San Lucas 10 - Li Santil hu

Li Jesús quixtaklaheb li laje̱b xca̱cꞌa̱l (70) chi cui̱nk chixchꞌolobanquil lix ya̱lal

¹ Ut chirix chic a cꞌaꞌak re ru aꞌin, li Ka̱cuaꞌ quixsiqꞌueb ru laje̱b xca̱cꞌa̱leb (70) chic chi cui̱nk ut quixtaklaheb chi caꞌcabil saꞌ eb li junju̱nk chi tenamit ut saꞌ eb li naꞌajej li bar talajeꞌnumekꞌ cuiꞌ.

² Ut quixye reheb, —Relic chi ya̱l nabaleb li incꞌaꞌ nequeꞌxnau xya̱lal. Abanan moco qꞌuiheb ta li teꞌxye lix ya̱lal reheb. Chanchaneb li ru li acui̱mk li ma̱cꞌaꞌ aj sicꞌol re. Joꞌcan ut tinye e̱re nak te̱tzꞌa̱ma chiru li Ka̱cuaꞌ re nak aꞌan tixtaklaheb laj cꞌanjel chixchꞌolobanquil lix ya̱lal chiruheb.

³ Ayukex biꞌ ut chenauhak nak la̱in yo̱quin chi takla̱nc e̱re saꞌ xya̱nkeb li xicꞌ nequeꞌiloc e̱re. Chanchanakex li cocꞌ carner saꞌ xya̱nkeb laj xoj.

⁴ Incꞌaꞌ te̱cꞌam xnaꞌaj li cꞌaꞌak re ru ta̱cꞌanjelak e̱re saꞌ be, chi moco e̱tumin, chi moco xjalbal e̱xa̱b. Ut ma̱ ani aj iqꞌuin texxakli̱k chi serakꞌic saꞌ be.

⁵ Nak texcuulak saꞌ junak cab, te̱qꞌue xsahileb xchꞌo̱l ut te̱ye, “Aꞌ taxak li tuktu̱quil usilal chicua̱nk saꞌ li cab aꞌin,” chaꞌkex.

⁶ Cui cha̱bileb li cuanqueb saꞌ li cab aꞌan, ta̱cua̱nk li tuktu̱quil usilal riqꞌuineb joꞌ xeye la̱ex. Cui ut incꞌaꞌ cha̱bileb, incꞌaꞌ ajcuiꞌ ta̱cua̱nk li tuktu̱quil usilal riqꞌuineb. Caꞌaj cuiꞌ e̱riqꞌuin ban la̱ex ta̱cana̱k.

⁷ Nak tex-oc saꞌ junak cab, aran texcana̱k. Incꞌaꞌ yo̱kex chixbeninquil e̱rib. Ut chetzacahak li cꞌaꞌru ta̱qꞌuehekꞌ e̱re xban nak laj cꞌanjel tento tixcꞌul lix tojbal.

⁸ Nak texcꞌulekꞌ saꞌ junak tenamit, checꞌulak ut chetzaca li cꞌaꞌru ta̱qꞌuehekꞌ e̱re.

⁹ Te̱qꞌuirtesiheb li yaj li cuanqueb saꞌ li tenamit aꞌan ut te̱ye ajcuiꞌ reheb nak yo̱ chak chi nachꞌoc lix nimajcual cuanquilal li Dios.

¹⁰ Abanan cui texcuulak saꞌ junak tenamit ut incꞌaꞌ texcꞌulekꞌ saꞌ xya̱lal, tex-e̱lk saꞌ be ut tex-oc xyebal,

¹¹ “Lix poksil le̱ tenamit li xletz chi kok takachikꞌchikꞌi chokꞌ retalil nak ta̱cha̱lk raylal saꞌ e̱be̱n. Julticak e̱re nak lix nimajcual cuanquilal li Dios xcꞌulun e̱riqꞌuin, abanan incꞌaꞌ xecꞌul”, chaꞌkex reheb.

¹² Relic chi ya̱l tinye e̱re nak toj cubenak caꞌchꞌin lix tojbal xma̱queb li tenamit Sodoma chiru lix tojbal xma̱queb li tenamit aꞌin saꞌ xkꞌehil li rakba a̱tin.—

Ra teꞌxcꞌul li tenamit cui incꞌaꞌ teꞌxxo̱to xma̱c

¹³ Li Jesús quixye: —Raylal cha̱lel saꞌ e̱be̱n la̱ex li cuanquex saꞌ li tenamit Corazín. Raylal cha̱lel saꞌ e̱be̱n la̱ex li cuanquex saꞌ li tenamit Betsaida. Cui ta quinba̱nu aran Tiro li milagro aꞌin li xinba̱nu che̱ru ut cui ta quinba̱nu aran Sidón, ac najter raj queꞌxqꞌue li kꞌes ru tꞌicr chirixeb ut queꞌxchunub raj rib saꞌ cha ut queꞌyotꞌeꞌ raj xchꞌo̱leb ut queꞌxjal raj xcꞌaꞌuxeb.

¹⁴ Joꞌcan ut tinye e̱re nak saꞌ xkꞌehil li rakba a̱tin, kꞌaxal cuiꞌchic li raylal li te̱cꞌul la̱ex chiru li raylal li teꞌxcꞌul eb laj Tiro ut eb laj Sidón.

¹⁵ Ut la̱ex li cuanquex saꞌ li tenamit Capernaum, cꞌajoꞌ nak nequenimobresi e̱rib. ¿Ma nequecꞌoxla nak ta̱taksi̱k e̱cuanquil toj saꞌ choxa? Ta̱cubsi̱k ban e̱cuanquil nak textakla̱k saꞌ xnaꞌajeb li camenak.

¹⁶ Li ani ta̱abi̱nk re le̱ ra̱tin la̱ex, ta̱rabi ajcuiꞌ li cua̱tin la̱in. Ut li ani ta̱tzꞌekta̱na̱nk e̱re la̱ex, tinixtzꞌekta̱na ajcuiꞌ la̱in. Ut li ani natzꞌekta̱nan cue la̱in, naxtzꞌekta̱na ajcuiꞌ li quitaklan chak cue, chan li Jesús.

Queꞌsukꞌi chak chixyebal resil li queꞌtakla̱c cuiꞌ li laje̱b xca̱cꞌa̱l (70) chi cui̱nk

¹⁷ Queꞌsukꞌi chak li laje̱b xca̱cꞌa̱l chi cui̱nk chi saheb saꞌ xchꞌo̱l ut queꞌxye re li Jesús: —At Ka̱cuaꞌ, saꞌ a̱cꞌabaꞌ la̱at nequeꞌpa̱ban chiku eb li ma̱us aj musikꞌej, chanqueb.

¹⁸ Li Jesús quixye reheb: —La̱in quicuil laj tza chanchan rakꞌ ca̱k nak quitꞌaneꞌ chak saꞌ choxa.

¹⁹ La̱in xinqꞌue e̱cuanquil. Usta te̱yekꞌ li cꞌantiꞌ ut laj xo̱cꞌ, ma̱cꞌaꞌ te̱cꞌul. Xinqꞌue e̱cuanquil saꞌ xbe̱n laj tza ut ma̱cꞌaꞌ ta̱ru̱k tixba̱nu e̱re.

²⁰ Misahoꞌ saꞌ e̱chꞌo̱l xban nak cuan e̱cuanquil saꞌ xbe̱neb li ma̱us aj musikꞌej. Chisahokꞌ ban e̱chꞌo̱l xban nak tzꞌi̱banbilak le̱ cꞌabaꞌ saꞌ choxa, chan.

²¹ Saꞌ li ho̱nal aꞌan li Jesús quirecꞌa xsahil xchꞌo̱l xban li Santil Musikꞌej. Quitijoc ut quixye: —At inYucuaꞌ, la̱at laj e̱chal re li choxa joꞌ ajcuiꞌ li ruchichꞌochꞌ. Ninbantioxi cha̱cuu xban nak xamuk lix ya̱lal chiruheb li tzolbileb ut li cuanqueb xnaꞌleb. Ut xacꞌut lix ya̱lal chiruheb li cubenakeb xcuanquil. Chanchaneb cocꞌal. Xaba̱nu chi joꞌcan xban nak joꞌcan xcuulac cha̱cuu la̱at, chan li Jesús nak quitijoc.

²² Ut quixye reheb li cuanqueb aran: —Chixjunil li cꞌaꞌak re ru xkꞌaxtesi saꞌ cuukꞌ lin Yucuaꞌ. Ma̱ ani nanaꞌoc cuu la̱in li Cꞌajolbej, caꞌaj cuiꞌ li Acuabej Dios. Ma̱ ani nanaꞌoc ru li Acuabej Dios, caꞌaj cuiꞌ la̱in li Cꞌajolbej. Ut ta̱naꞌekꞌ ajcuiꞌ ru xbaneb li ani tincꞌut cuiꞌ lix ya̱lal, chan li Jesús.

²³ Quixsukꞌisi rib riqꞌuineb lix tzolom ut quixye reheb xjuneseb: —Us xak e̱re la̱ex xban nak riqꞌuin xnakꞌ e̱ru yo̱quex chirilbal li cꞌaꞌru yo̱ chi cꞌulma̱nc.

²⁴ La̱in tinye e̱re nak nabaleb li profeta ut nabaleb li rey queꞌraj raj rilbal li cꞌaꞌru yo̱quex chirilbal la̱ex, abanan incꞌaꞌ queꞌru rilbal. Ut queꞌraj raj rabinquil li cꞌaꞌru yo̱quex chirabinquil la̱ex, abanan incꞌaꞌ queꞌru rabinquil, chan li Jesús reheb.

Takara li kas ki̱tzꞌin usta xicꞌ nocoeꞌril

²⁵ Jun aj tzolol chakꞌrab quixye re li Jesús yal re xyalbal rix: —At tzolonel: ¿Cꞌaꞌru us tinba̱nu re nak tincue̱chani li junelic yuꞌam? chan.

²⁶ Quichakꞌoc li Jesús ut quixye re: —La̱at nacacuil saꞌ li Santil Hu. ¿Cꞌaꞌru naxye saꞌ li chakꞌrab?—

²⁷ Ut aꞌan quichakꞌoc ut quixye: —Chara li Ka̱cuaꞌ la̱ Dios chi anchal a̱chꞌo̱l, chi anchal a̱cua̱m, chi anchal a̱metzꞌe̱u ut chi anchal a̱cꞌaꞌux. Ut chara la̱ cuas a̱cui̱tzꞌin joꞌ nak nacara a̱cuib la̱at, chan.

²⁸ Ut li Jesús quixye re: —Ya̱l li xaye. Ba̱nu aꞌin ut ta̱cua̱nk a̱yuꞌam chi junelic, chan.

²⁹ Aꞌan quiraj raj xti̱cobresinquil xchꞌo̱l xjunes rib. Quixye re li Jesús: —¿Ani tzꞌakal li cuas cui̱tzꞌin? chan.

³⁰ Li Jesús quichakꞌoc ut quixye re: —Cuan jun li cui̱nk aj judío qui-el Jerusalén ut yo̱ chi xic Jericó. Quicꞌuleꞌ xbaneb laj e̱lkꞌ. Queꞌxmakꞌ chiru chixjunil li cꞌaꞌru cuan re. Queꞌxtacuasi chi us ut co̱eb. Ca̱mc re li cui̱nk queꞌxcanab.

³¹ Ut saꞌ li be aꞌan quinumeꞌ jun laj tij. Quiril li cui̱nk tꞌantꞌo aran, aban ti̱c quinumeꞌ.

³² Ut joꞌcan ajcuiꞌ quixba̱nu jun laj levita xcomoneb li nequeꞌtenkꞌan reheb laj tij. Quinumeꞌ chixcꞌatk li cui̱nk li tꞌantꞌo aran, abanan quinumeꞌ chi ti̱c.

³³ Ut quinumeꞌ ajcuiꞌ jun chic li cui̱nk saꞌ li be aꞌan, Samaria xtenamit. Eb laj Samaria xicꞌ nequeꞌril rib riqꞌuineb laj judío. Abanan nak yo̱ chi numecꞌ quiril li cui̱nk tꞌantꞌo aran ut quiril xtokꞌoba̱l ru.

³⁴ Quicuulac riqꞌuin. Quixban lix yocꞌolal riqꞌuin vino ut aceite. Quixbati ru lix tochꞌolal. Quixqꞌue chirix lix cacua̱y ut quixcꞌam saꞌ jun li cab ut aran quixqꞌue chi hila̱nc ut aꞌan qui-iloc re.

³⁵ Joꞌ cuulajak chic nak ac xic re li cui̱nk aj Samaria, quixqꞌue cuib li tumin plata re laj e̱chal cab ut quixye re: “Chacuil chi us li cui̱nk aꞌin. Ut chixjunil li joꞌ qꞌuial chic ta̱sach, la̱in tintoj a̱cue saꞌ insukꞌijic,” chan.

³⁶ ¿Cꞌaꞌru nacacꞌoxla la̱at? ¿Bar cuan reheb li oxib li queꞌnumeꞌ li tzꞌakal ras ri̱tzꞌin li quitꞌaneꞌ saꞌ rukꞌeb laj e̱lkꞌ? chan.

³⁷ Laj tzolol chakꞌrab quichakꞌoc ut quixye: —Aꞌ li qui-uxta̱nan ru, chan. Ut li Jesús quixye re: —Ayu ut joꞌcan ajcuiꞌ chaba̱nu la̱at, chan.

Li Jesús quixye nak us quixba̱nu lix María xban nak quirabi li ra̱tin

³⁸ Ut nak yo̱queb chi xic li Jesús, queꞌcuulac saꞌ jun chꞌina tenamit. Aran quihilan li Jesús saꞌ rochoch jun li ixk xMarta xcꞌabaꞌ.

³⁹ Lix Marta cuan jun li ri̱tzꞌin xMaría xcꞌabaꞌ. Lix María quixchunub rib chiru li Jesús chirabinquil li cꞌaꞌru yo̱ chixyebal.

⁴⁰ Abanan lix Marta caꞌaj cuiꞌ lix qꞌuila cꞌanjel yo̱ xcꞌaꞌux chirix. Quichal riqꞌuin li Jesús ut quixye re: —Ka̱cuaꞌ, ¿ma incꞌaꞌ chꞌaꞌaj nacacuecꞌa nak li cui̱tzꞌin niquinixcanab chi cꞌanjelac injunes? Ye re nak tinixtenkꞌa, chan.

⁴¹ Li Jesús quichakꞌoc ut quixye re: —Marta, la̱at naxic a̱cꞌaꞌux chirix la̱ qꞌuila cꞌanjel xban nak caꞌaj cuiꞌ aꞌan nacacꞌoxla.

⁴² Abanan jun ajcuiꞌ li cꞌaꞌru tento xba̱nunquil ut lix María xsicꞌ ru aꞌan. Li kꞌaxal us xba̱nunquil, aꞌan rabinquil li cꞌaꞌru ninye. Ut ma̱ ani ta̱ramok re chiru xba̱nunquil, chan li Jesús.