San Lucas 22 - Li Santil hu

Laj Judas Iscariote quixye reheb nak tixkꞌaxtesi li Jesús saꞌ rukꞌeb laj judío

¹ Yo̱ chi cuulac xcutanquil li ninkꞌe nak nequeꞌxcuaꞌ li caxlan cua ma̱cꞌaꞌ xchꞌamal. Pascua nayeman re li ninkꞌe aꞌan.

² Eb lix be̱nil aj tij ut eb laj tzꞌi̱b yo̱queb chixsicꞌbal chanru nak ta̱ru̱k teꞌxcamsi li Jesús. Abanan yo̱queb xcꞌaꞌux xban nak incꞌaꞌ queꞌraj xchikꞌbal xjoskꞌileb li tenamit.

³ Laj Judas Iscariote jun reheb lix cablaju chi xtzolom li Jesús. Aꞌan quixqꞌue rib chi a̱le̱c xban laj tza.

⁴ Co̱ riqꞌuineb li xbe̱nil aj tij ut riqꞌuineb li nequeꞌcꞌacꞌalen re li templo chixyebal reheb nak tixkꞌaxtesi li Jesús saꞌ rukꞌeb.

⁵ Queꞌsahoꞌ xchꞌo̱leb chirabinquil li quixye ut queꞌxyechiꞌi xtumin.

⁶ Ut quixcꞌul xchꞌo̱l laj Judas li quiyeheꞌ re. Joꞌcan nak qui-oc xsicꞌbal jokꞌe ta̱ru̱k tixkꞌaxtesi li Jesús saꞌ rukꞌeb chi incꞌaꞌ teꞌxnau li qꞌuila tenamit.

Li Jesús quicuaꞌac rochbeneb lix tzolom re xnumsinquil li ninkꞌe Pascua

⁷ Quicuulac xkꞌehil li ninkꞌe Pascua nak nequeꞌxcuaꞌ li caxlan cua ma̱cꞌaꞌ xchꞌamal. Saꞌ li ninkꞌe aꞌan tento nak teꞌxcamsi junak li carner.

⁸ Li Jesús quixye reheb laj Pedro ut laj Juan: —Ayukex ut cauresihomak chak li tzacae̱mk re li pascua re totzaca̱nk, chan.

⁹ Queꞌxpatzꞌ re: —¿Bar ta̱cuaj takacauresi chak?—

¹⁰ Li Jesús quixye reheb: —Nak tex-oc saꞌ li tenamit, aran te̱tau jun li cui̱nk yo̱ chixcꞌambal jun cuc xhaꞌ. Te̱ta̱ke aꞌan toj saꞌ li cab bar tox-ocak cuiꞌ.

¹¹ Ut te̱ye re laj e̱chal cab, “Chan laj tzolonel, ¿bar cuan li naꞌajej li ta̱cuaꞌak cuiꞌ saꞌ li ninkꞌe Pascua rochbeneb lix tzolom?” chaꞌakex re.

¹² Ut aꞌan tixcꞌut che̱ru jun nimla naꞌajej takecꞌ saꞌ xcaꞌ tasalil li cab. Ac yi̱banbil li naꞌajej. Ut aran te̱cauresi li ninkꞌe chokꞌ ke, chan li Jesús.

¹³ Queꞌco̱eb saꞌ li tenamit ut qui-uxman joꞌ quixye li Jesús. Ut aran queꞌxcauresi li ninkꞌe Pascua.

¹⁴ Nak quicuulac x-o̱ril, li Jesús quicꞌojla saꞌ li me̱x rochbeneb lix tzolom.

¹⁵ Ut quixye reheb: —Cꞌajoꞌ nak yo̱quin chixrahinquil ru nak tocuaꞌak cuochbenex saꞌ li ninkꞌe aꞌin nak toj ma̱jiꞌ nincam.

¹⁶ Relic chi ya̱l ninye e̱re nak incꞌaꞌ chic tinba̱nu li ninkꞌe Pascua toj ta̱cuulak xkꞌehil nak tinba̱nu cuiꞌchic saꞌ lix nimajcual cuanquilal li Dios, chan.

¹⁷ Ut quixchap li secꞌ re ucꞌac. Quixbantioxi chiru li Dios ut quixye: —Cꞌulumak aꞌin ut jeqꞌuihomak saꞌ e̱ya̱nk li cuan chi saꞌ,

¹⁸ xban nak la̱in tinye e̱re nak chalen anakcuan incꞌaꞌ chic tincuucꞌ xyaꞌal li uva toj ta̱cuulak xkꞌehil nak tincuucꞌ cuiꞌchic saꞌ lix nimajcual cuanquilal li Dios, chan.

¹⁹ Ut quixchap li caxlan cua, quixbantioxi chiru li Dios, tojoꞌnak quixjachi ut quixqꞌue reheb lix tzolom ut quixye: —Aꞌan aꞌin lin tzꞌejcual, kꞌaxtesinbil re camsi̱c saꞌ e̱cꞌabaꞌ la̱ex. Cheba̱nuhak re xjulticanquil lin camic, chan.

²⁰ Joꞌcan ajcuiꞌ quixba̱nu nak ac xrakeꞌ chi cuaꞌac. Quixchap li secꞌ re ucꞌac ut quixye: —Aꞌan aꞌin retalil li acꞌ contrato li ta̱xakaba̱k xcuanquil riqꞌuin lin quiqꞌuel li ta̱hoyekꞌ nak tincamsi̱k saꞌ e̱cꞌabaꞌ la̱ex, chan.

²¹ Ut quixye ajcuiꞌ li Jesús: —Nacuaj nak te̱nau nak li cui̱nk li ta̱kꞌaxtesi̱nk cue yo̱ chi cuaꞌac saꞌ me̱x cuochben.

²² Tento nak tincamsi̱k la̱in li Cꞌajolbej. Abanan raylal cuan saꞌ xbe̱n li cui̱nk li ta̱kꞌaxtesi̱nk cue, chan li Jesús.

²³ Ut eb aꞌan queꞌoc chixpatzꞌinquil chi ribileb rib ut queꞌxye: —¿Ani anchal li ta̱kꞌaxtesi̱nk re? chanqueb.

Queꞌxcuechꞌi rix ani kꞌaxal nim xcuanquil

²⁴ Eb lix tzolom li Jesús queꞌoc chixcuechꞌinquil rix chi ribileb rib ani tana saꞌ xya̱nkeb nimak xcuanquil.

²⁵ Li Jesús quixye reheb: —Eb li rey li cuanqueb saꞌ ruchichꞌochꞌ cuanqueb xcuanquil saꞌ xbe̱neb li tenamit. Eb aꞌan nequeꞌraj nak cha̱bil ta̱yehekꞌ chirixeb.

²⁶ Abanan la̱ex incꞌaꞌ te̱ba̱nu chi joꞌcan. Li ani naraj xcuanquil saꞌ e̱ya̱nk, tento nak tixcubsi rib ut ta̱cꞌanjelak che̱ru. Li ani ta̱raj cꞌamoc be saꞌ e̱ya̱nk, tento nak tixcubsi rib ut ta̱cꞌanjelak che̱ru.

²⁷ ¿Ani li kꞌaxal nim xcuanquil nak nequecꞌoxla la̱ex? ¿Ma li nacꞌojla saꞌ me̱x, malaj ut li nacꞌanjelac chiru? ¿Ma ma̱cuaꞌ ta biꞌ li ani nacꞌojla saꞌ me̱x? La̱in cuan incuanquil, aban cuanquin saꞌ e̱ya̱nk joꞌ jun aj cꞌanjel che̱ru.

²⁸ La̱ex xecuy cuochbeninquil saꞌ li ra xi̱cꞌ xincꞌul.

²⁹ Joꞌcan nak tinqꞌue e̱cuanquil la̱ex joꞌ nak xqꞌue incuanquil la̱in lin Yucuaꞌ.

³⁰ La̱ex texcuaꞌak ut tex-ucꞌak saꞌ lin me̱x nak cua̱nkin saꞌ lin cuanquil. Ut la̱ex texcꞌojla̱k saꞌ le̱ cꞌojariba̱l ut texrakok a̱tin saꞌ xbe̱neb li cablaju xte̱paleb laj Israel, chan li Jesús.

Li Jesús quixye nak ta̱tzꞌekta̱na̱k xban laj Simón Pedro

³¹ Ut quixye li Ka̱cuaꞌ: —At Simón, laj tza ac xpatzꞌ xlese̱ns re nak tixyal rix le̱ pa̱ba̱l joꞌ nak nachikꞌeꞌ ru li trigo re risinquil li rix.

³² Abanan la̱in xintijoc cha̱cuix re nak incꞌaꞌ ta̱canab la̱ pa̱ba̱l. Ut nak tatsukꞌi̱k cuiꞌchic cuiqꞌuin, ta̱qꞌue xcacuilal xchꞌo̱leb la̱ cuech aj pa̱banelil, chan li Jesús.

³³ Ut laj Pedro quixye re: —At Ka̱cuaꞌ, la̱in cau inchꞌo̱l cha̱ta̱kenquil usta tineꞌxqꞌue saꞌ tzꞌalam malaj ut tineꞌxcamsi a̱cuochben, chan.

³⁴ Ut li Jesús quixye re: —At Pedro, la̱in ninye a̱cue, anakcuan ajcuiꞌ nak toj ma̱jiꞌ naya̱bac laj tzoꞌ xul, la̱at ac xaye oxib sut nak incꞌaꞌ nacanau cuu, chan.

³⁵ Ut quixye cuiꞌchic reheb lix tzolom: —Nak quexintakla chi ma̱cꞌaꞌ e̱bo̱ls, chi ma̱cꞌaꞌ xnaꞌaj e̱tumin, chi ma̱cꞌaꞌ e̱xa̱b, ¿ma cuan ta biꞌ cꞌaꞌru xpaltoꞌ e̱re? Ut eb aꞌan queꞌxye: —Ma̱cꞌaꞌ quipaltoꞌ ke.

³⁶ Quixye cuiꞌchic li Jesús reheb: —Ut anakcuan li ani cuan xbo̱ls, xcꞌamak chirix joꞌ ajcuiꞌ xnaꞌaj lix tumin. Ut li ani ma̱cꞌaꞌ xchꞌi̱chꞌ, tixcꞌayi lix chaque̱t ut xlokꞌak xchꞌi̱chꞌ chiru li tumin aꞌan.

³⁷ Relic chi ya̱l ninye e̱re nak tento ta̱tzꞌaklok ru li cꞌaꞌru tzꞌi̱banbil chicuix saꞌ li Santil Hu, li naxye chi joꞌcaꞌin: Quiqꞌueheꞌ saꞌ ajl saꞌ xya̱nkeb li incꞌaꞌ useb xnaꞌleb. Tento nak ta̱cꞌulma̱nk li cꞌaꞌru tzꞌi̱banbil retalil chicuix, chan.

³⁸ Eb aꞌan queꞌxye: —Ka̱cuaꞌ, cuan arin cuib li chꞌi̱chꞌ, chanqueb. Ut li Jesús quixye: —Tzꞌakal li xeye. Mex-a̱tinac chic.

Nak quitijoc chak li Jesús aran Getsemaní

³⁹ Li Jesús qui-el aran ut co̱ saꞌ li tzu̱l Olivos, joꞌ cꞌaynak xba̱nunquil. Ut eb lix tzolom queꞌxta̱ke.

⁴⁰ Nak quicuulac saꞌ li naꞌajej aꞌan, quixye reheb lix tzolom: —Chextijok re nak incꞌaꞌ te̱qꞌue e̱rib chi a̱le̱c, chan.

⁴¹ Ut li Jesús quirisi rib saꞌ xya̱nkeb joꞌ na xnajtil nacuteꞌ cuiꞌ junak pec. Ut aran quixcuikꞌib rib chi tijoc.

⁴² Quixye: —At inyucuaꞌ, cui la̱at ta̱cuaj, incꞌaꞌ raj tincꞌul li raylal aꞌin. Abanan chi-uxma̱nk li cꞌaꞌru nacacuaj la̱at ut ma̱cuaꞌ li nacuaj la̱in, chan.

⁴³ Ut quichal jun li ángel saꞌ choxa ut quixqꞌue xcacuil xchꞌo̱l.

⁴⁴ Nak yo̱ chi yotꞌecꞌ xchꞌo̱l, quitijoc cuiꞌchic li Jesús chi kꞌaxal anchal xchꞌo̱l ut lix tikob yo̱ chi tzꞌukuc saꞌ chꞌochꞌ chi ni̱nki tzꞌukul chanchan quicꞌ.

⁴⁵ Nak quirakeꞌ chi tijoc, quicuacli ut co̱ riqꞌuineb lix tzolom. Quiril nak yo̱queb chi cua̱rc xban nak kꞌaxal ra saꞌ xchꞌo̱leb.

⁴⁶ Ut li Jesús quixye reheb: —¿Cꞌaꞌut nak yo̱quex chi cua̱rc? Cuaclinkex ut tijonkex re nak incꞌaꞌ te̱qꞌue e̱rib chi a̱le̱c, chan reheb.

Li Jesús quichapeꞌ ut quicꞌameꞌ chi pre̱xil xbaneb laj cꞌamol be saꞌ xya̱nkeb laj judío

⁴⁷ Toj yo̱ ajcuiꞌ chi a̱tinac li Jesús nak queꞌcuulac li qꞌuila tenamit. Laj Judas, aꞌan yo̱ chi cꞌamoc be chiruheb. Aꞌan jun reheb lix tzolom cablaju. Quijiloc chixcꞌatk li Jesús re nak ta̱rutzꞌ ru.

⁴⁸ Ut li Jesús quixye re: —At Judas, ¿ma ta̱cuutzꞌ cuu re inkꞌaxtesinquil, la̱in li Cꞌajolbej? chan re.

⁴⁹ Ut li cuanqueb rochben queꞌril li cꞌaꞌru yo̱ chixba̱nunquil ut queꞌxpatzꞌ re: —Ka̱cuaꞌ, ¿ma takaqꞌueheb chi chꞌi̱chꞌ? chanqueb.

⁵⁰ Ut jun reheb quixyocꞌ lix xic lix mo̱s li xyucuaꞌil aj tij ut quirisi lix xic li cuan saꞌ xnim.

⁵¹ Li Jesús quixye: —Canabomak xba̱nunquil aꞌan, chan. Ut quixchꞌeꞌ riqꞌuin rukꞌ lix xic li cui̱nk ut quixqꞌuirtesi.

⁵² Ut quixye reheb li xbe̱nil aj tij, ut eb li nequeꞌtaklan saꞌ li templo, joꞌqueb ajcuiꞌ li nequeꞌcꞌamoc be, li queꞌchal chixchapbal: —¿Ma la̱in ta biꞌ aj e̱lkꞌ nak xexchal chinchapbal riqꞌuin cheꞌ ut riqꞌuin chꞌi̱chꞌ?

⁵³ Rajlal cutan cuanquin saꞌ e̱ya̱nk che̱tzolbal saꞌ li templo ut incꞌaꞌ quine̱chap aran. Abanan anakcuan xcuulac xkꞌehil nak te̱ba̱nu li cꞌaꞌru te̱raj la̱ex riqꞌuin xcuanquil laj tza, chan li Jesús.

Laj Pedro quixye oxib sut nak incꞌaꞌ naxnau ru li Jesús

⁵⁴ Queꞌxchap li Jesús ut queꞌxcꞌam saꞌ rochoch li xyucuaꞌil aj tij. Ut laj Pedro yo̱ chixta̱kenquil chi najt.

⁵⁵ Queꞌxtzꞌab jun li xam chiru neba̱l, ut quilajeꞌcꞌojla chire xam, ut quicꞌojla ajcuiꞌ laj Pedro saꞌ xya̱nkeb.

⁵⁶ Ut jun li mo̱s ixk quiril laj Pedro cꞌojcꞌo chire xam. Quixcaꞌya ut quixye: —Li cui̱nk aꞌin, aꞌan jun reheb li nequeꞌochbenin re li Jesús, chan.

⁵⁷ Abanan laj Pedro quiticꞌtiꞌic ut quixye: —At ixk, la̱in incꞌaꞌ ninnau ru ani li nacaye, chan.

⁵⁸ Junpa̱t na chic nak jun li cui̱nk qui-iloc re laj Pedro ut quixye: —La̱at jun xcomoneb aꞌan, chan re. Ut laj Pedro quixye: —At cui̱nk, ma̱cuaꞌ la̱in xcomoneb, chan.

⁵⁹ Ac xnumeꞌ na chic jun o̱r, nak jun chic li cui̱nk quixye: —Relic chi ya̱l nak li cui̱nk aꞌin, aꞌan jun reheb li queꞌochbenin re li Jesús. Li cui̱nk aꞌin aj Galilea, chan.

⁶⁰ Ut laj Pedro quixye: —At cui̱nk, incꞌaꞌ ninnau cꞌaꞌru yo̱cat chixyebal, chan. Ut toj yo̱ ajcuiꞌ chi a̱tinac laj Pedro nak quiya̱bac li tzoꞌ xul.

⁶¹ Ut li Ka̱cuaꞌ quixsukꞌisi rib ut quixcaꞌya laj Pedro. Ut quinak saꞌ xchꞌo̱l laj Pedro li quiyeheꞌ re xban li Ka̱cuaꞌ, “Toj ma̱jiꞌ ajcuiꞌ naya̱bac li tzoꞌ xul, nak la̱at ac xaye oxib sut nak incꞌaꞌ nacanau cuu.”

⁶² Laj Pedro qui-el chirix cab ut cꞌajoꞌ nak quiya̱bac xban xrahil xchꞌo̱l.

Li Jesús quihobeꞌ ut quisaqꞌueꞌ xbaneb li soldado aj Roma

⁶³ Eb li cui̱nk li yo̱queb chi cꞌacꞌale̱nc re li Jesús, queꞌxhob ut queꞌxsacꞌ.

⁶⁴ Queꞌxbacꞌ chi tꞌicr li xnakꞌ ru re nak incꞌaꞌ ta̱ilok, queꞌxsacꞌ ut queꞌxye: —Kꞌehi ani xsacꞌoc a̱cue, chanqueb re.

⁶⁵ Ut nabal chic cꞌaꞌak re ru queꞌxye re xhobbal li Jesús.

Li Jesús quicꞌameꞌ chiruheb li nequeꞌtaklan saꞌ xbe̱neb laj judío

⁶⁶ Nak quicutanoꞌ, queꞌxchꞌutub ribeb li nequeꞌcꞌamoc be saꞌ xya̱nkeb li tenamit ut eb li xbe̱nil aj tij joꞌ eb ajcuiꞌ laj tzꞌi̱b. Ut queꞌxcꞌam li Jesús riqꞌuineb li nequeꞌtaklan saꞌ xbe̱neb laj judío. Ut queꞌxye re:

⁶⁷ —Ye ke. ¿Ma la̱at li Cristo, laj Colonel li yechiꞌinbil xban li Dios? chanqueb. Ut li Jesús quixye reheb: —Cui tinye e̱re nak la̱in, incꞌaꞌ ajcuiꞌ raj te̱pa̱b, chan.

⁶⁸ Ut cui tinpatzꞌok e̱re, incꞌaꞌ aj raj cuiꞌ te̱sume li cꞌaꞌru tinpatzꞌ, chi moco tine̱rachꞌab.

⁶⁹ Ut chalen anakcuan la̱in li Cꞌajolbej tincꞌojla̱k saꞌ xnim ukꞌ li nimajcual Dios, chan.

⁷⁰ Ut chixjunileb queꞌxye re: —¿Ma la̱at li Ralal li Dios chi joꞌcanan? Ut li Jesús quichakꞌoc ut quixye: —Ya̱l li xeye nak la̱in, chan.

⁷¹ Ut chixjunileb queꞌxye: —¿Cꞌaꞌ chic ru aj e nak toj teꞌxye ke cꞌaꞌru xma̱c? Riqꞌuin kaxic xkabi li cꞌaꞌru xye, chanqueb.