Levítico 8 - Li Santil hu

Laj Aarón ut eb li ralal queꞌxakaba̱c chokꞌ aj tij

¹ Li Dios quia̱tinac riqꞌuin laj Moisés ut quixye re:

² —Ta̱xakabeb laj Aarón ut eb li ralal chi cꞌanjelac chokꞌ aj tij. Ta̱cꞌameb chiru li oqueba̱l re li tabernáculo. Ut ta̱cꞌam ajcuiꞌ li rakꞌeb laj tij ut li aceite re xqꞌuebal saꞌ xjolomeb. Ta̱cꞌam junak li toro li ta̱mayeja̱k re xtzꞌa̱manquil xcuybal lix ma̱queb. Ut ta̱cꞌameb ajcuiꞌ cuib li carner te̱lom ut li chacach li cuan cuiꞌ li caxlan cua li ma̱cꞌaꞌ xchꞌamal.

³ Ta̱chꞌutubeb chixjunileb li tenamit saꞌ li oqueba̱l re li tabernáculo, chan li Ka̱cuaꞌ.

⁴ Ut laj Moisés quixba̱nu joꞌ quiyeheꞌ re xban li Dios. Quixchꞌutubeb li tenamit saꞌ li oqueba̱l re li tabernáculo.

⁵ Ut quixye reheb li chꞌutchꞌu̱queb aran: —Aꞌan aꞌin li xinixtakla xba̱nunquil li Dios, chan.

⁶ Tojoꞌnak laj Moisés quixcꞌameb chi ubej laj Aarón ut eb li ralal ut quixchꞌajeb re xsantobresinquileb.

⁷ Ut laj Moisés quixqꞌue chirix laj Aarón li rakꞌ li nim rok li nequeꞌxqꞌue toj chi saꞌ, túnica xcꞌabaꞌ. Ut quixqꞌue lix cꞌa̱mal xsaꞌ. Ut quixqꞌue ajcuiꞌ li rakꞌ jun chic li nequeꞌxqꞌue saꞌ xbe̱n, manto xcꞌabaꞌ. Chirix aꞌan quixqꞌue li efod ut quixbacꞌ riqꞌuin xcꞌa̱mal.

⁸ Chirix aꞌan quixqꞌue li pectoral chire xchꞌo̱l. Ut chi saꞌ li pectoral quixqꞌue li Urim ut li Tumim.

⁹ Ut chirix aꞌan laj Moisés quixqꞌue li tꞌicr li nequeꞌxbacꞌ saꞌ xjolom, mitra xcꞌabaꞌ ut chiru aꞌan quixqꞌue jun pere̱l li oro retalil nak aꞌan kꞌaxtesinbil re li Ka̱cuaꞌ. Laj Moisés quixba̱nu joꞌ quiyeheꞌ re xban li Dios.

¹⁰ Chirix aꞌan laj Moisés quixqꞌue li aceite chiru li tabernáculo ut chiru ajcuiꞌ chixjunil li cuan chi saꞌ. Joꞌcaꞌin nak quixsantobresi chiru li Ka̱cuaꞌ.

¹¹ Cuukub sut quixrachrachi li aceite chiru li artal. Ut quixrachrachi ajcuiꞌ chiru li secꞌ ut li cꞌaꞌru nacꞌanjelac saꞌ li tabernáculo, joꞌ ajcuiꞌ li pila ut lix cꞌochleba̱l re xsantobresinquileb chiru li Ka̱cuaꞌ.

¹² Ut quixqꞌue li aceite saꞌ xjolom laj Aarón re xkꞌaxtesinquil chiru li Ka̱cuaꞌ chokꞌ aj tij.

¹³ Chirix aꞌan quixcꞌameb li ralal laj Aarón chi ubej. Ut quixqꞌue li rakꞌeb chirixeb li najt rok li nequeꞌxqꞌue toj chi saꞌ. Ut quixqꞌue lix cꞌa̱mal xsaꞌeb. Ut quixbacꞌ ajcuiꞌ li tꞌicr saꞌ xjolomeb, joꞌ quiyeheꞌ re xban li Ka̱cuaꞌ.

¹⁴ Chirix aꞌan laj Moisés quixcꞌam chak li toro li toj sa̱j li ta̱mayeja̱k re xtzꞌa̱manquil xcuybal lix ma̱queb. Ut laj Aarón ut eb li ralal queꞌxqꞌue li rukꞌ saꞌ xjolom li xul.

¹⁵ Ut laj Moisés quixcamsi li toro. Quixxoc lix quiqꞌuel ut riqꞌuin li ruꞌuj rukꞌ quixqꞌue li quicꞌ chiru li xucub li cuanqueb saꞌ xca̱ xucu̱til li artal re xsantobresinquil chiru li Ka̱cuaꞌ. Ut li quicꞌ li joꞌ qꞌuial chic quicana quixhoy saꞌ xto̱n li artal. Joꞌcaꞌin nak quixkꞌaxtesi li artal chiru li Ka̱cuaꞌ li teꞌmayejak cuiꞌ laj tij.

¹⁶ Laj Moisés quirisi chixjunil li xe̱b li nacuan chiru lix cꞌamcꞌot ut li xe̱b li nacuan chiru lix chꞌochꞌ joꞌ ajcuiꞌ lix que̱nkꞌ cuib rochben li xe̱b li nacuan chiru. Ut quixcꞌat saꞌ xbe̱n li artal.

¹⁷ Ut li toro rochben lix tzꞌu̱mal, lix tibel ut lix cꞌamcꞌot quixcꞌam laj Moisés toj chirix lix naꞌaj lix muheba̱leb. Ut aran quixcꞌat joꞌ quiyeheꞌ re xban li Ka̱cuaꞌ.

¹⁸ Chirix aꞌan laj Moisés quixcꞌam chak li carner te̱lom li ta̱qꞌuehekꞌ chokꞌ cꞌatbil mayej. Ut laj Aarón ut eb li ralal queꞌxqꞌue li rukꞌ saꞌ xjolom li carner.

¹⁹ Ut laj Moisés quixcamsi li carner ut quixrachrachi lix quiqꞌuel chixjun sutam li artal.

²⁰ Quixseti lix tibel ut quixcꞌat lix jolom ut lix tibel ut lix xe̱bul.

²¹ Laj Moisés quixchꞌaj lix cꞌamcꞌot ut li rok ut quixcꞌat chixjunil li carner saꞌ li artal. Ut aꞌan jun sununquil mayej quixcꞌat ut quicuulac chiru li Ka̱cuaꞌ. Laj Moisés quixba̱nu joꞌ quiyeheꞌ re xban li Ka̱cuaꞌ.

²² Chirix aꞌan laj Moisés quixcꞌam chak li te̱lom carner jun chic li teꞌxmayeja re xxakabanquileb chokꞌ aj tij laj Aarón ut eb li ralal. Ut laj Aarón ut eb li ralal queꞌxqꞌue li rukꞌ saꞌ xjolom li carner.

²³ Laj Moisés quixcamsi li carner. Quixxoc lix quiqꞌuel ut quixqꞌue caꞌchꞌin saꞌ lix xic laj Aarón li cuan saꞌ xnim. Ut quixqꞌue ajcuiꞌ saꞌ li ruꞌuj rukꞌ nim li cuan saꞌ xnim ukꞌ ut saꞌ li ruꞌuj rok nim li cuan saꞌ xnim ok.

²⁴ Chirix aꞌan quixcꞌam chi ubej eb li ralal laj Aarón ut quixqꞌue caꞌchꞌin li quicꞌ saꞌ eb lix xic li cuan saꞌ xnim. Ut quixqꞌue ajcuiꞌ saꞌ ruꞌuj rukꞌeb li nim li cuan saꞌ xnim ukꞌ ut saꞌ ruꞌuj rok li nim li cuan saꞌ xnim ok. Ut quixrachrachi li quicꞌ chixjun sutam li artal.

²⁵ Quixchap lix xe̱bul li carner, lix ye rochben lix xe̱bul, ut lix xe̱bul li cuan chiru lix cꞌamcꞌot, lix chꞌochꞌ, ut lix que̱nkꞌ rochben lix xe̱bul ut quixchap ajcuiꞌ li rukꞌ li cuan saꞌ xnim.

²⁶ Ut laj Moisés quixchap li caxlan cua saꞌ li chacach li cuan cuiꞌ li caxlan cua li ma̱cꞌaꞌ xchꞌamal li kꞌaxtesinbil re li Ka̱cuaꞌ. Quixchap jun li caxlan cua ma̱cꞌaꞌ xchꞌamal, ut jun li caxlan cua yi̱banbil riqꞌuin aceite ut jun li caxlan cua jay. Quixqꞌueheb aꞌin saꞌ xbe̱n lix xe̱bul li carner ut li rukꞌ li cuan saꞌ xnim.

²⁷ Chixjunil aꞌin laj Moisés quixqꞌue saꞌ rukꞌ laj Aarón ut saꞌ rukꞌ eb li ralal. Ut laj Aarón ut eb li ralal queꞌxtaksi saꞌ rukꞌeb chiru li Ka̱cuaꞌ chokꞌ xmayejeb.

²⁸ Ut laj Moisés quixchapeb cuiꞌchic li mayej saꞌ rukꞌeb ut quixcꞌat saꞌ li artal saꞌ xbe̱n li cꞌatbil mayej chokꞌ xmayej re xxakabanquileb laj tij. Ut aꞌan jun li sununquil mayej quicuulac chiru li Ka̱cuaꞌ.

²⁹ Ut laj Moisés quixchap li re xchꞌo̱l li carner li ta̱tzꞌak aꞌan ut quixtaksi saꞌ rukꞌ chiru li Ka̱cuaꞌ chokꞌ xmayej. Quixba̱nu joꞌ quiyeheꞌ re xban li Ka̱cuaꞌ.

³⁰ Chirix aꞌan laj Moisés quixchap caꞌchꞌin li quicꞌ li cuan saꞌ li artal ut quixchap ajcuiꞌ caꞌchꞌin li aceite ut quixrachrachi saꞌ xbe̱n laj Aarón ut chiru li rakꞌ. Quixrachrachi ajcuiꞌ saꞌ xbe̱neb li ralal ut chiru li rakꞌeb. Joꞌcaꞌin nak quixkꞌaxtesi re li Ka̱cuaꞌ laj Aarón ut eb li ralal ut quixkꞌaxtesi re li Ka̱cuaꞌ li rakꞌeb.

³¹ Ut laj Moisés quixye re laj Aarón ut reheb li ralal: —Te̱chik li tib aꞌin chiru li oqueba̱l re li tabernáculo. Ut aran ajcuiꞌ te̱tzaca rochben li caxlan cua li cuan saꞌ li chacach, li quiqꞌueheꞌ cuiꞌ li mayejanbil caxlan cua re xkꞌaxtesinquileb laj tij chiru li Ka̱cuaꞌ. Te̱ba̱nu chi joꞌcan xban nak li Ka̱cuaꞌ quixye cue: “Laj Aarón ut eb li ralal teꞌxtzaca li tzacae̱mk aꞌin,” chan.

³² Ut li joꞌ qꞌuial chic li tib ut li caxlan cua li incꞌaꞌ te̱choy, te̱cꞌat.

³³ Incꞌaꞌ naru tex-e̱lk chiru li oqueba̱l re li tabernáculo. Texcana̱k ban aran chiru cuukub cutan. Nak ac xnumeꞌ cuukub cutan e̱kꞌaxtesinquil chiru li Ka̱cuaꞌ, naru tex-e̱lk.

³⁴ Li Ka̱cuaꞌ quixye nak takaba̱nu chixjunil li xkaba̱nu chiru li cutan aꞌin re xtojbal rix le̱ ma̱c. Ut xkaba̱nu joꞌ quixye ke li Ka̱cuaꞌ.

³⁵ Texcana̱k chiru li oqueba̱l re li tabernáculo chiru cuukub cutan ut cuukub kꞌojyi̱n. Te̱ba̱nu joꞌ xye li Ka̱cuaꞌ re nak incꞌaꞌ texca̱mk xban nak joꞌcan quixye cue li Ka̱cuaꞌ, chan laj Moisés.

³⁶ Ut laj Aarón ut eb li ralal queꞌxba̱nu chixjunil li quiyeheꞌ re laj Moisés xban li Ka̱cuaꞌ.