San Mateo 15 - Li Santil hu

Li cꞌaꞌru na-el chak saꞌ li kachꞌo̱l, aꞌan li nocoma̱cob cuiꞌ

¹ Jun chꞌol eb aj tzꞌi̱b rochbeneb laj fariseo queꞌchal chak Jerusalén. Queꞌcuulac riqꞌuin li Jesús ut queꞌxye re:

² —¿Cꞌaꞌut nak eb la̱ tzolom nequeꞌxkꞌet li chakꞌrab li canabanbil xbaneb li kaxeꞌ kato̱n? ¿Cꞌaꞌut nak incꞌaꞌ nequeꞌxchꞌaj li rukꞌeb nak nequeꞌcuaꞌac joꞌ tzꞌi̱banbil saꞌ li kachakꞌrab? chanqueb.

³ Li Jesús quichakꞌoc ut quixye reheb: —Ut la̱ex, ¿cꞌaꞌut nak nequekꞌet li chakꞌrab qꞌuebil e̱re xban li Dios riqꞌuin xba̱nunquil le̱ najter naꞌleb li cꞌaynakex chixba̱nunquil?

⁴ Li Dios quixye: Cha-oxlokꞌi la̱ naꞌ a̱yucuaꞌ. (Ex. 20:12) Ut quixye ajcuiꞌ: Ani tixhob xnaꞌ xyucuaꞌ, li jun aꞌan camsinbil nak ta̱osokꞌ. (Ex. 21:17)

⁵ Aꞌut la̱ex nequeye cui cuan junak incꞌaꞌ naraj xtenkꞌanquil lix naꞌ xyucuaꞌ, li jun aꞌan tixye re lix naꞌ xyucuaꞌ, “ac mayejanbil chiru li Dios li cꞌaꞌru raj ta̱ru̱k tatintenkꞌa cuiꞌ.” Ut incꞌaꞌ chic tento tixtenkꞌa lix naꞌ xyucuaꞌ, chanquex.

⁶ Joꞌcan nak la̱ex nequetzꞌekta̱na xcuanquil li chakꞌrab qꞌuebil xban li Dios ut aꞌ chic le̱ najter naꞌleb nequeba̱nu.

⁷ La̱ex aj caꞌ pacꞌal u. Ya̱l ajcuiꞌ li quixye li profeta Isaías che̱rix la̱ex nak quixtzꞌi̱ba li cꞌaꞌru quiyeheꞌ re xban li Dios nak quixye:

⁸ Li tenamit aꞌin niquineꞌxlokꞌoni caꞌaj cuiꞌ riqꞌuin xtzꞌu̱mal reheb. Moco nequeꞌxba̱nu ta chi anchal xchꞌo̱leb.

⁹ Ma̱cꞌaꞌ rajbal nak niquineꞌxlokꞌoni xban nak li tijleb li nequeꞌxcꞌut aꞌan yal xchakꞌrabeb li cui̱nk.— (Isa. 29:13)

¹⁰ Ut li Jesús quixbokeb li tenamit riqꞌuin ut quixye reheb: —Abihomak che̱junilex li cꞌaꞌru tinye ut qꞌuehomak retal re nak te̱tau xya̱lal.

¹¹ Ma̱cuaꞌ li cꞌaꞌru naxtzaca li cui̱nk nama̱coꞌ cuiꞌ; aban li cꞌaꞌru incꞌaꞌ us naxcꞌoxla saꞌ xchꞌo̱l, aꞌan li nama̱coꞌ cuiꞌ.—

¹² Queꞌjiloc lix tzolom riqꞌuin li Jesús ut queꞌxye re: —¿Ma xaqꞌue retal nak eb laj fariseo ra xeꞌrecꞌa nak xeꞌrabi li a̱tin li xaye?—

¹³ Quichakꞌoc li Jesús ut quixye reheb: —Chixjunil li acui̱mk incꞌaꞌ aubil xban lin Yucuaꞌ cuan saꞌ choxa, aꞌan ta̱michꞌma̱nk.

¹⁴ Canabomakeb. Aꞌaneb mutzꞌeb ut nequeꞌxberesiheb li mutzꞌ. Ut cui li mutzꞌ nequeꞌxberesi li rech mutzꞌil, chi xcabichaleb teꞌtꞌanekꞌ saꞌ jul.—

¹⁵ Aꞌut laj Pedro quichakꞌoc ut quixye: —Ba̱nu usilal, chꞌolob chiku lix ya̱lal li jaljo̱quil ru a̱tin aꞌin.—

¹⁶ Ut li Jesús quixye re: —¿Ma toj ma̱cꞌaꞌ ajcuiꞌ e̱naꞌleb la̱ex?

¹⁷ ¿Ma toj ma̱jiꞌ nequetau xya̱lal nak chixjunil li cꞌaꞌru naxtzaca junak, aꞌan moco saꞌ xchꞌo̱l ta naxic? Ti̱c saꞌ xsaꞌ naxic ut chirix aꞌan naxtzꞌek cuiꞌchic.

¹⁸ Li incꞌaꞌ us na-el saꞌ xtzꞌu̱mal re li junju̱nk, aꞌan saꞌ lix chꞌo̱l nachal. Ut aꞌan aꞌin li nama̱coꞌ cuiꞌ.

¹⁹ Saꞌ lix chꞌo̱l junak nachal chak li ma̱us aj naꞌleb, li camsi̱nc ras ri̱tzꞌin, li muxuc caxa̱r, li coꞌbe̱tac yumbe̱tac, li elkꞌac, li kꞌaba̱nc ut li majecua̱nc.

²⁰ Chixjunil li ma̱us aj naꞌleb aꞌin saꞌ xchꞌo̱l junak nachal chak, ut aꞌan li nama̱coꞌ cuiꞌ li junju̱nk. Ut li cuaꞌac chi incꞌaꞌ chꞌajbil li ukꞌej, ma̱cuaꞌ aꞌan li nama̱coꞌ cuiꞌ li cui̱nk, chan.

Li ma̱cuaꞌeb aj judío naru nequeꞌoc rubel xcuanquil li Dios

²¹ Ut qui-el aran li Jesús ut co̱ saꞌ eb li naꞌajej xcue̱nt Tiro ut xcue̱nt Sidón.

²² Ut cuan jun li ixk aj Canaán quichal saꞌ li naꞌajej aꞌan. Japjo re chixyebal: —Ka̱cuaꞌ, Ralalat laj David, chacuuxta̱na taxak cuu. Lin coꞌ cꞌajoꞌ nak yo̱ chi tacuasi̱c xban li ma̱us aj musikꞌej, chan.

²³ Aꞌut li Jesús ma̱ jun li a̱tin quixye re. Ut eb lix tzolom queꞌnachꞌoc riqꞌuin li Jesús ut queꞌxye re: —Ka̱cuaꞌ, ba̱nu li usilal re, re nak tixcanab xjapbal re, chanqueb.

²⁴ Li Jesús quichakꞌoc ut quixye: —Ma̱ bar chic taklanbilin chak, caꞌaj cuiꞌ riqꞌuineb laj Israel. Chanchaneb li carner sachenak, chan.

²⁵ Ut li ixk quixcuikꞌib rib chiru li Jesús ut quixye cuiꞌchic: —Ka̱cuaꞌ, chacuuxta̱na taxak cuu.—

²⁶ Li Jesús quichakꞌoc ut quixye re: —Incꞌaꞌ us xmakꞌbal xcuaheb li cocꞌal ut xqꞌuebal reheb li tzꞌiꞌ, chan li Jesús.

²⁷ Ut li ixk quichakꞌoc ut quixye re: —Ya̱l li nacaye, Ka̱cuaꞌ, abanan eb li tzꞌiꞌ nequeꞌxxoc xcꞌaj xcuaheb li cocꞌal li natꞌaneꞌ rubel li me̱x nak yo̱queb chi cuaꞌac, chan.

²⁸ Ut li Jesús quixye re: —Kanaꞌ, la̱at relic chi ya̱l xatau ru lix ya̱lal ut chi anchal a̱chꞌo̱l xatpa̱ban. Chi-uxk li cꞌaꞌru xatzꞌa̱ma, chan. Ut saꞌ ajcuiꞌ li ho̱nal aꞌan quiqꞌuira lix coꞌ.

Li ma̱cuaꞌeb aj judío queꞌqꞌuirtesi̱c xban li Jesús

²⁹ Qui-el chak li Jesús aran, ut quinumeꞌ chire li palau Galilea saꞌ xnaꞌajeb li ma̱cuaꞌeb aj judío. Tojoꞌnak quitakeꞌ chiru jun li tzu̱l ut aran quicꞌojla.

³⁰ Ut queꞌcuulac li qꞌuila tenamit riqꞌuin. Cuanqueb nabal li yaj li queꞌcꞌameꞌ riqꞌuin. Cuanqueb li ye̱k rok, cuanqueb li mutzꞌ, cuanqueb li mem ut li tokol rukꞌeb, ut cuanqueb ajcuiꞌ nabaleb li yaj rochbeneb. Ut coleꞌqꞌuehekꞌ chiru li Jesús ut aꞌ yal cꞌaꞌru lix yajel li junju̱nk, li Jesús quixqꞌuirtesiheb.

³¹ Joꞌcan nak queꞌsach xchꞌo̱leb li tenamit chirilbal nak li mem nequeꞌa̱tinac chic ut li tokoleb rukꞌ queꞌqꞌuira ut li ye̱keb rokeb nequeꞌbe̱c chic ut eb li mutzꞌ ruheb nequeꞌiloc chic. Ut queꞌxnima xlokꞌal lix Dioseb laj Israel.

Li Jesús quixqꞌueheb chi cuaꞌac li ca̱hib mil chi cui̱nk

³² Ut li Jesús quixbokeb lix tzolom riqꞌuin ut quixye reheb: —Nequeꞌcuil xtokꞌoba̱l ruheb li tenamit. Ac oxib cutan xchaliqueb chicuix ut ma̱cꞌaꞌ xcuaheb. Ut incꞌaꞌ nacuaj xtaklanquileb saꞌ rochocheb chi incꞌaꞌ teꞌcuaꞌak. Naru nequeꞌlub saꞌ be, chan.

³³ Ut eb lix tzolom queꞌxye re: —¿Bar takatau cua saꞌ li naꞌajej aꞌin re takaqꞌueheb chi cuaꞌac li qꞌuila tenamit aꞌin? Arin ma̱cꞌaꞌ cuan, chanqueb.

³⁴ Ut li Jesús quixye reheb: —¿Jarub li caxlan cua cuan e̱riqꞌuin? chan. —Cuukub ajcuiꞌ li caxlan cua ut cuib oxib li cocꞌ car, chanqueb re.

³⁵ Ut li Jesús quixtaklaheb li tenamit chi cꞌojla̱c chiru chꞌochꞌ.

³⁶ Ut quixchap li cuukub chi caxlan cua ut eb li car, quixbantioxi chiru li Dios ut quixjachi. Ut quixqꞌue reheb lix tzolom re nak teꞌxjeqꞌui reheb li tenamit.

³⁷ Queꞌcuaꞌac chixjunileb toj retal queꞌcꞌojla xchꞌo̱leb. Ut queꞌxcꞌu̱la li qui-elaꞌan. Cuukub chacach nujenak li relaꞌ xcꞌaj li caxlan cua li qui-elaꞌan.

³⁸ Ut eb li queꞌcuaꞌac, aꞌaneb ca̱hib mil chi cui̱nk chi ma̱cꞌaꞌeb saꞌ ajl li ixk chi moco li cocꞌal.

³⁹ Nak ac quixchakꞌrabiheb li tenamit, li Jesús qui-oc cuiꞌchic saꞌ li jucub ut co̱ cuiꞌchic jun pacꞌal li palau saꞌ li naꞌajej xcue̱nt Magdala.