San Marcos 2 - Li Santil hu

Li Jesús quixqꞌuirtesi jun li cui̱nk yaj ut sic

¹ Nak ac xnumeꞌ cuib oxib cutan chic, li Jesús co̱ cuiꞌchic saꞌ li tenamit Capernaum. Ut queꞌrabi resil nak li Jesús cuan saꞌ li tenamit saꞌ jun li cab bar nahilan cuiꞌ.

² Saꞌ junpa̱t queꞌxchꞌutub rib li cristian saꞌ li cab cuan cuiꞌ li Jesús. Ut xban xqꞌuial li tenamit, ma̱ ani chic naru na-oc chire li cab xban nak ma̱cꞌaꞌ chic li naꞌajej. Ut li Jesús yo̱ chixchꞌolobanquil lix ya̱lal chiruheb.

³ Nak yo̱ chi a̱tinac li Jesús, ca̱hibeb li cui̱nk queꞌxcꞌam chak chi pakpo jun li cui̱nk sic. Incꞌaꞌ nabe̱c.

⁴ Abanan xban li qꞌuila tenamit, incꞌaꞌ naru teꞌrocsi li yaj cuan cuiꞌ li Jesús. Joꞌcan nak queꞌtakeꞌ saꞌ xbe̱n li cab ut queꞌxte caꞌchꞌin xbe̱n li cab ut aran queꞌxcubsi li yaj yocyo chiru lix cuariba̱l ut coxcana̱c chiru li Jesús.

⁵ Li Jesús quixqꞌue retal nak eb li cui̱nk aꞌan queꞌxpa̱b nak naru tixqꞌuirtesi li yaj. Joꞌcan nak quixye re li yaj: —At cui̱nk, cuybil sachbil chic la̱ ma̱c, chan.

⁶ Ut chunchu̱queb ajcuiꞌ aran laj tzꞌi̱b li nequeꞌcꞌutuc xchakꞌrab li Dios. Yo̱queb chi cꞌoxlac.

⁷ Ut queꞌxye saꞌ xchꞌo̱leb: —¿Cꞌaꞌut nak naa̱tinac chi joꞌcan li cui̱nk aꞌin? ¿Ma aꞌin ta biꞌ li Dios? Ma̱ ani naru nacuyuc nasachoc ma̱c. Caꞌaj cuiꞌ li Dios naru nacuyuc nasachoc ma̱c, chanqueb.

⁸ Ticto quixnau li Jesús cꞌaꞌru yo̱queb chixcꞌoxlanquil. Quixye reheb: —¿Cꞌaꞌut nak nequecꞌoxla chi joꞌcan?

⁹ ¿Bar cuan li us tinye re li yaj re nak ta̱cꞌutu̱nk che̱ru nak cuan incuanquil? ¿Ma tinye re, “Cuybil sachbil la̱ ma̱c”, malaj ut tinye re, “Cuaclin, ayu, ut cꞌam la̱ cuariba̱l”?

¹⁰ La̱in tincꞌut che̱ru nak la̱in li Cristo li Cꞌajolbej, ut cuan incuanquil saꞌ ruchichꞌochꞌ chixcuybal xsachbal li ma̱c, chan reheb.

¹¹ Tojoꞌnak li Jesús quixye re li cui̱nk: —At cui̱nk, la̱in tinye a̱cue, cuaclin, cꞌam la̱ cuariba̱l ut ayu saꞌ la̱ cuochoch, chan.

¹² Ut li cui̱nk sic nak quicuan ac ta̱cuacli̱k. Quixchap lix cuariba̱l ut ac ta̱e̱lk chiruheb chixjunil li tenamit. Ut riqꞌuin aꞌin chixjunileb queꞌsach xchꞌo̱l. Queꞌxqꞌue xlokꞌal li Dios ut queꞌxye: —Ma̱ jun cua kilom aꞌin, chanqueb.

Li Jesús quixbok laj Leví re nak ta̱xic chirix

¹³ Ut nak ac xqꞌuirtesi li cui̱nk sic, li Jesús co̱ chire li palau Galilea. Nabaleb li tenamit queꞌcuulac riqꞌuin ut li Jesús qui-oc chixtzolbaleb.

¹⁴ Nak yo̱ chi numecꞌ aran, li Jesús quiril laj Leví li ralal laj Alfeo. Laj Leví cꞌojcꞌo saꞌ xnaꞌaj ut yo̱ chi titzꞌoc toj. Li Jesús quixye re: —China̱ta̱ke.— Tojoꞌnak laj Leví quicuacli ut quixta̱ke li Jesús.

¹⁵ Ut chirix aꞌan li Jesús co̱ saꞌ li rochoch laj Leví chi cuaꞌac. Nabaleb laj titzꞌol toj ut nabaleb ajcuiꞌ laj ma̱c cuanqueb saꞌ li me̱x bar cuan cuiꞌ li Jesús rochbeneb lix tzolom. Nabaleb xban nak nabal queꞌta̱ken re li Jesús.

¹⁶ Ut eb laj tzꞌi̱b ut eb laj fariseo queꞌril nak cuan li Jesús saꞌ me̱x rochbeneb laj titzꞌol toj joꞌqueb ajcuiꞌ laj ma̱c. Ut queꞌxye reheb lix tzolom li Jesús: —¿Cꞌaꞌut nak laj tzolol e̱re nacuaꞌac saꞌ xya̱nkeb laj titzꞌol toj ut saꞌ xya̱nkeb laj ma̱c? chanqueb.

¹⁷ Li Jesús quirabi li queꞌxpatzꞌ ut quixye reheb: —Li cauheb ma̱cꞌaꞌ na-oc cuiꞌ aj banonel reheb. Aban li yajeb, aꞌaneb li nequeꞌraj banecꞌ. Joꞌcan nak la̱in incꞌaꞌ xinchal chixsicꞌbaleb li ti̱queb xchꞌo̱l. Xinchal ban chixsicꞌbaleb laj ma̱c, chan li Jesús.

Li Jesús quixchꞌolob xya̱lal li ayunic

¹⁸ Saꞌ eb li cutan aꞌan eb lix tzolom laj Juan laj Cubsihom Haꞌ ut eb laj fariseo nequeꞌxba̱nu x-ayu̱n. Li tenamit queꞌcuulac riqꞌuin li Jesús ut queꞌxye re: —Eb lix tzolom laj Juan nequeꞌxba̱nu x-ayu̱n joꞌqueb ajcuiꞌ laj fariseo. ¿Cꞌaꞌut nak incꞌaꞌ nequeꞌxba̱nu x-ayu̱n eb la̱ tzolom? chanqueb re.

¹⁹ Tojoꞌnak quichakꞌoc li Jesús ut quixye reheb, —La̱in joꞌ jun be̱lomej nak cuanquin. ¿Ma naru teꞌayunik li nequeꞌxic riqꞌuin sumla̱c nak cuan li be̱lomej riqꞌuineb? Nak toj cuan li be̱lomej riqꞌuineb, incꞌaꞌ naru nequeꞌxba̱nu x-ayu̱n.

²⁰ Ut joꞌcan ajcuiꞌ lin tzolom. Ta̱cuulak xkꞌehil nak tin-isi̱k saꞌ xya̱nkeb. Toj saꞌ li cutan aꞌan teꞌxba̱nu x-ayu̱n, chan reheb.

Li jaljo̱quil ru a̱tin chirix li acꞌ yuꞌam

²¹ Ma̱ ani naxxi̱ti junak kꞌel tꞌicr riqꞌuin acꞌ tꞌicr. Cui ut naxxi̱ti riqꞌuin acꞌ tꞌicr, nak tixpuchꞌ ta̱cꞌosk li acꞌ tꞌicr ut tixnimobresi xpejelal li kꞌel tꞌicr.

²² Ut ma̱ ani naqꞌuehoc acꞌ vino saꞌ li kꞌel bo̱ls tzꞌu̱m. Cui tixqꞌue li acꞌ vino saꞌ li kꞌel bo̱ls tzꞌu̱m, ta̱puqꞌuekꞌ li kꞌel tzꞌu̱m, ta̱hoyekꞌ li vino, ut ta̱osokꞌ ajcuiꞌ li bo̱ls tzꞌu̱m. Li acꞌ vino saꞌ li acꞌ bo̱ls tzꞌu̱m naqꞌueman, chan li Jesús.

Li Jesús quixchꞌolob xya̱lal chirix li hiloba̱l cutan

²³ Saꞌ jun li hiloba̱l cutan li Jesús rochbeneb lix tzolom yo̱queb chi numecꞌ bar cuiꞌ aubil li acui̱mk trigo xcꞌabaꞌ. Eb lix tzolom queꞌxchꞌot ru li trigo nak yo̱queb chi numecꞌ xban nak teꞌtzꞌoca̱k.

²⁴ Tojoꞌnak eb laj fariseo queꞌxye re li Jesús: —Il cꞌaꞌru yo̱queb la̱ tzolom. ¿Cꞌaꞌut nak nequeꞌxba̱nu li cꞌanjel moco uxc ta naraj saꞌ li hiloba̱l cutan? chanqueb.

²⁵ Li Jesús quichakꞌoc ut quixye reheb: —¿Ma incꞌaꞌ ta biꞌ xeril saꞌ li Santil Hu cꞌaꞌru quixba̱nu laj David nak aꞌan ut li rochben teꞌtzꞌoca̱k?

²⁶ Nak quicuan laj Abiatar chokꞌ xyucuaꞌileb aj tij, laj David qui-oc saꞌ li rochoch li Dios. Cuan aran li mayejanbil caxlan cua. Juneseb laj tij naru nequeꞌxcuaꞌ li caxlan cua aꞌan. Abanan laj David quixcuaꞌ li caxlan cua li quiqꞌueheꞌ re xban laj tij ut quixqꞌue ajcuiꞌ reheb li rochben xban nak teꞌtzꞌoca̱k, chan.

²⁷ Ut quixye ajcuiꞌ reheb: —Aꞌ li cui̱nk ut li ixk aꞌaneb li kꞌaxal lokꞌ chiru li hiloba̱l cutan. Toj ma̱cꞌaꞌ li hiloba̱l cutan nak ac queꞌyoꞌobtesi̱c chak ut li hiloba̱l cutan quiqꞌueheꞌ re xtenkꞌanquileb li cui̱nk ut li ixk.

²⁸ Joꞌcan nak la̱in li Cꞌajolbej cuan incuanquil chixyebal cꞌaꞌru ta̱uxma̱nk saꞌ li hiloba̱l cutan, chan li Jesús reheb.