Nahum 2 - Li Santil hu

Ta̱sachekꞌ ruheb laj Nínive

¹ Xeꞌchal saꞌ e̱be̱n li teꞌsachok e̱re, la̱ex aj Nínive. Cauresihomak e̱rib. Qꞌuehomakeb laj ramonel saꞌ eb li be. Qꞌuehomak lix cꞌa̱mal e̱saꞌ ut cauresihomak e̱rib chi pletic.

² Li Ka̱cuaꞌ tixqꞌue cuiꞌchic xlokꞌaleb li ralal xcꞌajol laj Jacob. Tixqꞌue cuiꞌchic xlokꞌaleb laj Israel. Teꞌqꞌuehekꞌ cuiꞌchic xlokꞌal ut xcuanquil li quimakꞌeꞌ chiruheb xbaneb li queꞌnumta saꞌ xbe̱neb. Tixqꞌue cuiꞌchic li racui̱mkeb laj Israel li quisacheꞌ chiruheb.

³ Cak li chꞌi̱chꞌ li nequeꞌxcol cuiꞌ rib li oqueb re chi pletic. Ut cak ajcuiꞌ li rakꞌeb li tikto̱queb cuiꞌ. Ac cauresinbileb re teꞌpletik. Lix carruajeb chanchan yo̱ xxamlel, ut eb lix cacua̱yeb teꞌraj ru xic chi pletic.

⁴ Eb li carruaje yo̱keb chi xic saꞌ a̱nil saꞌ eb li be. Telajeꞌnumekꞌ saꞌ eb li cꞌayil. Yalak bar telajeꞌxic. Chanchanakeb li xam ut chanchanakeb li rakꞌ ca̱k.

⁵ Lix reyeb laj Nínive tixtakla xbokbaleb li nequeꞌcꞌamoc be chiruheb lix soldado. Teꞌxic raj saꞌ a̱nil saꞌ xbe̱n li tzꞌac re raj teꞌxcol li tenamit. Abanan teꞌxtich li rokeb ut telajeꞌtꞌanekꞌ.

⁶ Li puerta li nequeꞌramoc re li nimaꞌ teꞌteli̱k ut ta̱sachekꞌ li palacio.

⁷ Li rixakil li rey ta̱chapekꞌ ut ta̱cꞌamekꞌ joꞌqueb ajcuiꞌ lix mo̱seb. Chanchanakeb li paloma nak teꞌya̱bak. Yo̱keb xtenbal reheb xchꞌo̱l ut yo̱keb chi ya̱bac xban xrahil xchꞌo̱leb.

⁸ Li tenamit Nínive najter chanchan jun li nimaꞌ tzꞌaptzꞌo li rok. Ut nak napuqꞌueꞌ naxic saꞌ junpa̱t li haꞌ. Chanchan nak yo̱ chi e̱lc li haꞌ aꞌan, nak yo̱keb chi e̱lelic saꞌ lix tenamiteb laj Nínive. Usta teꞌyehekꞌ reheb, “Xaklinkex, ut sukꞌinkex chak,” abanan ma̱ jun chic reheb teꞌraj sukꞌi̱c.

⁹ Kacꞌamak li plata. Kacꞌamak li oro. Kꞌaxal cuiꞌchic nabal lix biomaleb ut cꞌajoꞌ xchakꞌal ru.

¹⁰ Ma̱cꞌaꞌ chic cuan saꞌ li tenamit. Xeꞌosoꞌ. Xeꞌcana chi ma̱cꞌaꞌ chic cuan reheb. Sachso̱queb xchꞌo̱leb li cristian ut ma̱cꞌaꞌ chic nequeꞌxyoꞌoni. Nequeꞌsicsot xban xxiuheb ut sakquirineb aj chic.

¹¹ ¿Cꞌaꞌru xcꞌul li tenamit Nínive? Junxil chanchan xnaꞌajeb li cakcoj. X-osoꞌ lix naꞌajeb. ¿Ma incꞌaꞌ ta biꞌ chanchaneb li cakcoj nak queꞌcuan? Eb aꞌan ma̱ ani queꞌxxucua ru ut ma̱ ani naru naseꞌbesin reheb.

¹² Junxil cauheb rib laj Nínive. Queꞌcamsin ut queꞌxba̱nu li joꞌ qꞌuial queꞌraj. Chanchaneb li cakcoj li naxchap lix tib ut naxjeqꞌui re li ixki cakcoj ut reheb li cocꞌ ral. Queꞌnujac lix naꞌajeb riqꞌuin li cꞌaꞌru queꞌxchap. Joꞌcan ajcuiꞌ queꞌxba̱nu eb laj Nínive.

¹³ Li nimajcual Dios quixye: —La̱in tinsach ruheb laj Nínive. Tincꞌat lix carruajeb re pletic. Chanchan nak na-osoꞌ li sib saꞌ ikꞌ, joꞌcan nak teꞌosokꞌ. Riqꞌuin chꞌi̱chꞌ teꞌosokꞌ chixjunileb re nak incꞌaꞌ chic teꞌelkꞌak. Ut incꞌaꞌ chic ta̱abi̱k li cꞌaꞌru teꞌxye li ani teꞌxtakla xban nak ma̱ anihakeb chic.