San Mateo 11 - Li Santil hu

Laj Juan laj Cubsihom Haꞌ naxtakla xpatzꞌbal ani li Jesús

¹ Nak quirakeꞌ li Jesús chixtaklanquileb chi xic chi cꞌanjelac lix tzolom cablaju, qui-el aran ut co̱ chixchꞌolobanquil lix ya̱lal saꞌ eb li tenamit.

² Ac cuan chi pre̱xil laj Juan laj Cubsihom Haꞌ nak quirabi resil li cꞌaꞌru yo̱ chixba̱nunquil li Cristo. Laj Juan quixtaklaheb lix tzolom chi a̱tinac riqꞌuin ut chixpatzꞌbal re:

³ ¿Ma la̱at li Cristo li yechiꞌinbil, li yo̱co chiroybeninquil? ¿Malaj toj takoybeni chic junak? chanqueb.

⁴ Quichakꞌoc li Jesús ut quixye reheb: —Ayukex ut te̱serakꞌi re laj Juan li cꞌaꞌru yo̱quin chixba̱nunquil che̱ru ut te̱ye re li cꞌaꞌru yo̱quex chirabinquil chicuix la̱in.

⁵ Yehomak re nak eb li mutzꞌ nequeꞌiloc chic; eb li ye̱k rok nequeꞌbe̱c chic; eb li saklep rix xeꞌqꞌuirtesi̱c; eb li tzꞌap xic nequeꞌabin chic; eb li camenak nequeꞌcuaclesi̱c cuiꞌchic chi yoꞌyo; ut eb li nebaꞌ yo̱queb chirabinquil resil li usilal, chaꞌkex re.

⁶ Us xak reheb li ani incꞌaꞌ ta̱chꞌina̱nk xchꞌo̱l inban, chan li Jesús.

⁷ Ut nak queꞌel eb aꞌan, qui-oc chi a̱tinac li Jesús riqꞌuineb li tenamit chirix laj Juan ut quixye chi joꞌcaꞌin: —¿Cꞌaꞌru coxe̱ril chak saꞌ li chaki chꞌochꞌ? ¿Ma junak cui̱nk nacuiban xchꞌo̱l chanchan li caxlan aj yo̱ recꞌasinquil xban ikꞌ coxe̱ril chak?

⁸ ¿Cꞌaꞌ put ru coxe̱ril chak? ¿Ma junak cui̱nk cha̱bil xtikibanquil coxe̱ril chak? Aꞌ li cha̱bileb rakꞌ saꞌ rochocheb li rey cuanqueb.

⁹ ¿Cꞌaꞌru coxe̱ril chak? ¿Ma junak profeta coxe̱ril chak? Ya̱l nak aꞌan jun profeta. Abanan la̱in tinye e̱re nak li jun aꞌin naxkꞌax ru xcuanquil junak profeta.

¹⁰ Chirix laj Juan tzꞌi̱banbil saꞌ li Santil Hu nak naxye chi joꞌcaꞌin: Aꞌut la̱in tintakla lin takl aj cꞌamol be cha̱cuu. Aꞌan ta̱chꞌoloba̱nk xya̱lal chiruheb li tenamit re nak eb aꞌan yoꞌon cua̱nkeb cha̱cꞌulbal la̱at. (Mal. 3:1)

¹¹ Relic chi ya̱l tinye e̱re nak ma̱ jun reheb li nequeꞌyoꞌla arin saꞌ ruchichꞌochꞌ naxkꞌax xcuanquil laj Juan laj Cubsihom Haꞌ. Aban li kꞌaxal caꞌchꞌin saꞌ lix nimajcual cuanquil li Dios, kꞌaxal us chokꞌ re aꞌan chiru laj Juan (xban nak laj Juan incꞌaꞌ quiril lix nimajcual cuanquilal li Dios arin saꞌ ruchichꞌochꞌ).

¹² Chalen chak nak quixtiquib xchꞌolobanquil xya̱lal laj Juan laj Cubsihom Haꞌ ut toj anakcuan cuanqueb li nequeꞌxyal xxakabanquil lix nimajcual cuanquilal li Dios, yal xjuneseb, ut queꞌraj xba̱nunquil saꞌ junpa̱t usta riqꞌuin raylal ta̱uxma̱nk.

¹³ Chixjunileb li profeta joꞌ cuiꞌ lix chakꞌrab laj Moisés, toj riqꞌuin laj Juan xolrakekꞌ xyebal nak ta̱xakaba̱k lix nimajcual cuanquilal li Dios.

¹⁴ Ut cui te̱raj xtaubal lix ya̱lal chirix laj Juan, aꞌan laj Elías li tol-e̱lk.

¹⁵ Li ani na-abin re li yo̱quin xyebal chixqꞌuehak retal chi us li cua̱tin xban nak cuan xya̱lal.

¹⁶ ¿Ani ta cuiꞌ aj iqꞌuin ta̱ru̱k tebinjuntakꞌe̱ta li cuanqueb saꞌ ruchichꞌochꞌ anakcuan? Ma̱cꞌaꞌ nacuulac chiruheb. Chanchaneb li cocꞌal li nequeꞌcꞌojla chi batzꞌu̱nc saꞌ eb li cꞌayil ut nequeꞌxjap re chixyebal reheb lix comon:

¹⁷ “Xkaya̱basi li kaxo̱lb ut incꞌaꞌ xexxajoc; xobichan chi ra saꞌ kachꞌo̱l, ut incꞌaꞌ xyotꞌeꞌ e̱chꞌo̱l chi moco xexya̱bac xban”, chanqueb.

¹⁸ Nak quicꞌulun laj Juan laj Cubsihom Haꞌ, cuan li incꞌaꞌ quixtzaca, ut cuan li incꞌaꞌ quirucꞌ, ut eb li tenamit incꞌaꞌ queꞌxcꞌul ut queꞌxye, “Ma̱us aj musikꞌej cuan riqꞌuin”, chanqueb.

¹⁹ Ut nak xincꞌulun la̱in li Cꞌajolbej, nincuaꞌac ut nin-ucꞌac, ut incꞌaꞌ ajcuiꞌ quineꞌxcꞌul saꞌ xya̱lal. Eb li tenamit nequeꞌxye chicuix, “Li jun cuan arin, junes cuaꞌac ut junes ucꞌac vino naxba̱nu. Aꞌan rami̱gueb laj ma̱c ut eb laj titzꞌol toj”, chanqueb. Aꞌut li naꞌleb li qꞌuebil xban li Dios, xakxo xcuanquil riqꞌuin li xba̱nu laj Juan ut li cꞌaꞌru xinba̱nu la̱in.

Ra teꞌxcꞌul li tenamit cui incꞌaꞌ teꞌxxo̱to xma̱c

²⁰ Tojoꞌnak li Jesús qui-oc chixkꞌusbaleb li tenamit saꞌ eb li naꞌajej bar quixba̱nu cuiꞌ nabal li milagro xban nak incꞌaꞌ queꞌyotꞌeꞌ xchꞌo̱leb ut incꞌaꞌ queꞌxjal xcꞌaꞌuxeb, ut quixye reheb:

²¹ —Raylal cha̱lel saꞌ e̱be̱n, ex aj Corazín. Raylal cha̱lel saꞌ e̱be̱n ex aj Betsaida. Cui ta qui-uxman aran Tiro li milagro aꞌin li xinba̱nu che̱ru ut cui ta qui-uxman aran Sidón, ac najter raj queꞌxqꞌue li cha saꞌ xjolomeb ut ac queꞌxqꞌue raj li kꞌes ru tꞌicr chirixeb chokꞌ retalil nak raheb saꞌ xchꞌo̱l ut queꞌyotꞌeꞌ raj xchꞌo̱leb ut queꞌxjal raj xcꞌaꞌuxeb.

²² Joꞌcan ut nak tinye e̱re nak saꞌ xkꞌehil li rakba a̱tin, kꞌaxal cuiꞌchic li raylal li te̱cꞌul la̱ex chiru li raylal li teꞌxcꞌul eb laj Tiro ut eb laj Sidón.

²³ Ut la̱ex aj Capernaum, cꞌajoꞌ nak nequenimobresi e̱rib. ¿Ma nequecꞌoxla nak ta̱taksi̱k le̱ cuanquil toj saꞌ choxa? Ta̱cubsi̱k ban le̱ cuanquil toj saꞌ xnaꞌajeb li camenak. Cui ta riqꞌuineb laj Sodoma quilaj-uxman eb li milagro li x-uxman e̱riqꞌuin la̱ex, toj cuanqueb raj saꞌ li cutan anakcuan.

²⁴ Joꞌcan ut nak tinye e̱re nak saꞌ xkꞌehil li rakba a̱tin, kꞌaxal cuiꞌchic nabal lix tojbal e̱ma̱c li te̱cꞌul la̱ex chiru li teꞌxcꞌul eb laj Sodoma.—

Cha̱lkex cuiqꞌuin ut texinqꞌue chi hila̱nc, chan li Jesús

²⁵ Saꞌ eb li cutan aꞌan, li Jesús quitijoc ut quixye: —At inYucuaꞌ, la̱at laj e̱chal re li choxa joꞌ ajcuiꞌ li ruchichꞌochꞌ. Ninbantioxi cha̱cuu xban nak xamuk lix ya̱lal chirix lix nimal la̱ cuanquilal chiruheb li cuanqueb xnaꞌleb nak nequeꞌxye rib, ut xamuk ajcuiꞌ chiruheb li tzolbileb. Ut xacꞌut lix ya̱lal chiruheb li cubenakeb xcuanquil, li chanchaneb cocꞌal.

²⁶ Xaba̱nu chi joꞌcan xban nak joꞌcan xcuulac cha̱cuu, chan li Jesús nak quitijoc.

²⁷ Ut quixye reheb li tenamit: —Chixjunil li cꞌaꞌak re ru xkꞌaxtesi saꞌ cuukꞌ lin Yucuaꞌ. Ma̱ ani nanaꞌoc cuu la̱in li Cꞌajolbej, caꞌaj cuiꞌ li Acuabej Dios. Ma̱ ani nanaꞌoc ru li Acuabej Dios, caꞌaj cuiꞌ la̱in li Cꞌajolbej. Ut ta̱naꞌekꞌ ajcuiꞌ ru xbaneb li ani tincꞌut cuiꞌ lix ya̱lal, la̱in li Cꞌajolbej.

²⁸ Joꞌcan ut cha̱lkex cuiqꞌuin che̱junilex li lublu̱quex ut li tacuajenakex ut la̱in texinqꞌue chi hila̱nc.

²⁹ Cꞌulumak li yugo li tinqꞌue saꞌ e̱be̱n ut tzolomak e̱rib cuiqꞌuin xban nak tu̱lanin ut kꞌun inchꞌo̱l ut te̱tau xcꞌojobanquil e̱chꞌo̱l,

³⁰ xban nak lin yugo kꞌun ut se̱b li i̱k li tinqꞌue saꞌ e̱be̱n.