San Marcos 13 - Li Santil hu

Ta̱cuulak xkꞌehil nak ta̱juqꞌuekꞌ li rochoch li Dios

¹ Nak qui-el chak li Jesús saꞌ rochoch li Dios, jun reheb lix tzolom quixye re: —At tzolonel, il, ma̱ cꞌajoꞌ xchakꞌal ru li cab aꞌin ut ma̱ cꞌajoꞌ xchakꞌal ru li pec yi̱banbil cuiꞌ.—

² Li Jesús quichakꞌoc ut quixye re: —Us ajcuiꞌ nak te̱ril chi us xban nak ta̱cuulak xkꞌehil nak ma̱ jun chic li pec aꞌan ta̱cana̱k saꞌ xnaꞌaj chi incꞌaꞌ ta ta̱juqꞌuekꞌ, chan li Jesús.

Retalil rosoꞌjic li ruchichꞌochꞌ

³ Queꞌco̱eb saꞌ li tzu̱l Olivos saꞌ xcaꞌyaba̱l li rochoch li Dios. Li Jesús quicꞌojla aran ut nak cuan xjunes quipatzꞌeꞌ re xbaneb laj Pedro, laj Jacobo, laj Juan ut laj Andrés.

⁴ —Ye ke jokꞌe ta̱cꞌulma̱nk li yo̱cat chixyebal chirix li rochoch li Dios ut ¿cꞌaꞌru retalil ta̱cua̱nk nak talajcꞌulma̱nk li cꞌaꞌak re ru aꞌin?—

⁵ Li Jesús quichakꞌoc ut quixye: —Cheqꞌue retal re nak ma̱ ani ta̱balakꞌi̱nk e̱re.

⁶ Nabal teꞌcha̱lk chi balakꞌi̱nc ut toleꞌxye, “La̱in li Cristo”, chaꞌkeb. Ut nabal teꞌbalakꞌi̱k xbaneb.

⁷ Nak te̱rabi nak yo̱ li ple̱t ut nak te̱rabi resil nak ticla̱c re li ple̱t yalak bar, mexxucuac xban nak tento nak ta̱cꞌulma̱nk chi joꞌcan. Abanan moco ac aꞌan ta rosoꞌjiqueb li cutan.

⁸ Nabal li tenamit teꞌpletik riqꞌuin jalan chic tenamit. Ut eb li acuabej teꞌxpleti ribeb. Talajcua̱nk hi̱c saꞌ nabal chi naꞌajej ut ta̱cua̱nk cueꞌej. Abanan aꞌan yal xticlajic li raylal ta̱cha̱lk.

⁹ Aꞌut la̱ex cheqꞌuehak retal li raylal ta̱cha̱lk saꞌ e̱be̱n. Texkꞌaxtesi̱k chiruheb laj rakol a̱tin ut texsaqꞌuekꞌ saꞌ li cab li nequeꞌxchꞌutub cuiꞌ ribeb laj judío. Texcꞌamekꞌ chiruheb li acuabej ut chiruheb li rey saꞌ incꞌabaꞌ la̱in ut ta̱ru̱k te̱chꞌolob xya̱lal li cua̱tin chiruheb.

¹⁰ Tento nak xbe̱n cua ta̱sutu̱nk xchꞌolobanquil resilal li colba-ib chiruheb chixjunil li tenamit nak toj ma̱jiꞌ na-osoꞌ li ruchichꞌochꞌ.

¹¹ Ut nak texchapekꞌ ut texkꞌaxtesi̱k chiruheb li acuabej, mexcꞌoxlac chirix li cꞌaꞌru te̱ye. Li cꞌaꞌru te̱ye saꞌ li ho̱nal aꞌan ma̱cuaꞌ cꞌoxlanbil a̱tin li te̱ye. Aban li tixye e̱re li Santil Musikꞌej, aꞌan li te̱ye.

¹² Eb li cui̱nk teꞌxkꞌaxtesi chi camsi̱c li ras ri̱tzꞌin. Ut li yucuaꞌbej tixkꞌaxtesi li ralal. Ut li alalbej cꞌajolbej teꞌxqꞌue chi camsi̱c li naꞌbej yucuaꞌbej.

¹³ Ut xicꞌ tex-ilekꞌ xbaneb chixjunileb saꞌ incꞌabaꞌ la̱in. Ut li tixcuy xnumsinquil li raylal aꞌin toj saꞌ rosoꞌjic lix yuꞌam, aꞌan ta̱colekꞌ xban li Dios.

¹⁴ Chetzolak rix chi us li cꞌaꞌru quixye li profeta Daniel re nak te̱tau ru li cꞌaꞌru ta̱cꞌulma̱nk. Aꞌan quixye nak eb laj balakꞌ teꞌcha̱lk ut toleꞌxqꞌue li kꞌaxal yibru ut xucuajel rilbal saꞌ li rochoch li Dios li ma̱cuaꞌ xcꞌulub cuiꞌ cua̱nc. Nak te̱ril nak yo̱queb chixmuxbal ru li rochoch li Dios, la̱ex li cuanquex Judea chex-e̱lelik saꞌ junpa̱t ut texxic toj saꞌ li tzu̱l.

¹⁵ Cui cuan chak junak saꞌ xbe̱n li rochoch nak ta̱cꞌulma̱nk aꞌan, chi cubec chak ut ti̱c ta̱e̱lelik ut incꞌaꞌ chic ta̱oc saꞌ rochoch chirisinquil li cꞌaꞌru cuan re.

¹⁶ Cui ani cuan chak saꞌ xcꞌaleba̱l incꞌaꞌ chic ta̱sukꞌi̱k saꞌ cab chixxocbal li rakꞌ.

¹⁷ Kꞌaxal ra cuiꞌchic li e̱lelic chokꞌ reheb li yaj aj ixk ut li yo̱queb chi tuꞌresi̱nk saꞌ eb a cutan aꞌan.

¹⁸ Chextijok ut chetzꞌa̱ma chiru li Dios re nak incꞌaꞌ ta̱cꞌulma̱nk a raylal aꞌin saꞌ habalkꞌe.

¹⁹ Saꞌ eb li cutan aꞌan ma̱ caꞌchꞌin li raylal ta̱cua̱nk. Ma̱ jun cua quicꞌulman chi joꞌcan chalen chak saꞌ xticlajic nak li Dios quixyi̱b li ruchichꞌochꞌ, chi moco ta̱cꞌulma̱nk chi joꞌcan mokon.

²⁰ Cui ta ma̱cꞌaꞌ saꞌ xchꞌo̱l li Ka̱cuaꞌ xrakbaleb li cutan aꞌan ma̱ ani raj ta̱colekꞌ. Abanan nim xrahom li Ka̱cuaꞌ saꞌ xbe̱neb li sicꞌbileb ru xban. Joꞌcan nak cuan saꞌ xchꞌo̱l li Ka̱cuaꞌ xrakbal eb li cutan aꞌan re nak teꞌcolekꞌ.

²¹ Joꞌcan nak ani ta̱yehok e̱re, “Cueꞌ li Cristo”, malaj, “leꞌ cuan li Cristo”, me̱pa̱b li cꞌaꞌru teꞌxye.

²² Nabaleb aj balakꞌ teꞌcꞌulu̱nk ut teꞌxye nak aꞌaneb li Cristo. Ut cuan teꞌxye nak aꞌaneb li profeta. Nabal li cꞌaꞌak re ru teꞌxcꞌutbesi ut sachba chꞌo̱lej telajeꞌxba̱nu re xbalakꞌinquileb li sicꞌbileb ru xban li Dios.

²³ Abanan ac xinye e̱re li cꞌaꞌru ta̱cꞌulma̱nk. Joꞌcan nak me̱qꞌue e̱rib chi balakꞌi̱c.

Nak tol-e̱lk cuiꞌchic li Cꞌajolbej Dios

²⁴ Ut saꞌ eb li cutan aꞌan nak ta̱cꞌulma̱nk li raylal, ta̱kꞌojyi̱nokꞌ ru li sakꞌe ut li po incꞌaꞌ chic ta̱cutanokꞌ ru.

²⁵ Ta̱ecꞌa̱nk ru li choxa ut li chahim telajeꞌtꞌanekꞌ.

²⁶ Nak acak x-ecꞌan ru li choxa, teꞌril cuu la̱in li Cꞌajolbej nak yo̱kin chak chi cha̱lc saꞌ li chok riqꞌuin lix nimal incuanquil ut lin lokꞌal.

²⁷ Tojoꞌnak tintaklaheb lin ángel ut teꞌxchꞌutub li sicꞌbileb ru inban li cua̱nkeb yalak bar saꞌ chixjunil li ruchichꞌochꞌ.

²⁸ Cheqꞌuehak retal cꞌaꞌru naxba̱nu li jun to̱n chi higo. Nak nakꞌunkꞌut chak li xak chi e̱lc, riqꞌuin aꞌan te̱nau nak yo̱ chak chi nachꞌoc li sakꞌehil.

²⁹ Joꞌ nak li higo naxcꞌutbesi retalil li sakꞌehil, joꞌcan ajcuiꞌ nak li raylal talajeꞌcꞌulma̱nk tixcꞌutbesi retalil nak yo̱ chi cuulac xkꞌehil nak toline̱lk cuiꞌchic la̱in li Cꞌajolbej.

³⁰ Relic chi ya̱l tinye e̱re nak talajeꞌcꞌulma̱nk chixjunil li cꞌaꞌak re ru aꞌin nak toj ma̱jiꞌ nequeꞌosoꞌ li tenamit aꞌin.

³¹ Li choxa ut li ruchichꞌochꞌ talajeꞌosokꞌ. Abanan li cꞌaꞌru ninye incꞌaꞌ ta̱cana̱k yal chi joꞌcan. Talajcꞌulma̱nk ban chixjunil li cꞌaꞌak re ru xinye.

³² Abanan ma̱ ani nanaꞌoc re jokꞌe ta̱cuulak xkꞌehil li cutan aꞌan chi moco li ho̱nal jokꞌe ta̱cꞌulma̱nk. Eb li ángel saꞌ choxa incꞌaꞌ nequeꞌxnau chi moco la̱in li Cꞌajolbej ninnaꞌoc re. Caꞌaj cuiꞌ li Dios Acuabej nanaꞌoc re jokꞌe ta̱cꞌulma̱nk aꞌin.

³³ Joꞌcan nak yoꞌon cua̱nkex. Chexyoꞌlek ut chextijok xban nak incꞌaꞌ nequenau jokꞌe ta̱cuulak xkꞌehil incꞌulunic.

³⁴ Chanchan jun li cui̱nk najt co̱ saꞌ xvia̱j. Toj ma̱jiꞌ naxic nak quixqꞌueheb xcuanquileb laj cꞌanjel chiru. Quixcanab xcꞌanjel li junju̱nk. Ut quixye re laj ilol cab nak junelic yoꞌon cua̱nk.

³⁵ Joꞌcan ajcuiꞌ la̱ex. Junelic yoꞌon cua̱nkex xban nak incꞌaꞌ nequenau jokꞌe ho̱nal tincꞌulu̱nk. Ma̱re tincha̱lk ecuu, malaj tuktu kꞌojyi̱n, malaj ut nak naya̱bac laj tzoꞌ xul malaj ut ekꞌela.

³⁶ Yoꞌon cua̱nkex re nak incꞌaꞌ tolexintau chi cua̱rc xban nak incꞌaꞌ nequenau jokꞌe tincꞌulu̱nk.

³⁷ Ut li cꞌaꞌak re ru ninye e̱re la̱in, aꞌan ajcuiꞌ ninye reheb chixjunileb re nak yoꞌon cua̱nkeb, chan li Jesús.