Miqueas 7 - Li Santil hu

¹ Tokꞌob xak cuu. Chanchanin jun li cui̱nk li naxsicꞌ li ru li acui̱mk saꞌ sakꞌehil abanan ma̱cꞌaꞌ chic ru. Ac sicꞌbil. Xinsicꞌ li ru li uva abanan ac sicꞌbil ajcuiꞌ ut la̱in aꞌ raj li xbe̱n ru xcuaj, abanan incꞌaꞌ chic xintau.

² Ma̱ jun chic li cui̱nk ti̱c xchꞌo̱l saꞌ ruchichꞌochꞌ ut ma̱ ani chic junak cha̱bil. Chixjunileb nequeꞌcamsin ut li junju̱nk nequeꞌxsicꞌ chanru nak ta̱ru̱k teꞌxbalakꞌi li ras ri̱tzꞌin.

³ Se̱beb xchꞌo̱l chixba̱nunquil li incꞌaꞌ us. Li nataklan saꞌ xbe̱neb li tenamit naraj nak ta̱qꞌuehekꞌ xtumin. Ut laj rakol a̱tin natumina̱c ru nak narakoc a̱tin. Li ani cuan xcuanquil naxye reheb cꞌaꞌru naraj ut chixjunileb nequeꞌxcꞌu̱b ru chanru nak teꞌxba̱nu li incꞌaꞌ us.

⁴ Lix cha̱bilaleb li tenamit aꞌan chanchan li qꞌuix. Ut lix ti̱quilal chanchan li corral yi̱banbil riqꞌuin qꞌuix. Cuulac re xkꞌehil nak li Dios tixqꞌueheb chixtojbal rix lix ma̱queb joꞌ queꞌyeheꞌ reheb xbaneb li profeta. Anakcuan sachso̱keb xchꞌo̱l teꞌcana̱k.

⁵ Ma̱ ani aj iqꞌuin te̱cꞌojob e̱chꞌo̱l chi moco riqꞌuin le̱ rami̱g, chi moco riqꞌuin li nataklan saꞌ xbe̱neb li tenamit, chi moco riqꞌuin le̱ rixakil. Cheqꞌuehak retal li cꞌaꞌru te̱ye.

⁶ Eb li alalbej nequeꞌxkꞌetkꞌeti ribeb chiru li yucuaꞌbej. Ut eb li coꞌbej nequeꞌxtzꞌekta̱na li naꞌbej ut eb li alibej incꞌaꞌ nequeꞌxra lix naꞌ lix be̱lomeb. Ut li xicꞌ nequeꞌiloc re junak, aꞌaneb ajcuiꞌ li cuanqueb saꞌ li rochoch.

⁷ Abanan la̱o, caꞌaj cuiꞌ riqꞌuin li Dios toyoꞌoni̱nk. Takacꞌojob kachꞌo̱l riqꞌuin li Ka̱cuaꞌ laj Colol ke. Li kaDios ta̱rabi nak takaya̱ba xcꞌabaꞌ.

Li Dios ta̱ruxta̱na cuiꞌchic ruheb laj Israel

⁸ La̱ex, li xicꞌ nequex-iloc ke, misahoꞌ e̱chꞌo̱l chikilbal nak yo̱co chixcꞌulbal li raylal. Usta totꞌanekꞌ, abanan la̱o tocuacli̱k cuiꞌchic. Usta chanchan nak cua̱nko saꞌ kꞌojyi̱n xban li ma̱c, abanan li Dios tixcutanobresi cuiꞌchic li kabe.

⁹ Xban nak xoma̱cob chiru li Ka̱cuaꞌ tento takacuy lix joskꞌil toj tixtzꞌil a̱tin chikix ut toj ta̱rakok a̱tin saꞌ xbe̱neb li xicꞌ nequeꞌiloc ke. Torisi saꞌ kꞌojyi̱n ut toxqꞌue saꞌ cutan ut riqꞌuin aꞌin takaqꞌue retal nak li Dios ti̱c xchꞌo̱l.

¹⁰ Ut eb li xicꞌ nequeꞌiloc ke teꞌril nak li Dios cuan kiqꞌuin. Teꞌcꞌutekꞌ xxuta̱n li ani queꞌyehoc ke: ¿Bar cuan li Ka̱cuaꞌ le̱ Dios? La̱o takil nak teꞌsachekꞌ li xicꞌ nequeꞌiloc ke. Takil nak teꞌyekꞌi̱k joꞌ nayekꞌi̱c li sulul saꞌ be.

¹¹ Ta̱cuulak xkꞌehil nak ta̱yi̱ba̱k cuiꞌchic li tzꞌac li sutsu cuiꞌ le̱ tenamit ut ta̱nima̱nk le̱ naꞌaj la̱ex li cuanquex Jerusalén.

¹² Saꞌ eb li cutan aꞌan, nabaleb le̱ rech tenamitil teꞌsukꞌi̱k cuiꞌchic saꞌ le̱ tenamit. Cuan teꞌcha̱lk chak saꞌ li naꞌajej Asiria li cuan saꞌ releb sakꞌe. Ut cuan teꞌcha̱lk chak Egipto li cuan saꞌ li sur. Ut cuan cuiꞌchic teꞌcha̱lk chak saꞌ li norte cuan cuiꞌ li nimaꞌ Éufrates, cuan teꞌcha̱lk chak cuan cuiꞌ li palau ut cuan ajcuiꞌ teꞌcha̱lk chak cuanqueb cuiꞌ li tzu̱l.

¹³ Ut xban li ma̱usilal li yo̱quex chixba̱nunquil la̱ex aj Israel, le̱ chꞌochꞌ incꞌaꞌ chic us ta̱cana̱k. Ma̱cꞌaꞌ chic ta̱e̱lk chiru.

¹⁴ At Ka̱cuaꞌ, chacuil taxak la̱ tenamit riqꞌuin la̱ cuanquil, li ac sicꞌbileb ru a̱ban. Ut chaqꞌue taxak li cꞌaꞌruheb re joꞌ nak li cha̱bil aj ilol xul narileb chi us lix carner ut naxqꞌueheb chi cua̱nc saꞌ li tzu̱l cuan cuiꞌ li cha̱bil pachꞌayaꞌ. Chaqꞌueheb cuiꞌchic la̱ cualal a̱cꞌajol chi cua̱nc saꞌ li naꞌajej Basán ut Galaad joꞌ nak queꞌcuan junxil.

¹⁵ Ut chacꞌut ta ajcuiꞌ chiku li sachba chꞌo̱lej joꞌ caba̱nu chak junxil nak coa̱cuisi chak saꞌ li naꞌajej Egipto.

¹⁶ Ut nak teꞌril lix nimal a̱cuanquilal saꞌ xya̱nkeb laj Israel, sachso̱keb xchꞌo̱l teꞌcana̱k li jalaneb xtenamit. Ma̱cꞌaꞌ teꞌxye chi moco teꞌraj rabinquil.

¹⁷ Chanchanakeb li cꞌantiꞌ li naxquelo rib saꞌ li poks nak ta̱cuisi lix cuanquileb. Sicsotkeb xbaneb xxiu teꞌcana̱k cha̱cuu, at Ka̱cuaꞌ at kaDios.

¹⁸ Ma̱ jun chic li Dios cuan. Caꞌaj cuiꞌ la̱at. La̱at nacatcuyuc ma̱c ut nasach saꞌ a̱chꞌo̱l lix ma̱queb la̱ tenamit Israel, li joꞌ qꞌuial chic li incꞌaꞌ queꞌsacheꞌ. La̱at incꞌaꞌ nacatjoskꞌoꞌ chi junaj cua. Nasahoꞌ ban saꞌ a̱chꞌo̱l chi uxta̱na̱nc u.

¹⁹ La̱at ta̱cuuxta̱na cuiꞌchic ku ut incꞌaꞌ chic ta̱nak saꞌ a̱chꞌo̱l li kama̱c. Chanchan cutbil saꞌ xchꞌamal li palau ta̱ba̱nu nak ta̱tzꞌekta̱na chi junaj cua li kama̱usilal.

²⁰ La̱at toa̱cuosobtesi joꞌ cayechiꞌi re laj Jacob, li kaxeꞌto̱nil yucuaꞌ. La̱at ta̱cuuxta̱na cuiꞌchic ku joꞌ cayechiꞌi re laj Abraham li kaxeꞌto̱nil yucuaꞌ najter kꞌe cutan.