Miqueas 2 - Li Santil hu

Raylal ta̱cha̱lk saꞌ xbe̱neb li nequeꞌrahobtesin reheb li nebaꞌ

¹ Raylal ta̱cha̱lk saꞌ xbe̱neb li nequeꞌxcꞌoxla saꞌ lix cuariba̱l chanru teꞌxba̱nu li ma̱usilal. Nequeꞌxcꞌu̱b ru li xi̱qꞌuilal ut nak nasake̱u, nequeꞌxba̱nu li cꞌaꞌru nequeꞌxcꞌoxla xba̱nunquil xban nak cuanqueb xcuanquil.

² Nequeꞌxrahi ru li chꞌochꞌ jalan aj e toj retal nequeꞌxmakꞌ chiruheb. Ut nequeꞌxmakꞌ li rochocheb ut nequeꞌxcꞌam chokꞌ reheb. Nequeꞌxrahobtesi laj e̱chal re joꞌqueb ajcuiꞌ li ralal xcꞌajol ut nequeꞌxcꞌam chixjunil li cꞌaꞌru cuan reheb.

³ Joꞌcan nak quixye li Ka̱cuaꞌ: —La̱in tintakla li raylal saꞌ e̱be̱n. Ut incꞌaꞌ ta̱ru̱k te̱col e̱rib chi moco te̱nimobresi chic e̱rib xban nak tintakla li raylal saꞌ e̱be̱n.

⁴ Ut saꞌ eb li cutan aꞌan, eb li xicꞌ nequeꞌiloc e̱re texhob ut texretzꞌu ut teꞌxbicha li bich li nequebicha la̱ex yal re e̱hobbal: La̱o xo-osoꞌ. Xkasach chixjunil. Li Ka̱cuaꞌ quixmakꞌ chiku li kachꞌochꞌ ut quixjeqꞌui reheb li queꞌchapoc ke, chaꞌkeb e̱re.

⁵ Laj Miqueas quia̱tinac cuiꞌchic riqꞌuineb laj Israel ut quixye reheb: —Ta̱cuulak xkꞌehil nak li Dios tixjeqꞌui cuiꞌchic li chꞌochꞌ, ut la̱ex ma̱cꞌaꞌ textzꞌak xban li ma̱usilal yo̱quex chixba̱nunquil.

⁶ Eb li tenamit nequeꞌxye cue: —Mat-a̱tinac chi joꞌcan. Ma̱ye ke ra̱tin profeta. Li Dios incꞌaꞌ tixcꞌut kaxuta̱n.

⁷ ¿Ma nacacꞌoxla nak li Dios toxtzꞌekta̱na la̱o aj Israel? ¿Ma tixba̱nu ta biꞌ chi joꞌcan li Ka̱cuaꞌ? Aꞌan junelic naxtenkꞌaheb li ralal xcꞌajol, chanqueb.

⁸ Li Ka̱cuaꞌ quixye reheb: —Junxil la̱ex intenamit, abanan anakcuan xicꞌ chic niquine̱ril. Xemakꞌ li rakꞌeb li yo̱queb chi numecꞌ saꞌ xya̱lal, li incꞌaꞌ nequeꞌxcꞌoxla pletic.

⁹ Eb li ixk li cuanqueb saꞌ lin tenamit xera̱linaheb nak xerisiheb saꞌ li rochocheb li cuanqueb cuiꞌ chi sa saꞌ xchꞌo̱leb. Ut xeram ajcuiꞌ chiruheb lix cocꞌaleb re nak incꞌaꞌ chic tineꞌxlokꞌoni.

¹⁰ Cuaclinkex ut ayukex xban nak li naꞌajej aꞌin incꞌaꞌ chic ta̱usa̱k. Xban li ma̱usilal nequeba̱nu, li naꞌajej aꞌin ta̱sachekꞌ.

¹¹ Eb li tenamit aꞌin nequeꞌraj junak profeta aj balakꞌ. Nequeꞌraj junak li profeta ta̱ticꞌtiꞌik ut tixye reheb: —La̱in tinyehok e̱re nak ta̱cua̱nk nabal li vino ut li trau chokꞌ e̱re, chaꞌak. Aꞌan li te̱raj rabinquil.

¹² Chi ya̱l la̱in texinxoc cuiꞌchic la̱ex aj Israel ut tinchꞌutub cuiꞌchic e̱ru li joꞌ qꞌuialex chic li xexcoleꞌ. Chanchanakex li carner li cuanqueb aran Bosra nak texinqꞌue cuiꞌchic saꞌ li naꞌajej li quinqꞌue e̱re junxil. Ut texqꞌuia̱nk toj retal ta̱nujak cuiꞌchic li naꞌajej, chan li Ka̱cuaꞌ.

¹³ Li Ka̱cuaꞌ Dios ta̱colok reheb chiruheb li tenamit li queꞌnumta saꞌ xbe̱neb. Chanchan nak yo̱ chixtebal li be chiruheb nak ta̱risiheb saꞌ xya̱nkeb li xicꞌ nequeꞌiloc reheb. Ut li Ka̱cuaꞌ, aꞌan ta̱cꞌamok be chiruheb ut aꞌanak lix reyeb.