San Mateo 7 - Li Santil hu

Me̱qꞌue e̱chꞌo̱l chixcuechꞌbal rix le̱ ras e̱ri̱tzꞌin

¹ Ma̱ ani te̱tzꞌil a̱tin chirix re nak incꞌaꞌ ta̱tzꞌilekꞌ a̱tin che̱rix la̱ex.

² Xban nak chanru nak nequextzꞌiloc a̱tin, joꞌcan ajcuiꞌ ta̱uxk e̱re la̱ex. Ut riqꞌuin li bisleb li nequexbisoc cuiꞌ, riqꞌuin ajcuiꞌ aꞌan texbisekꞌ la̱ex.

³ ¿Cꞌaꞌut nak nacaqꞌue retal li cꞌaj cheꞌ cuan saꞌ xnakꞌ ru la̱ cuas a̱cui̱tzꞌin ut incꞌaꞌ nacacuil li tzꞌamba cuan saꞌ xnakꞌ a̱cuu la̱at?

⁴ ¿Chanru nak ta̱ye re la̱ cuas a̱cui̱tzꞌin: “Cuisihak li cꞌaj cheꞌ saꞌ xnakꞌ a̱cuu”, ut toj cuan li tzꞌamba saꞌ xnakꞌ a̱cuu la̱at?

⁵ At aj caꞌ pacꞌal u, xbe̱n cua isi li tzꞌamba cuan saꞌ li xnakꞌ a̱cuu, tojoꞌnak tat-ilok chi tzꞌakal re risinquil li cꞌaj cheꞌ cuan saꞌ xnakꞌ ru la̱ cuas a̱cui̱tzꞌin.

⁶ Me̱qꞌue reheb li tzꞌiꞌ li cꞌaꞌru kꞌaxal lokꞌ xban nak naru nequeꞌchal saꞌ e̱be̱n ut textiu. Chi moco te̱qꞌue li pec li kꞌaxal terto xtzꞌak chiruheb li a̱k re teꞌxyekꞌi.

Li Dios tixqꞌue li cha̱bil naꞌleb reheb li nequeꞌxtzꞌa̱ma chi anchaleb xchꞌo̱l

⁷ Nak ta̱paltok cꞌaꞌru e̱re, chextzꞌa̱ma̱nk chiru li Dios ut aꞌan tixqꞌue e̱re; chesicꞌak ut te̱tau, chebokak ut li puerta ta̱tehekꞌ che̱ru.

⁸ Cheba̱nu aꞌan xban nak li ani natzꞌa̱man chiru li Dios naqꞌueheꞌ re. Li ani naxsicꞌ, naxtau. Ut li ani nabokoc, li puerta nateheꞌ chiru.

⁹ ¿Ma cuan ta biꞌ junak yucuaꞌbej saꞌ e̱ya̱nk tixqꞌue junak pec re li ralal nak tixpatzꞌ xcua re?

¹⁰ Ut nak tixpatzꞌ junak xcar re, ¿ma cꞌantiꞌ ta biꞌ tixqꞌue re?

¹¹ Cui la̱ex li moco cha̱bilex ta nequenau xqꞌuebal li cꞌaꞌru cha̱bil re le̱ ralal e̱cꞌajol, ¿ma tojaꞌ ta chic le̱ Yucuaꞌ li cuan saꞌ choxa incꞌaꞌ tixqꞌue li kꞌaxal cha̱bil re li ani tixtzꞌa̱ma chiru?

¹² Joꞌcan nak li cꞌaꞌru nequeraj la̱ex nak teꞌxba̱nu raj le̱ ras e̱ri̱tzꞌin, cheba̱nuhak la̱ex reheb aꞌan, xban nak aꞌan aꞌin xya̱lal li chakꞌrab li quiqꞌueheꞌ re laj Moisés, ut aꞌan ajcuiꞌ lix ya̱lal lix yehomeb li profeta.

¹³ Chex-oc saꞌ li oqueba̱l li caꞌchꞌin ru xban nak nim ru li oqueba̱l ut nim ru li be li naxic saꞌ li tojba ma̱c ut nabaleb li nequeꞌxic aran.

¹⁴ Abanan li oqueba̱l ut li be li naxic saꞌ li junelic yuꞌam, aꞌan caꞌchꞌin ru ut incꞌaꞌ qꞌuiheb li nequeꞌoc aran.

Li cheꞌ nanaꞌeꞌ ru xban li ru naxqꞌue

¹⁵ Chenauhak xcolbal e̱rib chiruheb li profeta aj balakꞌ. Chanchan nak cha̱bileb joꞌ li carner nak nequeꞌcꞌutun. Abanan moco ya̱l ta. Chanchaneb li joskꞌ aj xoj nak nequeꞌchal chi balakꞌi̱nc.

¹⁶ Yal riqꞌuin lix naꞌlebeb te̱nau ruheb. La̱ex nequeqꞌue retal nak li qꞌuix incꞌaꞌ naru̱chin li uva ut li tun qꞌuix incꞌaꞌ naru̱chin li higo.

¹⁷ Joꞌcan nak li cha̱bil cheꞌ, cha̱bil ajcuiꞌ li ru naxqꞌue. Ut li cheꞌ li incꞌaꞌ us, incꞌaꞌ ajcuiꞌ us li ru naxqꞌue.

¹⁸ Li cha̱bil cheꞌ incꞌaꞌ naru naru̱chin li incꞌaꞌ us, chi moco li cheꞌ incꞌaꞌ us naru̱chin li cha̱bil.

¹⁹ Chixjunil li cheꞌ li incꞌaꞌ cha̱bil li ru naxqꞌue nayocꞌman ut naqꞌueman saꞌ xam.

²⁰ Joꞌcan ut nak riqꞌuin lix naꞌlebeb li profeta te̱nau ru aniheb.

Ma̱cuaꞌ riqꞌuin kayehom kaba̱nuhom to-oc rubel xcuanquil li Dios

²¹ Moco chixjunileb ta li nequeꞌyehoc “Ka̱cuaꞌ, Ka̱cuaꞌ” cue, teꞌoc saꞌ lix nimajcual cuanquilal li Dios. Aban li nequeꞌba̱nun re li naraj lin Yucuaꞌ cuan saꞌ choxa, aꞌaneb li teꞌoc saꞌ lix nimajcual cuanquilal li Dios.

²² Nabaleb li teꞌyehok cue saꞌ xkꞌehil li rakba a̱tin, “Ka̱cuaꞌ, Ka̱cuaꞌ, ¿ma ma̱cuaꞌ ta biꞌ saꞌ a̱cꞌabaꞌ coa̱tinac joꞌ profeta? ¿Ma ma̱cuaꞌ ta biꞌ saꞌ a̱cꞌabaꞌ co-isin ma̱us aj musikꞌej? La̱o nabal li milagro quilajkaba̱nu saꞌ a̱cꞌabaꞌ”, chaꞌkeb.

²³ Ut la̱in tinye reheb, “La̱ex ma̱cuaꞌex cualal incꞌajol. La̱in incꞌaꞌ ninnau e̱ru. Elenkex chicuu, ex aj ba̱nuhom ma̱usilal.”

Li ani naxba̱nu li cꞌaꞌru naxye li Ka̱cuaꞌ, li jun aꞌan cuan xnaꞌleb

²⁴ Joꞌcan nak yalak ani ta̱abi̱nk reheb li cua̱tin aꞌin ut cui tixba̱nu li cꞌaꞌru xinye, li jun aꞌan tinjuntakꞌe̱ta riqꞌuin li cui̱nk cuan xnaꞌleb li quixyi̱b li rochoch saꞌ xbe̱n pec.

²⁵ Ut quichal li hab ut quicuan li butꞌi haꞌ, ut quichal li ca̱k-sut-ikꞌ. Coxsacꞌ rib chiru li cab aꞌan, ut incꞌaꞌ quitꞌaneꞌ li cab xban nak yi̱banbil chi us saꞌ xbe̱n pec.

²⁶ Ut yalak ani ta̱abi̱nk re li cua̱tin ut incꞌaꞌ tixba̱nu li cꞌaꞌru xinye, li jun aꞌan tinjuntakꞌe̱ta riqꞌuin li cui̱nk li ma̱cꞌaꞌ xnaꞌleb. Incꞌaꞌ quixyi̱b li rochoch chi cha̱bil. Yal saꞌ xbe̱n samaib quixqꞌue.

²⁷ Ut quichal li hab, quicuan li butꞌi haꞌ ut quichal li ca̱k-sut-ikꞌ. Coxsacꞌ rib chiru ut li cab aꞌan quitꞌaneꞌ ut aran qui-osoꞌ.

²⁸ Ut nak quirakeꞌ li Jesús chixyebal li a̱tin aꞌin, sachso̱queb xchꞌo̱l queꞌcana li qꞌuila tenamit chirabinquil li cꞌaꞌru yo̱ chixyebal.

²⁹ Queꞌsach xchꞌo̱leb xban nak quixcꞌut chi tzꞌakal lix ya̱lal chiruheb riqꞌuin xcuanquil ut moco joꞌ ta eb laj tzꞌi̱b.