San Lucas 24 - Li Santil hu

Li Jesús quicuacli cuiꞌchic chi yoꞌyo saꞌ xya̱nkeb li camenak

¹ Saꞌ li xbe̱n li cutan re li xama̱n, toj ekꞌela chi us, co̱eb li ixk cuan cuiꞌ li mukleba̱l. Queꞌxcꞌam li sununquil ban li queꞌxyi̱b. Ut cuanqueb jalaneb chic ixk rochbeneb.

² Nak queꞌcuulac, queꞌril nak ac isinbil chic li nimla pec li natzꞌapoc re li mukleba̱l.

³ Ut nak queꞌoc chi saꞌ li mukleba̱l, incꞌaꞌ queꞌxtau li camenak.

⁴ Queꞌsach xchꞌo̱leb ut incꞌaꞌ queꞌxnau cꞌaꞌru teꞌxba̱nu. Ut xaka̱mil chiruheb cuib li cui̱nk. Nalemtzꞌun li rakꞌeb.

⁵ Cꞌajoꞌ nak queꞌxucuac li ixk. Queꞌxxulub li riloba̱l. Ut eb li cui̱nk queꞌxye reheb: —¿Cꞌaꞌut nak nequesicꞌ li yoꞌyo saꞌ xya̱nkeb li camenak?

⁶ Aꞌan ma̱ ani chic arin. Ac xcuacli cuiꞌchic chi yoꞌyo. Chijulticokꞌ e̱re li cꞌaꞌru quixye chak nak toj cua̱nk chak Galilea.

⁷ Quixye nak tento ta̱kꞌaxtesi̱k li Cꞌajolbej saꞌ rukꞌeb li cui̱nk aj ma̱c. Ta̱qꞌuehekꞌ chiru cruz ut ta̱camsi̱k. Ut quixye ajcuiꞌ nak ta̱cuacli̱k cuiꞌchic chi yoꞌyo saꞌ xya̱nkeb li camenak saꞌ rox li cutan, chanqueb.

⁸ Riqꞌuin aꞌan quinak saꞌ xchꞌo̱leb li ixk li cꞌaꞌru quixye li Jesús.

⁹ Queꞌel saꞌ li mukleba̱l ut co̱eb. Coleꞌxye resil chixjunil li cꞌaꞌak re ru aꞌin reheb li junlaju ut reheb ajcuiꞌ li jun chꞌol chic.

¹⁰ Eb li ixk li queꞌyehoc re li esilal aꞌin reheb li apóstol, aꞌan eb lix María Magdala xtenamit, lix Juana ut lix María lix naꞌ laj Jacobo rochbeneb li jun chꞌol chic li ixk.

¹¹ Abanan eb li junlaju chi apóstol incꞌaꞌ queꞌxpa̱b li cꞌaꞌru queꞌxye li ixk. Saꞌ xchꞌo̱leb aꞌan nak moco ya̱l ta li yo̱queb chixyebal.

¹² Abanan laj Pedro co̱ saꞌ a̱nil saꞌ li mukleba̱l. Qui-iloc chi saꞌ ut quiril nak caꞌaj chic li tꞌicr lino cuan aran. Joꞌcan nak sachso xchꞌo̱l chi cꞌoxlac nak quisukꞌi saꞌ rochoch.

Li Jesús quixcꞌutbesi rib chiruheb li cui̱nk nak yo̱queb chi xic Emaús

¹³ Saꞌ ajcuiꞌ li cutan aꞌan, cuibeb lix tzolom li Jesús yo̱queb chi xic saꞌ li chꞌina tenamit Emaús. Li tenamit aꞌan junlaju kilómetro na xnajtil riqꞌuin Jerusalén.

¹⁴ Yo̱queb chi a̱tinac chi ribileb rib chirix chixjunil li cꞌaꞌak re ru quicꞌulman saꞌ eb li cutan aꞌan.

¹⁵ Nak yo̱queb chi a̱tinac ut chixtzꞌilbal rix chi ribileb rib li cꞌaꞌru quicꞌulman, li Jesús quijiloc riqꞌuineb ut qui-oc chi be̱c rochbeneb.

¹⁶ Usta queꞌril ru, abanan incꞌaꞌ queꞌxnau nak aꞌan li Jesús xban nak cuan cꞌaꞌru quiramoc re chiruheb.

¹⁷ Ut li Jesús quixye reheb: —¿Cꞌaꞌru chi aj ix yo̱quex chi serakꞌic chi ribil e̱rib nak yo̱quex chi be̱c? ¿Cꞌaꞌut nak ra saꞌ e̱chꞌo̱l? chan reheb.

¹⁸ Jun reheb aꞌan, aj Cleofas xcꞌabaꞌ, quichakꞌoc ut quixye: —Joꞌ li caꞌaj cuiꞌ la̱at li yo̱cat chi numecꞌ saꞌ li tenamit Jerusalén li incꞌaꞌ nacatnaꞌoc re li cꞌaꞌru xcꞌulman saꞌ eb li cutan aꞌin, chan.

¹⁹ Ut li Jesús quixye reheb: —¿Cꞌaꞌru anchal aꞌan? chan. Eb aꞌan queꞌxye re: —Chirix li Jesús aj Nazaret. Aꞌan profeta nak quicuan. Nim xcuanquil. Cha̱bil quixba̱nu ut cha̱bil quixye chiru li Dios ut chiruheb li tenamit.

²⁰ Eb li xbe̱nil aj tij ut eb li nequeꞌtaklan saꞌ kabe̱n queꞌxkꞌaxtesi chi camsi̱c ut queꞌxqꞌue chiru cruz.

²¹ Aꞌan raj li ta̱colok re li katenamit Israel saꞌ kachꞌo̱l. Abanan anakcuan ac oxib cutan xcꞌulbal aꞌan.

²² Xsach kachꞌo̱l chirabinquil li cꞌaꞌru xeꞌxye ke li ixk li xeꞌcuulac saꞌ li mukleba̱l toj ekꞌela.

²³ Xban nak incꞌaꞌ xeꞌxtau li camenak, xeꞌsukꞌi saꞌ cab ut xeꞌxye ke nak cuib li ángel xeꞌxcꞌutbesi rib chiruheb ut xeꞌxye reheb nak yoꞌyo li Jesús.

²⁴ Ut cuanqueb ajcuiꞌ kacomon xeꞌcuulac chak saꞌ li mukleba̱l ut xeꞌril nak ya̱l li xeꞌxye li ixk. Abanan incꞌaꞌ xeꞌril ru li Jesús, chan laj Cleofas.

²⁵ Ut li Jesús quixye reheb: —¡La̱ex ma̱cꞌaꞌ e̱naꞌleb ut a̱l le̱ chꞌo̱l chixpa̱banquil chixjunil li cꞌaꞌru queꞌxye chak li profeta!

²⁶ ¿Ma incꞌaꞌ ta biꞌ tento nak tixcꞌul chixjunil li raylal aꞌin li Cristo laj Colonel li yechiꞌinbil xban li Dios re nak ta̱qꞌuehekꞌ xlokꞌal? chan reheb.

²⁷ Ut quixchꞌolob xya̱lal chiruheb chirix li cꞌaꞌru quixtzꞌi̱ba laj Moisés. Quixchꞌolob ajcuiꞌ lix ya̱lal li queꞌxtzꞌi̱ba chak li profeta chirix li Cristo li yechiꞌinbil xban li Dios joꞌ tzꞌi̱banbil saꞌ li Santil Hu.

²⁸ Queꞌcuulac saꞌ li chꞌina tenamit li yo̱queb cuiꞌ chi xic. Ut li Jesús quixba̱nu rib nak ti̱c ta̱xic.

²⁹ Abanan eb aꞌan queꞌrelaji ru re ta̱cana̱k riqꞌuineb. Queꞌxye re: —Cana̱kat kiqꞌuin xban nak yo̱ chi ecuu̱c. Oc re li kꞌojyi̱n, chanqueb re. Ut li Jesús qui-oc saꞌ cab ut quicana riqꞌuineb.

³⁰ Nak cꞌojcꞌo saꞌ me̱x rochbeneb, quixchap li caxlan cua, quixbantioxi chiru li Dios, quixjachi ut quixqꞌue reheb.

³¹ Saꞌ li ho̱nal aꞌan queꞌxqꞌue retal nak aꞌan li Jesús. Ut nak ac xeꞌxnau nak aꞌan, nak queꞌril ac ma̱ ani chic saꞌ xya̱nkeb.

³² Ut eb aꞌan queꞌxye chi ribileb rib: —Joꞌcan peꞌ nak yo̱co chak recꞌanquil jun sahil chꞌo̱lej saꞌ ka̱m nak yo̱ chak chika̱tinanquil saꞌ be ut nak yo̱ chixchꞌolobanquil chiku li naxye saꞌ li Santil Hu, chanqueb.

³³ Saꞌ ajcuiꞌ li ho̱nal aꞌan queꞌsukꞌi Jerusalén. Aran queꞌxtau li junlaju chi apóstol chꞌutchꞌu̱queb rochbeneb lix comon.

³⁴ Yo̱queb chixyebal: —Relic chi ya̱l nak xcuacli cuiꞌchic chi yoꞌyo li Ka̱cuaꞌ xban nak xcꞌutbesi rib chiru laj Simón, chanqueb.

³⁵ Tojoꞌnak li cuib chi cui̱nk queꞌxserakꞌi reheb li cꞌaꞌru quicꞌulman saꞌ be nak yo̱queb chi xic Emaús. Queꞌxye reheb chanru nak queꞌxnau ru li Jesús nak quixjachi li caxlan cua.

Li Jesús quixcꞌutbesi rib chiruheb lix tzolom

³⁶ Toj yo̱queb ajcuiꞌ xserakꞌinquil li cꞌaꞌru queꞌxcꞌul nak ac xaka̱mil li Jesús saꞌ xya̱nkeb ut quixye reheb: —¡Chicua̱nk taxak li tuktu̱quil usilal e̱riqꞌuin! chan reheb.

³⁷ Ut eb aꞌan sachso̱queb xchꞌo̱l queꞌcana ut teꞌxucuak. Saꞌ xchꞌo̱leb aꞌan nak ma̱re junak musikꞌej yo̱queb chirilbal.

³⁸ Ut li Jesús quixye reheb: —¿Cꞌaꞌut nak nequexxucuac? Ut, ¿cꞌaꞌut nak na-oc e̱cꞌaꞌux?

³⁹ La̱in li Jesús. Ilomak li cuok ut li cuukꞌ. Chꞌeꞌomakin re nak te̱qꞌue retal nak la̱in tzꞌakal. Junak musikꞌej, aꞌan ma̱cꞌaꞌ xbakel, chi moco cuan xtibel. Ilomak. La̱in cuan inbakel ut cuan intibel, chan reheb.

⁴⁰ Ut nak yo̱ chixyebal aꞌin, quixcꞌut li rok ut li rukꞌ chiruheb.

⁴¹ Cꞌajoꞌ nak quisahoꞌ saꞌ xchꞌo̱leb. Abanan toj sachso̱queb xchꞌo̱l. Incꞌaꞌ queꞌxnau ma ya̱l li yo̱queb chirilbal malaj ut incꞌaꞌ. Ut li Jesús quixye reheb: —¿Ma cuan caꞌchꞌinak tzacae̱mk e̱riqꞌuin? chan reheb.

⁴² Ut queꞌxqꞌue re jun jachal li pombil car ut caꞌchꞌin li xyaꞌal cab.

⁴³ Li Jesús quixcꞌul ut quixtzaca.

⁴⁴ Ut quixye reheb: —Li cꞌaꞌru xincꞌul, aꞌan ajcuiꞌ li quinserakꞌi chak e̱re nak toj cuanquin chak saꞌ e̱ya̱nk. Tento nak ta̱tzꞌaklok ru chixjunil li tzꞌi̱banbil chak retalil chicuix saꞌ lix chakꞌrab laj Moisés, joꞌ ajcuiꞌ saꞌ lix hu eb li profeta ut saꞌ ajcuiꞌ li Salmos, chan reheb.

⁴⁵ Ut quixqꞌueheb xnaꞌleb re nak teꞌxtau ru li tzꞌi̱banbil saꞌ li Santil Hu.

⁴⁶ Quixye reheb: —Joꞌcaꞌin tzꞌi̱banbil chak retalil saꞌ li Santil Hu chicuix la̱in: tento nak li Cristo tixcꞌul li raylal ut saꞌ rox li cutan ta̱cuacli̱k cuiꞌchic chi yoꞌyo saꞌ xya̱nkeb li camenak.

⁴⁷ Tzꞌi̱banbil ajcuiꞌ retalil nak ta̱julticama̱nk chiruheb chixjunileb li tenamit nak tento teꞌxyotꞌ xchꞌo̱leb ut teꞌxjal xcꞌaꞌuxeb re ta̱cuyma̱nk ta̱sachma̱nk lix ma̱queb saꞌ xcꞌabaꞌ aꞌan. Ta̱ticla̱k xchꞌolobanquil arin Jerusalén.

⁴⁸ La̱ex texyehok resil xban nak la̱ex xex-abin re ut la̱ex xex-iloc re chixjunil li cꞌaꞌak re ru aꞌin.

⁴⁹ Ut la̱in tintakla chak e̱re le̱ ma̱tan li quixyechiꞌi lin Yucuaꞌ. Abanan cana̱kex arin saꞌ li tenamit Jerusalén toj te̱cꞌul le̱ cuanquil li ta̱cha̱lk saꞌ choxa, chan li Jesús reheb.

Li Jesucristo quicꞌameꞌ cuiꞌchic saꞌ choxa xban li Dios

⁵⁰ Ut li Jesús quixcꞌameb toj saꞌ li tenamit Betania. Quixtaksi li rukꞌ ut quirosobtesiheb.

⁵¹ Nak yo̱ chirosobtesinquileb, quirisi rib saꞌ xya̱nkeb ut quicꞌameꞌ takecꞌ saꞌ choxa.

⁵² Nak ac xeꞌxlokꞌoni li Ka̱cuaꞌ, eb aꞌan queꞌsukꞌi cuiꞌchic Jerusalén chi cꞌajoꞌ xsahil saꞌ xchꞌo̱leb.

⁵³ Ut junelic cuanqueb saꞌ li templo. Yo̱queb chi bantioxi̱nc ut yo̱queb chixlokꞌoninquil li Dios. Joꞌcan taxak.