San Mateo 9 - Li Santil hu

Li Jesús quixqꞌuirtesi jun li sic aran Capernaum

¹ Ut li Jesús qui-oc cuiꞌchic saꞌ jun li jucub ut quikꞌaxon jun pacꞌal li palau ut quicuulac saꞌ lix tenamit.

² Ut aran queꞌxcꞌam riqꞌuin li Jesús jun li cui̱nk sic li rok ut sic li rukꞌ yocyo chiru xcuarib. Ut li Jesús quixqꞌue retal nak eb li cui̱nk aꞌan nequeꞌxpa̱b nak naru tixqꞌuirtesi li yaj. Joꞌcan nak quixye re li yaj: —At cui̱nk cauhak taxak a̱chꞌo̱l. Ac xcuyman xsachman la̱ ma̱c.—

³ Ut cuanqueb junju̱nk saꞌ xya̱nkeb laj tzꞌi̱b yo̱queb chixyebal saꞌ xchꞌo̱leb: —Li cui̱nk aꞌin naxjuntakꞌe̱ta rib riqꞌuin li Dios, chanqueb.

⁴ Li Jesús ac naxnau li cꞌaꞌru yo̱queb chixcꞌoxlanquil ut quixye reheb: —¿Cꞌaꞌut nak yo̱quex chixcꞌoxlanquil li incꞌaꞌ us?

⁵ ¿Bar cuan li us tinye re li yaj re nak ta̱cꞌutu̱nk che̱ru nak cuan incuanquil? ¿Ma tinye re, “Cuybil sachbil la̱ ma̱c” malaj ut tinye re, “Cuaclin ut be̱n”?

⁶ La̱in tincꞌut che̱ru nak la̱in li Cristo li Cꞌajolbej ut cuan incuanquil saꞌ ruchichꞌochꞌ chixcuybal xsachbal li ma̱c, chan. Joꞌcan nak quixye re li yaj: —Cuaclin, cꞌam la̱ chꞌa̱t ut ayu saꞌ la̱ cuochoch, chan.

⁷ Tojoꞌnak quicuacli li cui̱nk ut co̱ saꞌ rochoch.

⁸ Nak li qꞌuila tenamit queꞌril li quicꞌulman, queꞌxucuac ut queꞌxqꞌue xlokꞌal li Dios li quiqꞌuehoc chak xcuanquil li Jesús chi qꞌuirtesi̱nc ut chi cuyuc ma̱c.

Nak quibokeꞌ laj Mateo xban li Jesús

⁹ Ut li Jesús qui-el aran Capernaum ut quinumeꞌ saꞌ li naꞌajej bar nequeꞌcꞌuluc cuiꞌ toj. Quiril jun li cui̱nk aj Mateo xcꞌabaꞌ. Cꞌojcꞌo aran xban nak aꞌan aj titzꞌol toj. Ut li Jesús quixye re: —China̱ta̱ke.— Ut laj Mateo quicuacli ut quixta̱ke.

¹⁰ Ut chirix aꞌan li Jesús co̱ saꞌ li rochoch laj Mateo chi cuaꞌac. Cꞌojcꞌo saꞌ me̱x rochbeneb lix tzolom nak queꞌcuulac nabaleb laj titzꞌol toj rochbeneb nabaleb chic li rech aj ma̱quil. Ut queꞌcꞌojla saꞌ me̱x chi cuaꞌac rochben li Jesús.

¹¹ Ut nak queꞌril aꞌan, eb laj fariseo queꞌxye reheb lix tzolom li Jesús: —¿Cꞌaꞌut nak nacuaꞌac laj tzolol e̱re rochbeneb laj titzꞌol toj ut rochbeneb laj ma̱c? chanqueb.

¹² Nak quirabi li cꞌaꞌru quipatzꞌeꞌ reheb lix tzolom, li Jesús quixye: —Li cauheb ma̱cꞌaꞌ na-oc cuiꞌ aj banonel reheb. Aban li yajeb, aꞌaneb li teꞌraj banecꞌ.

¹³ Cheqꞌuehak biꞌ e̱chꞌo̱l chixtaubal ru lix ya̱lal li a̱tin aꞌin: “li kꞌaxal lokꞌ chicuu, aꞌan li uxta̱na̱nc u ut ma̱cuaꞌ li mayejac xul”. La̱in incꞌaꞌ xinchal chixsicꞌbal li ti̱queb xchꞌo̱l. Xinchal ban chixsicꞌbaleb laj ma̱c re nak teꞌyotꞌekꞌ xchꞌo̱l teꞌxjal xcꞌaꞌux, chan li Jesús.

Li Jesús quixchꞌolob xya̱lal li ayunic

¹⁴ Ut queꞌcuulac lix tzolom laj Juan riqꞌuin li Jesús ut queꞌxye re: —La̱o nakaba̱nu ka-ayu̱n rajlal ut eb laj fariseo nequeꞌxba̱nu x-ayu̱n. ¿Cꞌaꞌut nak la̱ tzolom incꞌaꞌ nequeꞌxba̱nu x-ayu̱n? chanqueb.

¹⁵ Ut li Jesús quichakꞌoc ut quixye reheb li tijleb aꞌin: —¿Ma naru ta biꞌ nak rahak saꞌ xchꞌo̱leb li nequeꞌbokeꞌ riqꞌuin sumla̱c nak toj cuan li be̱lomej saꞌ xya̱nkeb? La̱in joꞌ jun li be̱lomej. Ta̱cuulak xkꞌehil nak tin-isi̱k saꞌ xya̱nkeb tojoꞌnak teꞌxba̱nu x-ayu̱n eb lin tzolom, chan.

Li najter naꞌleb incꞌaꞌ naxcꞌam rib riqꞌuin li acꞌ naꞌleb

¹⁶ Ma̱ ani naxxi̱ti junak kꞌel tꞌicr riqꞌuin acꞌ tꞌicr. Cui ut naxxi̱ti riqꞌuin acꞌ tꞌicr nak tixpuchꞌ, ta̱cꞌosk li acꞌ tꞌicr ut naxnimobresi xpejelal li kꞌel tꞌicr.

¹⁷ Ut ma̱ ani naqꞌuehoc acꞌ vino saꞌ li kꞌel bo̱ls tzꞌu̱m. Cui tixqꞌue li acꞌ vino saꞌ li kꞌel bo̱ls tzꞌu̱m, ta̱puqꞌuekꞌ li kꞌel tzꞌu̱m, ta̱hoyekꞌ li vino, ut ta̱osokꞌ ajcuiꞌ li bo̱ls tzꞌu̱m. Li acꞌ vino saꞌ acꞌ bo̱ls tzꞌu̱m naqꞌueman. Chi joꞌcan ma̱cꞌaꞌ nasachman, chan li Jesús.

Li Jesús quixyoꞌobtesi cuiꞌchic lix rabin laj Jairo

¹⁸ Nak yo̱ chixyebal li cꞌaꞌak re ru aꞌin reheb, quicuulac riqꞌuin jun li cui̱nk xcomoneb li xbe̱nil saꞌ li cab li nequeꞌxchꞌutub cuiꞌ ribeb laj judío. Quixcuikꞌib rib chiru li Jesús ut quixye re: —Lin rabin tojeꞌ ta̱ca̱mk. Tatxic taxak ut ta̱qꞌue raj la̱ cuukꞌ saꞌ xbe̱n, ut ta̱yoꞌla̱k raj cuiꞌchic, chan.

¹⁹ Quicuacli li Jesús ut co̱ chirix rochbeneb lix tzolom.

²⁰ Ut cuan jun li ixk cablaju chihab xticlajic xyajel. Junelic yo̱ lix yajel li ixk aꞌan ut incꞌaꞌ chic natzꞌap lix quiqꞌuel. Quijiloc chixcꞌatk li Jesús nak yo̱ chi xic, ut quixchꞌeꞌ li rakꞌ.

²¹ Usta caꞌaj cuiꞌ li rakꞌ tinchꞌeꞌ, tinqꞌuira̱k, chan saꞌ xchꞌo̱l li ixk.

²² Ut li Jesús quixakli ut qui-iloc chirix. Quiril li ixk ut quixye re: —Kanaꞌ, cauhak taxak a̱chꞌo̱l. Xban nak xapa̱b nak cuan incuanquil cha̱qꞌuirtesinquil, joꞌcan nak xatqꞌuira, chan. Ut saꞌ ajcuiꞌ li ho̱nal aꞌan, li ixk quiqꞌuira.

²³ Chirix chic aꞌan li Jesús co̱ saꞌ rochoch laj Jairo. Nak quicuulac saꞌ li rochoch, quirileb li yo̱queb chixya̱basinquil li xo̱lb ut li japjo̱queb re chi ya̱bac xban xcamic li xkaꞌal.

²⁴ Ut quixye reheb: —Elenkex arin. Li xkaꞌal aꞌin yal cua̱rc yo̱. Moco camenak ta, chan reheb. Ut li tenamit queꞌoc chixseꞌenquil.

²⁵ Ut nak ac xrisiheb li tenamit chirix cab, li Jesús qui-oc cuan cuiꞌ li xkaꞌal ut quixchap chi rukꞌ ut li xkaꞌal quicuacli cuiꞌchic chi yoꞌyo.

²⁶ Ut li cꞌaꞌru quixba̱nu li Jesús, qui-el resil saꞌ chixjunil li naꞌajej aꞌan.

Li Jesús quixqꞌue chi iloc li cuib chi mutzꞌ

²⁷ Ut nak qui-el aran li Jesús, cuib li mutzꞌ yo̱queb chi ta̱ke̱nc re ut japjo̱queb re chixyebal: —Chacuuxta̱na taxak ku, at ralal xcꞌajol li rey David.—

²⁸ Nak ac x-oc li Jesús saꞌ li cab, queꞌoc ajcuiꞌ li mutzꞌ riqꞌuin ut li Jesús quixye: —¿Ma nequepa̱b nak cuan incuanquil che̱qꞌuirtesinquil? chan reheb. Ut eb aꞌan queꞌchakꞌoc ut queꞌxye: —Nakapa̱b, Ka̱cuaꞌ.—

²⁹ Tojoꞌnak li Jesús quixchꞌeꞌ li xnakꞌ ruheb ut quixye: —Chanru nak xepa̱b, joꞌcan ajcuiꞌ nak chi-uxk li cꞌaꞌru te̱raj.—

³⁰ Ut queꞌiloc li xnakꞌ ruheb. Ut li Jesús quixye reheb: —Cherabi chi us li cꞌaꞌru tinye e̱re. Ma̱ ani aj iqꞌuin te̱serakꞌi li cꞌaꞌru xecꞌul, chan reheb.

³¹ Caꞌaj cuiꞌ tzꞌakal queꞌel aran nak queꞌoc chixserakꞌinquil resil saꞌ chixjunil li naꞌajej aꞌan li cꞌaꞌru quixba̱nu li Jesús reheb.

Li Jesús quixqꞌuirtesi li cui̱nk mem

³² Tojeꞌ ajcuiꞌ teꞌe̱lk eb aꞌan nak quicꞌameꞌ chak riqꞌuin li Jesús jun li cui̱nk mem. Cuan ma̱us aj musikꞌej riqꞌuin.

³³ Li Jesús quirisi li ma̱us aj musikꞌej riqꞌuin ut li cui̱nk qui-oc chi a̱tinac. Cꞌajoꞌ nak queꞌsach xchꞌo̱l li tenamit ut queꞌxye: —Ma̱ jun cua kilom aꞌin saꞌ li katenamit Israel.—

³⁴ Aban eb laj fariseo queꞌxye: —Riqꞌuin xcuanquil laj tza narisiheb li ma̱us aj musikꞌej li cui̱nk aꞌan, chanqueb.

Li Jesús quiril xtokꞌoba̱l ruheb li tenamit

³⁵ Ut li Jesús yo̱ xbeninquil saꞌ eb li tenamit junju̱nk ut saꞌ eb ajcuiꞌ li cꞌaleba̱l. Quixcꞌut lix ya̱lal chiruheb saꞌ li cab li nequeꞌxchꞌutub cuiꞌ ribeb laj judío ut quixchꞌolob xya̱lal lix nimajcual cuanquilal li Dios chiruheb. Ut yo̱ chixqꞌuirtesinquil chixjunil li qꞌuila pa̱y chi yajel ut li raylal.

³⁶ Ut nak quirileb li qꞌuila tenamit, quixtokꞌobaheb ru xban nak tacuajenakeb ut raheb saꞌ xchꞌo̱l. Chanchaneb li carner li ma̱cꞌaꞌ aj ilol reheb.

³⁷ Tojoꞌnak quixye reheb lix tzolom, —Relic chi ya̱l nabaleb li incꞌaꞌ nequeꞌxnau lix ya̱lal. Abanan moco qꞌuiheb ta li teꞌxye lix ya̱lal reheb. Chanchaneb li ru li acui̱mk li ma̱cꞌaꞌ aj sicꞌol re.

³⁸ Joꞌcan ut tinye e̱re nak te̱tzꞌa̱ma chiru li Ka̱cuaꞌ re nak aꞌan tixtaklaheb laj cꞌanjel chixchꞌolobanquil lix ya̱lal chiruheb, chan li Jesús.