Malaquías 2 - Li Santil hu

¹ Joꞌcaꞌin xye li Ka̱cuaꞌ: —Le̱ chakꞌrabinquil li oc cue xqꞌuebal anakcuan, aꞌan e̱re la̱ex aj tij.

² Cui incꞌaꞌ nequeba̱nu li cꞌaꞌru ninye ut cui incꞌaꞌ nequeqꞌue e̱chꞌo̱l chixqꞌuebal xlokꞌal lin cꞌabaꞌ, texintzꞌekta̱na ut le̱ rosobtesinquil tinsukꞌisi chokꞌ raylal. Ac xexintzꞌekta̱na xban nak incꞌaꞌ xeqꞌue e̱chꞌo̱l chixba̱nunquil li cꞌaꞌru xinye e̱re.

³ La̱in tincuisi le̱ cuanquil ut tincut saꞌ xnakꞌ e̱ru lix cꞌot li xul li nequemayeja. Ut texcuisi chirix cab e̱rech xxiquic lix cꞌot li xul li nequemayeja.

⁴ Ut riqꞌuin aꞌin te̱qꞌue retal nak le̱ chakꞌrabinquil li xinqꞌue e̱re, aꞌan re nak xakxo̱k xcuanquil li contrato li quinba̱nu riqꞌuin laj Leví. La̱in li Ka̱cuaꞌ li nimajcual Dios yo̱quin chi yehoc re aꞌin.

⁵ Saꞌ li contrato li quinba̱nu riqꞌuin laj Leví quinyechiꞌi reheb nak ta̱cua̱nk xyuꞌameb ut teꞌcua̱nk saꞌ tuktu̱quil usilal. Quinba̱nu li contrato riqꞌuineb re nak teꞌxxucua cuu. Ut eb aꞌan queꞌxxucua cuu ut queꞌxcubsi ribeb chicuu.

⁶ Laj Leví quixchꞌolob lix ya̱lal chiruheb li tenamit ut incꞌaꞌ quiticꞌtiꞌic. Quicuan chi sum a̱tin cuiqꞌuin ut saꞌ xcꞌabaꞌ aꞌan nabaleb queꞌxcanab xba̱nunquil li ma̱usilal.

⁷ Lix cꞌanjel eb laj tij, aꞌan xcꞌutbal lix ya̱lal chiruheb li tenamit. Riqꞌuineb aꞌan teꞌxic li cristian chirabinquil lix chakꞌrabinquileb inban la̱in xban nak eb laj tij, aꞌan eb lin takl, chan li nimajcual Dios.

⁸ —Abanan la̱ex xecanab xba̱nunquil li us joꞌ queꞌxba̱nu le̱ xeꞌto̱nil yucuaꞌ. Ut e̱ma̱c la̱ex nak nabaleb xeꞌxcanab xba̱nunquil li naxye saꞌ li chakꞌrab. Riqꞌuin aꞌan la̱ex xetzꞌekta̱na li contrato li quinba̱nu riqꞌuin laj Leví.

⁹ Joꞌcan nak la̱in xincꞌut e̱xuta̱n ut xicꞌ chic nequex-ileꞌ xbaneb chixjunileb li tenamit xban nak incꞌaꞌ nequeba̱nu li cꞌaꞌru nacuaj, ut xban ajcuiꞌ nak toj nequesicꞌ ru ani nequecꞌut lix ya̱lal chiru chi tzꞌakal, chan li nimajcual Dios.

Eb laj Israel queꞌxtzꞌekta̱na li Dios

¹⁰ ¿Cꞌaꞌut nak toj nequesicꞌ ru li junju̱nk? ¿Ma incꞌaꞌ ta biꞌ jun ajcuiꞌ li kaYucuaꞌ? ¿Ma incꞌaꞌ ta biꞌ jun ajcuiꞌ li Dios li quiyoꞌobtesin ke? ¿Cꞌaꞌut nak nequeba̱nu chi joꞌcan riqꞌuineb le̱ ras e̱ri̱tzꞌin? ¿Cꞌaꞌut nak incꞌaꞌ nequeba̱nu chi tzꞌakal? ¿Cꞌaꞌut nak nequetzꞌekta̱na li contrato li quixba̱nu li Dios riqꞌuineb li kaxeꞌto̱nil yucuaꞌ?

¹¹ Eb li ralal xcꞌajol laj Judá yo̱queb chixba̱nunquil li ma̱usilal aran Jerusalén joꞌ ajcuiꞌ saꞌ chixjunil Israel. Queꞌxmux ru li templo li raro xban li Ka̱cuaꞌ xban nak yo̱queb chi sumla̱c riqꞌuineb li ixk li nequeꞌxlokꞌoni li jalanil dios.

¹² Aꞌ taxak li Ka̱cuaꞌ ta̱isi̱nk reheb saꞌ xya̱nkeb li ralal xcꞌajol laj Jacob li ani yo̱ chixba̱nunquil li ma̱usilal aꞌin. Yalak ani ta̱ba̱nu̱nk re li ma̱usilal aꞌin ta̱isi̱k, usta aj cꞌutul chakꞌrab, usta aj tzolonel, usta aj tij.

¹³ Incꞌaꞌ us nequeba̱nu la̱ex. Nequejap e̱re chi ya̱bac ut nequetꞌakresi li artal riqꞌuin xyaꞌal e̱ru xban nak li Ka̱cuaꞌ incꞌaꞌ chic naxcꞌul li nequemayeja chiru.

¹⁴ Ut la̱ex nequeye, “¿Cꞌaꞌut nak incꞌaꞌ chic naxcꞌul li kamayej li Ka̱cuaꞌ?” chanquex. Aꞌan incꞌaꞌ naxcꞌul xban nak aꞌan naxnau nak la̱ex xekꞌet li a̱tin li quesume chak xba̱nunquil nak quexsumla saꞌ e̱sa̱jilal. Ut le̱ rixakil, aꞌan raj li tzꞌakal e̱rochben ut le̱ sum a̱tin. Abanan anakcuan xekꞌet le̱ ra̱tin li queye saꞌ li contrato li queba̱nu riqꞌuineb le̱ rixakil.

¹⁵ ¿Ma ma̱cuaꞌ ta biꞌ li Ka̱cuaꞌ xba̱nun re nak junajakeb chic ru li jun sumal chi cristian? ¿Cꞌaꞌut nak joꞌcan xba̱nu li Dios? ¿Ma ma̱cuaꞌ ta biꞌ re nak teꞌcua̱nk li ralal xcꞌajoleb ut ti̱cakeb xchꞌo̱l? Joꞌcan nak chenauhak xra̱bal le̱ yuꞌam ut canabomak xbalakꞌinquil le̱ rixakil li quexsumla cuiꞌ saꞌ e̱sa̱jilal.

¹⁶ Li Ka̱cuaꞌ lix Dioseb laj Israel quixye: —La̱in xicꞌ nacuil li ani naxjach rib riqꞌuin li rixakil ut naxmux rib chixba̱nunquil li incꞌaꞌ us, chan li Ka̱cuaꞌ. Joꞌcan nak cherahak le̱ yuꞌam ut me̱mux ru le̱ sumlajic.

Cuulac re xkꞌehil li rakba a̱tin

¹⁷ Li Ka̱cuaꞌ xtitzꞌ chirabinquil li cꞌaꞌru nequeye. Ut toj nequeye, “¿Cꞌaꞌru xtitzꞌ cuiꞌ li Ka̱cuaꞌ kaban?” Xtitzꞌ e̱ban xban nak la̱ex nequeye nak nasahoꞌ xchꞌo̱l li Dios riqꞌuin li ani naxba̱nu ma̱usilal. Ut nequeye ajcuiꞌ, “Cui ta ya̱l nak ti̱c xchꞌo̱l li Dios, ac xqꞌueheb raj chixtojbal xma̱queb li ani nequeꞌba̱nun ma̱usilal,” chanquex.