San Lucas 17 - Li Santil hu

Li Jesús quixqꞌue xnaꞌlebeb lix tzolom

¹ Li Jesús quixye reheb lix tzolom: —Junelic cuan li poꞌoc chꞌo̱l. Abanan raylal cha̱lel saꞌ xbe̱n li ani tixpoꞌ xchꞌo̱l li ras ri̱tzꞌin.

² Kꞌaxal raj us chokꞌ re aꞌan nak ta̱cutekꞌ saꞌ xchamal li palau chi bacꞌbo junak nimla pec chi xcux chiru nak tixpoꞌ xchꞌo̱l junak li toj kꞌun xchꞌo̱l saꞌ lix pa̱ba̱l.

³ Cheqꞌuehak retal chanru le̱ naꞌleb. Cui ta̱ma̱cobk cha̱cuu la̱ cuas a̱cui̱tzꞌin, chakꞌusak. Ut cui ta̱yotꞌekꞌ xchꞌo̱l ut tixjal xcꞌaꞌux, chacuyak xma̱c.

⁴ Usta ta̱ma̱cobk cha̱cuu cuukubak sut chiru li jun cutan ut cuukub sut tixpatzꞌ xcuybal cha̱cuu ut tixye nak incꞌaꞌ chic tixba̱nu, tento nak ta̱cuy xma̱c, chan li Jesús.

⁵ Eb li apóstol queꞌxye re li Ka̱cuaꞌ: —At Ka̱cuaꞌ, choa̱tenkꞌa taxak re nak cua̱nk kapa̱ba̱l chi tzꞌakal, chanqueb.

⁶ Ut li Ka̱cuaꞌ quixye reheb: —Usta caꞌchꞌin ajcuiꞌ le̱ pa̱ba̱l cuan joꞌ li riyajil li mostaza, ta̱ru̱k raj te̱ye re li cheꞌ aꞌin, “Michꞌ a̱cuib ut au a̱cuib saꞌ li palau” ut li cheꞌ tixba̱nu raj joꞌ te̱ye re, chan.

⁷ Kayehak nak junak e̱re cuan xmo̱s yo̱k chak chi cꞌalec malaj ut chi iloc queto̱mk. Nak acak xchoy lix cꞌanjel lix mo̱s, ta̱sukꞌi̱k saꞌ cab. ¿Ma ta̱yehekꞌ ta biꞌ re xban lix patrón, “Ocan, cꞌojlan ut cuaꞌin”?

⁸ Incꞌaꞌ. Ta̱yehekꞌ ban re: “Chacꞌu̱b cuan intzacae̱mk ut chatcꞌanjelak chicuu. Nak acak xinrakeꞌ chi cuaꞌac, naru tatcuaꞌak la̱at.”

⁹ ¿Ma tixbantioxi re lix mo̱s nak quixba̱nu li quitakla̱c xba̱nunquil? La̱in ninye nak incꞌaꞌ.

¹⁰ Joꞌcan ajcuiꞌ la̱ex. Nak ac xeba̱nu li xextakla̱c cuiꞌ, cheyehak: “La̱o aj cꞌanjel cha̱cuu. Caꞌaj cuiꞌ li joꞌ qꞌuial xoa̱takla cuiꞌ xkaba̱nu. Joꞌcan nak ma̱bantioxi chiku”, chaꞌakex, chan li Jesús reheb.

Li Jesús quixqꞌuirtesiheb li laje̱b chi cui̱nk saklepeb rix ut jun ajcuiꞌ quibantioxin chiru

¹¹ Nak yo̱ chi xic Jerusalén, li Jesús quinumeꞌ saꞌ li naꞌajej li nequeꞌxcꞌul cuiꞌ rib li tenamit Samaria ut Galilea.

¹² Nak yo̱ chi cuulac saꞌ jun li cꞌaleba̱l, queꞌchal chixcꞌulbal laje̱b li cui̱nk saklep rixeb. Eb aꞌan najt queꞌxakli riqꞌuin li Jesús.

¹³ Ut queꞌxjap reheb chixyebal: —At Jesús, at aj tzolonel, chacuuxta̱na taxak ku, chanqueb.

¹⁴ Nak quirileb li Jesús quixye reheb: —Ayukex riqꞌuineb laj tij ut cꞌutumak chak e̱rib chiruheb, chan reheb. Ut nak yo̱queb chi xic, queꞌqꞌuira.

¹⁵ Jun reheb li cui̱nk quiril nak quiqꞌuira, quisukꞌi riqꞌuin li Jesús ut yo̱ chixlokꞌoninquil li Dios chi cau xya̱b xcux.

¹⁶ Quixcuikꞌib rib chiru li Jesús ut quixbantioxi chiru. Li cui̱nk aꞌan aj Samaria.

¹⁷ Quixye li Jesús: —¿Ma ma̱cuaꞌ ta biꞌ laje̱b chi cui̱nk li xinqꞌuirtesi? ¿Bar cuanqueb li bele̱b chic?

¹⁸ ¿Ma caꞌaj cuiꞌ li jun aꞌin li ma̱cuaꞌ aj judío xsukꞌi chixlokꞌoninquil li Dios? chan.

¹⁹ Tojoꞌnak quixye re li cui̱nk: —Xaklin ut tatxic. Xatqꞌuira xban nak xatpa̱ban, chan.

Li Jesús quixye nak lix nimajcual cuanquilal li Dios ac cuan riqꞌuineb

²⁰ Eb laj fariseo queꞌxpatzꞌ re li Jesús jokꞌe ta̱cha̱lk lix nimajcual cuanquilal li Dios. Li Jesús quichakꞌoc ut quixye reheb: —Lix cuanquilal li Dios moco cua̱nk ta retalil lix cꞌulunic re nak te̱nau jokꞌe xkꞌehil.

²¹ Chi moco teꞌxye, “cuan arin” chi moco teꞌxye, “leꞌ cuan”, xban nak lix cuanquilal li Dios ac cuan saꞌ e̱ya̱nk la̱ex, chan.

Li Jesús quixye chanru nak ta̱cꞌulu̱nk cuiꞌchic

²² Ut li Jesús quixye reheb lix tzolom: —Ta̱cuulak xkꞌehil nak la̱ex te̱ra ru rilbal lin cꞌulunic la̱in li Cꞌajolbej, abanan incꞌaꞌ te̱ril cuu.

²³ Ut teꞌxye e̱re, “cueꞌ arin” malaj ut “cuan toj leꞌ”. Abanan mexxic chirilbal chi moco te̱ta̱keheb.

²⁴ Saꞌ xkꞌehil lin cꞌulunic la̱in li Cꞌajolbej chanchanakin li rakꞌ ca̱k nak narepoc chak ut naxcutanobresi chixjunil ru li choxa. La̱in moco chi mukmu ta tincꞌulu̱nk.

²⁵ Abanan tento nak la̱in li Cꞌajolbej tinrahobtesi̱k ut tintzꞌekta̱na̱k xbaneb li cuanqueb saꞌ ruchichꞌochꞌ saꞌ eb li cutan aꞌin.

²⁶ Joꞌ quicꞌulman saꞌ eb li cutan nak toj cua̱nk laj Noé saꞌ ruchichꞌochꞌ, joꞌcan ajcuiꞌ ta̱cꞌulma̱nk nak ta̱cuulak xkꞌehil lin cꞌulunic la̱in li Cꞌajolbej.

²⁷ Saꞌ eb li cutan aꞌan li tenamit yo̱queb chi cuaꞌac ut yo̱queb chi ucꞌac. Yo̱queb chi sumla̱c ut yo̱queb chi sumuba̱nc toj quicuulac xkꞌehil nak laj Noé qui-oc saꞌ li jucub cab. Nak ma̱cꞌaꞌ saꞌ xchꞌo̱leb quichal li butꞌi haꞌ ut quilajxsacheb chixjunileb li incꞌaꞌ queꞌoc saꞌ li jucub cab.

²⁸ Ta̱cꞌulma̱nk joꞌ quicꞌulman saꞌ eb li cutan nak laj Lot toj cua̱nk saꞌ ruchichꞌochꞌ. Chixjunileb yo̱queb chi tzaca̱nc ut yo̱queb chi ucꞌac. Yo̱queb chi lokꞌoc ut yo̱queb chi cꞌayi̱nc. Yo̱queb chi a̱uc ut yo̱queb chi cablac.

²⁹ Abanan saꞌ li cutan nak laj Lot qui-el saꞌ li tenamit Sodoma, nak ma̱cꞌaꞌ saꞌ xchꞌo̱leb, quichal chak saꞌ choxa xam ut azufre ut quilajxsacheb chixjunileb.

³⁰ Joꞌcan ajcuiꞌ ta̱cꞌulma̱nk nak tincꞌulu̱nk cuiꞌchic la̱in li Cꞌajolbej. Ma̱cꞌaꞌak saꞌ xchꞌo̱leb li tenamit.

³¹ Saꞌ li cutan nak tincꞌulu̱nk, li ani cua̱nk chak saꞌ xbe̱n li rochoch ut li cꞌaꞌru re cua̱nk saꞌ li cab, micube chak chixxocbal. Joꞌcan ajcuiꞌ li cua̱nk chak saꞌ cꞌaleba̱l, incꞌaꞌ ta̱sukꞌi̱k saꞌ li rochoch.

³² Chijulticokꞌ e̱re li cꞌaꞌru quixcꞌul li rixakil laj Lot nak quiraj raj sukꞌi̱c.

³³ Li ani ta̱raj xcolbal rix lix yuꞌam arin saꞌ ruchichꞌochꞌ, ta̱sachk chiru. Ut li ani ta̱sachk lix yuꞌam chiru, aꞌan ta̱cua̱nk xyuꞌam chi junelic.

³⁴ Ut tinye ajcuiꞌ e̱re: Saꞌ li ho̱nal aꞌan nak tincꞌulu̱nk, cua̱nkeb cuib yo̱keb chi cua̱rc saꞌ jun chi cuarib. Jun aj pa̱banel ut jun ma̱cuaꞌ. Laj pa̱banel ta̱cꞌamekꞌ xban li Dios ut li jun chic li ma̱cuaꞌ aj pa̱banel, aꞌan ta̱canaba̱k.

³⁵ Ut cuib li ixk yo̱keb chi queꞌec saꞌ jun li queꞌleb, jun aj pa̱banel ut li jun chic ma̱cuaꞌ aj pa̱banel. Ut laj pa̱banel ta̱cꞌamekꞌ xban li Dios ut li jun chic li ma̱cuaꞌ aj pa̱banel, aꞌan ta̱canaba̱k.

³⁶ Cua̱nkeb cuib chi cui̱nk saꞌ li cꞌaleba̱l, jun aj pa̱banel ut li jun chic ma̱cuaꞌ aj pa̱banel. Laj pa̱banel ta̱cꞌamekꞌ xban li Dios ut li jun chic, li ma̱cuaꞌ aj pa̱banel, ta̱canaba̱k, chan li Jesús.

³⁷ Eb lix tzolom queꞌxpatzꞌ re: —¿Bar ta̱cꞌulma̱nk li yo̱cat chixyebal? chanqueb. Ut li Jesús quixye reheb: —La̱ex nequenau nak bar cuan cuiꞌ junak li camenak, aran ajcuiꞌ teꞌchꞌutla̱k eb li soꞌsol, chan.