San Mateo 4 - Li Santil hu

Li Jesús quiyaleꞌ ra̱lenquil xban laj tza

¹ Tojoꞌnak li Jesús quicꞌameꞌ xban li Santil Musikꞌej saꞌ li chaki chꞌochꞌ re ta̱yalekꞌ ra̱lenquil xban laj tza.

² Nak ac xba̱nu x-ayu̱n caꞌcꞌa̱l cutan caꞌcꞌa̱l kꞌojyi̱n quitzꞌoca.

³ Ut laj tza quicuulac riqꞌuin ut quixye re: —Cui tzꞌakal ya̱l nak la̱at ralal li Dios, sukꞌisiheb chokꞌ caxlan cua li pec aꞌin.—

⁴ Quichakꞌoc li Jesús ut quixye: —Incꞌaꞌ tinba̱nu aꞌan xban nak tzꞌi̱banbil retalil saꞌ li Santil Hu: Ma̱cuaꞌ caꞌaj cuiꞌ riqꞌuin li naxtzaca yoꞌyo cuiꞌ li cui̱nk; riqꞌuin ban li a̱tin li naxye li Dios.— (Deut. 8:3)

⁵ Tojoꞌnak quicꞌameꞌ xban laj tza saꞌ li santil tenamit Jerusalén; ut coxxakaba̱k toj takecꞌ saꞌ xbe̱n li rochoch li Dios.

⁶ Ut laj tza quixye re: —Cui tzꞌakal ya̱l nak la̱at ralal li Dios, cut a̱cuib takꞌa. Ma̱cꞌaꞌ ta̱cꞌul xban nak joꞌcaꞌin tzꞌi̱banbil saꞌ li Santil Hu: Tixtaklaheb lix ángel cha̱cuilbal ut riqꞌuin rukꞌeb tateꞌxchap re nak incꞌaꞌ ta̱tochꞌ la̱ cuok chiru pec.— (Sal. 91:11-12)

⁷ Ut li Jesús quichakꞌoc ut quixye re: —Tzꞌi̱banbil ajcuiꞌ saꞌ li Santil Hu chi joꞌcaꞌin: Ma̱tzꞌa̱ma xmilagro li Ka̱cuaꞌ la̱ Dios yal chi ma̱cꞌaꞌ rajbal.— (Deut. 6:16)

⁸ Ut quicꞌameꞌ cuiꞌchic xban laj tza saꞌ xbe̱n jun li tzu̱l kꞌaxal najt xteram. Ut laj tza quixcꞌut chak chiru li Jesús chixjunil li tenamit li cuan saꞌ ruchichꞌochꞌ joꞌ ajcuiꞌ lix nimal lix lokꞌal cuan chi saꞌ.

⁹ Ut quixye re li Jesús: —Chixjunil aꞌin tinqꞌue a̱cue cui la̱at ta̱cuikꞌib a̱cuib chicuu ut tina̱lokꞌoni.—

¹⁰ Tojoꞌnak li Jesús quichakꞌoc ut quixye re: —Elen chicuu la̱at aj tza, xban nak joꞌcaꞌin tzꞌi̱banbil saꞌ li Santil Hu: Li Ka̱cuaꞌ la̱ Dios ta̱lokꞌoni ut caꞌaj cuiꞌ chiru aꞌan tatcꞌanjelak.— (Deut. 6:13)

¹¹ Tojoꞌnak quicanaba̱c xban laj tza ut eb li ángel queꞌcuulac ut queꞌcꞌanjelac chiru.

Xticlajic xcꞌanjel li Jesús

¹² Nak li Jesús quirabi resil nak laj Juan cuan chi pre̱xil, co̱ Nazaret xcue̱nt Galilea.

¹³ Qui-el Nazaret ut co̱ Capernaum. Ut aran quicana. Li tenamit aꞌan cuan chire li palau saꞌ xchꞌochꞌeb laj Zabulón ut eb aj Neftalí.

¹⁴ Aꞌin quicꞌulman joꞌ quixye li profeta Isaías nak quixye chi joꞌcaꞌin:

¹⁵ Aran saꞌ xchꞌochꞌ laj Zabulón ut saꞌ xchꞌochꞌ laj Neftalí, li cuan chire li be li naxic saꞌ li palau, aran jun pacꞌal li nimaꞌ Jordán, saꞌ li naꞌajej Galilea bar nequeꞌcuan cuiꞌ li ma̱cuaꞌeb aj judío,

¹⁶ li tenamit chanchan li cuanqueb saꞌ kꞌojyi̱n xban nak incꞌaꞌ nequeꞌxnau lix ya̱lal. Chanchan quicutanoꞌ nak queꞌril nak queꞌxtau li colba-ib. Chanchan nak cuanqueb saꞌ jun naꞌajej re ca̱mc xban lix ma̱queb nak quicuulac li cutan saꞌ xya̱nkeb. (Isa. 9:1-2)

¹⁷ Chalen nak quicuulac aran, li Jesús yo̱ chixchꞌolobanquil lix ya̱lal ut quixye: —Chiyotꞌekꞌ e̱chꞌo̱l ut jalomak e̱cꞌaꞌux xban nak cuulac re xkꞌehil nak tinqꞌuehekꞌ saꞌ incuanquil xban li Dios. Ut la̱in chic cua̱nk incuanquil saꞌ xbe̱neb li cualal incꞌajol.—

Li Jesús quixbok ca̱hib aj car re nak teꞌxic chirix

¹⁸ Saꞌ jun cutan nak coxnumekꞌ li Jesús chire li palau cuan Galilea, quirileb cuib li cui̱nk ri̱tzꞌineb rib. Li jun, aꞌan laj Simón. Aj Pedro nayeman re. Li jun chic aj Andrés xcꞌabaꞌ. Yo̱queb chixqꞌuebal lix yoy saꞌ li palau xban nak aꞌaneb aj chapol car.

¹⁹ Li Jesús quixye reheb: —Chine̱ta̱ke. Ma̱cuaꞌ chic caribc te̱ba̱nu. E̱ras e̱ri̱tzꞌin ban chic te̱sicꞌ re teꞌpa̱ba̱nk, chan reheb.

²⁰ Ut saꞌ junpa̱t queꞌxcanab lix yoy ut queꞌxta̱ke li Jesús.

²¹ Junpa̱t na chic quibe̱c li Jesús nak quixtauheb cuiꞌchic cuibeb li cui̱nk ri̱tzꞌineb rib. Aꞌaneb laj Jacobo ut laj Juan. Cuanqueb saꞌ lix jucub rochben laj Zebedeo lix yucuaꞌeb. Yo̱queb chixxitinquil lix yoy. Ut li Jesús quixbokeb re nak teꞌxic chirix.

²² Ut saꞌ junpa̱t queꞌxcanab lix yucuaꞌeb ut queꞌxcanab li jucub ut queꞌxta̱ke li Jesús.

²³ Ut li Jesús quixbeni chixjunil li naꞌajej Galilea. Yo̱ chixcꞌutbal lix ya̱lal saꞌ eb li cab li nequeꞌxchꞌutub cuiꞌ ribeb laj judío. Quixchꞌolob xya̱lal li cha̱bil esilal chirix lix cuanquilal li Dios. Ut yo̱ chixqꞌuirtesinquil chixjunil li qꞌuila pa̱y ru chi yajel ut li raylal.

²⁴ Quicuulac resil saꞌ chixjunil li naꞌajej Siria li cꞌaꞌru yo̱ chixba̱nunquil li Jesús aran Galilea. Ut queꞌxcꞌam riqꞌuin chixjunileb li yaj. Qꞌuila pa̱y ru lix yajeleb ut lix raylaleb. Cuan li toj nakꞌehin xyajeleb. Ut cuan li cuanqueb ma̱us aj musikꞌej riqꞌuineb ut cuanqueb ajcuiꞌ li sic. Ut li Jesús naxqꞌuirtesiheb.

²⁵ Ut quita̱ke̱c xbaneb li qꞌuila tenamit. Cuan li queꞌchal chak Galilea. Cuan li queꞌchal chak Decápolis. Cuan li queꞌchal chak Jerusalén. Cuan li queꞌchal chak Judea joꞌ ajcuiꞌ jun pacꞌal li nimaꞌ Jordán.