Malaquías 1 - Li Santil hu

Li Ka̱cuaꞌ naxra lix tenamit Israel

¹ Aꞌan aꞌin li a̱tin li quixye li Ka̱cuaꞌ re li profeta Malaquías chirix li cꞌaꞌru teꞌxcꞌul eb laj Israel.

² —La̱in junelic nequexinra, chan li Ka̱cuaꞌ reheb laj Israel. —Abanan la̱ex nequeye, “¿Chanru nak takanau nak nocoa̱ra?” chanquex. ¿Ma ma̱cuaꞌ ta biꞌ ri̱tzꞌin laj Esaú laj Jacob? La̱in xinra aꞌan, chan li Ka̱cuaꞌ.

³ —Xintzꞌekta̱na laj Esaú. Ut xinsukꞌisi lix naꞌaj chokꞌ chaki chꞌochꞌ li cha̱bil tzu̱l nak quicuan. Xincanab lix chꞌochꞌ chokꞌ xnaꞌajeb li joskꞌ aj xul, chan li Dios.

⁴ Ut cui ta teꞌxye li ralal xcꞌajol laj Esaú li cuanqueb saꞌ li tenamit Edom, “Xeꞌxsach ru li katenamit, abanan takacuaclesi cuiꞌchic li katenamit,” chaꞌkeb, abanan li Ka̱cuaꞌ li kꞌaxal nim xcuanquil tixye: —Eb aꞌan teꞌxcuaclesi cuiꞌchic lix tenamiteb ut la̱in tinsach cuiꞌchic ru. “Numtajenak chi ma̱usilal lix tenamiteb” chaꞌkeb re. Ut ta̱yehekꞌ ajcuiꞌ re, “Li tenamit aꞌan junelic yo̱ xjoskꞌil li Dios saꞌ xbe̱n.”

⁵ Riqꞌuin ajcuiꞌ xnakꞌ e̱ru te̱ril li cꞌaꞌru ta̱cꞌulma̱nk. Ut te̱ye, “Chinima̱k taxak xlokꞌal li nimajcual Dios yalak bar,” chaꞌkex.—

Li Ka̱cuaꞌ naxkꞌuseb laj tij

⁶ Joꞌcaꞌin quixye li nimajcual Dios reheb laj tij: —Junak alalbej naxqꞌue xlokꞌal lix yucuaꞌ. Ut junak aj cꞌanjel naxqꞌue xlokꞌal lix patrón. Cui la̱in le̱ Yucuaꞌ, ¿cꞌaꞌut nak incꞌaꞌ nequeqꞌue inlokꞌal? Ut cui la̱in le̱ patrón, ¿cꞌaꞌut nak incꞌaꞌ niquine̱qꞌue saꞌ xnakꞌ e̱ru? La̱ex niquine̱tzꞌekta̱na. Ut nequeye, “¿Cꞌaꞌru xatkatzꞌekta̱na cuiꞌ?” chanquex.

⁷ La̱ex nequemayeja saꞌ xbe̱n lin artal li yibru tzacae̱mk. Ut nequeye, “¿Cꞌaꞌru xkamux cuiꞌ a̱cuu?” chanquex. Nequemux cuu nak nequetzꞌekta̱na lin artal riqꞌuin xqꞌuebal li mayej incꞌaꞌ us.

⁸ La̱ex nequecꞌoxla nak naru te̱mayeja chicuu li xul yaj, joꞌ li mutzꞌ ru, malaj li ye̱k rok. ¿Ma us ta biꞌ aꞌan? Ayukex ut sihomak aꞌan re li acuabej saꞌ le̱ tenamit. ¿Ma ta̱cuulak na chiru aꞌan? Ut, ¿ma tixcꞌul na che̱ru chi sa saꞌ xchꞌo̱l? chan li nimajcual Dios.

⁹ Ut anakcuan, tijonkex. Chextzꞌa̱ma̱nk taxak chiru li Ka̱cuaꞌ re nak aꞌan ta̱ruxta̱na e̱ru. Abanan cui incꞌaꞌ nequecanab xba̱nunquil li incꞌaꞌ us, ¿chanru nak ta̱ruxta̱na e̱ru li Dios chi joꞌcan?

¹⁰ Li Ka̱cuaꞌ li nimajcual Dios quixye: —Us raj cuan ta junak e̱re tixtzꞌap raj xpuertil lin templo re nak ma̱ ani chic ta̱oc aran chixtzꞌabbal li xam saꞌ xbe̱n lin artal chi ma̱cꞌaꞌ rajbal. La̱in incꞌaꞌ sa saꞌ inchꞌo̱l e̱riqꞌuin ut incꞌaꞌ chic tincꞌul li nequemayeja chicuu.

¹¹ Yalak bar saꞌ ruchichꞌochꞌ ta̱qꞌuehekꞌ inlokꞌal xbaneb li cuanqueb saꞌ li xni̱nkal ru tenamit. Ut yalak bar saꞌ eb li naꞌajej teꞌxqꞌue xlokꞌal incꞌabaꞌ riqꞌuin xcꞌatbal li sununquil ban chicuu ut riqꞌuin li cha̱bil mayej li teꞌxmayeja. Nimanbilak lin cꞌabaꞌ saꞌ eb li jalan tenamit.

¹² Abanan la̱ex nequemux cuu nak nequeye nak ma̱cꞌaꞌ na-oc cuiꞌ lin artal ut nequeye nak ma̱cꞌaꞌ na-oc cuiꞌ li mayej li naqꞌueheꞌ aran.

¹³ La̱ex nequeye, “Xotitzꞌ chi mayejac chiru li Ka̱cuaꞌ.” La̱ex niquine̱tzꞌekta̱na. Nequecꞌam chak li xul li elkꞌanbil malaj ut li ye̱k rok, malaj ut li xul yaj ut nequemayeja saꞌ lin artal. ¿Ma tincꞌul ta biꞌ chi sa saꞌ inchꞌo̱l li mayej aꞌan?

¹⁴ Tzꞌekta̱nanbilak li ani nabalakꞌin riqꞌuin xyechiꞌinquil jun li cha̱bil xul te̱lom chokꞌ xmayej ut incꞌaꞌ ajcuiꞌ naxqꞌue. Naxmayeja ban li xul li yaj li incꞌaꞌ us. La̱in li tzꞌakal Rey, chan li nimajcual Dios, ut xucuanbilak cuu saꞌ xya̱nkeb li xni̱nkal ru tenamit.