Levítico 7 - Li Santil hu

Li mayej li nequeꞌxqꞌue li nequeꞌxkꞌet junak reheb lix chakꞌrab li Dios

¹ Aꞌan aꞌin li chakꞌrab chirix li mayej li nequeꞌxqꞌue nak nequeꞌxkꞌet junak reheb lix chakꞌrab li Dios. Aꞌan jun mayej santobresinbil.

² Li mayej xul aꞌin teꞌxcamsi saꞌ li naꞌajej li nequeꞌxcamsi cuiꞌ li cꞌatbil mayej. Ut lix quiqꞌuel teꞌxrach saꞌ xbe̱n li artal joꞌ ajcuiꞌ chixjun sutam.

³ Ut teꞌxqꞌue chokꞌ xmayej lix xe̱bul, ut lix ye ut lix xe̱bul lix cꞌamcꞌot.

⁴ Teꞌxqꞌue ajcuiꞌ lix que̱nkꞌ cuib ut lix xe̱bul ut teꞌxqꞌue ajcuiꞌ li xe̱b li cuan chixcꞌatk xsaꞌ. Ut teꞌxqꞌue ajcuiꞌ li xe̱b li letzlo chiru lix chꞌochꞌ.

⁵ Laj tij tixcꞌat chixjunil aꞌin saꞌ li artal. Aꞌanak jun li cꞌatbil mayej chiru li Ka̱cuaꞌ re xtzꞌa̱manquil xcuybal lix ma̱queb xban nak xeꞌxkꞌet li chakꞌrab.

⁶ Eb laj tij ut eb li ralal naru nequeꞌtzacan re li mayej aꞌin. Tento nak teꞌxtzaca saꞌ li naꞌajej santo xban nak aꞌan jun li mayej santobresinbil.

⁷ Juntakꞌe̱t lix chakꞌrabinquileb chirix xqꞌuebal li mayej li nequeꞌxqꞌue re xtzꞌa̱manquil xcuybal xma̱queb riqꞌuin li mayej li nequeꞌxqꞌue nak nequeꞌxkꞌet lix chakꞌrab li Dios. Laj tij li ta̱cꞌatok reheb li mayej aꞌin, aꞌan ta̱tzꞌak li tib aꞌin.

⁸ Lix tzꞌu̱mal li xul aꞌan ta̱cana̱k chokꞌ re laj tij li ta̱qꞌuehok re li cꞌatbil mayej saꞌ xcꞌabaꞌeb li tenamit.

⁹ Joꞌcan ajcuiꞌ li mayej caxlan cua li nachakꞌa̱c saꞌ horno, ut li nayaloꞌ saꞌ xartin joꞌ ajcuiꞌ li naqꞌuili̱c, aꞌan re laj tij li ta̱cꞌatok re li mayej.

¹⁰ Chixjunil li mayej cꞌaj joꞌ li yokꞌinbil riqꞌuin aceite joꞌ ajcuiꞌ li chaki, aꞌan reheb li ralal xcꞌajol laj Aarón. Juntakꞌe̱t teꞌxcꞌul li junju̱nk.

Li mayej re xcꞌambaleb rib saꞌ usilal riqꞌuin li Dios

¹¹ Aꞌan aꞌin li chakꞌrab chirix li mayej li nequeꞌxqꞌue re xcꞌambal ribeb saꞌ usilal riqꞌuin li Ka̱cuaꞌ Dios:

¹² Li ani tixqꞌue lix mayej re xbantioxinquil chiru li Ka̱cuaꞌ tixqꞌue li caxlan cua li ma̱cꞌaꞌ xchꞌamal junajinbil riqꞌuin aceite, malaj ut tixqꞌue ajcuiꞌ li caxlan cua chi jay li ma̱cꞌaꞌ xchꞌamal ut tixqꞌue aceite saꞌ xbe̱n. Tixqꞌue ajcuiꞌ li caxlan cua yi̱banbil riqꞌuin cha̱bil cꞌaj, yokꞌinbil chi us ut junajinbil riqꞌuin aceite.

¹³ Ut rochben lix mayej re xcꞌambal rib saꞌ usilal riqꞌuin li Dios re bantioxi̱nc, tixqꞌue li caxlan cua li cuan xchꞌamal.

¹⁴ Tixqꞌue re li Ka̱cuaꞌ junju̱nk li caxlan cua. Li caxlan cua aꞌan re laj tij li ta̱rachok re lix quiqꞌuel li xul li ta̱mayeja̱k re xcꞌambaleb rib saꞌ usilal riqꞌuin li Dios.

¹⁵ Nak teꞌmayejak re xcꞌambaleb rib saꞌ usilal riqꞌuin li Ka̱cuaꞌ re bantioxi̱nc, tento nak teꞌxchoy xtzacanquil lix tibel li xul li teꞌxmayeja chiru li cutan aꞌan. Incꞌaꞌ naru xxocbal chokꞌ re li cutan jun chic.

¹⁶ Abanan cui tixqꞌue lix mayej yal xban nak qui-ala saꞌ xchꞌo̱l xqꞌuebal, malaj ut xban nak cuan cꞌaꞌru quixyechiꞌi re li Ka̱cuaꞌ nak tixba̱nu, ta̱tzaca̱k li tib saꞌ li cutan nak ta̱qꞌuehekꞌ lix mayej. Ut li joꞌ qꞌuial na-elaꞌan naru xtzacanquil saꞌ li cutan jun chic.

¹⁷ Cui toj cua̱nk li tib saꞌ rox li cutan, tento ta̱cꞌatekꞌ.

¹⁸ Incꞌaꞌ naru xtzacanquil li tib li ac oxib cutan xmayejanquil. Cui natzaca̱c, li mayej aꞌan incꞌaꞌ ta̱cꞌulekꞌ. Ta̱tzꞌekta̱na̱k xban li Dios. Ut li ani ta̱tzaca̱nk re cua̱nk xma̱c chiru li Dios.

¹⁹ Ut cui li tib nanak chiru li muxbil ru, incꞌaꞌ naru ta̱tzaca̱k. Tento ban xcꞌatbal. Abanan li tib li incꞌaꞌ muxbil ru naru teꞌxtzaca li incꞌaꞌ queꞌxmux ribeb.

²⁰ Cui junak tixmux rib ut tixtiu li tib li quimayeja̱c chiru li Dios re xcꞌambal rib saꞌ usilal riqꞌuin li Dios, li jun aꞌan ta̱isi̱k saꞌ xya̱nkeb li rech aj Israelil.

²¹ Cui ani tixmux rib riqꞌuin xchꞌeꞌbal li muxbil ru, usta cristian usta xul li tixchꞌeꞌ, ut tixtzaca li tib li mayejanbil re xcꞌambal rib saꞌ usilal riqꞌuin li Dios, li jun aꞌan ta̱isi̱k saꞌ xya̱nkeb li rech aj Israelil.

Aꞌin li chakꞌrab chirix xtzacanquil li xe̱b ut li quicꞌ

²² Quia̱tinac li Dios riqꞌuin laj Moisés ut quixye re:

²³ —Ta̱ye reheb laj Israel nak incꞌaꞌ naru teꞌxtzaca lix xe̱bul li cuacax, chi moco li carner, chi moco li chiba̱t.

²⁴ Chi moco naru teꞌxtzaca lix xe̱bul li xul li yal nacam, chi moco naru teꞌxtzaca lix xe̱bul li xul li nacamsi̱c xban joskꞌ aj xul. Naru nequeꞌxsicꞌ jalan xcꞌanjel li xe̱b aꞌan.

²⁵ Li ani tixtiu lix xe̱bul li xul li quicꞌateꞌ chokꞌ mayej chiru li Dios, li jun aꞌan ta̱isi̱k saꞌ xya̱nkeb li rech aj Israelil.

²⁶ Yalak bar cuanqueb laj Israel, incꞌaꞌ naru teꞌxtzaca xquiqꞌuel li xul li nequeꞌbe̱c saꞌ chꞌochꞌ chi moco li xul li nequeꞌrupupic.

²⁷ Cui ani tixtzaca lix quiqꞌuel li xul, li jun aꞌan ta̱isi̱k saꞌ xya̱nkeb li rech aj Israelil.

Li tib li teꞌxcꞌul eb laj tij

²⁸ Li Ka̱cuaꞌ quia̱tinac riqꞌuin laj Moisés ut quixye re:

²⁹ —Ta̱ye reheb laj Israel nak li ani tixqꞌue lix mayej re xcꞌambal rib saꞌ usilal riqꞌuin li Ka̱cuaꞌ, tento nak aꞌan tixcꞌam lix mayej chiru li Ka̱cuaꞌ.

³⁰ Nak tixcꞌam lix mayej li ta̱cꞌatma̱nk, riqꞌuin rukꞌ aꞌan tixtaksi li xe̱b ut li re xchꞌo̱l li xul chiru li artal re xkꞌaxtesinquil chiru li Ka̱cuaꞌ.

³¹ Ut laj tij tixcꞌat li xe̱b saꞌ li artal. Abanan li re xchꞌo̱l, aꞌan re laj Aarón ut reheb ajcuiꞌ li ralal.

³² Ut li rukꞌ li cuan saꞌ xnim, teꞌxqꞌue re laj tij xban nak aꞌan li tento ta̱tzꞌak.

³³ Teꞌxqꞌue li rukꞌ li cuan saꞌ xnim re laj tij li ta̱cꞌatok re li xe̱b ut ta̱mayeja̱nk re lix quiqꞌuel li xul re xcꞌambaleb rib saꞌ usilal riqꞌuin li Dios.

³⁴ La̱in xinyehoc re nak laj Aarón laj tij ut eb li ralal teꞌxcꞌul li re xchꞌo̱l ut li rukꞌ li xul li teꞌxmayeja eb laj Israel re xcꞌambaleb rib saꞌ usilal riqꞌuin li Dios. Aꞌan jun chakꞌrab teꞌxba̱nu chi junelic, chan li Dios.

³⁵ Chalen saꞌ li cutan nak queꞌxakaba̱c laj Aarón ut eb li ralal chi cꞌanjelac chokꞌ aj tij, li Ka̱cuaꞌ quixye nak eb aꞌan teꞌtzꞌak li tib nak nequeꞌxcꞌat li mayej chiru li Ka̱cuaꞌ.

³⁶ Saꞌ li cutan nak li Ka̱cuaꞌ quixsiqꞌueb ru chi cꞌanjelac chokꞌ aj tij, li Ka̱cuaꞌ quixye nak eb laj Israel junelic teꞌxqꞌue li tib aꞌan reheb laj tij.

³⁷ Aꞌan aꞌin li chakꞌrab chirix li cꞌatbil mayej, li mayej cꞌaj, li mayej re xtojbal rix lix ma̱queb, li mayej re xtzꞌa̱manquil xcuybal nak nequeꞌxkꞌet junak reheb li chakꞌrab ut li mayej re xkꞌaxtesinquileb laj tij chi cꞌanjelac chiru li Ka̱cuaꞌ, joꞌ ajcuiꞌ li mayej re xcꞌambal ribeb saꞌ usilal riqꞌuin li Ka̱cuaꞌ.

³⁸ Li Ka̱cuaꞌ quixqꞌue li chakꞌrab aꞌin re laj Moisés saꞌ li tzu̱l Sinaí nak cuanqueb saꞌ li chaki chꞌochꞌ. Quixqꞌue reheb saꞌ li cutan nak quixye reheb laj Israel nak teꞌmayejak chiru.