San Lucas 13 - Li Santil hu

Li Jesús quixkꞌuseb li nequeꞌxcꞌoxla nak nakacꞌul li raylal xban nak cuan li kama̱c

¹ Saꞌ li ho̱nal aꞌan queꞌcuulac cuib oxibeb li cui̱nk riqꞌuin li Jesús ut queꞌxye re chanru nak laj Pilato quixtakla xcamsinquileb li cui̱nk aj Galilea nak yo̱queb chi mayejac saꞌ li templo.

² Ut li Jesús quixye reheb: —¿Ma nequecꞌoxla la̱ex nak eb li cui̱nk aꞌan kꞌaxal cuiꞌchic aj ma̱queb chiruheb li rech tenamitil? ¿Ma xban aꞌan nak queꞌxcꞌul a raylal aꞌan nak nequeye la̱ex? chan reheb.

³ —Tinye e̱re nak incꞌaꞌ. Cui la̱ex incꞌaꞌ te̱yotꞌ e̱chꞌo̱l ut te̱jal e̱cꞌaꞌux, tex-osokꞌ ajcuiꞌ la̱ex che̱junilex.

⁴ ¿Cꞌaꞌru nequecꞌoxla chirixeb li cuakxaklaju chi cui̱nk li queꞌcam nak li torre li cuan Siloé quitꞌaneꞌ saꞌ xbe̱neb? ¿Ma xban nak numtajenak lix ma̱queb aꞌan chiruheb chixjunileb li cuanqueb Jerusalén nak queꞌxcꞌul chi joꞌcan?

⁵ La̱in ninye e̱re nak incꞌaꞌ. Ut cui la̱ex incꞌaꞌ te̱yotꞌ e̱chꞌo̱l ut te̱jal e̱cꞌaꞌux, tex-osokꞌ ajcuiꞌ la̱ex, chan li Jesús.

Li jun to̱n chi higo li incꞌaꞌ nau̱chin

⁶ Quixye ajcuiꞌ li jaljo̱quil ru a̱tin aꞌin reheb: —Jun li cui̱nk cuan jun to̱n xhigo aubil saꞌ lix chꞌochꞌ. Ut quichal chixsicꞌbal li ru, abanan ma̱cꞌaꞌ quixtau.

⁷ Quixye re li cui̱nk li na-iloc re li acui̱mk: “Oxib chihab cuoquic chiroybeninquil ma ta̱u̱chi̱nk li cheꞌ aꞌin, ut incꞌaꞌ nau̱chin. Yocꞌ li cheꞌ aꞌin. ¿Cꞌaꞌru aj e nak yo̱k chixlatzꞌanquil li chꞌochꞌ chi incꞌaꞌ nau̱chin?” chan.

⁸ Ut li cui̱nk li na-iloc re li acui̱mk quixye re: “Ka̱cuaꞌ, cana̱k cuan chic jun chihabak. Ut tinbec li chꞌochꞌ saꞌ xto̱n ut tinqꞌue xkꞌemal li chꞌochꞌ.

⁹ Ut cui ta̱u̱chi̱nk, us; ut cui incꞌaꞌ, ta̱yocꞌ mokon,” chan.—

Quicuechꞌi̱c rix li Jesús xban nak naqꞌuirtesin saꞌ li hiloba̱l cutan

¹⁰ Saꞌ jun li hiloba̱l cutan, li Jesús yo̱ chixcꞌutbal lix ya̱lal chiruheb saꞌ li cab li nequeꞌxchꞌutub cuiꞌ ribeb laj judío.

¹¹ Ut aran cuan jun li ixk cuan ma̱us aj musikꞌej riqꞌuin. Cuakxaklaju chihab roquic lix yajel. Cꞌutzcꞌu rix li ixk nak nabe̱c ut incꞌaꞌ naru naxakli chi ti̱c.

¹² Nak quiril li ixk li Jesús quixbok riqꞌuin ut quixye re: —At ixk, anakcuan qꞌuirtesinbilat chic.—

¹³ Ut quixqꞌue li rukꞌ saꞌ xbe̱n li ixk. Ut saꞌ ajcuiꞌ li ho̱nal aꞌan li ixk quixakli chi ti̱c ut qui-oc chixlokꞌoninquil li Dios.

¹⁴ Cꞌajoꞌ nak quijoskꞌoꞌ li nataklan saꞌ li cab li nequeꞌxchꞌutub cuiꞌ ribeb laj judío xban nak li Jesús quixqꞌuirtesi li ixk saꞌ li hiloba̱l cutan. Ut quixye reheb li cuanqueb aran: —Cuakib cutan cuan re nak naru texcꞌanjelak. Chiruheb a cutan aꞌan naru nequexchal chi banecꞌ ut incꞌaꞌ texcha̱lk chi banecꞌ saꞌ li hiloba̱l cutan, chan.

¹⁵ Ut li Ka̱cuaꞌ quichakꞌoc ut quixye re: —¡Ex aj caꞌ pacꞌal u! ¿Ma incꞌaꞌ ta biꞌ te̱hit e̱bo̱yx malaj ut e̱bu̱r saꞌ li hiloba̱l cutan re nak te̱cꞌameb chi ucꞌac?

¹⁶ Li ixk aꞌin, aꞌan xcomoneb li ralal xcꞌajol laj Abraham. Ac cuan cuakxaklaju chihab roquic laj tza xchꞌiꞌchꞌiꞌinquil. Cui la̱ex nequehit le̱ bo̱yx saꞌ li hiloba̱l cutan, ¿ma incꞌaꞌ ta biꞌ ta̱ru̱k tinqꞌuirtesi li ixk aꞌin saꞌ li hiloba̱l cutan? chan.

¹⁷ Ut riqꞌuin li cꞌaꞌru quixye li Jesús, quixcꞌut xxuta̱neb chixjunileb li yo̱queb chixcuechꞌinquil rix. Abanan li qꞌuila tenamit queꞌsahoꞌ xchꞌo̱l xbaneb li milagro li yo̱ chixba̱nunquil li Jesús.

Quijuntakꞌe̱ta̱c lix nimajcual cuanquilal li Dios riqꞌuin li riyajil li mostaza

¹⁸ —¿Cꞌaꞌru ta̱ru̱k tinjuntakꞌe̱ta cuiꞌ lix nimajcual cuanquilal li Dios? chan li Jesús. —Ut, ¿cꞌaꞌru chi jaljo̱quil ru a̱tin tinye re xchꞌolobanquil xya̱lal lix nimajcual cuanquilal li Dios?

¹⁹ Lix nimajcual cuanquilal li Dios, aꞌan chanchan riyajil li mostaza, li quixcꞌam jun li cui̱nk ut quirau saꞌ lix chꞌochꞌ. Ut quimok ut quiniman chi us. Nimla cheꞌ quicuulac. Ut laj xicꞌanel xul nequeꞌxyi̱b xsoqueb saꞌ eb li rukꞌ.—

²⁰ Ut quixye cuiꞌchic: —¿Cꞌaꞌru ta̱ru̱k tinjuntakꞌe̱ta cuiꞌ lix nimajcual cuanquilal li Dios?

²¹ Lix nimajcual cuanquilal li Dios, aꞌan chanchan li na-oc chokꞌ xchꞌamal li caxlan cua. Li ixk quixqꞌue caꞌchꞌin saꞌ oxib bisoc li cꞌaj ut quisipoꞌ chixjunil li kꞌem xban.—

Moco chixjunileb ta teꞌoc saꞌ lix nimajcual cuanquilal li Dios, usta nequeꞌxye nak aj pa̱baneleb

²² Li Jesús quinumeꞌ saꞌ eb li tenamit ut saꞌ eb li cꞌaleba̱l nak yo̱ chi xic Jerusalén ut yo̱ chixchꞌolobanquil lix ya̱lal chiruheb li tenamit.

²³ Jun reheb li cuanqueb aran quixye re: —At Ka̱cuaꞌ, ¿ma ya̱l nak incꞌaꞌ qꞌuiheb li teꞌcolekꞌ? chan re.

²⁴ Li Jesús quichakꞌoc ut quixye: —Joꞌcan nak qꞌuehomak e̱chꞌo̱l chi oc saꞌ li oqueba̱l li caꞌchꞌin ru. Nabaleb raj li teꞌraj oc, abanan incꞌaꞌ teꞌru̱k chi oc.

²⁵ Nak acak xtzꞌap li oqueba̱l laj e̱chal re li cab, la̱ex texcana̱k chirix cab ut te̱tochꞌ raj chic li puerta ut te̱ye, “Ka̱cuaꞌ, Ka̱cuaꞌ, te li puerta chiku”, chaꞌkex. Abanan aꞌan ta̱chakꞌok ut tixye e̱re, “Incꞌaꞌ ninnau e̱ru bar xexchal chak”, chaꞌak.

²⁶ Ut la̱ex te̱ye cuiꞌchic re, “¿Cꞌaꞌut nak incꞌaꞌ ta̱nau ku? La̱o xocuaꞌac xo-ucꞌac kochbenat. Ut la̱at xatcꞌutuc lix ya̱lal chiku saꞌ li katenamit”, chaꞌkex.

²⁷ Ut laj e̱chal cab tixye cuiꞌchic e̱re, “Ninye e̱re nak incꞌaꞌ ninnau bar xexchal chak. Elenkex chicuu, la̱ex aj ba̱nuhom ma̱usilal”, chaꞌak.

²⁸ Nak te̱ril laj Abraham, laj Isaac, laj Jacob ut chixjunileb li profeta cua̱nkeb saꞌ lix nimajcual cuanquilal li Dios, ut la̱ex incꞌaꞌ tex-ocsi̱k, toj aran texya̱bak ut te̱cꞌuxuxi li ruch e̱re xban xrahil e̱chꞌo̱l.

²⁹ Nabaleb li telajeꞌcha̱lk chak yalak bar jun sut rubel choxa, ut teꞌcꞌojla̱k chi cuaꞌac saꞌ lix nimajcual cuanquilal li Dios.

³⁰ Cuanqueb li incꞌaꞌ qꞌuebileb xlokꞌal arin saꞌ ruchichꞌochꞌ teꞌqꞌuehekꞌ xlokꞌal riqꞌuin li Dios. Ut cuanqueb ajcuiꞌ li qꞌuebileb xlokꞌal arin saꞌ ruchichꞌochꞌ. Eb aꞌan incꞌaꞌ teꞌxcꞌul xlokꞌal riqꞌuin li Dios, chan li Jesús.

Laj Herodes ta̱raj xcamsinquil li Jesús

³¹ Ut saꞌ ajcuiꞌ li ho̱nal aꞌan cuanqueb aj fariseo queꞌcuulac riqꞌuin li Jesús chixyebal re: —Elen arin. Ayu xban nak laj Herodes ta̱raj a̱camsinquil, chanqueb.

³² Li Jesús quixye reheb: —Ayukex ut yehomak re laj Herodes li chanchan yac nak anakcuan ut cuulaj la̱in yo̱kin chi isi̱nc ma̱us aj musikꞌej ut yo̱kin chi qꞌuirtesi̱nc. Ut saꞌ rox li cutan tinchoy lin cꞌanjel.

³³ Abanan tento nak yo̱kin chi xic anakcuan, cuulaj, ut caꞌbej. Tento tincuulak Jerusalén re nak tincamsi̱k aran xban nak incꞌaꞌ naru ta̱camsi̱k junak profeta saꞌ jalan naꞌajej. Tento nak aran Jerusalén tincamsi̱k, chaꞌkex re.

Li Jesús quiyotꞌeꞌ xchꞌo̱l chirilbal li tenamit Jerusalén

³⁴ Ex aj Jerusalén, la̱ex nequecamsiheb li profeta ut nequecuti chi pec eb li nequeꞌtakla̱c e̱riqꞌuin xban li Dios. Nabal sut raj xcuaj e̱colbal joꞌ nak naxchꞌutubeb li ral li caxlan rubel lix xicꞌ. Abanan la̱ex incꞌaꞌ xeraj.

³⁵ Ut anakcuan le̱ tenamit ta̱cana̱k chi naqꞌuirnac aj chic ru. Tinye ut e̱re chalen anakcuan incꞌaꞌ chic te̱ril cuu toj nak te̱ye, “Osobtesinbil taxak li xchal saꞌ xcꞌabaꞌ li Ka̱cuaꞌ”, chan li Jesús.