San Marcos 3 - Li Santil hu

Li Jesús quixqꞌuirtesi li cui̱nk sic jun li rukꞌ

¹ Ut li Jesús co̱ cuiꞌchic saꞌ li cab li nequeꞌxchꞌutub cuiꞌ ribeb laj judío. Ut aran cuan jun li cui̱nk sic jun li rukꞌ.

² Eb laj fariseo yo̱queb chixsicꞌbal chanru nak teꞌxjit li Jesús. Joꞌcan nak yo̱queb chirilbal ma tixqꞌuirtesi tana li cui̱nk aꞌin saꞌ li hiloba̱l cutan.

³ Li Jesús quixye re li cui̱nk li sic rukꞌ: —Numen chak arin chi ubej, chan re.

⁴ Tojoꞌnak li Jesús quixpatzꞌ reheb laj fariseo: —¿Cꞌaꞌru us xba̱nunquil saꞌ li hiloba̱l cutan? ¿Ma naru xba̱nunquil li us malaj ut li incꞌaꞌ us? ¿Ma us xcolbal xyuꞌam junak malaj ut xsachbal? chan cuiꞌchic reheb. Ut eb aꞌan mem queꞌcana. Incꞌaꞌ chic queꞌxtau cꞌaꞌru queꞌxye.

⁵ Quijoskꞌoꞌ li Jesús saꞌ xbe̱neb, abanan quiril cuiꞌchic xtokꞌoba̱l ruheb xban nak incꞌaꞌ queꞌraj xtaubal xya̱lal. Ut li Jesús quixye re li cui̱nk li sic rukꞌ: —Yeꞌ la̱ cuukꞌ, chan. Ut li cui̱nk quixyeꞌ li rukꞌ ut saꞌ junpa̱t quiqꞌuira.

⁶ Tojoꞌnak eb laj fariseo queꞌel riqꞌuin li Jesús. Queꞌco̱eb riqꞌuineb li nequeꞌoquen chirix laj Herodes. Ut queꞌoc xcꞌu̱banquil chanru nak teꞌxcamsi li Jesús.

Li qꞌuila tenamit queꞌco̱eb chire li palau chixsicꞌbal li Jesús

⁷ Ut chirix aꞌan li Jesús co̱ chire li palau Galilea rochbeneb lix tzolom. Ut li qꞌuila tenamit queꞌxta̱ke li Jesús. Queꞌchal chak Galilea joꞌ ajcuiꞌ Judea.

⁸ Nak queꞌrabi resil li xni̱nkal usilal yo̱ chixba̱nunquil li Jesús, quilajeꞌchal chirilbal. Cuan li queꞌchal chak Jerusalén ut Idumea. Ut cuan ajcuiꞌ queꞌchal chak jun pacꞌal li nimaꞌ Jordán. Ut queꞌchal ajcuiꞌ chak Tiro ut Sidón chirilbal li Jesús.

⁹ Joꞌcan nak li Jesús quixye reheb lix tzolom nak teꞌxcauresi junak li jucub. Ac cua̱nk aran re ta̱cua̱nk chi saꞌ re nak incꞌaꞌ ta̱natꞌekꞌ xbaneb li qꞌuila tenamit.

¹⁰ Xban nak nabal ac xqꞌuirtesi, joꞌcan nak li qꞌuila tenamit yo̱queb chixtiquisinquil ribeb. Teꞌraj teꞌxchꞌeꞌ li Jesús re nak teꞌqꞌuira̱k.

¹¹ Li cuan ma̱us aj musikꞌej riqꞌuineb, nak queꞌril li Jesús, queꞌxcuikꞌib rib chiru ut queꞌxjap re chixyebal: —La̱at li Ralal li Dios, chanqueb re.

¹² Ut li Jesús quixkꞌuseb li ma̱us aj musikꞌej ut quixye reheb nak incꞌaꞌ teꞌxye resil nak aꞌan Ralal li Dios.

Li Jesús quixsiqꞌueb ru lix tzolom cablaju

¹³ Tojoꞌnak li Jesús quitakeꞌ chiru tzu̱l. Quixbokeb li ani quiraj ut eb aꞌan co̱eb chirix.

¹⁴ Ut li Jesús quixsiqꞌueb ru li cablaju chi cui̱nk re nak teꞌcua̱nk riqꞌuin ut re nak tixtaklaheb chixjulticanquil li ra̱tin li Dios.

¹⁵ Ut quixqꞌueheb xcuanquil chixqꞌuirtesinquileb li yaj ut chirisinquil li ma̱us aj musikꞌej.

¹⁶ Aꞌaneb aꞌin li cablaju li quixxakabeb li Jesús: laj Simón li quixqꞌue aj Pedro chokꞌ xcꞌabaꞌ,

¹⁷ ut laj Jacobo ut laj Juan. Lix yucuaꞌeb aꞌan, aꞌan laj Zebedeo. Aj Boanerges quiqꞌueheꞌ chokꞌ xcꞌabaꞌeb xban li Jesús. Li cꞌabaꞌej aꞌan naraj naxye “Ralaleb li Ca̱k”.

¹⁸ Quixxakabeb ajcuiꞌ laj Andrés, laj Felipe, laj Bartolomé, laj Mateo, laj Tomás, laj Jacobo li ralal laj Alfeo, laj Tadeo ut laj Simón. Aꞌan xcomoneb laj Canaán.

¹⁹ Ut quixsicꞌ ajcuiꞌ ru laj Judas Iscariote li quikꞌaxtesin re li Jesús saꞌ rukꞌeb li xicꞌ nequeꞌiloc re.

Ma̱cꞌaꞌ chic xcuybal xma̱c li namajecuan re li Santil Musikꞌej

²⁰ Ut nak ac xsiqꞌueb ru lix tzolom, li Jesús co̱ saꞌ jun li cab rochbeneb lix tzolom. Ut queꞌtubla cuiꞌchic li qꞌuila tenamit; riqꞌuin aꞌan moco naxqꞌue ta chic rib nacuaꞌac li Jesús chi moco eb lix tzolom.

²¹ Ut nak queꞌrabi resil li cꞌaꞌru yo̱ chixba̱nunquil li Jesús, eb li rechꞌalal queꞌchal chixcꞌambal. Queꞌxye nak moco tuktu ta chic xnaꞌleb li Jesús.

²² Ut eb laj tzꞌi̱b li queꞌchal chak Jerusalén yo̱queb chixyebal: —Laj tza cuan riqꞌuin li Jesús ut saꞌ xcꞌabaꞌ laj tza narisiheb li ma̱us aj musikꞌej, chanqueb.

²³ Ut li Jesús quixbokeb ut quixpatzꞌ reheb: —¿Chanru nak laj tza ta̱risi li rech aj tzahil?— Ut quixye ajcuiꞌ li jaljo̱quil ru a̱tin aꞌin:

²⁴ —Cui cuan jun te̱pak chi tenamit xicꞌ teꞌril rib chi ribileb rib, li jun te̱p chi tenamit aꞌan tixsach xcuanquil xjunes rib.

²⁵ Ut cui cuan ta jun cabalak xicꞌ teꞌril rib chi ribileb rib saꞌ rochocheb, li jun cabal aꞌan teꞌxsach xcuanquil lix jun cablal.

²⁶ Joꞌcan ajcuiꞌ laj tza cui teꞌxpleti rib chi ribileb rib, aꞌan tixsach xcuanquil xjunes rib.

²⁷ Ma̱ ani naru ta̱oc saꞌ rochoch junak cui̱nk cau rib chixmakꞌbal li cꞌaꞌru cuan re, cui incꞌaꞌ ta xbe̱n cua tixbacꞌ li cui̱nk cau rib, tojoꞌnak ta̱oc chixcꞌambal li cꞌaꞌru cuan re.

²⁸ Relic chi ya̱l ninye e̱re nak ta̱cuyma̱nk ta̱sachma̱nk lix ma̱queb li cristian ut ta̱cuyma̱nk ajcuiꞌ li majecua̱nc nequeꞌxba̱nu.

²⁹ Abanan li ta̱majecua̱nk re li Santil Musikꞌej, incꞌaꞌ ta̱cuyekꞌ ta̱sachekꞌ xma̱c. Cua̱nk ban saꞌ xbe̱n chi junelic lix tojbal rix li ma̱c aꞌan, chan.

³⁰ Li Jesús quixye aꞌin xban nak yo̱queb chixyebal nak cuan ma̱us aj musikꞌej riqꞌuin.

Lix naꞌ ut eb li ri̱tzꞌin li Jesús

³¹ Quicuulac aran lix naꞌ li Jesús ut queꞌcuulac ajcuiꞌ li ri̱tzꞌin. Queꞌcana chirix cab ut queꞌxtakla xbokbal li Jesús.

³² Ut nabaleb li tenamit cꞌojcꞌo̱queb chixcꞌatk li Jesús. Queꞌxye re: —Ka̱cuaꞌ, xcꞌulun la̱ naꞌ rochbeneb la̱ cui̱tzꞌin. Cuanqueb chirix cab. Yo̱queb cha̱sicꞌbal, chanqueb.

³³ Li Jesús quichakꞌoc ut quixye reheb: —¿Ani ta biꞌ lin naꞌ? Ut, ¿ani ta biꞌ li cui̱tzꞌin nak nequecꞌoxla la̱ex?—

³⁴ Quirileb li cꞌojcꞌo̱queb chixcꞌatk ut quixye: —Aꞌineb lin naꞌ ut aꞌineb li cui̱tzꞌin.

³⁵ Xban nak li ani naba̱nun re li naraj li Dios, aꞌan li cui̱tzꞌin, aꞌan li cuanab, ut aꞌan lin naꞌ, chan.