San Marcos 14 - Li Santil hu

Queꞌraj xchapbal li Jesús

¹ Cuib cutan chic ma̱ nacuulac xkꞌehil li ninkꞌe re xjulticanquil li reliqueb laj Israel saꞌ li tenamit Egipto. Pascua nayeman re li ninkꞌe aꞌan. Aꞌan ajcuiꞌ xkꞌehil li ninkꞌe nak nequeꞌxcuaꞌ li caxlan cua chi ma̱cꞌaꞌ xchꞌamal. Saꞌ eb li cutan aꞌan eb lix be̱nil aj tij ut eb laj tzꞌi̱b yo̱queb chixsicꞌbal chanru nak teꞌxyoꞌob a̱tin chirix li Jesús re nak teꞌxqꞌue chi camsi̱c.

² Ut queꞌxye chi ribileb rib: —Incꞌaꞌ takachap li Jesús nak yo̱k li ninkꞌe xban nak teꞌpokꞌ li tenamit kiqꞌuin ut teꞌoc chi pletic, chanqueb.

Nak quiyuleꞌ li sununquil ban saꞌ xjolom li Jesús xban jun li ixk

³ Li Jesús cuan aran Betania saꞌ rochoch laj Simón li saklep rix. Chunchu saꞌ me̱x nak quichal jun li ixk. Cuan chak jun chꞌina botella sununquil ban riqꞌuin. Lix naꞌaj li ban aꞌan yi̱banbil riqꞌuin cha̱bil pec alabastro xcꞌabaꞌ ut li sununquil ban aꞌan nardo xcꞌabaꞌ ut kꞌaxal terto xtzꞌak. Li ixk quixtok xcux li chꞌina botella ut quixqꞌue li ban saꞌ xjolom li Jesús.

⁴ Cuan li queꞌjoskꞌoꞌ ut queꞌxye chi ribileb rib: —¿Cꞌaꞌut nak xsach li sununquil ban aꞌan chi ma̱cꞌaꞌ rajbal?

⁵ Xru raj xcꞌayiman chi numenak oxib ciento denarios ut xkajeqꞌui raj reheb li nebaꞌ, chanqueb. Ut queꞌoc chixcuechꞌinquil li ixk.

⁶ Ut li Jesús quixye reheb: —¿Cꞌaꞌut nak yo̱quex chixchꞌiꞌchꞌiꞌinquil li ixk? Canabomak xcuechꞌinquil xban nak us li xba̱nu cue.

⁷ Li nebaꞌ junelic cuanqueb saꞌ e̱ya̱nk. Yalak jokꞌe naru te̱tenkꞌaheb. Abanan la̱in moco cua̱nkin ta junelic e̱riqꞌuin.

⁸ Li ixk aꞌin xba̱nu li joꞌ qꞌuial xru xba̱nunquil. Ma̱jiꞌ nincam abanan ac xinixban re lin mukbal.

⁹ Relic chi ya̱l tinye e̱re nak ta̱yema̱nk resil li colba-ib yalak bar, ta̱yema̱nk ajcuiꞌ resil li cꞌaꞌru xba̱nu li ixk aꞌin re xjulticanquil aꞌan, chan.

¹⁰ Ut laj Judas Iscariote, xcomoneb li cablaju, co̱ riqꞌuineb lix be̱nil aj tij chixyebal reheb nak tixkꞌaxtesi li Jesús saꞌ rukꞌeb.

¹¹ Ut eb laj tij nak queꞌrabi aꞌan cꞌajoꞌ nak queꞌsahoꞌ saꞌ xchꞌo̱leb ut queꞌxyechiꞌi xtumin. Ut laj Judas quixsicꞌ xya̱lal chanru nak tixkꞌaxtesi li Jesús saꞌ rukꞌeb.

Xticlajic chak li Lokꞌoni̱nc re Xjulticanquil lix Camic li Jesucristo

¹² Saꞌ li xbe̱n cutan re li ninkꞌe nak nequeꞌxcuaꞌ li caxlan cua chi ma̱cꞌaꞌ xchꞌamal, nequeꞌxmayeja jun li carner. Li ninkꞌe aꞌan re xjulticanquil li reliqueb laj Israel saꞌ li tenamit Egipto. Eb lix tzolom queꞌxye re li Jesús: —¿Bar ta̱cuaj takacauresi chak li naꞌajej re ta̱tzaca cuiꞌ li mayejanbil xul? chanqueb.

¹³ Li Jesús quixye reheb cuib lix tzolom: —Ayukex saꞌ li tenamit. Aran te̱cꞌul jun li cui̱nk yo̱ chak chixcꞌambal jun cuc xhaꞌ. Te̱ta̱ke aꞌan.

¹⁴ Bar ta̱oc aꞌan aran ajcuiꞌ tex-oc la̱ex. Ut te̱ye re laj e̱chal cab, “Chan laj tzolonel, ¿bar len cuan li naꞌajej ta̱cuaꞌak cuiꞌ rochbeneb lix tzolom?” chaꞌkex re.

¹⁵ Ut aꞌan tixcꞌut che̱ru jun nimla naꞌajej takecꞌ saꞌ xcaꞌ tasalil li cab. Ac yi̱banbil li naꞌajej. Ut aran toxe̱cauresi li ninkꞌe chokꞌ ke, chan li Jesús.

¹⁶ Queꞌco̱eb saꞌ li tenamit ut qui-uxman joꞌ quixye li Jesús. Ut aran queꞌxcauresi li ninkꞌe.

¹⁷ Nak qui-ecuu, quicuulac li Jesús rochbeneb lix tzolom.

¹⁸ Nak ac yo̱queb chi cuaꞌac saꞌ li me̱x, li Jesús quixye reheb lix tzolom, —Relic chi ya̱l tinye e̱re nak jun e̱re la̱ex ta̱kꞌaxtesi̱nk cue saꞌ rukꞌeb li xicꞌ nequeꞌiloc cue, chan.

¹⁹ Ut eb aꞌan queꞌrahoꞌ saꞌ xchꞌo̱leb ut eb li junju̱nk queꞌoc chixyebal re li Jesús: —¿Ma la̱in ta biꞌ tinkꞌaxtesi̱nk a̱cue, Ka̱cuaꞌ? chanqueb.

²⁰ Ut li Jesús quichakꞌoc ut quixye reheb: —Li ta̱kꞌaxtesi̱nk cue, aꞌan jun e̱re la̱ex li yo̱ chixtzꞌabal lix caxlan cua cuochben saꞌ li secꞌ.

²¹ Relic chi ya̱l la̱in li Cꞌajolbej tincꞌul li cꞌaꞌru tzꞌi̱banbil chak retalil chicuix. Abanan raylal cuan saꞌ xbe̱n li cui̱nk li ta̱kꞌaxtesi̱nk cue. Kꞌaxal us raj chokꞌ re li cui̱nk aꞌan nak incꞌaꞌ ta quiyoꞌla.—

²² Ut nak yo̱queb chi cuaꞌac, li Jesús quixchap li caxlan cua. Quixbantioxi chiru li Dios, quixjachi, tojoꞌnak quixjeqꞌui reheb lix tzolom. Ut quixye reheb: —Cuaꞌinkex. Aꞌan aꞌin intzꞌejcual.—

²³ Ut quixchap ajcuiꞌ li secꞌ re ucꞌac ut quixbantioxi chiru li Dios, tojoꞌnak quixqꞌue reheb ut chixjunileb queꞌucꞌac.

²⁴ Ut li Jesús quixye reheb: —Aꞌan aꞌin lin quiqꞌuel li ta̱hoyekꞌ saꞌ xcꞌabaꞌeb chixjunileb ut aꞌan ta̱xakaba̱nk xcuanquil li Acꞌ Contrato.

²⁵ Relic chi ya̱l tinye e̱re nak incꞌaꞌ chic tincuucꞌ lix yaꞌal ru li uva toj ta̱cuulak xkꞌehil nak tincuucꞌ cuiꞌchic saꞌ lix nimajcual cuanquilal li Dios, chan li Jesús.

Li Jesús quixye nak ta̱tzꞌekta̱na̱k xbaneb lix tzolom

²⁶ Ut nak ac xeꞌrakeꞌ xbichanquil jun li bich, queꞌco̱eb saꞌ li tzu̱l Olivos.

²⁷ Ut li Jesús quixye reheb: —Che̱junilex la̱ex ta̱chꞌina̱k le̱ chꞌo̱l ut tine̱canab injunes chiru a kꞌojyi̱n aꞌin xban nak joꞌcaꞌin tzꞌi̱banbil retalil xbaneb li profeta: Tincanab chi camsi̱c laj ilol reheb li carner ut eb li carner teꞌxchaꞌchaꞌi ribeb.

²⁸ Ut nak acak xincuacli cuiꞌchic chi yoꞌyo saꞌ xya̱nkeb li camenak, la̱in xbe̱n cua tinxic che̱ru aran Galilea.—

²⁹ Ut laj Pedro quixye re: —Usta chixjunileb tateꞌxcanab abanan la̱in incꞌaꞌ tatincanab.—

³⁰ Ut li Jesús quichakꞌoc ut quixye re: —Relic chi ya̱l tinye a̱cue nak toj ma̱jiꞌ naya̱bac xcaꞌ sut li tzoꞌ xul nak la̱at ac xaye oxib sut nak incꞌaꞌ nacanau cuu.—

³¹ Ut laj Pedro quixye cuiꞌchic chi cau: —Ma̱ jokꞌe tinye nak incꞌaꞌ ninnau a̱cuu usta tineꞌxcamsi a̱cuochben, chan. Ut joꞌcan queꞌxye chixjunileb lix tzolom.

Nak quitijoc chak li Jesús aran Getsemaní

³² Li Jesús quicuulac rochbeneb lix tzolom saꞌ li naꞌajej Getsemaní xcꞌabaꞌ. Li Jesús quixye reheb lix tzolom: —Cana̱kex arin. Xic cue chi tijoc la̱in.—

³³ Ut quixcꞌam oxib lix tzolom chirix. Aꞌaneb laj Pedro, laj Jacobo ut laj Juan. Ut cꞌajoꞌ nak qui-oc chi yotꞌecꞌ xchꞌo̱l li Jesús.

³⁴ Quixye reheb lix tzolom: —Cuan jun raylal saꞌ inchꞌo̱l yo̱ chinyotꞌbal. La̱in nacuecꞌa nak incꞌaꞌ chic tincuy. Cana̱kex arin ut yoꞌlenkex.—

³⁵ Ut li Jesús quibe̱c chic caꞌchꞌin ut quixcuikꞌib rib saꞌ chꞌochꞌ ut qui-oc chi tijoc ut quixtzꞌa̱ma re li Ka̱cuaꞌ Dios ut quixye: —Cui ta tixqꞌue rib, incꞌaꞌ raj tincꞌul li raylal aꞌin.—

³⁶ Ut quixye ajcuiꞌ: —At inYucuaꞌ, la̱in ninnau nak chixjunil naru xba̱nunquil cha̱cuu. Cui ta naru incꞌaꞌ raj tincꞌul li raylal aꞌin. Abanan chi-uxma̱nk li cꞌaꞌru nacacuaj la̱at ut ma̱cuaꞌ li nacuaj la̱in.—

³⁷ Ut nak quisukꞌi chak li Jesús, quixtauheb chi cua̱rc lix tzolom. Ut quixye re laj Pedro: —At Simón, ¿ma yo̱quex chi cua̱rc? ¿Ma incꞌaꞌ xru xexyoꞌlec jun o̱rak cuochben?

³⁸ Chexyoꞌlek ut chextijok re nak incꞌaꞌ te̱qꞌue e̱rib chi a̱le̱c. La̱ex nequeraj raj xba̱nunquil li us, abanan e̱junes incꞌaꞌ texru̱k.—

³⁹ Ut li Jesús co̱ cuiꞌchic chi tijoc ut quixtzꞌa̱ma cuiꞌchic saꞌ lix tij nak incꞌaꞌ raj tixcꞌul li raylal.

⁴⁰ Ut nak quisukꞌi cuiꞌchic li Jesús quixtauheb cuiꞌchic chi cua̱rc lix tzolom xban nak ma̱ caꞌchꞌin lix cuaraheb. Ut eb aꞌan incꞌaꞌ chic nequeꞌxtau cꞌaꞌru teꞌxye.

⁴¹ Ut quisukꞌi cuiꞌchic saꞌ rox sut, coxtauheb cuiꞌchic chi cua̱rc ut quixye reheb: —¿Ma toj yo̱quex ajcuiꞌ chi cua̱rc? Tzꞌakalak li hila̱nc xeba̱nu. Ac xtau xkꞌehil nak la̱in li Cꞌajolbej tinkꞌaxtesi̱k saꞌ rukꞌeb laj ma̱c.

⁴² Cuaclinkex anakcuan, ut yoꞌkeb chixcꞌulbal li yo̱ chi cha̱lc chi kꞌaxtesi̱nc cue, chan.

Nak queꞌxcꞌam chi pre̱xil li Jesús

⁴³ Toj yo̱ ajcuiꞌ chi a̱tinac li Jesús riqꞌuineb lix tzolom nak quicuulac laj Judas. Aꞌan jun reheb li cablaju. Nabal queꞌchal rochben laj Judas taklanbileb chak xbaneb li xbe̱nil aj tij ut xbaneb laj tzꞌi̱b. Taklanbileb ajcuiꞌ xbaneb laj cꞌamol be saꞌ li rochoch li Dios. Cuanqueb xchꞌi̱chꞌ ut cuanqueb xcheꞌ.

⁴⁴ Ut laj Judas quixye reheb nak tixqꞌue jun retalil chanru nak tixkꞌaxtesi li Jesús. Ac quixye reheb: —Li ani tincuutzꞌ ru, aꞌan li te̱chap ut te̱cꞌam.—

⁴⁵ Ut nak quicuulac laj Judas quijiloc chixcꞌatk, ut quixye: —At Ka̱cuaꞌ,— ut quirutzꞌ ru.

⁴⁶ Ut eb aꞌan queꞌxchap li Jesús re nak teꞌxcꞌam riqꞌuin laj rakol a̱tin.

⁴⁷ Ut jun reheb li rochben li Jesús quirisi chak lix chꞌi̱chꞌ ut quixchꞌot lix xic lix mo̱s li xyucuaꞌileb aj tij.

⁴⁸ Ut li Jesús quixye reheb li tenamit: —¿Ma la̱in ta biꞌ aj e̱lkꞌ nak xexchal chinchapbal riqꞌuin cheꞌ ut riqꞌuin chꞌi̱chꞌ?

⁴⁹ Rajlal cutan cuanquin saꞌ e̱ya̱nk che̱tzolbal saꞌ rochoch li Dios ut incꞌaꞌ quine̱chap. Abanan xcꞌulman chi joꞌcaꞌin re nak ta̱tzꞌaklok ru li tzꞌi̱banbil saꞌ li Santil Hu, chan li Jesús.

⁵⁰ Ut chixjunileb lix tzolom queꞌe̱lelic ut queꞌxcanab xjunes li Jesús saꞌ rukꞌeb li xicꞌ nequeꞌiloc re.

⁵¹ Jun li al yo̱ chi ta̱ke̱nc re li Jesús lanlo saꞌ xtꞌicr. Aꞌan queꞌxchap raj.

⁵² Abanan aꞌan quie̱lelic chiruheb. Quicana lix tꞌicr saꞌ rukꞌeb ut quie̱lelic chi tꞌustꞌu.

Queꞌxtzꞌil a̱tin chirix li Jesús nak cuan chiru lix yucuaꞌileb aj tij

⁵³ Tojoꞌnak queꞌxcꞌam li Jesús riqꞌuin lix yucuaꞌileb aj tij ut queꞌchꞌutla chixjunileb lix be̱nil aj tij. Ut queꞌchꞌutla ajcuiꞌ eb laj cꞌamol be saꞌ rochoch li Dios ut eb laj tzꞌi̱b.

⁵⁴ Ut laj Pedro chi najt yo̱ chixta̱kenquil li Jesús ut quicuulac toj chi ruꞌuj neba̱l saꞌ rochoch lix yucuaꞌil eb aj tij ut aran quicꞌojla chire xam chi kꞌixi̱nc rochbeneb laj cꞌacꞌalenel.

⁵⁵ Eb li xbe̱nil aj tij ut li nequeꞌtzꞌiloc a̱tin yo̱queb chixsicꞌbal chanru nak teꞌxyoꞌob junak a̱tin chirix li Jesús re nak teꞌxqꞌue chi camsi̱c. Abanan incꞌaꞌ queꞌxtau.

⁵⁶ Nabal li queꞌyoꞌoban ticꞌtiꞌ chirix ut incꞌaꞌ natukla ru li ra̱tineb xban nak jalan jala̱nk nequeꞌxye li junju̱nk.

⁵⁷ Cuan li queꞌxakli chixyebal li yoꞌobanbil a̱tin chirix.

⁵⁸ Ut queꞌxye: —La̱o quikabi nak quixye, “La̱in tinjucꞌ li rochoch li Dios li yi̱banbil xbaneb li cui̱nk, ut la̱in chiru oxib cutan tinyi̱b jun chic, aban ma̱cuaꞌ yi̱banbil xbaneb li cui̱nk.” Joꞌcan quixye li cui̱nk aꞌin, chanqueb.

⁵⁹ Abanan incꞌaꞌ nachꞌola ru li ra̱tineb xban nak jalan jala̱nk nequeꞌxye li junju̱nk.

⁶⁰ Ut li xyucuaꞌileb aj tij quixakli saꞌ xya̱nkeb ut quixye re li Jesús, —¿Ma ma̱cꞌaꞌ nacaye la̱at chirix li yo̱queb chixyebal cha̱cuix?—

⁶¹ Ut li Jesús ma̱ jun a̱tin quixye. Ut li xyucuaꞌileb aj tij quixpatzꞌ cuiꞌchic re li Jesús ut quixye re: —¿Ma la̱at li Cristo li Ralal li nimajcual Dios? chan re.

⁶² Ut li Jesús quixye: —La̱in. Ut saꞌ jun cutan tine̱ril la̱in li Cꞌajolbej nak cꞌojcꞌo̱kin saꞌ xnim ukꞌ li nimajcual Dios ut te̱ril ajcuiꞌ nak yo̱kin chak chi cha̱lc saꞌ li chok saꞌ choxa, chan.

⁶³ Nak quirabi li quixye li Jesús, li xyucuaꞌil eb aj tij quixpej li rakꞌ xban xjoskꞌil ut quixye: —¿Cꞌaꞌ chic ru aj e nak toj teꞌxye ke cꞌaꞌru xma̱c?

⁶⁴ Ac xerabi nak xjuntakꞌe̱ta rib riqꞌuin li Dios. ¿Cꞌaꞌru nequeye? ¿Ma cuan xma̱c malaj ut incꞌaꞌ? chan. Ut chixjunileb queꞌxye nak cuan xma̱c re camsi̱c.

⁶⁵ Cuan li yo̱queb chi chu̱ba̱nc re ut cuan ajcuiꞌ queꞌtzꞌapoc re li ru li Jesús riqꞌuin tꞌicr re nak incꞌaꞌ ta̱ilok, ut queꞌxsacꞌ ut queꞌxye re: —Ye ke ani xsacꞌoc a̱cue, chanqueb. Tojoꞌnak queꞌxkꞌaxtesi saꞌ rukꞌeb laj cꞌacꞌalenel pre̱x ut eb aꞌan queꞌxsacꞌ cuiꞌchic.

Laj Pedro quixye nak incꞌaꞌ naxnau ru li Jesús

⁶⁶ Ut nak cuan laj Pedro takꞌa chi ruꞌuj neba̱l, quicuulac jun li ixk, xmo̱s li xyucuaꞌil eb aj tij.

⁶⁷ Ut li ixk aꞌan quiril laj Pedro nak yo̱ chi kꞌixi̱nc chire li xam. Quixcaꞌya ut quixye re: —La̱at xat-ochbenin re li Jesús aj Nazaret, chan re laj Pedro.

⁶⁸ Ut nak quichakꞌoc laj Pedro, quiticꞌtiꞌic ut quixye: —¿Ani nacaye? La̱in incꞌaꞌ ninnau ru ani li nacaye.— Ut laj Pedro qui-el chire li oqueba̱l ut li tzoꞌ xul quiya̱bac.

⁶⁹ Ut li ixk nak quiril cuiꞌchic laj Pedro, qui-oc chixyebal reheb li cuanqueb aran: —Li cui̱nk aꞌin, aꞌan jun reheb lix tzolom li Jesús, chan.

⁷⁰ Ut laj Pedro quiticꞌtiꞌic cuiꞌchic. Ut ac junpa̱t na chic nak eb li cuanqueb aran queꞌxye cuiꞌchic re laj Pedro: —Ya̱l. La̱at xcomoneb xban nak la̱ cua̱tinoba̱l nacꞌutuc re nak la̱at aj Galilea.—

⁷¹ Ut laj Pedro qui-oc chi majecua̱nc ut quixye: —Cutan saken chiru li Dios nak incꞌaꞌ ninnau ru li cui̱nk li nequeye. Cui ticꞌtiꞌ li yo̱quin chixyebal, chinixtzꞌekta̱na̱k li Dios, chan.

⁷² Tojoꞌnak quiya̱bac cuiꞌchic xcaꞌ sut li tzoꞌ xul. Ut quinak saꞌ xchꞌo̱l laj Pedro li a̱tin quiyeheꞌ re xban li Jesús, “Nak toj ma̱jiꞌ naya̱bac xcaꞌ sut li tzoꞌ xul, la̱at ac xaye oxib sut nak incꞌaꞌ nacanau cuu”. Nak quijulticoꞌ re laj Pedro li a̱tin aꞌin, cꞌajoꞌ nak quirahoꞌ saꞌ xchꞌo̱l ut qui-oc chi ya̱bac.