Miqueas 3 - Li Santil hu

Quiyeheꞌ reheb li nequeꞌcꞌamoc be saꞌ li tenamit nak incꞌaꞌ us yo̱queb

¹ Ut quixye laj Miqueas: —Abihomak anakcuan la̱ex li nequexcꞌamoc be saꞌ xya̱nkeb li ralal xcꞌajol laj Jacob. Abihomak la̱ex li cuan e̱cuanquil saꞌ xya̱nkeb li ralal xcꞌajol laj Israel. ¿Ma incꞌaꞌ ta biꞌ tento ajcuiꞌ saꞌ e̱be̱n la̱ex xtaubal ru li ti̱quilal?

² La̱ex nequera li incꞌaꞌ us ut nequetzꞌekta̱na li us. La̱ex nequexrahobtesin reheb lin tenamit. Chanchan nak nequerisi lix tzꞌu̱maleb chiru lix tibeleb ut nequerisi lix tibeleb chiru lix bakeleb nak nequerahobtesiheb.

³ Chanchan nak nequetiu ajcuiꞌ lix tibeleb lin tenamit nak nequerahobtesiheb. Nequerisi lix tzꞌu̱maleb, nequejori lix bakeleb ut nequeseti lix tibeleb joꞌ nak naseteꞌ li tib re xqꞌuebal saꞌ ucꞌal.

⁴ Te̱ya̱ba raj chic xcꞌabaꞌ li Ka̱cuaꞌ, abanan aꞌan incꞌaꞌ chic texsume. Xmukbal ban chic rib tixba̱nu che̱ru saꞌ eb li cutan aꞌan, xban nak numtajenak li ma̱usilal ac xeba̱nu.

⁵ Joꞌcaꞌin quixye li Ka̱cuaꞌ chirixeb li profeta li nequeꞌqꞌuehoc reheb lin tenamit chi ma̱cobc: —Tuktu̱quil usilal nequeꞌxtzꞌa̱ma saꞌ xbe̱neb li nequeꞌqꞌuehoc xcuaheb. Ut raylal nequeꞌxtzꞌa̱ma saꞌ xbe̱neb li ani incꞌaꞌ nequeꞌqꞌuehoc xcuaheb.

⁶ Joꞌcan ut naxye li Ka̱cuaꞌ reheb li profeta: —Ta̱cuulak xkꞌehil nak incꞌaꞌ chic ta̱ru̱k te̱ye ra̱tin profeta chi moco ta̱ru̱k chic texkꞌehi̱nk. Ta̱cuulak xkꞌehil nak incꞌaꞌ chic tincꞌutbesi che̱ru cꞌaꞌru ta̱cꞌulma̱nk. Ta̱kꞌojyi̱nokꞌ ru le̱ naꞌleb ut incꞌaꞌ chic texyehok ra̱tin profeta xban nak xebalakꞌi lin tenamit, chan li Ka̱cuaꞌ.

⁷ Quixye ajcuiꞌ laj Miqueas: —Xuta̱nal teꞌxcꞌul li teꞌoc raj xyebal li cꞌaꞌru ta̱cꞌulma̱nk. Ut talajeꞌsachk xnaꞌlebeb laj kꞌe. Ma̱cꞌaꞌ chic ta̱ru̱k teꞌxye xban nak incꞌaꞌ chic teꞌsume̱k xban li Ka̱cuaꞌ Dios.

⁸ Abanan la̱in cuan lix musikꞌ li Ka̱cuaꞌ cuiqꞌuin. Ut aꞌan naqꞌuehoc incuanquil. Aꞌan nacꞌutuc chicuu cꞌaꞌru li ti̱quilal ut aꞌan li naqꞌuehoc xcacuil inchꞌo̱l re nak tinye reheb laj Israel li ralal xcꞌajol laj Jacob nak yo̱queb chixtzꞌekta̱nanquil li Dios. Ut naxqꞌue ajcuiꞌ xcacuil inchꞌo̱l re nak tinye reheb nak cuan xma̱queb.

⁹ Abihomak li oc cue xyebal e̱re la̱ex li nequexcꞌamoc be chiruheb laj Israel li ralal xcꞌajol laj Jacob. Abihomak la̱ex li cuan e̱cuanquil saꞌ xya̱nkeb. La̱ex xicꞌ nequeril li ti̱quilal ut nequesukꞌisi li us chokꞌ ma̱usilal.

¹⁰ La̱ex nequeraj xtaksinquil xcuanquil li tenamit Sión riqꞌuin li camsi̱nc nequeba̱nu. Nequeraj xnimobresinquil xcuanquil li tenamit Jerusalén riqꞌuin xba̱nunquil li cꞌaꞌak re ru moco us ta.

¹¹ Eb laj rakol a̱tin nequeꞌtumina̱c ruheb nak nequeꞌrakoc a̱tin. Ut eb laj tij tojbileb nak nequeꞌxcꞌut li chakꞌrab chiruheb li tenamit. Ut eb li profeta nequeꞌyehoc ra̱tin profeta re nak teꞌxcꞌul lix tumineb. Ut chixjunileb nequeꞌxcꞌojob xchꞌo̱l chixyebal: —Li Ka̱cuaꞌ cuan kiqꞌuin. La̱o ma̱cꞌaꞌ raylal takacꞌul, chanqueb.

¹² Joꞌcan utan xban li ma̱usilal li yo̱quex chixba̱nunquil, li naꞌajej Sión ta̱becma̱nk chokꞌ xnaꞌaj li acui̱mk. E̱ma̱c la̱ex nak ta̱juqꞌuekꞌ li ni̱nki cab li cuanqueb Jerusalén. Ut li tzu̱l li cuan cuiꞌ li templo ta̱cana̱k joꞌ li tzu̱l qꞌuicheꞌ ru.