San Marcos 9 - Li Santil hu

¹ Ut li Jesús quixye: —Relic chi ya̱l tinye e̱re nak cuanqueb arin saꞌ e̱ya̱nk li incꞌaꞌ teꞌca̱mk toj teꞌril lix nimajcual cuanquilal li Dios nak ta̱cha̱lk riqꞌuin lix cuanquil.—

Qui-ileꞌ lix lokꞌal li Jesús nak quijalanoꞌ li riloba̱l

² Cuakib cutan chic xyebal aꞌan xban li Jesús nak quixcꞌameb laj Pedro, laj Jacobo, ut laj Juan saꞌ xbe̱n jun li nimla tzu̱l. Nak cuanqueb aran xjuneseb, quijalanoꞌ li riloba̱l li Jesús chiruheb.

³ Ut li rakꞌ quijalanoꞌ rilbal. Nalemtzꞌun chic li rakꞌ. Saksakpotzꞌin nacꞌutun, chanchan li ratzꞌam que. Ma̱ jun aj puchꞌunel arin saꞌ ruchichꞌochꞌ tixsakobresi junak tꞌicr joꞌ nak quisakobresi̱c li rakꞌ li Jesús.

⁴ Ac xaka̱mil laj Elías ut laj Moisés chiruheb nak queꞌril. Ut yo̱queb chi a̱tinac riqꞌuin li Jesús.

⁵ Laj Pedro quixye: —Ka̱cuaꞌ, cꞌajoꞌ xchakꞌal ru nak cuanco arin. Xkayi̱b ta oxibak muheba̱l arin. Jun a̱cue, jun re laj Moisés, ut jun re laj Elías.—

⁶ Quixye chi joꞌcan xban nak incꞌaꞌ chic naxnau cꞌaꞌru tixye xban nak cꞌajoꞌ lix xiuheb.

⁷ Ut quichal jun nimla chok saꞌ xbe̱neb. Li Dios quia̱tinac chak saꞌ li chok, ut quixye: —Aꞌin li cualal, raro inban. Cherabi li cꞌaꞌru tixye.—

⁸ Ut nak quiril ac ma̱ aniheb chic laj Elías ut laj Moisés. Caꞌaj chic li Jesús quicana xjunes.

⁹ Nak yo̱queb chak chi cubec saꞌ li tzu̱l quixye li Jesús reheb nak ma̱ ani aj e teꞌxye li cꞌaꞌru queꞌril toj ta̱cuacli̱k cuiꞌchic li Alalbej chi yoꞌyo saꞌ xya̱nkeb li camenak.

¹⁰ Eb aꞌan ma̱ ani aj e queꞌxye, caꞌaj cuiꞌ chi ribileb rib queꞌa̱tinac. Queꞌxye: —¿Cꞌaꞌru xya̱lal aꞌan nak li Jesús quixye nak ta̱cuacli̱k cuiꞌchic chi yoꞌyo saꞌ xya̱nkeb li camenak?—

¹¹ Queꞌxpatzꞌ re li Jesús: —¿Cꞌaꞌut nak nequeꞌxye laj tzꞌi̱b nak xbe̱n cua ta̱cha̱lk laj Elías tojoꞌnak tol-e̱lk li Cristo? chanqueb.

¹² Ut nak quichakꞌoc li Jesús quixye reheb: —Ya̱l ajcuiꞌ tzꞌi̱banbil retalil nak laj Elías xbe̱n cua ta̱cha̱lk chixcꞌu̱banquil chixjunil li cꞌaꞌak re ru. Ut tzꞌi̱banbil ajcuiꞌ saꞌ li Santil Hu chicuix la̱in li Alalbej nak nabal li raylal tincꞌul ut tineꞌxtzꞌekta̱na.

¹³ Abanan tinye e̱re nak laj Elías ac xcꞌulun ut cꞌajoꞌ li raylal queꞌxba̱nu re joꞌ tzꞌi̱banbil saꞌ li Santil Hu chanru ta̱cꞌulma̱nk.—

Li Jesús quirisi li ma̱us aj musikꞌej riqꞌuin li al

¹⁴ Nak coxeꞌe̱lk cuanqueb cuiꞌ li bele̱b chic lix tzolom li Jesús, queꞌril nak cuan nabal li tenamit riqꞌuineb. Ut eb laj tzꞌi̱b yo̱queb chixcuechꞌinquil lix tzolom li Jesús.

¹⁵ Ut eb li qꞌuila tenamit queꞌsach xchꞌo̱l chirilbal li Jesús, ut queꞌco̱eb saꞌ a̱nil chixcꞌulbal ut queꞌxqꞌue xsahil xchꞌo̱l.

¹⁶ Li Jesús quixpatzꞌ reheb: —¿Cꞌaꞌru nequecuechꞌi cuiꞌ e̱rib? chan.

¹⁷ Quichakꞌoc jun saꞌ xya̱nkeb li qꞌuila tenamit ut quixye re: —At Ka̱cuaꞌ, xincꞌam chak jun li cualal arin. Mem ut cuan ma̱us aj musikꞌej riqꞌuin.

¹⁸ Yalak bar nacuteꞌ saꞌ chꞌochꞌ xban li ma̱us aj musikꞌej. Na-el cuokx saꞌ re ut naxcꞌuxuxi li ruch re ut naxchecꞌ rib. Xintzꞌa̱ma chiruheb la̱ tzolom nak teꞌrisi li ma̱us aj musikꞌej; abanan incꞌaꞌ xeꞌru chirisinquil.—

¹⁹ Nak li Jesús quichakꞌoc, quixye reheb: —Ti̱c incꞌaꞌ nequexpa̱ban. ¿Joꞌ najtil chic tincua̱nk e̱riqꞌuin re nak texpa̱ba̱nk? ¿Joꞌ najtil chic texincuy nak nequecꞌoxla? Cꞌam chak li al arin cuiqꞌuin, chan li Jesús.

²⁰ Queꞌxcꞌam li al riqꞌuin ut li ma̱us aj musikꞌej nak quiril li Jesús quixchꞌikle li al, quixcut saꞌ chꞌochꞌ ut quixtolcꞌosi ut qui-oc chi e̱lc cuokx saꞌ re.

²¹ Ut li Jesús quixpatzꞌ re lix yucuaꞌ: —¿Jokꞌe xticla lix yajel li al aꞌin? chan. —Toj caꞌchꞌin nak quixtiquib xcꞌulbal chi joꞌcaꞌin, chan lix yucuaꞌ.

²² —Nabal sut nacuteꞌ saꞌ xam. Nabal sut nacuteꞌ saꞌ haꞌ xban li ma̱us aj musikꞌej re xcamsinquil. Cui cuan cꞌaꞌru naru ta̱ba̱nu re, ba̱nu usilal, il xtokꞌoba ku ut choa̱tenkꞌa, chan.

²³ Li Jesús quixye: —¿Cꞌaꞌut nak nacaye “cui naru”? ¿Ma incꞌaꞌ nacanau nak cui nacatpa̱ban chixjunil naru xba̱nunquil? chan.

²⁴ Saꞌ junpa̱t quia̱tinac lix yucuaꞌ li al ut quixye chi cau, —La̱in ninpa̱b. China̱tenkꞌa re nak tinpa̱b chi tzꞌakal.—

²⁵ Nak li Jesús quiril nak saꞌ junpa̱t yo̱queb chi chꞌutla̱c nabal li tenamit, quixchꞌila li ma̱us aj musikꞌej. Quixye re: —At ma̱us aj musikꞌej, la̱at nacatmemobresin. La̱at nacattzꞌapoc xic. La̱in tinye a̱cue, elen riqꞌuin li al aꞌin ut mat-oc chic riqꞌuin, chan.

²⁶ Ut li ma̱us aj musikꞌej quixjap re ut quixchꞌikle chi cau li al. Tojoꞌnak qui-el riqꞌuin. Ut li al chanchan camenak quicana. Nabal li tenamit queꞌyehoc re nak xcam.

²⁷ Ut li Jesús quixchap chi rukꞌ li al ut quixcuaclesi ut li al quixakli.

²⁸ Nak qui-oc li Jesús saꞌ cab xjunes rochbeneb lix tzolom, queꞌxpatzꞌ re: —¿Cꞌaꞌut nak incꞌaꞌ xoru la̱o chirisinquil li ma̱us aj musikꞌej? chanqueb.

²⁹ Ut li Jesús quixye reheb: —Caꞌaj cuiꞌ riqꞌuin ayu̱n ut riqꞌuin tijoc naru risinquil li ma̱us aj musikꞌej aꞌin.—

Li Jesús quixye cuiꞌchic resil lix camic

³⁰ Ut nak queꞌel aran, queꞌnumeꞌ saꞌ li naꞌajej Galilea. Ut li Jesús incꞌaꞌ quiraj nak teꞌxnau nak cuan aran.

³¹ Yo̱ chixchꞌolobanquil xya̱lal chiruheb lix tzolom. Quixye reheb: —La̱in li Alalbej, tineꞌxkꞌaxtesi saꞌ rukꞌeb li cui̱nk li teꞌcamsi̱nk cue. Ut nak ac xineꞌxcamsi, tincuacli̱k cuiꞌchic chi yoꞌyo saꞌ xya̱nkeb li camenak saꞌ rox li cutan.—

³² Aban eb aꞌan incꞌaꞌ queꞌxtau ru li cꞌaꞌru quixye reheb, ut queꞌxucuac chixpatzꞌbal cꞌaꞌru xya̱lal li quixye.

Li nim xcuanquil, aꞌan li nacꞌanjelac chiruheb li ras ri̱tzꞌin

³³ Queꞌcuulac saꞌ li tenamit Capernaum. Nak cuanqueb saꞌ cab quixpatzꞌ reheb lix tzolom: —¿Cꞌaꞌru li yo̱quex chixcuechꞌinquil rix nak yo̱co chi cha̱lc? chan.

³⁴ Mem queꞌcana ut incꞌaꞌ chic queꞌchakꞌoc xban nak yo̱queb chixcuechꞌinquil rix ani reheb li nim xcuanquil.

³⁵ Li Jesús quicꞌojla ut quixbokeb li cablaju chi xtzolom riqꞌuin ut quixye reheb: —Li ani ta̱raj nak ta̱qꞌuehekꞌ xcuanquil, chixcubsihak rib ut chicꞌanjelak chiruheb chixjunileb.—

³⁶ Quixchap chi rukꞌ jun li chꞌina al ut quixqꞌue saꞌ xyiheb. Quixkꞌalu ut quixye reheb:

³⁷ —Li ani naxqꞌue xlokꞌal li toj kꞌun xchꞌo̱l joꞌ li chꞌina al aꞌin saꞌ incꞌabaꞌ la̱in, naxqꞌue ajcuiꞌ inlokꞌal la̱in. Ut ma̱cuaꞌ caꞌaj cuiꞌ la̱in naxqꞌue inlokꞌal. Naxqꞌue aj ban cuiꞌ xlokꞌal li Dios li quitaklan chak cue.—

Li ani incꞌaꞌ xicꞌ na-iloc ke, aꞌan na-oquen chikix

³⁸ Laj Juan quixye re li Jesús: —At Ka̱cuaꞌ, jun cui̱nk xkil chak leꞌ. Yo̱ chi isi̱nc ma̱us aj musikꞌej saꞌ a̱cꞌabaꞌ. Ut la̱o xkaye re nak incꞌaꞌ tixba̱nu aꞌan xban nak moco kacomon ta.—

³⁹ Ut li Jesús quixye reheb: —Me̱kꞌus xban nak ma̱ ani ta̱ba̱nu̱nk junak milagro saꞌ incꞌabaꞌ la̱in ut mokon ta̱oc ta chintzꞌekta̱nanquil.

⁴⁰ Li ani incꞌaꞌ xicꞌ na-iloc ke, aꞌan na-oquen chikix.

⁴¹ Li ani ta̱qꞌuehok jun secꞌak haꞌ e̱re saꞌ incꞌabaꞌ la̱in xban nak la̱ex cualal incꞌajol, relic chi ya̱l tinye e̱re nak tixcꞌul lix kꞌajca̱munquil.—

Xiu xiu li tꞌanecꞌ saꞌ li ma̱c

⁴² —Li ani ta̱poꞌok xchꞌo̱leb li toj kꞌuneb xchꞌo̱l, us raj xcutbal saꞌ li palau chi bacꞌbo junak nimla pec chi xcux.

⁴³ Cui la̱ cuukꞌ ta̱qꞌuehok a̱cue chi ma̱cobc, us raj cui ta̱yocꞌ. Mas us nak cua̱nk la̱ yuꞌam chi junelic riqꞌuin jun ajcuiꞌ la̱ cuukꞌ chiru nak tatxic riqꞌuin cuib la̱ cuukꞌ saꞌ li xbalba, bar cuiꞌ incꞌaꞌ ta̱chupk li xam.

⁴⁴ Aran incꞌaꞌ teꞌca̱mk li motzoꞌ chi moco li xam ta̱chupk.

⁴⁵ Cui la̱ cuok ta̱qꞌuehok a̱cue chi ma̱cobc, us raj cui ta̱yocꞌ. Mas us nak cua̱nk la̱ yuꞌam chi junelic riqꞌuin jun la̱ cuok chiru nak tatxic riqꞌuin cuib la̱ cuok saꞌ li xbalba, bar cuiꞌ incꞌaꞌ ta̱chupk li xam.

⁴⁶ Aran incꞌaꞌ teꞌca̱mk li motzoꞌ chi moco li xam ta̱chupk.

⁴⁷ Cui li xnakꞌ a̱cuu ta̱qꞌuehok a̱cue chi ma̱cobc, us raj cui ta̱cuisi. Mas us nak tat-oc saꞌ xnimajcual cuanquilal li Dios riqꞌuin jun li xnakꞌ a̱cuu chiru nak tatxic saꞌ li xbalba riqꞌuin cuib xnakꞌ a̱cuu.

⁴⁸ Aran incꞌaꞌ teꞌca̱mk li motzoꞌ chi moco li xam ta̱chupk.

⁴⁹ Joꞌ nak naqꞌueman li atzꞌam chiru li tib re nak incꞌaꞌ nachuhoꞌ, joꞌcan ajcuiꞌ nak nayaleꞌ rix li kapa̱ba̱l. Chanchan riqꞌuin xam nayaleꞌ rix xban li raylal nakacꞌul.

⁵⁰ Cha̱bil li atzꞌam, abanan cui na-osoꞌ lix quiꞌal ma̱cꞌaꞌ chic na-oc cuiꞌ. Joꞌcan ajcuiꞌ la̱ex chicua̱nk e̱cha̱bilal ut cua̱nkex saꞌ usilal chi ribil e̱rib.—