San Mateo 8 - Li Santil hu

Li Jesús quixqꞌuirtesi jun li saklep rix

¹ Nak quicube chak li Jesús chiru li tzu̱l, quita̱ke̱c xbaneb li qꞌuila tenamit.

² Ut quichal jun li saklep rix ut quixcuikꞌib rib chiru li Jesús ut quixye re: —Ka̱cuaꞌ, la̱in ninnau nak la̱at naru tina̱qꞌuirtesi. Cui ta̱ba̱nu li usilal, china̱qꞌuirtesi, chan.

³ Li Jesús quixyeꞌ li rukꞌ, quixchꞌeꞌ li cui̱nk ut quixye re: —Nacuaj a̱qꞌuirtesinquil. Anakcuan tatinqꞌuirtesi, chan. Ut saꞌ junpa̱t quiqꞌuira li saklep rix.

⁴ Tojoꞌnak li Jesús quixye re: —Abi li tinye a̱cue. Ma̱ ani aj e ta̱serakꞌi li xacꞌul. Ayu ban ut cꞌut a̱cuib chiru laj tij. Ut ta̱qꞌue li mayej joꞌ naxye saꞌ lix chakꞌrab laj Moisés re xcꞌutbal chiruheb nak xatqꞌuira.— (Lev. 13:49)

Li Jesús quixqꞌuirtesi lix mo̱s jun li capitán

⁵ Ut nak quicuulac li Jesús aran Capernaum, quichal jun li capitán aj Roma riqꞌuin. Quixtzꞌa̱ma usilal chiru ut quixye re:

⁶ —Ka̱cuaꞌ, lin mo̱s tꞌantꞌo saꞌ cab. Sic ut kꞌaxal ra cuan, chan.

⁷ Li Jesús quichakꞌoc ut quixye re: —Tinxic la̱in ut toxinqꞌuirtesi.—

⁸ Li capitán quixye re li Jesús: —Ka̱cuaꞌ, moco incꞌulub ta nak tatxic saꞌ li cuochoch. Caꞌaj cuiꞌ nacuaj nak ta̱ye nak ta̱qꞌuira̱k lin mo̱s ut ninnau nak ta̱qꞌuira̱k.

⁹ La̱in ninnau nak naru ta̱ba̱nu aꞌan xban nak la̱in cuan ani nataklan cue ut cuanqueb lin soldado rubel lin cuanquil. Ut ninye re li jun, “ayu” ut naxic. Ut ninye re li jun chic, “quim”, ut nachal. Ut ninye re lin mo̱s, “ba̱nu aꞌin”, ut naxba̱nu, chan li capitán.

¹⁰ Ut nak li Jesús quirabi li quixye, quisach xchꞌo̱l ut quixye reheb li yo̱queb chi ochbeni̱nc re: —Relic chi ya̱l tinye e̱re nak ma̱ jun intauhom chi moco saꞌ xya̱nkeb laj Israel tzꞌakal re ru xpa̱ba̱l joꞌ li jun aꞌin, usta ma̱cuaꞌ aj judío.

¹¹ Ut la̱in tinye e̱re nak nabaleb li ma̱cuaꞌeb aj judío yalak bar saꞌ ruchichꞌochꞌ teꞌpa̱ba̱nk. Ut eb aꞌan teꞌe̱chani̱nk re lix nimajcual cuanquilal li Dios rochbeneb laj Abraham, laj Isaac, ut laj Jacob.

¹² Aꞌut nabaleb laj judío li teꞌe̱chani̱nk raj re lix nimajcual cuanquilal li Dios, eb aꞌan chic li teꞌisi̱k ut teꞌqꞌuehekꞌ saꞌ li kꞌojyi̱n. Ut aran ta̱cua̱nk li ya̱bac ut li cꞌuxuxi̱nc ruch e, chan li Jesús reheb li tenamit.

¹³ Tojoꞌnak li Jesús quixye re li capitán: —Ayu saꞌ la̱ cuochoch. Chanru nak xapa̱b, joꞌcan ajcuiꞌ nak chi-uxk li cꞌaꞌru xatzꞌa̱ma, chan. Ut saꞌ ajcuiꞌ li ho̱nal aꞌan quiqꞌuira lix mo̱s li capitán.

Li Jesús quixqꞌuirtesi xnaꞌ li rixakil laj Pedro

¹⁴ Ut quicuulac li Jesús saꞌ rochoch laj Pedro. Ut aran quixtau lix naꞌ li rixakil laj Pedro yocyo saꞌ xchꞌa̱t ut yo̱ xtik.

¹⁵ Ut li Jesús quixchap li rukꞌ ut quinumeꞌ lix tik. Ut aꞌan quicuacli, ut quicꞌanjelac chiru.

¹⁶ Nak ac oc re li kꞌojyi̱n, nabaleb li cristian queꞌcꞌameꞌ chak riqꞌuin li Jesús. Cuanqueb ma̱us aj musikꞌej riqꞌuineb. Ut yal riqꞌuin ra̱tin, li Jesús quirisi li ma̱us aj musikꞌej riqꞌuineb, ut quixqꞌuirtesi chixjunileb li yaj.

¹⁷ Aꞌin quicꞌulman joꞌ quixye li profeta Isaías, nak quixye chi joꞌcaꞌin: Aꞌan quicꞌamoc re li kayajel, ut aꞌan quicꞌuluc re li karaylal. (Isa. 53:4)

¹⁸ Ut nak quiril li Jesús nak sutsu xbaneb li qꞌuila tenamit, quixye: —Tento toxic jun pacꞌal li palau, chan reheb lix tzolom.

¹⁹ Ut saꞌ li ho̱nal aꞌan quicuulac riqꞌuin li Jesús jun aj tzꞌi̱b ut quixye re: —At tzolonel, tincuaj a̱ta̱kenquil yalak bar tatxic, chan re.

²⁰ Ut li Jesús quichakꞌoc ut quixye re: —Cꞌoxla chi us ma ta̱cuy inta̱kenquil. Li yac cuanqueb xjul saꞌ pec, ut li xul li nequeꞌrupupic chiru choxa cuanqueb xsoc, abanan la̱in li Cꞌajolbej ma̱cꞌaꞌ innaꞌaj bar ta̱ru̱k tinyocob cuiꞌ cuib, chan.

²¹ Ut jun reheb lix tzolom quixye re li Jesús: —Ka̱cuaꞌ, china̱cuy. Inmukak cuan inyucuaꞌ tojoꞌnak tinxic cha̱cuix, chan.

²² Ut li Jesús quixye re: —Ta̱kehin, canabeb li toj camenakeb saꞌ li ma̱c xmukakeb cuan lix camenak, chan re.

Nak quixchꞌanab li ikꞌ chiru li palau

²³ Ut li Jesús qui-oc saꞌ li jucub rochbeneb lix tzolom.

²⁴ Nak ac cuanqueb chiru haꞌ, saꞌ junpa̱t quichal jun li nimla ca̱k-sut-ikꞌ. Ut yo̱ chi oc lix cau ok li haꞌ saꞌ li jucub. Ut li Jesús sa xcuara.

²⁵ Eb lix tzolom queꞌjiloc riqꞌuin, queꞌrajsi, ut queꞌxye re: —Ka̱cuaꞌ, choa̱col. Osocꞌ ke, chanqueb re.

²⁶ Ut li Jesús quichakꞌoc ut quixye: —La̱ex incꞌaꞌ nequexpa̱ban chi tzꞌakal. Joꞌcan nak nequexxucuac, chan reheb. Tojoꞌnak quicuacli, quixkꞌus li ikꞌ, ut li palau, ut saꞌ junpa̱t quichꞌana li ikꞌ ut quitukla ru li haꞌ.

²⁷ Ut cꞌajoꞌ nak queꞌsach xchꞌo̱l lix tzolom nak queꞌril li quixba̱nu ut queꞌxye chi ribileb rib: —¿Chanru nak cuan xcuanquil li cui̱nk aꞌin nak naxkꞌus li ikꞌ ut li palau ut nequeꞌabin chiru? chanqueb.

Li cui̱nk li cuan ma̱us aj musikꞌej riqꞌuineb

²⁸ Ut nak ac xkꞌaxon li Jesús jun pacꞌal li palau saꞌ xchꞌochꞌeb laj Gadara, cuib li cui̱nk queꞌchal chixcꞌulbal. Queꞌchal chak saꞌ li naꞌajej bar nequeꞌmukeꞌ cuiꞌ li camenak. Cuan ma̱us aj musikꞌej riqꞌuineb. Kꞌaxal xiu xiu rilbaleb ut ma̱ ani naru nanumeꞌ saꞌ li be aꞌan.

²⁹ Ut eb aꞌan queꞌxjap re chixyebal: —¿Cꞌaꞌru ta̱cuaj kiqꞌuin, at Jesús? La̱at ralalat li nimajcual Dios. ¿Ma xatchal arin chikachꞌiꞌchꞌiꞌinquil chi toj ma̱jiꞌ xkꞌehil li rakba a̱tin? chanqueb.

³⁰ Ut najt caꞌchꞌin riqꞌuineb cuan chak jun tu̱b li a̱k, yo̱queb chi ichajibc.

³¹ Ut eb li ma̱us aj musikꞌej queꞌxtzꞌa̱ma chiru li Jesús ut queꞌxye re: —Cui toa̱cuisi riqꞌuineb li cui̱nk aꞌin, choa̱canab chi oc riqꞌuineb li jun tu̱b chi a̱k li cuanqueb aran.—

³² Ut li Jesús quichakꞌoc ut quixye reheb: —Ayukex.— Ut eb aꞌan queꞌel ut co̱eb riqꞌuineb li jun tu̱b chi a̱k. Ut eb li a̱k queꞌoc chi a̱linac ut queꞌxrum chak rib saꞌ xbe̱n u̱l ut toj saꞌ li palau coxeꞌnak ut aran queꞌosoꞌ.

³³ Ut eb laj ilol a̱k queꞌxucuac ut queꞌco̱eb saꞌ a̱nil saꞌ li tenamit chixyebal resil chixjunil li cꞌaꞌru quicꞌulman. Ut queꞌxserakꞌi li cꞌaꞌru quicꞌulman riqꞌuineb li cui̱nk li cuanqueb ma̱us aj musikꞌej riqꞌuineb.

³⁴ Ut chixjunileb li tenamit queꞌel chak chixcꞌulbal li Jesús. Ut nak queꞌril ru, queꞌxtzꞌa̱ma chiru nak chie̱lk saꞌ lix tenamiteb.