San Marcos 8 - Li Santil hu

Li Jesús quixqꞌueheb chi cuaꞌac li ca̱hib mil

¹ Saꞌ jun chic li cutan queꞌxchꞌutub rib nabal li tenamit riqꞌuin li Jesús. Xban nak ma̱cꞌaꞌ xcuaheb quixbokeb lix tzolom ut quixye reheb:

² —Tokꞌobeb ru li qꞌuila tenamit aꞌin. Ac cuan oxib cutan roquiqueb arin cuiqꞌuin ut ma̱cꞌaꞌ chic xcuaheb.

³ Cui tebintakla saꞌ rochocheb chi incꞌaꞌ teꞌcuaꞌak, naru nequeꞌlub saꞌ be xban nak cuan najt xeꞌchal chak.—

⁴ Lix tzolom queꞌxye re: —¿Bar takatau cua saꞌ li naꞌajej aꞌin re takaqꞌueheb chi cuaꞌac? Arin ma̱cꞌaꞌ cuan, chanqueb.

⁵ Ut li Jesús quixpatzꞌ reheb: —¿Jarub li caxlan cua cuan e̱riqꞌuin? chan. —Cuukub ajcuiꞌ, chanqueb.

⁶ Tojoꞌnak quixye reheb li tenamit nak teꞌchunla̱k chiru chꞌochꞌ. Quixchap li cuukub chi caxlan cua. Quixbantioxi chiru li Dios ut quixjachi. Ut quixqꞌue reheb lix tzolom re nak teꞌxjeqꞌui reheb li tenamit.

⁷ Ut cuan cuib oxib li cocꞌ car riqꞌuineb. Nak quirosobtesi quixye reheb nak teꞌxjeqꞌui ajcuiꞌ reheb li tenamit.

⁸ Queꞌcuaꞌac chi us ut queꞌcꞌojla xchꞌo̱l. Ut cuukub chacach chic li qui-elaꞌan.

⁹ Cuanqueb na ca̱hibak mil li queꞌcuaꞌac ut nak ac xeꞌcuaꞌac, queꞌchakꞌrabi̱c xban li Jesús.

¹⁰ Ut saꞌ junpa̱t qui-oc li Jesús saꞌ li jucub rochbeneb lix tzolom ut queꞌco̱eb saꞌ li naꞌajej xcue̱nt Dalmanuta.

Eb laj fariseo queꞌraj rilbal li milagro

¹¹ Queꞌcuulac laj fariseo riqꞌuin li Jesús. Queꞌoc chixcuechꞌinquil yal re xyalbal. Queꞌxye re nak tixba̱nu junak milagro chiruheb re rilbal ma ya̱l na nak riqꞌuin li Dios nachal lix cuanquil.

¹² Quixjikꞌ xchꞌo̱l li Jesús xban nak quititzꞌ xbaneb, ut quixye: —Caꞌaj cuiꞌ milagro yo̱queb chixpatzꞌbal eb li tenamit aꞌin. Relic chi ya̱l tinye e̱re nak ma̱ jun milagro tinba̱nu chiruheb.—

¹³ Qui-el riqꞌuineb laj fariseo. Qui-oc saꞌ li jucub rochbeneb lix tzolom. Yo̱queb chi xic jun pacꞌal li palau.

Li Jesús quixjuntakꞌe̱ta lix tijleb eb laj fariseo riqꞌuin lix chꞌamal li caxlan cua

¹⁴ Ut quisach saꞌ xchꞌo̱leb xcꞌambal xcuaheb. Ac cuanqueb saꞌ li jucub nak queꞌxqꞌue retal nak jun ajcuiꞌ li caxlan cua cuan riqꞌuineb.

¹⁵ Li Jesús quixye reheb: —Cheba̱nu cue̱nt. Micuan xchꞌamal xcaxlan cuaheb laj fariseo e̱riqꞌuin chi moco xchꞌamal xcaxlan cua laj Herodes.—

¹⁶ Eb lix tzolom queꞌoc chi a̱tinac chi ribileb rib ut queꞌxye: —¿Cꞌaꞌru xya̱lal aꞌin? ¿Ma xban nak ma̱cꞌaꞌ li caxlan cua kiqꞌuin nak xye ke chi joꞌcan? chanqueb.

¹⁷ Li Jesús quixnau cꞌaꞌru yo̱queb chixyebal chi ribileb rib ut quixye reheb: —¿Cꞌaꞌut nak yo̱quex chixyebal nak ma̱cꞌaꞌ e̱cua? ¿Ma incꞌaꞌ nequetau ru nak ma̱cuaꞌ chirix xchꞌamal li caxlan cua yo̱quin chi a̱tinac? Chirix ban xtijlebeb laj fariseo yo̱quin chi a̱tinac. La̱ex cꞌajoꞌ xcacuil e̱chꞌo̱l.

¹⁸ Incꞌaꞌ nequetau xya̱lal. Cuan xnakꞌ e̱ru ut incꞌaꞌ nequex-iloc. Cuan e̱xic ut incꞌaꞌ nequex-abin.

¹⁹ ¿Ma incꞌaꞌ najulticoꞌ e̱re nak xinjachi li o̱b chi caxlan cua reheb li o̱b mil chi cui̱nk? Ut, ¿jarub chacach qui-elaꞌan? chan reheb. —Cablaju, chanqueb.

²⁰ —¿Ma incꞌaꞌ najulticoꞌ e̱re nak xinjachi li cuukub chi caxlan cua reheb li ca̱hib mil. Ut jarub chacach qui-elaꞌan? chan reheb. —Cuukub chacach, chanqueb.

²¹ Ut li Jesús quixye reheb: —¿Ma toj ma̱jiꞌ ajcuiꞌ nequetau xya̱lal chi joꞌcanan?—

Li Jesús quixqꞌuirtesi li mutzꞌ aran Betsaida

²² Queꞌcuulac li Jesús rochbeneb lix tzolom aran Betsaida. Quicꞌameꞌ chak jun li cui̱nk riqꞌuin. Mutzꞌ ru li cui̱nk. Queꞌxtzꞌa̱ma chiru nak tixqꞌue li rukꞌ saꞌ xbe̱n re nak ta̱ilok.

²³ Li Jesús quixchap li rukꞌ li mutzꞌ ut quixcꞌam chire li tenamit. Ut quixchu̱ba saꞌ xnakꞌ ru li mutzꞌ. Quixqꞌue li rukꞌ saꞌ xbe̱n ut quixpatzꞌ re: —¿Ma nacat-iloc bayak anakcuan? chan re.

²⁴ Li mutzꞌ qui-iloc ut quixye: —Nin-iloc caꞌchꞌin. Nacuileb li cui̱nk chanchaneb li cheꞌ nak yo̱queb chi be̱c.—

²⁵ Tojoꞌnak li Jesús quixqꞌue cuiꞌchic li rukꞌ saꞌ li xnakꞌ ru li mutzꞌ ut quiqꞌuira li ru. Nak qui-iloc li cui̱nk, tzꞌakal chic naril chixjunil.

²⁶ Li Jesús quixtakla li cui̱nk saꞌ rochoch ut quixye re: —Matxic saꞌ li tenamit ut ma̱ ani aj e ta̱ye nak xatinqꞌuirtesi, chan re.

Laj Pedro quixye nak li Jesús, aꞌan li Cristo

²⁷ Chirix aꞌan co̱ li Jesús rochbeneb lix tzolom saꞌ li cocꞌ tenamit xcue̱nt Cesarea Filipo. Nak yo̱queb chi xic, quixpatzꞌ reheb lix tzolom: —¿Anihin la̱in nak nequeꞌxye li tenamit? chan.

²⁸ Queꞌxye re: —Cuan nequeꞌyehoc re nak la̱at laj Juan laj Cubsihom Haꞌ xcuacli cuiꞌchic chi yoꞌyo. Ut cuan nequeꞌyehoc re nak la̱at li profeta Elías, li quicuan najter. Ut cuan cuiꞌchic nequeꞌyehoc re nak la̱at jun chic li profeta, chanqueb.

²⁹ —Ut la̱ex ¿anihin la̱in nak nequeye? chan cuiꞌchic reheb. Ut laj Pedro quixye: —La̱at li Cristo.—

³⁰ Li Jesús quixye reheb nak ma̱ ani aj e teꞌxye nak aꞌan li Cristo.

Li Jesús quixye resil lix camic

³¹ Li Jesús quixchꞌolob xya̱lal chiruheb nak aꞌan li Alalbej ut nak nabal li raylal cha̱lc re saꞌ xbe̱n. Quixye reheb nak ta̱tzꞌekta̱na̱k xbaneb li xakabanbileb chi cꞌanjelac saꞌ li templo. Ta̱tzꞌekta̱na̱k ajcuiꞌ xbaneb li xbe̱nil aj tij. Joꞌ ajcuiꞌ xbaneb laj tzꞌi̱b ut quixye ajcuiꞌ reheb nak ta̱camsi̱k ut ta̱cuacli̱k cuiꞌchic chi yoꞌyo saꞌ rox li cutan.

³² Quixye chi tzꞌakal li cꞌaꞌru tixcꞌul. Nak quirabi aꞌan laj Pedro quirisi xjunes li Jesús ut qui-oc chixkꞌusbal ut quixye re: —Ma̱ye chi joꞌcan Ka̱cuaꞌ.—

³³ Ut li Jesús quixsukꞌisi rib. Quirileb lix tzolom ut quixkꞌus laj Pedro. Quixye re: —Elen arin saꞌ xnakꞌ cuu. La̱at chanchanat aj tza. La̱at incꞌaꞌ yo̱cat chixcꞌoxlanquil joꞌ naxcꞌoxla li Dios. La̱at yo̱cat chixcꞌoxlanquil joꞌ naxcꞌoxla li cui̱nk, chan.

³⁴ Tojoꞌnak quixbokeb li qꞌuila tenamit rochbeneb lix tzolom ut quixye reheb: —Li ani ta̱raj inpa̱banquil, tento nak tixtzꞌekta̱na li cꞌaꞌru naxrahi ru lix chꞌo̱l. Tixcuy xnumsinquil li raylal li tixcꞌul usta ta̱camsi̱k saꞌ incꞌabaꞌ. Ut chinixta̱kehak.

³⁵ Li ani ta̱tzꞌekta̱na̱nk cue re xcolbal lix yuꞌam arin saꞌ ruchichꞌochꞌ, tixtzꞌek li junelic yuꞌam. Aꞌut li naxsach lix yuꞌam saꞌ incꞌabaꞌ la̱in malaj ut saꞌ xcꞌabaꞌ li evangelio, aꞌan ta̱re̱chani li junelic yuꞌam.

³⁶ ¿Cꞌaꞌru tixra junak cui̱nk nak ta̱re̱chani chixjunil lix biomal li ruchichꞌochꞌ ut tixtzꞌekta̱na li junelic yuꞌam xban li biomal?

³⁷ ¿Ma cuan ta biꞌ li cꞌaꞌru tixtoj cuiꞌ li yuꞌam chi junelic?

³⁸ Li ani ta̱xuta̱na̱k chiruheb li tenamit aj ma̱c inban la̱in malaj ut xban li cua̱tin, la̱in li Alalbej tinxuta̱na̱k ajcuiꞌ xbaneb nak tincha̱lk chak riqꞌuin xnimal xlokꞌal lin Yucuaꞌ cuochbeneb li santil ángel.—