Miqueas 1 - Li Santil hu

Ta̱rakekꞌ a̱tin saꞌ xbe̱neb laj Israel ut eb laj Judá

¹ Li Ka̱cuaꞌ quia̱tinac riqꞌuin laj Miqueas aj Moreset ut quixcꞌutbesi chiru cꞌaꞌru teꞌxcꞌul eb li tenamit Samaria ut Jerusalén. Aꞌin quicꞌulman saꞌ eb li cutan nak queꞌcuan chokꞌ xreyeb laj Judá laj Jotam ut laj Acaz ut laj Ezequías.

² Ut nak qui-oc chixyebal li cꞌaꞌru quiyeheꞌ re xban li Dios laj Miqueas quixye chi joꞌcaꞌin: —Cherabihak che̱junilex la̱ex li cuanquex saꞌ ruchichꞌochꞌ. Cheqꞌuehak retal li naxye li Ka̱cuaꞌ. Li nimajcual Dios ta̱a̱tinak chak saꞌ lix santil naꞌaj ut aꞌan ta̱yehok re nak cuan e̱ma̱c.

³ Li Ka̱cuaꞌ ta̱e̱lk chak saꞌ lix santil naꞌaj ut ta̱cha̱lk chi rakoc a̱tin saꞌ e̱be̱n ut ta̱be̱k saꞌ xbe̱neb li tzu̱l.

⁴ Ut nak ta̱be̱k saꞌ xbe̱neb li tzu̱l, telajeꞌhaꞌokꞌ li tzu̱l xban. Chanchan nak nahaꞌoꞌ li cera xban li xam. Nak teꞌhaꞌokꞌ li tzu̱l, teꞌhoyekꞌ. Chanchanak li haꞌ li na-el chak saꞌ tzu̱l.

⁵ Chixjunil aꞌin ta̱cꞌulma̱nk xban li ma̱c li yo̱queb chixba̱nunquil laj Israel, li ralal xcꞌajol laj Jacob, ut xban nak queꞌxkꞌetkꞌeti ribeb chiru li Dios. ¿Ani cuan re nak queꞌxkꞌetkꞌeti ribeb laj Israel? ¿Ma ma̱cuaꞌ ta biꞌ li tenamit Samaria? Ut, ¿ani cuan re nak queꞌxlokꞌoni li yi̱banbil dios aran Judá? ¿Ma ma̱cuaꞌ ta biꞌ li tenamit Jerusalén?

⁶ Joꞌcan nak quixye li Ka̱cuaꞌ: —La̱in tinsach ru chixjunil li cꞌaꞌru cuan reheb laj Samaria ut tincanab li naꞌajej aꞌan chokꞌ xnaꞌaj li acui̱mk uvas. Tinjucꞌ li tzꞌac li sutsu cuiꞌ li tenamit joꞌqueb ajcuiꞌ li rochocheb ut li pec li ta̱e̱lk saꞌ li cimiento tincuteb saꞌ takꞌa.

⁷ Ut chixjunil lix yi̱banbil dios tinpuqꞌuiheb. Ut tincꞌat chixjunil li qꞌuebil reheb li ixk aj yumbe̱t, li queꞌcꞌanjelac chiru lix dioseb. Tinsacheb ru chixjunileb lix yi̱banbil dios. Jalan xtenamiteb quicꞌutuc chiruheb xlokꞌoninquil li jalanil dios ut anakcuan jalan chic xtenamiteb ta̱makꞌok chiruheb lix dioseb joꞌ ajcuiꞌ lix biomaleb li ixk aj yumbe̱t li queꞌcꞌanjelac chiru lix dioseb, chan li Dios.

⁸ Ut quixye cuiꞌchic laj Miqueas: —Cꞌajoꞌ narahoꞌ inchꞌo̱l xban li ma̱usilal yo̱queb chixba̱nunquil laj Israel. Tinjap cue xban xrahil inchꞌo̱l ut tinya̱bak. Re xcꞌutbal chiruheb li tenamit nak kꞌaxal ra saꞌ inchꞌo̱l tincuisi lin xa̱b ut tincuisi li cuakꞌ. Chanchan nak nacuuꞌteꞌec laj xoj ut chanchan nak naya̱bac li cuarom nak tinya̱bak chi cau.

⁹ Xban li ma̱usilal li yo̱queb chixba̱nunquil laj Samaria, chanchan nak cuan jun xtochꞌolal yo̱ chi kꞌa̱c. Ma̱cꞌaꞌ xbanol. Ut xbon rib li ma̱usilal riqꞌuineb li ralal xcꞌajol laj Judá. Joꞌcan nak teꞌosokꞌ ut teꞌosokꞌ ajcuiꞌ lin tenamit li cuanqueb Jerusalén. Ma̱cꞌaꞌ xjalenquil. Cha̱lc re li rakba a̱tin saꞌ xbe̱neb chixjunileb.

¹⁰ Me̱ye resil aran Gat li raylal yo̱co chixcꞌulbal ut mexya̱bac chic. Tolcꞌosimak ban e̱rib saꞌ poks aran Bet-le-afra.

¹¹ La̱ex li cuanquex aran Safir, ta̱cꞌutekꞌ e̱xuta̱n nak texchapekꞌ ut texcꞌamekꞌ chi tꞌustꞌu̱quex. La̱ex li cuanquex Zaanán incꞌaꞌ chic tex-e̱lk saꞌ le̱ tenamit xban e̱xiu. Ut la̱ex li cuanquex Bet-esel, texya̱bak xban nak ma̱ ani chic ta̱tenkꞌa̱nk e̱re.

¹² Eb li cuanqueb aran Marot nequeꞌraj raj nak ta̱cotzk li raylal li yo̱queb chixcꞌulbal. Abanan canabanbileb xban li Ka̱cuaꞌ chixcꞌulbal li raylal ut cha̱lc ajcuiꞌ re saꞌ xbe̱neb li cuanqueb Jerusalén.

¹³ La̱ex li cuanquex Laquis, qꞌuehomak le̱ cacua̱y li nequeꞌa̱linac chi cau chixquelonquil li carruaje. Te̱yal e̱lelic re te̱col e̱rib chiru li raylal cha̱lc re saꞌ e̱be̱n xban nak la̱ex quexcꞌamoc xbeheb laj Jerusalén chintzꞌekta̱nanquil ut chixlokꞌoninquil jalanil dios joꞌ queꞌxba̱nu laj Israel.

¹⁴ Joꞌcan nak te̱chakꞌrabi li naꞌajej Moreset-gat, la̱ex li ralal xcꞌajol laj Judá, xban nak ta̱makꞌekꞌ che̱ru. Ut eb li cuanqueb saꞌ li tenamit Aczib teꞌxbalakꞌiheb lix reyeb laj Israel ut incꞌaꞌ teꞌxtenkꞌaheb joꞌ queꞌxyechiꞌi reheb junxil.

¹⁵ Ut la̱ex li cuanquex Maresa, li Ka̱cuaꞌ ta̱canaba̱nk e̱re chi chapecꞌ xbaneb li xicꞌ nequeꞌiloc e̱re. Ut eb li nequeꞌcꞌamoc be che̱ru teꞌe̱lelik ut teꞌxmuk ribeb saꞌ li naꞌajej Adulam.

¹⁶ La̱ex li cuanquex Judá nak te̱bes le̱ rismal jobil te̱ba̱nu. Tꞌuruꞌ ta̱cana̱k joꞌ xjolom li tꞌiu. Te̱ba̱nu aꞌan chokꞌ retalil xrahil e̱chꞌo̱l xban nak le̱ cocꞌal li raro̱queb e̱ban teꞌchapekꞌ ut teꞌcꞌamekꞌ saꞌ jalan tenamit.