San Lucas 9 - Li Santil hu

Li Jesús quixtaklaheb lix tzolom cablaju chixchꞌolobanquil resil li colba-ib

¹ Li Jesús quixchꞌutubeb lix tzolom cablaju ut quixqꞌueheb xcuanquil chirisinquileb li ma̱us aj musikꞌej ut quixqꞌueheb ajcuiꞌ xcuanquil chixqꞌuirtesinquileb li yaj.

² Quixtaklaheb chixchꞌolobanquil resil lix nimajcual cuanquilal li Dios ut chixqꞌuirtesinquileb li yaj.

³ Quixye reheb: —Ma̱cꞌaꞌ te̱cꞌam e̱re nak texxic. Incꞌaꞌ te̱cꞌam e̱xukꞌ, chi moco e̱bo̱ls, chi moco e̱tzacae̱mk chi moco e̱tumin. Caꞌaj cuiꞌ le̱ rakꞌ li cuan che̱rix te̱cꞌam.

⁴ Nak texcꞌulekꞌ saꞌ junak cab, aran texcana̱k. Toj ta̱cuulak xkꞌehil nak texxic, tex-e̱lk saꞌ li naꞌajej aꞌan.

⁵ Cui texcuulak saꞌ junak naꞌajej bar cuiꞌ incꞌaꞌ texcꞌulekꞌ, tex-e̱lk riqꞌuineb ut te̱chikꞌ li poks che̱rok joꞌ retalil li raylal teꞌxcꞌul xban nak incꞌaꞌ queꞌraj rabinquil li ra̱tin li Dios, chan li Jesús.

⁶ Co̱eb ut lix tzolom li Jesús saꞌ eb li junju̱nk chi naꞌajej ut yo̱queb chixchꞌolobanquil resil li colba-ib. Ut yo̱queb ajcuiꞌ chixqꞌuirtesinquileb li yaj.

Qui-oc xcꞌaꞌux laj Herodes xban li Jesús

⁷ Laj Herodes li nataklan aran Galilea quirabi resil chixjunil li yo̱ chixba̱nunquil li Jesús ut qui-oc xcꞌaꞌux xban nak cuan yo̱queb chi yehoc re nak aꞌan laj Juan li xcuacli cuiꞌchic chi yoꞌyo saꞌ xya̱nkeb li camenak.

⁸ Ut cuan ajcuiꞌ li yo̱queb chi yehoc re nak aꞌan li profeta Elías li xchal cuiꞌchic. Ut cuan cuiꞌchic li yo̱queb chi yehoc re nak ma̱re aꞌan jun xcomoneb li profeta li queꞌcuan junxil li xcuacli cuiꞌchic chi yoꞌyo saꞌ xya̱nkeb li camenak.

⁹ Laj Herodes quixye saꞌ xchꞌo̱l: —Aꞌan ma̱cuaꞌ laj Juan xban nak la̱in quintaklan re xchꞌotbal xcux. ¿Ani anchal aꞌan li yo̱quin chirabinquil resil? chan. Joꞌcan nak ta̱raj rilbal ru.

Li Jesús quixqꞌueheb chi cuaꞌac li o̱b mil chi cui̱nk

¹⁰ Nak queꞌsukꞌi chak lix tzolom chixba̱nunquil li cꞌanjel queꞌtakla̱c cuiꞌ, queꞌxserakꞌi re li Jesús li cꞌaꞌru quilajeꞌxba̱nu chak. Li Jesús quixcꞌameb xjuneseb saꞌ jun naꞌajej bar ma̱cꞌaꞌ cuan, li cuan xcue̱nt li tenamit Betsaida.

¹¹ Abanan li qꞌuila tenamit queꞌxqꞌue retal nak li Jesús yo̱queb chi xic saꞌ li naꞌajej aꞌan, ut queꞌco̱eb chirix. Li Jesús quixcꞌuleb ut qui-oc chixchꞌolobanquil xya̱lal chiruheb chirix lix nimajcual cuanquilal li Dios. Ut quixqꞌuirtesiheb ajcuiꞌ li yaj.

¹² Nak ac yo̱ chi ecuu̱c, lix tzolom cablaju queꞌco̱eb bar cuan cuiꞌ li Jesús ut queꞌxye re: —Chakꞌrabiheb li tenamit re nak teꞌxic xsicꞌbal lix naꞌajeb bar teꞌhila̱nk cuiꞌ ut teꞌxsicꞌ ajcuiꞌ lix tzacae̱mk saꞌ eb li cꞌaleba̱l ut saꞌ eb li naꞌajej li cuanqueb chi nachꞌ, chanqueb re.

¹³ Li Jesús quixye reheb: —Qꞌuehomak xcuaheb la̱ex.— Ut eb aꞌan queꞌxye: —Ma̱cꞌaꞌ tzacae̱mk kiqꞌuin la̱o. O̱b ajcuiꞌ li caxlan cua ut cuib ajcuiꞌ li car cuan. ¿Malaj ut yo̱cat chixcꞌoxlanquil nak la̱o toxic chixlokꞌbal xtzacae̱mkeb li qꞌuila tenamit aꞌin? chanqueb lix tzolom.

¹⁴ Chixjunileb li cuanqueb aran cuanqueb tana o̱b mil chi cui̱nk. Li Jesús quixye reheb lix tzolom nak teꞌxchunub ribeb chi chꞌu̱tal, chi laje̱tk roxcꞌa̱l. (50)

¹⁵ Eb lix tzolom li Jesús queꞌxba̱nu joꞌ quiyeheꞌ reheb. Ut li cristian queꞌchunla chi chꞌu̱tal.

¹⁶ Li Jesús quixchap li o̱b chi caxlan cua ut li cuib chi car. Qui-iloc saꞌ choxa. Quixbantioxi chiru li Dios. Quixjachi ut quixqꞌue reheb lix tzolom re nak teꞌxjeqꞌui reheb li qꞌuila tenamit.

¹⁷ Queꞌcuaꞌac chixjunileb toj retal queꞌcꞌojla xchꞌo̱l. Ut cablaju chacach chic li relaꞌ quicana.

Laj Pedro quixye nak li Jesús, aꞌan li Cristo laj Colonel li yechiꞌinbil

¹⁸ Saꞌ jun li cutan li Jesús yo̱ chi tijoc xjunes nak queꞌcuulac lix tzolom riqꞌuin. Li Jesús quixpatzꞌ reheb lix tzolom ut quixye: —¿Anihin la̱in nak nequeꞌxye li tenamit? chan.

¹⁹ Eb aꞌan queꞌxye re: —Cuan nequeꞌyehoc re nak la̱at laj Juan laj Cubsihom Haꞌ. Ut cuan ajcuiꞌ nequeꞌyehoc re nak la̱at li profeta Elías. Ut cuan cuiꞌchic nequeꞌyehoc re nak la̱at jun reheb li profeta li queꞌcuan najter li xcuacli cuiꞌchic chi yoꞌyo, chanqueb.

²⁰ —Ut la̱ex, ¿anihin la̱in nak nequecꞌoxla? chan li Jesús reheb. Quichakꞌoc laj Pedro ut quixye re: —La̱at li Cristo, laj Colonel li yechiꞌinbil xban li Dios, chan.

²¹ Ut li Jesús quixtzꞌa̱ma chiruheb lix tzolom ut quixye reheb: —Ma̱ ani aj e te̱ye nak la̱in li Cristo, chan reheb.

Li Jesús quixye resil li raylal li tixcꞌul

²² Ut quixye ajcuiꞌ reheb: —La̱in li Cꞌajolbej. Tento nak tincꞌul nabal li raylal. Tintzꞌekta̱na̱k xbaneb li xakabanbileb chi cꞌanjelac saꞌ li templo, joꞌ ajcuiꞌ xbaneb li xbe̱nil aj tij, ut xbaneb laj tzꞌi̱b. Tincamsi̱k, abanan tincuacli̱k cuiꞌchic chi yoꞌyo saꞌ rox li cutan, chan li Jesús.

²³ Li Jesús quixye reheb chixjunileb li cuanqueb aran: —Li ani ta̱raj inpa̱banquil tento nak tixtzꞌekta̱na li cꞌaꞌru naxrahi ru lix chꞌo̱l. Tixcuy xnumsinquil li raylal li tixcꞌul, usta ta̱camsi̱k saꞌ incꞌabaꞌ. Ut chinixta̱kehak.

²⁴ Li ani ta̱tzꞌekta̱na̱nk cue re xcolbal rix lix yuꞌam arin saꞌ ruchichꞌochꞌ, tixtzꞌek li junelic yuꞌam. Aꞌut li ani naxsach lix yuꞌam arin saꞌ ruchichꞌochꞌ saꞌ incꞌabaꞌ la̱in, aꞌan ta̱re̱chani li junelic yuꞌam.

²⁵ ¿Cꞌaꞌru tixra junak li cui̱nk cui ta̱re̱chani chixjunil xbiomal li ruchichꞌochꞌ ut tixtzꞌekta̱na li junelic yuꞌam?

²⁶ Li ani ta̱xuta̱na̱k inban malaj ut xban li cua̱tin, la̱in li Alalbej tinxuta̱na̱k ajcuiꞌ xbaneb nak tincha̱lk chak riqꞌuin inlokꞌal ut riqꞌuin xlokꞌal lin Yucuaꞌ cuochbeneb li santil ángel, chan li Jesús.

²⁷ Ut quixye ajcuiꞌ: —Relic chi ya̱l tinye e̱re nak cuanqueb arin saꞌ e̱ya̱nk li incꞌaꞌ teꞌca̱mk toj teꞌril lix nimajcual cuanquilal li Dios, chan li Jesús.

Laj Pedro, laj Jacobo ut laj Juan queꞌril nak quijala li riloba̱l li Jesús

²⁸ Cuakxakib cutan na chic xyebal eb a a̱tin aꞌin nak li Jesús co̱ chi tijoc saꞌ xbe̱n jun li tzu̱l rochbeneb laj Pedro, laj Jacobo ut laj Juan.

²⁹ Nak yo̱ chi tijoc li Jesús, quijalanoꞌ li riloba̱l chiruheb. Ut li rakꞌ sak sak ut nalemtzꞌun.

³⁰ Ut queꞌril nak cuibeb li cui̱nk yo̱queb chi a̱tinac riqꞌuin li Jesús. Aꞌaneb laj Moisés ut laj Elías.

³¹ Nequeꞌlemtzꞌun ut cꞌajoꞌ lix lokꞌaleb nak yo̱queb chi a̱tinac chirix lix camic li Jesús li tenebanbil saꞌ xbe̱n aran Jerusalén.

³² Usta yo̱queb xcuara laj Pedro ut li cuanqueb rochben, abanan incꞌaꞌ queꞌcuar. Yo̱queb ban chirilbal lix lokꞌal li Jesús joꞌ ajcuiꞌ li cuib chi cui̱nk li cuanqueb rochben.

³³ Nak ac oqueb re xcanabanquil li Jesús li cuib chi cui̱nk, laj Pedro quixye re li Jesús: —Ka̱cuaꞌ, cꞌajoꞌ xchakꞌal ru nak cuanco arin. Xkayi̱b ta oxibak muheba̱l arin. Jun a̱cue, jun re laj Moisés ut jun re laj Elías, chan. Quixye chi joꞌcan xban nak incꞌaꞌ quixtau ru lix ya̱lal li quiril.

³⁴ Nak toj yo̱ chi a̱tinac laj Pedro, quichal jun li chok saꞌ xbe̱neb. Cꞌajoꞌ nak queꞌxucuac nak queꞌmukun saꞌ li chok.

³⁵ Queꞌrabi nak li Dios quia̱tinac saꞌ li chok ut quixye: —Aꞌin li cualal li sicꞌbil ru inban. Cherabi li cꞌaꞌru tixye, chan.

³⁶ Nak quicana li a̱tinac, xjunes chic li Jesús quicana. Ut eb aꞌan ma̱cꞌaꞌ chic queꞌxye. Ut chiruheb li cutan aꞌan ma̱ ani aj e queꞌxye li cꞌaꞌru queꞌril.

Li Jesús quirisi li ma̱us aj musikꞌej riqꞌuin jun li al

³⁷ Joꞌ cuulajak chic nak quicube saꞌ li tzu̱l, nabaleb li qꞌuila tenamit queꞌcuulac chi cꞌuluc re li Jesús.

³⁸ Jun li cui̱nk quia̱tinac chak saꞌ xya̱nkeb li tenamit ut quixye chi cau xya̱b xcux: —At tzolonel, nintzꞌa̱ma cha̱cuu nak ta̱cuil li cualal xban nak caꞌaj cuiꞌ aꞌan chicuu.

³⁹ Cuan ma̱us aj musikꞌej riqꞌuin. Nak naniman xyajel naxjap re ut nachꞌikchꞌiki̱c chi cau xban li ma̱us aj musikꞌej ut na-el xcuokx saꞌ re. Ut incꞌaꞌ naraj xcanabanquil li cualal.

⁴⁰ Xintzꞌa̱ma chiruheb la̱ tzolom nak teꞌrisi li ma̱us aj musikꞌej, abanan incꞌaꞌ xeꞌru chirisinquil, chan li cui̱nk.

⁴¹ Quichakꞌoc li Jesús ut quixye reheb: —La̱ex tenamit li cuanquex anakcuan, chi ti̱c incꞌaꞌ nequexpa̱ban ut incꞌaꞌ us e̱naꞌleb. ¿Joꞌ najtil chic tincua̱nk e̱riqꞌuin re nak texpa̱ba̱nk? ¿Joꞌ najtil chic texincuy nak nequecꞌoxla? Cꞌam chak li al arin cuiqꞌuin, chan li Jesús.

⁴² Nak yo̱ chi xic li al riqꞌuin li Jesús, li ma̱us aj musikꞌej quixcut li al saꞌ chꞌochꞌ ut quixchꞌikle chi cau. Abanan li Jesús quixkꞌus li ma̱us aj musikꞌej. Quixqꞌuirtesi li al ut quixkꞌaxtesi re lix yucuaꞌ.

⁴³ Ut chixjunileb li cuanqueb aran sachso̱queb xchꞌo̱l chirilbal nak kꞌaxal nim xcuanquil li Dios. Nak toj sachso̱queb xchꞌo̱l li tenamit chi cꞌoxlac chirix li quicꞌulman, li Jesús quixye reheb lix tzolom:

⁴⁴ —Cherabihak chi us li tinye e̱re. Tento nak la̱in li Cꞌajolbej tinkꞌaxtesi̱k saꞌ rukꞌeb li cui̱nk li xicꞌ nequeꞌiloc cue, chan li Jesús.

⁴⁵ Abanan eb lix tzolom incꞌaꞌ queꞌxtau ru li cꞌaꞌru quixye, xban nak toj ma̱jiꞌ nacuulac xkꞌehil nak teꞌxtau ru. Ut queꞌxuta̱nac chixpatzꞌbal re cꞌaꞌru xya̱lal li quixye li Jesús reheb.

Lix tzolom li Jesús queꞌxpatzꞌ ani li nimak xcuanquil saꞌ xya̱nkeb

⁴⁶ Eb lix tzolom li Jesús queꞌoc chixcuechꞌinquil ribeb. Ut yo̱queb chixpatzꞌbal ani reheb li nimak xcuanquil.

⁴⁷ Nak li Jesús quixqꞌue retal li cꞌaꞌru yo̱queb chixcꞌoxlanquil, quixcꞌam jun li chꞌina al ut quixxakab chiru.

⁴⁸ Ut quixye reheb: —Li ani ta̱cꞌuluk re junak chꞌina al joꞌ aꞌin saꞌ incꞌabaꞌ la̱in, tinixcꞌul ajcuiꞌ la̱in; ut li ani ta̱cꞌuluk cue la̱in, tixcꞌul ajcuiꞌ li ani xtaklan chak cue. Joꞌcan nak li ani cubenak xcuanquil saꞌ e̱ya̱nk anakcuan, aꞌanak chic li nimak xcuanquil.—

⁴⁹ Laj Juan quixye re li Jesús: —At Ka̱cuaꞌ, xkil jun li cui̱nk yo̱ chi isi̱nc ma̱us aj musikꞌej saꞌ a̱cꞌabaꞌ. Ut la̱o xkaye re nak incꞌaꞌ tixba̱nu aꞌan xban nak moco kacomon ta, chan.

⁵⁰ Ut li Jesús quichakꞌoc ut quixye re: —Me̱kꞌus li cui̱nk aꞌan xban nak li ani incꞌaꞌ xicꞌ na-iloc ke, aꞌan na-oquen chikix, chan.

Li Jesús quixkꞌuseb laj Jacobo ut laj Juan

⁵¹ Nak ac cuulac re xkꞌehil nak li Jesús ta̱cꞌamekꞌ cuiꞌchic xban li Dios saꞌ choxa, quixcacuubresi xchꞌo̱l chi xic Jerusalén.

⁵² Li Jesús quixtakla xtakl saꞌ jun tenamit cuan saꞌ xcue̱nt Samaria, re nak teꞌxcauresi xnaꞌaj re ta̱hila̱nk cuiꞌ.

⁵³ Abanan li cuanqueb saꞌ li tenamit aꞌan incꞌaꞌ queꞌraj xcꞌulbal li Jesús xban nak queꞌxqꞌue retal nak yo̱ chi xic Jerusalén.

⁵⁴ Nak laj Jacobo ut laj Juan queꞌxqꞌue retal nak incꞌaꞌ quicꞌuleꞌ li Jesús saꞌ li tenamit aꞌan, queꞌxye re: —¿Ma ta̱cuaj nak takatzꞌa̱ma nak ta̱cubek chak xam saꞌ choxa re nak ta̱cꞌatekꞌ li tenamit aꞌan joꞌ quixba̱nu laj Elías? chanqueb.

⁵⁵ Quixsukꞌisi rib li Jesús ut quixkꞌuseb. Quixye reheb: —¿Cꞌaꞌru musikꞌejil cuan e̱riqꞌuin la̱ex nak incꞌaꞌ nequetau ru?

⁵⁶ La̱in li Cꞌajolbej incꞌaꞌ xinchal chixsachbal ruheb li cristian. Xinchal ban chixcolbaleb, chan li Jesús. Ut chirix aꞌan, queꞌco̱eb saꞌ jalan chic naꞌajej.

Eb li cui̱nk queꞌxye nak teꞌraj xta̱kenquil li Jesús abanan yal xcab rix xchꞌo̱l nak queꞌxye

⁵⁷ Nak yo̱queb chi xic li Jesús, jun li cui̱nk quicuulac riqꞌuin ut quixye re: —At tzolonel, tincuaj a̱ta̱kenquil yalak bar tatxic, chan re.

⁵⁸ Li Jesús quichakꞌoc ut quixye re: —Cꞌoxla chi us ma ta̱cuy inta̱kenquil. Li yac cuanqueb xjul saꞌ pec, ut li xul li nequeꞌrupupic chiru choxa cuanqueb xsoc. Abanan la̱in li Cꞌajolbej ma̱cꞌaꞌ innaꞌaj bar ta̱ru̱k tinhila̱nk cuiꞌ.—

⁵⁹ Li Jesús quixye re jun chic: —China̱ta̱ke, chan. Quichakꞌoc li cui̱nk ut quixye: —Ka̱cuaꞌ, china̱cuy. Inmukak cuan lin yucuaꞌ tojoꞌnak tinxic cha̱cuix, chan.

⁶⁰ Li Jesús quixye re: —Canabeb li toj camenakeb saꞌ li ma̱c xmukakeb cuan lix camenak. Ut la̱at, ayu. Ye chak resil lix nimajcual cuanquilal li Dios, chan.

⁶¹ Ut jun chic li cui̱nk quixye: —At Ka̱cuaꞌ, tatinta̱ke. Abanan inchakꞌrabihakeb cuan chak li cuanqueb saꞌ cuochoch, chan re.

⁶² Ut li Jesús quixye re: —Li ani naxtiquib cꞌanjelac chiru li Dios ut cui toj yo̱ chixcꞌoxlanquil li cꞌaꞌru re, li jun aꞌan incꞌaꞌ us chokꞌ aj cꞌanjel saꞌ lix nimajcual cuanquilal li Dios, chan li Jesús.