San Mateo 10 - Li Santil hu

Li Jesús quixqꞌueheb xcꞌanjel lix cablaju chi tzolom

¹ Saꞌ jun li cutan li Jesús quixbokeb lix tzolom cablaju riqꞌuin ut quixqꞌueheb xcuanquil chirisinquil li ma̱us aj musikꞌej ut quixqꞌueheb xcuanquil chixqꞌuirtesinquileb li yaj, aꞌ yalak cꞌaꞌru chi xyajelil ut raylal.

² Aꞌan aꞌin lix cꞌabaꞌeb lix tzolom cablaju, li quixxakab chokꞌ x-apóstol: li xbe̱n, aꞌan laj Simón, Pedro nayeman re; ut laj Andrés li ri̱tzꞌin; laj Jacobo ut laj Juan li ri̱tzꞌin. Laj Zebedeo, aꞌan lix yucuaꞌeb;

³ laj Felipe ut laj Bartolomé; laj Tomás ut laj Mateo laj titzꞌol toj; laj Jacobo li ralal laj Alfeo ut laj Lebeo aj Tadeo xcab xcꞌabaꞌ,

⁴ laj Simón aj Canaán, ut laj Judas Iscariote, aꞌ li quikꞌaxtesin re li Jesús saꞌ rukꞌeb li xicꞌ nequeꞌiloc re.

⁵ Nak quixtaklaheb li cablaju aꞌin chi cꞌanjelac, li Jesús quixchakꞌrabiheb ut quixye reheb: —Mexxic saꞌ lix tenamiteb li ma̱cuaꞌeb aj judío chi moco tex-oc saꞌ xtenamiteb aj Samaria.

⁶ Texxic ban riqꞌuineb laj judío. Aꞌaneb li ralal xcꞌajol laj Israel. Chanchaneb li carner li sachenakeb.

⁷ Ut nak yo̱kex chi xic, yo̱kex chixchꞌolobanquil lix ya̱lal ut chixyebal, “cuulac re xkꞌehil nak ta̱qꞌuehekꞌ saꞌ xcuanquil xban li Dios li ta̱cua̱nk xcuanquil saꞌ xbe̱neb li ralal xcꞌajol,” chaꞌkex.

⁸ Cheqꞌuirtesiheb li yaj, checuaclesiheb cuiꞌchic chi yoꞌyo li camenak. Cheqꞌuirtesiheb li saklep rix ut cherisiheb li ma̱us aj musikꞌej. Chi ma̱tan xecꞌul le̱ cuanquil ut chi ma̱tan ajcuiꞌ te̱ba̱nu li usilal.

⁹ Ma̱cꞌaꞌ cꞌaꞌru te̱cꞌam che̱rix. Incꞌaꞌ te̱cꞌam li oro chi moco li plata, chi moco li cocꞌ tumin kꞌan ru.

¹⁰ Chi moco te̱cꞌam xnaꞌaj li cꞌaꞌak re ru ta̱cꞌanjelak e̱re saꞌ be, chi moco te̱cꞌam xjalbal le̱ rakꞌ, chi moco xjalbal e̱xa̱b, chi moco e̱xukꞌ. Me̱cꞌam li cꞌaꞌak re ru aꞌin xban nak laj cꞌanjel, aꞌan tento nak ta̱qꞌuehekꞌ re lix tzacae̱mk.

¹¹ Ut yalak bar tenamitil ut cꞌaleba̱l toxex-ocak cuiꞌ, patzꞌomak ani ta̱cꞌuluk e̱re chi sa saꞌ xchꞌo̱l, ut aran texhila̱nk riqꞌuin tojaꞌ ya̱l jokꞌe texxic.

¹² Ut nak tex-oc saꞌ li cab, qꞌuehomak xsahil xchꞌo̱leb ut te̱tzꞌa̱ma li tuktu̱quil usilal saꞌ xbe̱neb li cuanqueb saꞌ li cab.

¹³ Ut cui texcꞌulekꞌ saꞌ usilal, ta̱cana̱k riqꞌuineb li tuktu̱quil usilal. Ut cui incꞌaꞌ texcꞌulekꞌ saꞌ usilal, incꞌaꞌ ajcuiꞌ ta̱cana̱k riqꞌuineb li tuktu̱quil usilal. Ta̱sukꞌi̱k cuiꞌchic e̱riqꞌuin.

¹⁴ Ut yalak ani incꞌaꞌ ta̱cꞌuluk e̱re chi moco ta̱rabi le̱ ra̱tin, nak tex-e̱lk saꞌ li cab aꞌan, malaj ut saꞌ li tenamit, te̱chikꞌchikꞌi li poks cuan che̱rok chokꞌ retalil nak incꞌaꞌ chic texcꞌoxlak chirix li naꞌajej aꞌan.

¹⁵ Relic chi ya̱l tinye e̱re nak toj cubenak caꞌchꞌin lix tojbal xma̱queb li tenamit Sodoma ut li tenamit Gomorra chiru lix tojbal xma̱queb li tenamit aꞌan saꞌ xkꞌehil li rakba a̱tin.

Resil li ra xi̱cꞌ li ta̱cha̱lk saꞌ xbe̱neb

¹⁶ Chenauhak nak la̱in tintakla̱nk e̱re saꞌ xya̱nkeb li xicꞌ nequeꞌiloc e̱re. Chanchanakex li carner saꞌ xya̱nkeb laj xoj. Se̱bak e̱chꞌo̱l joꞌcakex li cꞌantiꞌ ut ti̱cak e̱chꞌo̱l joꞌcakex li paloma.

¹⁷ Cauhak le̱ chꞌo̱l xban nak cuanqueb li teꞌkꞌaxtesi̱nk e̱re saꞌ rukꞌeb laj rakol a̱tin. Ut chi ma̱cꞌaꞌ e̱ma̱c texsaqꞌuekꞌ xbaneb saꞌ li cab li nequeꞌxchꞌutub cuiꞌ ribeb laj judío.

¹⁸ Ut texcꞌamekꞌ chiruheb li acuabej ut chiruheb li rey saꞌ incꞌabaꞌ la̱in. Ut te̱chꞌolob lix ya̱lal chiruheb aꞌan, joꞌ ajcuiꞌ chiruheb li ma̱cuaꞌeb aj judío.

¹⁹ Ut nak toxexxakaba̱k chiruheb, mexcꞌoxlac chirix li cꞌaꞌru te̱ye, chi moco texcꞌoxlak chirix chanru tex-a̱tinak xban nak saꞌ li ho̱nal aꞌan ta̱yehekꞌ e̱re cꞌaꞌru te̱ye.

²⁰ Ma̱cuaꞌ la̱ex li tex-a̱tinak. Aꞌ ban li Santil Musikꞌej ta̱a̱tinak. Yal tixtoꞌoni lix tzꞌu̱mal e̱re.

²¹ Saꞌ eb li cutan aꞌan, cuan li asbej tixkꞌaxtesi li i̱tzꞌinbej re ta̱camsi̱k ut cuan li i̱tzꞌinbej tixkꞌaxtesi li asbej. Ut cuan li yucuaꞌbej tixkꞌaxtesi li alalbej. Ut cuan li alalbej xicꞌ teꞌrileb lix naꞌ xyucuaꞌ ut teꞌxqꞌueheb chi camsi̱c.

²² Ut chixjunileb xicꞌ teꞌilok e̱re saꞌ incꞌabaꞌ. Abanan li ani teꞌcuyuk xcꞌulbal li raylal toj saꞌ rosoꞌjic lix yuꞌam, eb aꞌan teꞌcolekꞌ.

²³ Nak texrahobtesi̱k saꞌ jun li tenamit, texxic saꞌ jalan chic. Relic chi ya̱l ninye e̱re nak toj ma̱jiꞌ ajcuiꞌ nequechoy xbeninquil chixjunileb li tenamit cuanqueb Israel teꞌxnau nak xoline̱lk la̱in li Cꞌajolbej.

²⁴ Junak li yo̱ chi tzoloc incꞌaꞌ naru tixkꞌax xcuanquil li yo̱ chi tzoloc re, chi moco li mo̱s naxkꞌax xcuanquil lix patrón.

²⁵ Chicꞌojla̱k xchꞌo̱l li yo̱ chi tzoloc nak ta̱cuulak joꞌ laj tzolol re, ut li mo̱s joꞌcak lix patrón. Cui aj tza nayeheꞌ re laj e̱chal cab, ¿ma tojaꞌ ta chic incꞌaꞌ teꞌyehekꞌ aj tza reheb li ralal xcꞌajol?

²⁶ Joꞌcan utan mexxucuac chiruheb li xicꞌ nequeꞌiloc e̱re. Ma̱ jun naꞌleb mukmu anakcuan chi incꞌaꞌ ta ta̱tauma̱nk ru mokon, ut ma̱cꞌaꞌ mukmu anakcuan chi incꞌaꞌ ta̱cꞌutbesi̱k.

²⁷ Li cꞌaꞌru xexintzol cuiꞌ e̱junes, aꞌan te̱ye chiruheb chixjunileb, ut li cꞌaꞌru xinye e̱re e̱junes, aꞌan te̱ye chi cau xya̱b e̱cux chiruheb chixjunileb li tenamit.

²⁸ Mexxucuac chiruheb laj camsinel xban nak li a̱mej incꞌaꞌ naru teꞌxcamsi. Aꞌ li te̱xucua ru, aꞌan li Ka̱cuaꞌ li cuan xcuanquil chixcamsinquil li tibelej ut chixtaklanquil li a̱mej saꞌ xbalba.

Li Dios na-iloc e̱re

²⁹ ¿Ma incꞌaꞌ ta biꞌ nacꞌayi̱c cuib chi tzentzeyul chi jun centavo? Kꞌaxal cubenak xtzꞌak, abanan ma̱ jun li chꞌina tzentzeyul nacam chi incꞌaꞌ ta tixnau li Dios le̱ Yucuaꞌ.

³⁰ Joꞌcan ajcuiꞌ li rismal le̱ jolom ajlanbileb chixjunil xban li Dios.

³¹ Joꞌcan nak mexxucuac chiruheb li xicꞌ nequeꞌiloc e̱re xban nak la̱ex kꞌaxal terto e̱tzꞌak chiruheb nabal chi tzentzeyul.

³² Li ani naxye chiruheb li tenamit nak niquinixpa̱b, la̱in tinye chiru lin Yucuaꞌ cuan saꞌ choxa nak aꞌan li cualal.

³³ Ut li ani ta̱tzꞌekta̱na̱nk cue chiruheb li tenamit, la̱in tintzꞌekta̱na ajcuiꞌ aꞌan chiru lin Yucuaꞌ cuan saꞌ choxa.

³⁴ Me̱cꞌoxla nak xinchal ta chixqꞌuebal li tuktu̱quil usilal saꞌ ruchichꞌochꞌ. Xinchal ban chixchꞌolobanquil lix ya̱lal; ut xban lix ya̱lal li nachꞌoloba̱c, nacuan li chꞌaꞌajquilal.

³⁵ Xinchal ut chixchꞌolobanquil lix ya̱lal ut li ani ta̱pa̱ba̱nk cue, teꞌxcꞌul li raylal. Li alalbej ta̱cua̱nk saꞌ ra xi̱cꞌ riqꞌuin lix yucuaꞌ, ut li coꞌbej ta̱cua̱nk saꞌ ra xi̱cꞌ riqꞌuin lix naꞌ, ut li alibej ta̱cua̱nk saꞌ ra xi̱cꞌ riqꞌuin li naꞌbej saꞌ incꞌabaꞌ la̱in.

³⁶ Li cuanqueb saꞌ jun cabal, xicꞌ teꞌril rib saꞌ incꞌabaꞌ la̱in.

³⁷ Ut ani kꞌaxal naxra xnaꞌ xyucuaꞌ chicuu la̱in, moco xcꞌulub ta nak tincꞌul chokꞌ cualal. Ut ani kꞌaxal naxra li ralal xcꞌajol chicuu la̱in, moco xcꞌulub ta nak tincꞌul chokꞌ cualal.

³⁸ Li ani tixcuy inta̱kenquil usta tixcꞌul li camsi̱c saꞌ incꞌabaꞌ, li jun aꞌan xcꞌulub nak tincꞌul chokꞌ cualal. Abanan li ani incꞌaꞌ tixcuy inta̱kenquil, li jun aꞌan moco xcꞌulub ta nak tincꞌul chokꞌ cualal.

³⁹ Li ani naxra lix yuꞌam arin saꞌ ruchichꞌochꞌ, aꞌan tixsach li junelic yuꞌam. Ut li ani tixsach lix yuꞌam arin saꞌ ruchichꞌochꞌ saꞌ incꞌabaꞌ la̱in, aꞌan ta̱re̱chani li junelic yuꞌam.

Lix kꞌajca̱munquil li nacꞌuluc reheb lix tzolom li Jesús

⁴⁰ Li ani ta̱cꞌuluk e̱re la̱ex, tinixcꞌul ajcuiꞌ la̱in. Ut li ani ta̱cꞌuluk cue, tixcꞌul ajcuiꞌ li xtaklan chak cue.

⁴¹ Li ani ta̱cꞌuluk re junak profeta chi anchal xchꞌo̱l xban nak aꞌan naxye ra̱tin li Dios, li joꞌ qꞌuial lix kꞌajca̱munquil li tixcꞌul li profeta, aꞌan ajcuiꞌ li tixcꞌul li ta̱cꞌuluk re. Ut li ani ta̱cꞌuluk re li ti̱c xchꞌo̱l xban nak aꞌan ti̱c xchꞌo̱l, li joꞌ qꞌuial lix kꞌajca̱munquil li tixcꞌul li ti̱c xchꞌo̱l, aꞌan ajcuiꞌ li tixcꞌul li ta̱cꞌuluk re.

⁴² Li ani tixqꞌue jun secꞌak rucꞌa junak reheb lin tzolom usta cubenak xcuanquil, cui tixqꞌue li rucꞌa xban nak aꞌan intzolom, relic chi ya̱l ninye e̱re nak li jun aꞌan tixcꞌul lix kꞌajca̱munquil.