San Marcos 11 - Li Santil hu

Li Jesús quiqꞌueheꞌ xcuanquil aran Jerusalén

¹ Queꞌnachꞌoc Jerusalén bar cuan cuiꞌ li cuib chi tenamit Betfagé ut Betania. Cuanqueb chiru li tzu̱l Olivos nak li Jesús quia̱tinac riqꞌuin cuibeb lix tzolom.

² Quixye reheb: —Ayukex saꞌ li chꞌina tenamit aꞌan, ut nak texcuulak, te̱tau jun li chꞌina bu̱r bacꞌbo. Li chꞌina bu̱r aꞌan toj ma̱ ani nabe̱c chirix. Te̱hit chak ut te̱cꞌam chak arin.

³ Ut cui ani nayehoc e̱re, “¿Cꞌaꞌru yo̱quex?”, te̱ye reheb nak li Ka̱cuaꞌ ta̱ajok re li chꞌina bu̱r ut a que ajcuiꞌ tixtakla chak ho̱n, chaꞌkex reheb.—

⁴ Queꞌco̱eb ut queꞌxtau li chꞌina bu̱r bacꞌbo saꞌ be chire puerta. Ut queꞌoc chixhitbal.

⁵ Eb li cuanqueb aran queꞌxye: —¿Cꞌaꞌru yo̱quex? ¿Cꞌaꞌut nak yo̱quex chixhitbal li chꞌina bu̱r?—

⁶ Eb lix tzolom queꞌxye reheb li cꞌaꞌru quixye li Jesús, ut eb aꞌan queꞌcanaba̱c re nak teꞌxcꞌam li chꞌina bu̱r.

⁷ Queꞌxcꞌam riqꞌuin li Jesús ut queꞌxqꞌue li rakꞌeb chirix li chꞌina bu̱r ut li Jesús quitakeꞌ chirix.

⁸ Nabaleb queꞌxhel li rakꞌeb saꞌ be bar ta̱numekꞌ cuiꞌ li Jesús. Cuan queꞌxyocꞌ chak rukꞌ cheꞌ ut queꞌxqꞌue li xak saꞌ be.

⁹ Nak yo̱ chi xic li Jesús cuan li yo̱queb chi xic chiru ut cuan li yo̱queb chi xic chirix. Japjo̱queb re chixyebal: —¡Aj Colol ke taxak! ¡Osobtesinbil taxak li xchal saꞌ xcꞌabaꞌ li Ka̱cuaꞌ Dios!

¹⁰ Osobtesinbil taxak li tenamit ta̱takla̱nk cuiꞌ li xchal chokꞌ re̱kaj laj David li kaxeꞌto̱nil yucuaꞌ. Aj Colol ke taxak li xchal chak riqꞌuin li Dios, chanqueb.

¹¹ Nak quicuulac Jerusalén, li Jesús qui-oc saꞌ li rochoch li Dios. Quixsuti rilbal chixjunil li cꞌaꞌak re ru cuan aran. Xban nak qui-ecuu co̱ aran Betania rochbeneb lix tzolom cablaju.

Li Jesús quixtzꞌekta̱na li jun to̱n chi higo

¹² Joꞌ cuulajak chic nak queꞌel aran Betania, quichal xtzꞌocajic li Jesús.

¹³ Toj najt ajcuiꞌ cuan chak nak quiril jun to̱n li cheꞌ higo ut co̱ chirilbal ma cuan ru. Nak quicuulac cuan cuiꞌ li cheꞌ quiril nak ma̱cꞌaꞌ ru. Junes xak cuan xban nak toj ma̱jiꞌ xkꞌehil ta̱u̱chi̱nk.

¹⁴ Ut li Jesús quixye re li jun to̱n chi higo: —Ma̱ ani chic ta̱tzaca̱nk re li nacacuu̱chin xban nak ma̱ jun cua chic tatu̱chi̱nk, chan. Ut eb lix tzolom queꞌrabi li cꞌaꞌru quixye.

Li Jesús quirisiheb laj cꞌay saꞌ rochoch li Dios

¹⁵ Nak queꞌcuulac Jerusalén, li Jesús qui-oc saꞌ li rochoch li Dios. Quiril nak yo̱queb chi cꞌayi̱nc ut yo̱queb chi lokꞌoc aran. Qui-oc chixyolesinquileb. Quixbalkꞌusi lix me̱xeb laj jalol tumin ut quixbalkꞌusi ajcuiꞌ lix temeb li yo̱queb chi cꞌayi̱nc paloma.

¹⁶ Ut incꞌaꞌ chic quixcanabeb li tenamit chi numecꞌ saꞌ rochoch li Dios chi cuan ri̱keb.

¹⁷ Ut qui-oc xchꞌolobanquil xya̱lal chiruheb ut quixye: —¿Ma incꞌaꞌ ta biꞌ tzꞌi̱banbil saꞌ li Santil Hu li cꞌaꞌru quixye li Dios? “Li cuochoch, aꞌan re teꞌtijok cuiꞌ chixjunileb li tenamit.” Abanan la̱ex xeqꞌue li rochoch li Dios chokꞌ xnaꞌajeb laj e̱lkꞌ, chan li Jesús.

¹⁸ Eb li xbe̱nil aj tij ut eb laj tzꞌi̱b nak queꞌrabi aꞌan queꞌoc chixcꞌu̱banquil chanru nak teꞌxcamsi li Jesús. Cꞌajoꞌ nak queꞌxucuac xban nak queꞌril nak sachso̱queb xchꞌo̱l li qꞌuila tenamit chirabinquil li tijleb li yo̱ chixyebal li Jesús.

¹⁹ Nak qui-ecuu, qui-el li Jesús saꞌ li tenamit Jerusalén rochbeneb lix tzolom.

²⁰ Joꞌ cuulajak chic nak queꞌnumeꞌ cuan cuiꞌ li xto̱nal li higo, queꞌril nak ac xchakic chi junaj cua.

²¹ Ut laj Pedro quinak saꞌ xchꞌo̱l nak li Jesús quixtzꞌekta̱na li cheꞌ ut quixye re: —Ka̱cuaꞌ, il li cheꞌ li xatzꞌekta̱na. Xchakic chi junaj cua.—

²² Ut li Jesús quixye reheb: —Chepa̱b nak nim xcuanquil li Dios.

²³ Relic chi ya̱l tinye e̱re li ani tixye re junak tzu̱l, “Elen arin ut cut a̱cuib saꞌ li palau”, ut cui incꞌaꞌ tixcuiba xchꞌo̱l, ut cui tixpa̱b chi tzꞌakal nak ta̱uxk li tixye, ta̱uxma̱nk li cꞌaꞌru tixye.

²⁴ Joꞌcan nak tinye e̱re nak chixjunil li cꞌaꞌru te̱tzꞌa̱ma chiru li Dios nak yo̱quex chi tijoc, chepa̱b chi tzꞌakal nak ta̱qꞌuehekꞌ e̱re ut te̱cꞌul li cꞌaꞌru te̱tzꞌa̱ma.

²⁵ Nak yo̱kex chi tijoc, checuy xma̱c li ani cuan xma̱c che̱ru re nak li kaYucuaꞌ li cuan saꞌ choxa tixcuy ajcuiꞌ e̱ma̱c la̱ex.

²⁶ Ut cui incꞌaꞌ nequecuyeb xma̱c li cuanqueb xma̱c che̱ru, incꞌaꞌ ajcuiꞌ tixcuy e̱ma̱c la̱ex li kaYucuaꞌ li cuan saꞌ choxa, chan li Jesús.

Eb laj tzꞌi̱b queꞌxcuechꞌ rix xcuanquil li Jesús

²⁷ Queꞌsukꞌi cuiꞌchic aran Jerusalén. Nak yo̱ chi be̱c li Jesús saꞌ li rochoch li Dios queꞌcuulac li xbe̱nileb aj tij riqꞌuin. Ut queꞌcuulac laj tzꞌi̱b ut joꞌcan ajcuiꞌ li xakabanbileb chi cꞌanjelac saꞌ li rochoch li Dios.

²⁸ Queꞌxye re li Jesús: —¿Ani xtaklan chak a̱cue chixba̱nunquil li cꞌaꞌru yo̱cat chixba̱nunquil? Ut, ¿ani xqꞌuehoc a̱cuanquil? chanqueb.

²⁹ Li Jesús quixye: —La̱in tincuaj ajcuiꞌ patzꞌoc e̱re. Cui te̱sume li cꞌaꞌru tinpatzꞌ e̱re, la̱in tinye e̱re ani xqꞌuehoc incuanquil chixba̱nunquil li cꞌaꞌru ninba̱nu.

³⁰ ¿Ani quitaklan chak re laj Juan chi cubsi̱nc haꞌ? ¿Ma li Dios malaj ut cui̱nk quitaklan chak re? Yehomak cue anakcuan, chan reheb.

³¹ Ut queꞌoc chixyebal chi ribileb rib: —¿Cꞌaꞌru takasume cuiꞌ? Cui takaye nak li Dios xtaklan chak re, aꞌan tixye ke cꞌaꞌut nak incꞌaꞌ xkapa̱b li cꞌaꞌru quixye laj Juan.

³² Ut cui takaye nak cui̱nk xtaklan chak re, teꞌpokꞌ li tenamit saꞌ kabe̱n, chanqueb. Eb aꞌan queꞌxxucua ru li tenamit xban nak chixjunileb nequeꞌxnau nak laj Juan, aꞌan tzꞌakal profeta.

³³ Ut eb aꞌan queꞌchakꞌoc ut queꞌxye re li Jesús: —La̱o incꞌaꞌ nakanau, chanqueb. Tojoꞌnak li Jesús quixye reheb: —Chi moco la̱in tinye e̱re ani quiqꞌuehoc incuanquil, chan reheb.