Levítico 9 - Li Santil hu

Lix ticlajic xcꞌanjeleb laj tij chiru li Dios

¹ Saꞌ lix cuakxak li cutan laj Moisés quixbok laj Aarón ut eb li ralal ut quixbokeb ajcuiꞌ li nequeꞌcꞌamoc be saꞌ xya̱nkeb laj Israel.

² Quixye re laj Aarón: —Chap jun li toro toj sa̱j ut ta̱mayeja re xtzꞌa̱manquil xcuybal le̱ ma̱c. Ut ta̱chap jun li te̱lom carner ut ta̱cꞌat re le̱ mayej. Tzꞌakalakeb re ru li ta̱qꞌue.

³ Ta̱ye reheb laj Israel nak teꞌxqꞌue jun li te̱lom chiba̱t re xtzꞌa̱manquil xcuybal lix ma̱queb. Teꞌxqꞌue ajcuiꞌ jun li toro ut jun li carner re teꞌxcꞌat chokꞌ xmayej. Jun chihab cua̱nk reheb ut tzꞌakalakeb re ru.

⁴ Teꞌxqꞌue ajcuiꞌ jun li cuacax ut jun li te̱lom carner re teꞌxmayeja re xcꞌambal ribeb saꞌ usilal riqꞌuin li Ka̱cuaꞌ. Teꞌxmayeja chiru li Ka̱cuaꞌ rochben li cꞌaj junajinbil riqꞌuin aceite. Teꞌxba̱nu chi joꞌcan xban nak chiru li cutan aꞌin tixcꞌutbesi rib li Ka̱cuaꞌ chiruheb, chan.

⁵ Ut queꞌxcꞌam li mayej chiru li oqueba̱l re li tabernáculo joꞌ quiyeheꞌ reheb xban laj Moisés. Ut chixjunileb laj Israel queꞌcuulac aran ut queꞌxakli chiru li Ka̱cuaꞌ.

⁶ Ut laj Moisés quixye reheb: —Aꞌan aꞌin li xextakla cuiꞌ li Ka̱cuaꞌ. Cheba̱nuhak re nak li Ka̱cuaꞌ tixcꞌutbesi lix lokꞌal che̱ru, chan.

⁷ Ut laj Moisés quixye re laj Aarón: —Jilon chak riqꞌuin li artal ut ta̱qꞌue la̱ mayej re xtzꞌa̱manquil xcuybal la̱ ma̱c ut ta̱qꞌue li cꞌatbil mayej re xtojbal rix la̱ ma̱c ut lix ma̱queb li tenamit. Ta̱qꞌue lix mayejeb li tenamit re xtzꞌa̱manquil xcuybal lix ma̱queb joꞌ quixye li Ka̱cuaꞌ, chan.

⁸ Ut laj Aarón quijiloc riqꞌuin li artal ut quixcamsi li toro toj sa̱j re xtojbal rix lix ma̱c.

⁹ Eb li ralal queꞌxxoc li quicꞌ ut queꞌxqꞌue re laj Aarón. Ut laj Aarón quixtzꞌa li rukꞌ saꞌ li quicꞌ ut quixyul chiruheb li xucub li cuan saꞌ xca̱ xucu̱til li artal. Li qui-elaꞌan quixhoy saꞌ xto̱n li artal.

¹⁰ Quixcꞌat saꞌ li artal lix xe̱bul ut lix que̱nkꞌ ut lix xe̱bul lix chꞌochꞌ li xul li quixmayeja re xtzꞌa̱manquil xcuybal lix ma̱c. Quixba̱nu joꞌ quixye li Ka̱cuaꞌ.

¹¹ Ut lix tibel rochben lix tzꞌu̱mal quixcꞌam toj chirix li naꞌajej li cuanqueb cuiꞌ lix muheba̱leb ut aran quixcꞌat.

¹² Chirix aꞌan quixcamsi li xul li quixqꞌue chokꞌ xcꞌatbil mayej. Eb li ralal queꞌxqꞌue li quicꞌ re ut laj Aarón quixrachrachi chire li artal chixjun sutam.

¹³ Queꞌxqꞌue re laj Aarón li setbil tib joꞌ ajcuiꞌ lix jolom li xul ut laj Aarón quixcꞌat saꞌ xbe̱n li artal chokꞌ xmayejeb.

¹⁴ Laj Aarón quixchꞌaj lix cꞌamcꞌot ut li rok ut quixcꞌat saꞌ li artal saꞌ xbe̱n li cꞌatbil mayej.

¹⁵ Chirix aꞌan laj Aarón quixqꞌue lix mayejeb li tenamit. Quixchap li te̱lom chiba̱t ut quixcamsi. Ut quixmayeja chiru li Ka̱cuaꞌ re xtzꞌa̱manquil xcuybal lix ma̱queb joꞌ quixba̱nu riqꞌuin li xbe̱n mayej.

¹⁶ Quixcꞌam ajcuiꞌ li xul li ta̱qꞌuehekꞌ chokꞌ cꞌatbil mayej ut quixmayeja. Quixba̱nu joꞌ quixye li Dios.

¹⁷ Ut quixqꞌue ajcuiꞌ li mayej cꞌaj. Quixchap jun mo̱chꞌ ut quixcꞌat saꞌ xbe̱n li artal. Li mayej aꞌan jun chic li mayej tixba̱nu chirix li cꞌatbil mayej li quixqꞌue rajlal ekꞌela.

¹⁸ Quixcamsi li cuacax ut li carner te̱lom ut quixmayeja re xcꞌambaleb rib saꞌ usilal riqꞌuin li Ka̱cuaꞌ. Eb li ralal queꞌxqꞌue li quicꞌ re ut laj Aarón quixrachrachi chire li artal chixjun sutam.

¹⁹ Ut queꞌxchap lix xe̱bul li cuacax ut li carner, ut lix xe̱bul lix cꞌamcꞌot, joꞌ ajcuiꞌ lix ye rochben lix xe̱bul, ut lix que̱nkꞌ ut lix xe̱bul lix chꞌochꞌ.

²⁰ Eb li ralal laj Aarón queꞌxqꞌue li xe̱b saꞌ xbe̱n li re xchꞌo̱l. Ut laj Aarón quixqꞌue li xe̱b saꞌ xbe̱n li artal ut quixcꞌat.

²¹ Laj Aarón quixtaksi saꞌ rukꞌ chiru li Ka̱cuaꞌ li re xchꞌo̱l ut li rukꞌ li xul li cuan saꞌ xnim joꞌ quiyeheꞌ re xban laj Moisés.

²² Nak quirakeꞌ xqꞌuebaleb li mayej re xtzꞌa̱manquil xcuybal li ma̱c ut li cꞌatbil mayej joꞌ ajcuiꞌ li mayej re xcꞌambal ribeb saꞌ usilal riqꞌuin li Dios, laj Aarón quixtaksi li rukꞌ saꞌ xbe̱neb li tenamit ut quixtzꞌa̱ma chiru li Dios nak ta̱rosobtesiheb li tenamit. Chirix aꞌan qui-el chiru li artal.

²³ Laj Moisés rochben laj Aarón queꞌoc saꞌ li tabernáculo. Ut nak queꞌel queꞌxtzꞌa̱ma chiru li Dios nak ta̱rosobtesiheb li tenamit. Ut li Ka̱cuaꞌ quixcꞌutbesi lix lokꞌal chiruheb chixjunileb li tenamit.

²⁴ Ut li Ka̱cuaꞌ quixtakla li xam ut quixcꞌat li mayej ut li xe̱b li cuan saꞌ xbe̱n li artal. Nak eb li tenamit queꞌril li xam queꞌxhupub ribeb saꞌ chꞌochꞌ ut queꞌxlokꞌoni li Dios.