tinsach e̱ru la̱ex aj Nínive. Chanchan tꞌustꞌu texincanab nak tinmakꞌ che̱ru li cꞌaꞌru e̱re. Tincꞌut e̱xuta̱n chiruheb li xni̱nkal ru tenamit.

⁶ Chanchan tinqꞌue li tzꞌaj saꞌ e̱be̱n nak texintzꞌekta̱na. Tincꞌut e̱xuta̱n chiruheb li tenamit ut sachso̱k xnaꞌlebeb teꞌcana̱k che̱rilbal.

⁷ Chixjunileb li jalan tenamit incꞌaꞌ chic teꞌraj e̱rilbal. Teꞌxye: Eb laj Nínive queꞌsacheꞌ ruheb. ¿Ani ta cuiꞌ ta̱tokꞌoba̱nk ruheb? Ut, ¿ani ta cuiꞌ ta̱cꞌojoba̱nk xchꞌo̱leb? chaꞌkeb.

⁸ La̱ex aj Nínive, ¿ma nequecꞌoxla nak kꞌaxal cau e̱rib chixcolbal le̱ tenamit chiru lix tenamiteb laj Tebas xban nak sutsu riqꞌuin nimaꞌ? ¿Ma incꞌaꞌ ta biꞌ cuan chixcꞌatk li nimaꞌ Nilo li tenamit Tebas? Li tenamit aꞌan sutsu riqꞌuin haꞌ ut aꞌan raj nacoloc reheb joꞌ re̱kaj li tzꞌac li nequeꞌxsut cuiꞌ li tenamit.

⁹ Eb laj Etiopía ut eb laj Egipto queꞌcoloc re li tenamit aꞌan. Ut kꞌaxal cauheb rib. Ut queꞌtenkꞌa̱c ajcuiꞌ xbaneb laj Fut ut eb laj Libia.

¹⁰ Abanan, usta kꞌaxal cauheb rib, eb laj Tebas queꞌchapeꞌ ajcuiꞌ ut queꞌcꞌameꞌ chi najt. Eb li cocꞌal quilajeꞌsaqꞌueꞌ saꞌ eb li xa̱la be toj retal queꞌcamsi̱c. Queꞌbu̱lic chirixeb laj cꞌamol be re teꞌril ani aj iqꞌuin teꞌcana̱k chi mo̱sil li junju̱nk ut eb li cuanqueb xcuanquil queꞌbaqꞌueꞌ riqꞌuin cadena.

¹¹ Joꞌcan ajcuiꞌ te̱cꞌul la̱ex aj Nínive. Chanchan texcala̱k nak te̱yal xsicꞌbal bar te̱col e̱rib. Te̱yal raj chic xmukbal e̱rib chiruheb li xicꞌ nequeꞌiloc e̱re.

¹² Chixjunileb li cab li te̱col cuiꞌ e̱rib, yal caꞌchꞌin teꞌtochꞌekꞌ ut junpa̱t teꞌtꞌanekꞌ. Chanchanakeb jun to̱n chi higo nabal li ru. Yal caꞌchꞌin ta̱tochꞌekꞌ lix to̱nal ut li ru ta̱tꞌanekꞌ ut ta̱loꞌekꞌ.

¹³ Le̱ soldado li cuanqueb saꞌ le̱ tenamit chanchanakeb chic li ixk xban nak incꞌaꞌ chic cauhakeb rib. Chanchan nak li oqueba̱l re le̱ tenamit teto chiruheb li xicꞌ nequeꞌiloc e̱re. Cꞌatbil nak teꞌosokꞌ lix puertil li oqueba̱l re le̱ tenamit.

¹⁴ Xocomak nabal le̱ haꞌ re nak yoꞌon cua̱nkex nak teꞌcha̱lk chi pletic e̱riqꞌuin. Yi̱bomak chi us li cab li nequecol cuiꞌ e̱rib. Cꞌamomak chak li seb ut yokꞌimak. Cauresihomak le̱ horno re nak te̱yi̱b nabal li xan.

¹⁵ Cꞌatbil nak tex-osokꞌ saꞌ rukꞌeb li xicꞌ nequeꞌiloc e̱re ut riqꞌuin chꞌi̱chꞌ texcamsi̱k. Chanchan nak na-osoꞌ li acui̱mk xban laj sa̱cꞌ nak texcamsi̱k xbaneb. Usta kꞌaxal nabalex joꞌ laj sa̱cꞌ, abanan tex-osokꞌ saꞌ rukꞌeb.

¹⁶ Kꞌaxal cuiꞌchic nabaleb li nequeꞌchal chi cꞌayi̱nc saꞌ e̱ya̱nk. Chanchan xqꞌuialeb li chahim chiru li choxa. Eb aꞌan chanchanakeb laj sa̱cꞌ li nequeꞌsachoc re li acui̱mk ut nequeꞌxic.

¹⁷ Eb laj cꞌamol be ut li cuanqueb xcuanquil saꞌ le̱ tenamit, ma̱cꞌaꞌ nequeꞌxba̱nu. Chanchaneb laj sa̱cꞌ. Nak que nequeꞌxletzexi rib chiruheb li tzꞌac. Ut nak natikcuoꞌ li sakꞌe, ma̱ ani nanaꞌoc re bar nequeꞌxic.

¹⁸ Ma̱cꞌaꞌ yo̱queb laj ilol reheb la̱ tenamit, at xreyeb laj Asiria. Chanchan junes cua̱rc yo̱queb. Junes hila̱nc nequeꞌxba̱nu li cauheb rib saꞌ la̱ tenamit ut chixjunileb li tenamit quilajeꞌxchaꞌchaꞌi ribeb saꞌ eb li tzu̱l. Ma̱ ani naru nachꞌutuban reheb.

¹⁹ La̱ex aj Nínive, xex-osoꞌ. Ma̱cꞌaꞌ chic xbanol li raylal li yo̱quex chixcꞌulbal. Chixjunileb li teꞌabi̱nk resil li te̱cꞌul, teꞌxpokꞌpokꞌi li rukꞌeb xban xsahil xchꞌo̱leb. Teꞌsahokꞌ saꞌ xchꞌo̱leb nak tex-osokꞌ xban nak kꞌaxal cuiꞌchic nabal li raylal xeba̱nu reheb.