San Mateo 27 - Li Santil hu

Li Jesús quicꞌameꞌ saꞌ rakleb a̱tin chiru laj Pilato

¹ Ut nak quisake̱u, queꞌxchꞌutub ribeb chixjunileb lix be̱nil aj tij ut eb laj cꞌamol be saꞌ xya̱nkeb laj judío. Queꞌxcꞌu̱b rib chanru teꞌxba̱nu re nak ta̱camsi̱k li Jesús.

² Queꞌxcꞌam li Jesús chi bacꞌbo ut queꞌxkꞌaxtesi saꞌ rukꞌ laj Pilato li acuabej.

Lix camic laj Judas

³ Ut laj Judas li quikꞌaxtesin re li Jesús, cꞌajoꞌ nak quiyotꞌeꞌ xchꞌo̱l riqꞌuin li quixba̱nu nak quiril nak quiteneba̱c ca̱mc saꞌ xbe̱n li Jesús. Quixkꞌajsi li laje̱b xcaꞌcꞌa̱l chi tumin plata reheb lix be̱nil aj tij ut reheb li nequeꞌcꞌamoc be saꞌ xya̱nkeb laj judío.

⁴ Quixye reheb: —Xinma̱cob nak xinkꞌaxtesi e̱re li cui̱nk aꞌin xban nak ma̱cꞌaꞌ xma̱c, chan. Aꞌut eb aꞌan queꞌxye re: —¿Cꞌaꞌ takaj re la̱o? Il cꞌaꞌru ta̱ba̱nu.—

⁵ Ut laj Judas quixcut li tumin saꞌ rochoch li Dios. Ut co̱ ut quixyatzꞌ rib.

⁶ Ut eb lix be̱nil aj tij queꞌxxoc li tumin ut queꞌxye: —Incꞌaꞌ us xqꞌuebal li tumin aꞌin saꞌ xcaxil lix mayej li rochoch li Dios xban nak xtzꞌak xyuꞌam li cui̱nk.—

⁷ Ut queꞌxcꞌu̱b ru nak teꞌxlokꞌ jun li chꞌochꞌ re teꞌmukekꞌ cuiꞌ li jalaneb xtenamit. Ut chiru li tumin aꞌan queꞌxlokꞌ li naꞌajej aꞌan riqꞌuin laj pacꞌonel.

⁸ Joꞌcan nak chalen anakcuan quicana chokꞌ xcꞌabaꞌ li naꞌajej aꞌan “Lokꞌbil riqꞌuin Quicꞌ.”

⁹ Ut riqꞌuin aꞌin quitzꞌakloc ru li quixye li profeta Jeremías nak quixye:

¹⁰ Ut queꞌxchap li laje̱b xcaꞌcꞌa̱l chi tumin plata, xtzꞌak li quikꞌaxtesi̱c. Lix tzꞌak aꞌan li tenebanbil saꞌ xbe̱n xbaneb laj Israel. Ut chiru li tumin aꞌan queꞌxlokꞌ jun li chꞌochꞌ riqꞌuin laj pacꞌonel, joꞌ quiyeheꞌ cue xban li Ka̱cuaꞌ. (Zac. 11:12-13)

Li Jesús quicꞌameꞌ saꞌ rakleb a̱tin chiru laj Pilato

¹¹ Queꞌxcꞌam li Jesús ut queꞌxxakab chiru laj Pilato li acuabej. Ut laj Pilato quixpatzꞌ re: —¿Ma la̱at lix Reyeb laj judío?— Li Jesús quichakꞌoc ut quixye re: —Ya̱l li xaye nak la̱in.—

¹² Ut nak yo̱ xjitbal xbaneb lix be̱nil aj tij ut eb li nequeꞌcꞌamoc be chiruheb laj judío, chi ti̱c incꞌaꞌ quichakꞌoc.

¹³ Ut laj Pilato quixye re: —¿Ma incꞌaꞌ nacacuabi joꞌ qꞌuial li yo̱queb chixyebal cha̱cuix?—

¹⁴ Aban li Jesús ma̱ jun li a̱tin quixye re tixcol rib ut riqꞌuin aꞌan quisach xchꞌo̱l laj Pilato.

Quiteneba̱c li ca̱mc saꞌ xbe̱n li Jesús

¹⁵ Rajlal chihab saꞌ li ninkꞌe Pascua li acuabej narachꞌab junak li pre̱x aꞌ ya̱l ani teꞌraj li tenamit ta̱achꞌaba̱k joꞌ cꞌaynakeb xba̱nunquil.

¹⁶ Saꞌ eb li cutan aꞌan cuan saꞌ tzꞌalam jun li cui̱nk naꞌno ru chi us, aj Barrabás xcꞌabaꞌ.

¹⁷ Ut nak chꞌutchꞌu̱queb li qꞌuila tenamit, laj Pilato quixpatzꞌ reheb: —¿Ani te̱raj tincuachꞌab? ¿Ma laj Barrabás, malaj ut li Jesús li Cristo nequeꞌxye re? chan laj Pilato.

¹⁸ Laj Pilato naxnau nak xban xcakaleb xchꞌo̱l li xbe̱nil aj tij nak queꞌxkꞌaxtesi li Jesús saꞌ rakleb a̱tin.

¹⁹ Nak laj Pilato cꞌojcꞌo saꞌ lix naꞌaj li narakoc cuiꞌ a̱tin, li rixakil quixtakla xyebal re: —Ma̱cꞌaꞌ ta̱ba̱nu re li cui̱nk aꞌan xban nak ma̱cꞌaꞌ xma̱c. Saꞌ xcꞌabaꞌ aꞌan nak kꞌaxal ra xinmatqꞌue chi kꞌek, chan.

²⁰ Ut eb li xbe̱nil aj tij ut eb li nequeꞌcꞌamoc be saꞌ xya̱nkeb laj judío queꞌxtacchiꞌi li qꞌuila tenamit re nak teꞌxye nak aꞌ laj Barrabás li ta̱achꞌaba̱k, ut aꞌ li Jesús ta̱camsi̱k.

²¹ Ut li acuabej quixpatzꞌ reheb: —¿Bar cuan reheb li cuib aꞌin te̱raj tincuachꞌab?— Ut eb aꞌan queꞌxye: —Aꞌ laj Barrabás, chanqueb.

²² Quixye laj Pilato reheb: —Ut, ¿cꞌaꞌ put ru ta̱ru̱k tinba̱nu la̱in riqꞌuin li Jesús, li Cristo nequeꞌxye re?— Ut chixjunileb queꞌxye: —¡Chiqꞌuehekꞌ chiru cruz!—

²³ Ut li acuabej quixye reheb: —¿Cꞌaꞌut? ¿Cꞌaꞌru tzꞌakal xma̱c e̱re?— Ut eb aꞌan kꞌaxal cau cuiꞌchic queꞌxjap re chixyebal: —¡Chiqꞌuehekꞌ chiru cruz!—

²⁴ Ut laj Pilato quiril nak incꞌaꞌ qui-el chi us li quiraj xba̱nunquil ut quixqꞌue retal nak kꞌaxal cuiꞌchic nak queꞌpoꞌ xchꞌo̱l li tenamit. Tojoꞌnak quixtakla xcꞌambal lix haꞌ re xchꞌajbal li rukꞌ chiruheb li tenamit ut quixye: —Ma̱cꞌaꞌ inma̱c la̱in riqꞌuin xcamic li cui̱nk aꞌin li ma̱cꞌaꞌ xma̱c. La̱ex chic yal e̱re saꞌ xbe̱n, chan.

²⁵ Ut chixjunileb li tenamit queꞌchakꞌoc ut queꞌxye: —Saꞌ kabe̱n la̱o ut saꞌ xbe̱neb li kalal kacꞌajol chicana̱k xtojbal rix lix camic, chanqueb.

²⁶ Tojoꞌnak laj Pilato quirachꞌab laj Barrabás chiruheb li tenamit. Ut quixtakla xsacꞌbal li Jesús riqꞌuin tzꞌu̱m ut quixkꞌaxtesi saꞌ rukꞌeb li soldado re nak teꞌxqꞌue chiru cruz.

²⁷ Ut eb lix soldado li acuabej queꞌxcꞌam li Jesús saꞌ li po̱pol ut queꞌxchꞌutub ribeb chixjunileb li soldado ut queꞌxsut li Jesús.

²⁸ Queꞌrisi li rakꞌ ut queꞌxqꞌue jun caki tꞌicr chirix joꞌ nequeꞌrocsi li rey.

²⁹ Ut queꞌxtzꞌul jun li corona riqꞌuin qꞌuix ut queꞌxqꞌue saꞌ xjolom. Ut saꞌ xnim ukꞌ queꞌxqꞌue jun li cheꞌ. Ut queꞌxcuikꞌib ribeb chiru ut queꞌretzꞌu ut queꞌxye: —Sahak taxak saꞌ a̱chꞌo̱l, at xReyeb laj judío, chanqueb re.

³⁰ Quilajeꞌxchu̱ba, ut queꞌxchap li cheꞌ ut riqꞌuin aꞌan queꞌxsacꞌ saꞌ xjolom.

³¹ Ut nak ac xeꞌxtacuasi, queꞌrisi li tꞌicr li cuan chirix. Ut queꞌxqꞌue cuiꞌchic li rakꞌ chirix. Tojoꞌnak queꞌxcꞌam re nak teꞌxqꞌue chiru cruz.

Li Jesús quiqꞌueheꞌ chiru cruz

³² Ut nak yo̱queb chi xic, queꞌxcꞌul jun li cui̱nk aj Simón xcꞌabaꞌ, Cirene xtenamit. Eb li soldado queꞌxmin ru aꞌan chixpakonquil lix cruz li Jesús.

³³ Ut queꞌcuulac saꞌ li naꞌajej Gólgota xcꞌabaꞌ. Chi jalbil ru naraj naxye: Xnaꞌaj Xbakel Xjolom Camenak.

³⁴ Ut queꞌxqꞌue vino re li Jesús yubil riqꞌuin cꞌahil ban re xcotzbal li raylal, abanan nak quixyal, incꞌaꞌ quirucꞌ.

³⁵ Ut mokon nak ac queꞌxqꞌue chiru cruz, eb li soldado queꞌbu̱lic chirix li rakꞌ re rilbal ani na ta̱e̱chani̱nk re li rakꞌ. Joꞌcaꞌin quitzꞌakloc ru li yebil xban li profeta nak quixye: Queꞌxjeqꞌui chi ribileb rib li cuakꞌ ut queꞌbu̱lic chirix lin tꞌicr. (Sal. 22:18)

³⁶ Queꞌcꞌojla aran ut queꞌoc chixcꞌacꞌalenquil li Jesús.

³⁷ Saꞌ xbe̱n li cruz queꞌxqꞌue jun retalil cꞌaꞌut nak queꞌxcamsi ut naxye: Aꞌan aꞌin li Jesús, lix Reyeb laj judío.

³⁸ Ut cuib aj e̱lkꞌ queꞌqꞌueheꞌ chiru cruz rochben, jun saꞌ xnim ut jun saꞌ xtzꞌe.

³⁹ Ut eb li tenamit yo̱queb chi numecꞌ aran, queꞌxhob li Jesús ut nequeꞌrecꞌasi xjolomeb.

⁴⁰ Ut queꞌxye: —¿Ma ma̱cuaꞌ ta biꞌ la̱at li cat-ajoc re xjucꞌbal rochoch li Dios, ut yal chiru oxib cutan raj xayi̱b cuiꞌchic? Xacol raj a̱cuib. Cui ya̱l nak la̱at Ralalat li Dios, cuben chak chiru li cruz, chanqueb.

⁴¹ Joꞌcan ajcuiꞌ eb li xbe̱nil aj tij yo̱queb chixhobbal li Jesús rochbeneb laj tzꞌi̱b ut eb li nequeꞌcꞌamoc be saꞌ xya̱nkeb laj judío.

⁴² Ut queꞌxye: —Jalan chic xcoleb ut aꞌan incꞌaꞌ naru naxcol rib xjunes. Cui ya̱l nak aꞌan xReyeb laj judío, chicubek chak chiru li cruz anakcuan ut topa̱ba̱nk chiru.

⁴³ Cau xchꞌo̱l riqꞌuin li Dios. Chicolekꞌ anakcuan cui naraheꞌ xban li Dios xban nak naxye nak aꞌan Ralal li Dios, chanqueb.

⁴⁴ Ut joꞌcan eb ajcuiꞌ laj e̱lkꞌ li queꞌqꞌueheꞌ chiru cruz rochben, yo̱queb chixhobbal.

⁴⁵ Tuktu cuaꞌleb nak quikꞌojyi̱noꞌ saꞌ chixjunil li ruchichꞌochꞌ ut toj saꞌ oxib o̱r re ecuu quicutanoꞌ cuiꞌchic.

⁴⁶ Ut caꞌchꞌin chic ma̱ oxib o̱r nak quia̱tinac li Jesús chi cau xya̱b xcux ut quixye: —Elí, Elí, ¿lama sabactani?— Chi jalbil ru naraj naxye: At inDios, at inDios, ¿cꞌaꞌut nak xina̱canab injunes?

⁴⁷ Nak queꞌrabi li cꞌaꞌru quixye li cuanqueb aran, cuan li queꞌyehoc: —Abihomak, yo̱ chixbokbal li profeta Elías, chanqueb.

⁴⁸ Ut jun saꞌ xya̱nkeb co̱ saꞌ a̱nil ut coxtzꞌa chak jun li esponja saꞌ vinagre ut quixtaksi chi ruꞌuj jun li cheꞌ ut quixqꞌue saꞌ re li Jesús re ta̱rucꞌ.

⁴⁹ Ut li jun chꞌol chic queꞌxye: —Kilak cuan ma ta̱cha̱lk na laj Elías chixcolbal, chanqueb.

⁵⁰ Aꞌut li Jesús quixjap cuiꞌchic re chi cau ut qui-el xchꞌo̱l.

⁵¹ Ut li tꞌicr li cuan chokꞌ tas saꞌ li Santil Naꞌajej saꞌ li rochoch li Dios quikꞌicheꞌ saꞌ xyi. Quiticla chak takecꞌ ut toj takꞌa coxrakeꞌ lix kꞌichilal. Caꞌ jachal qui-el. Qui-ecꞌan li chꞌochꞌ ut eb li sako̱nac quilajeꞌitzꞌeꞌ.

⁵² Quilajeꞌteli li queꞌmukeꞌ cuiꞌ li camenak ut nabaleb li ti̱queb xchꞌo̱l queꞌcuacli cuiꞌchic chi yoꞌyo.

⁵³ Ut mokon chic nak li Jesús ac xcuacli cuiꞌchic chi yoꞌyo, queꞌel chak saꞌ lix mukleba̱l ut queꞌoc saꞌ li santil tenamit Jerusalén ut nabal chi aj u queꞌxcꞌutbesi cuiꞌ ribeb.

⁵⁴ Ut li capitán rochbeneb li yo̱queb chi cꞌacꞌale̱nc re li Jesús, queꞌrecꞌa li hi̱c ut queꞌxqꞌue retal li cꞌaꞌru yo̱ chi cꞌulma̱nc. Ma̱ cꞌajoꞌ nak queꞌxucuac ut queꞌxye: —Relic chi ya̱l nak li cui̱nk aꞌin tzꞌakal Ralal li Dios.—

⁵⁵ Ut cuanqueb ajcuiꞌ ixk yo̱queb chak chi iloc chi najt. Eb aꞌan toj Galilea queꞌxta̱ke chak li Jesús ut queꞌcꞌanjelac chiru.

⁵⁶ Saꞌ xya̱nkeb aꞌan cuanqueb lix María aj Magdala, ut lix María xnaꞌeb laj Jacobo ut laj José, ut lix naꞌeb li ralal laj Zebedeo.

Nak quimukeꞌ li Jesús

⁵⁷ Ac yo̱ chi oc kꞌojyi̱n nak quicuulac aran bar queꞌxcamsi cuiꞌ li Jesús jun li cui̱nk biom, aj José xcꞌabaꞌ. Arimatea xtenamit. Aꞌan xtzolom ajcuiꞌ li Jesús nak quicuan.

⁵⁸ Li cui̱nk aꞌin co̱ riqꞌuin laj Pilato ut quixtzꞌa̱ma chiru nak ta̱qꞌuehekꞌ re lix tzꞌejcual li Jesús re nak tixmuk. Ut laj Pilato quixtakla xkꞌaxtesinquil re.

⁵⁹ Ut laj José quixcꞌam li camenak ut quixlan saꞌ jun li acꞌ tꞌicr lino.

⁶⁰ Ut quixqꞌue saꞌ jun li acꞌ mukleba̱l. Re raj aꞌan li mukleba̱l nak quiyi̱ba̱c saꞌ jun sako̱nac. Ut quixbalkꞌusi jun nimla pec chire li mukleba̱l ut co̱.

⁶¹ Ut cuanqueb aran lix María aj Magdala ut lix María jun chic. Cꞌojcꞌo̱queb aran chi xcaꞌyaba̱l li mukleba̱l.

Queꞌxakaba̱c li soldado chixcꞌacꞌalenquil li mukleba̱l

⁶² Joꞌ cuulajak chic, nak ac xnumeꞌ lix cutanquil li cauresi̱nc re li hiloba̱l cutan, queꞌxchꞌutub ribeb li xbe̱nil aj tij rochbeneb laj fariseo. Queꞌco̱eb riqꞌuin laj Pilato.

⁶³ Ut queꞌxye re: —Ka̱cuaꞌ, xjulticoꞌ ke li a̱tin quixye laj balakꞌ nak toj yoꞌyo̱k. Quixye nak saꞌ rox li cutan ta̱cuacli̱k cuiꞌchic chi yoꞌyo.

⁶⁴ Takla xqꞌuebal retal chi us li mukleba̱l toj ta̱numekꞌ li oxib cutan. Ma̱re teꞌcha̱lk lix tzolom chi kꞌek chirelkꞌanquil li camenak ut teꞌxye reheb li tenamit, “Xcuacli cuiꞌchic chi yoꞌyo saꞌ xya̱nkeb li camenak.” Ut kꞌaxal cuiꞌchic chꞌaꞌaj toe̱lk la̱o chiru li xkacꞌul xbe̱n cua.

⁶⁵ Ut laj Pilato quixye reheb: —Cueꞌqueb jun chꞌu̱tal chi soldado. Ayukex rochbeneb ut qꞌuehomak retal nak teꞌxba̱nu chi us. La̱ex nequenau chanru te̱ba̱nu, chan.

⁶⁶ Ut co̱eb ut queꞌxtzꞌap chi us li mukleba̱l ut queꞌxqꞌue retalil li pec ut queꞌxcanab li soldado aran chixcꞌacꞌalenquil li mukleba̱l.