Levítico 6 - Li Santil hu

^1-2 Li Ka̱cuaꞌ Dios quixye re laj Moisés: —Nak junak cristian ta̱ma̱cobk riqꞌuin xbalakꞌinquil li ras ri̱tzꞌin malaj ut riqꞌuin elkꞌac, aꞌan cuan xma̱c chiru li Ka̱cuaꞌ. Cui tixcꞌul li cꞌaꞌak re ru re tixcꞌu̱la ut incꞌaꞌ chic ta̱raj xkꞌaxtesinquil nak ta̱patzꞌekꞌ re, malaj ut tixrahobtesi li ras ri̱tzꞌin, aꞌan cuan xma̱c.

³ Cui tixtau junak cꞌaꞌak re ru chi tzꞌektzꞌo ut ta̱ticꞌtiꞌik ut tixye nak incꞌaꞌ quixtau, riqꞌuineb chixjunil li cꞌaꞌak re ru aꞌin tixba̱nu, ta̱ma̱cobk chiru li Dios.

⁴ Cui junak nama̱cob riqꞌuin xba̱nunquil li ma̱c aꞌin, tento nak tixqꞌue re̱kaj li quirelkꞌa, malaj ut tixkꞌaxtesi li quixcꞌu̱la junxil, malaj ut tixkꞌaxtesi li quixxoc chi tzꞌektzꞌo li incꞌaꞌ quixcꞌut.

⁵ Tixkꞌaxtesi chixjunil li joꞌ qꞌuial quixcꞌul riqꞌuin balakꞌi̱nc ut tixtoj ajcuiꞌ ral li tumin. Tixtoj ju̱nk may ral li ju̱nk ciento re chixjunil li quirelkꞌa. Tixkꞌaxtesi chixjunil li cꞌaꞌak re ru aꞌin saꞌ li cutan nak ta̱mayejak chiru li Dios re xtojbal rix li ma̱c li quixba̱nu.

⁶ Tento nak tixqꞌue chokꞌ xmayej junak li carner te̱lom tzꞌakal re ru li tixsicꞌ saꞌ xya̱nk lix queto̱mk. Ut laj tij tixbir rix lix tzꞌak li xul aꞌan. Tixcꞌam lix mayej riqꞌuin laj tij re nak tixmayeja chokꞌ re xtzꞌa̱manquil xcuybal li ma̱c li quixba̱nu.

⁷ Ut laj tij tixcꞌat li mayej aꞌin re xtojbal rix lix ma̱c li ani quixba̱nu junak reheb li ma̱c aꞌin, ut ta̱cuyekꞌ xma̱c.

Joꞌcaꞌin nak teꞌxqꞌue li cꞌatbil mayej

⁸ Ut li Ka̱cuaꞌ quia̱tinac riqꞌuin laj Moisés ut quixye re:

⁹ —Ta̱ye re laj Aarón ut eb li ralal nak joꞌcaꞌin nak teꞌxqꞌue li cꞌatbil mayej. Li xul li teꞌxcꞌat teꞌxcanab saꞌ li xam saꞌ xbe̱n li artal. Aran yo̱k chi cꞌatc ta̱numekꞌ li kꞌojyi̱n toj ta̱sake̱uk.

¹⁰ Laj tij tixqꞌue li akꞌej lino chirix. Tixqꞌue lix ta lix cue̱x. Nak ac x-osoꞌ xcꞌatic li mayej, ta̱risi li cha li cuan saꞌ xbe̱n li artal ut tixqꞌue chixcꞌatk li artal.

¹¹ Chirix aꞌan ta̱risi li akꞌej lino chirix ut tixqꞌue jalan chic li rakꞌ chirix. Ut tixcꞌam li cha chirix li naꞌajej li cuanqueb cuiꞌ lix muheba̱leb li tenamit saꞌ li naꞌajej li incꞌaꞌ muxbil.

¹² Li xam li cuan saꞌ xbe̱n li artal junelic lochlo̱k. Incꞌaꞌ ta̱chupk. Laj tij tixqꞌue li siꞌ saꞌ xbe̱n li artal rajlal ekꞌela. Ut tixqꞌue ajcuiꞌ li cꞌatbil mayej ut li xe̱b saꞌ xbe̱n chokꞌ re li mayej re xcꞌambaleb rib saꞌ usilal riqꞌuin li Dios.

¹³ Li xam li cua̱nk saꞌ li artal junelic lochlo̱k. Incꞌaꞌ ta̱chupk.

Joꞌcaꞌin nak teꞌxqꞌue li mayej cꞌaj

¹⁴ Ut li Ka̱cuaꞌ quixye re laj Moisés: —Aꞌan aꞌin li chakꞌrab chirix li mayej cꞌaj. Eb laj tij li ralaleb laj Aarón teꞌxqꞌue li mayej saꞌ li artal chiru li Ka̱cuaꞌ.

¹⁵ Laj tij tixqꞌue jun mo̱chꞌak li cha̱bil cꞌaj li ac qꞌuebil chokꞌ mayej. Tixqꞌue ajcuiꞌ li aceite ut li incienso li na-oc saꞌ xbe̱n li mayej. Tixcꞌat saꞌ xbe̱n li artal chokꞌ retalil nak kꞌaxtesinbil re li Ka̱cuaꞌ lix comon li mayej. Ut li mayej aꞌan, aꞌan jun sununquil mayej nacuulac chiru li Ka̱cuaꞌ.

¹⁶ Ut li joꞌ qꞌuial chic li mayej li ta̱elaꞌa̱nk, teꞌxtzaca laj Aarón ut eb li ralal chi ma̱cꞌaꞌ xchꞌamal. Teꞌxtzaca saꞌ jun li naꞌajej lokꞌ. Teꞌxtzaca chiru li neba̱l li cuan chiru li Santil Naꞌajej.

¹⁷ Nak teꞌxyi̱b li caxlan cua aꞌin incꞌaꞌ teꞌxqꞌue xchꞌamal. La̱in xinqꞌue li mayej aꞌin chokꞌ reheb xban nak aꞌan li tento teꞌtzꞌak. Li mayej aꞌin kꞌaxal lokꞌ joꞌ xlokꞌal li cuib chi mayej li nequeꞌxqꞌue re xtzꞌa̱manquil xcuybal lix ma̱queb.

¹⁸ Chixjunileb li ralal laj Aarón naru teꞌxtzaca li tzacae̱mk aꞌin. Aꞌin jun li chakꞌrab cua̱nk chi junelic chokꞌ reheb. Eb aꞌan li naru teꞌtzaca̱nk re xcomoneb li mayej aꞌin li nequeꞌcꞌateꞌ chiru li Ka̱cuaꞌ. Cui li mayej aꞌin ta̱nak saꞌ xbe̱n cꞌaꞌak re ru, santobresinbil teꞌcana̱k.

¹⁹ Li Ka̱cuaꞌ quia̱tinac riqꞌuin laj Moisés ut quixye re:

²⁰ —Aꞌan aꞌin li mayej li teꞌxqꞌue laj Aarón ut eb li ralal saꞌ li cutan nak teꞌxakaba̱k chokꞌ aj tij: ca̱hib libra riqꞌuin media libra li cha̱bil cꞌaj. Yijach teꞌxqꞌue ekꞌela ut yijach teꞌxqꞌue ecuu. Ut aꞌin teꞌxba̱nu rajlal cutan.

²¹ Teꞌxqꞌue saꞌ xartin li caxlan cua aꞌin li qꞌuebil aceite riqꞌuin. Ut nak acak xchakꞌak te̱cꞌam chi pedasinbil chokꞌ e̱mayej ut te̱qꞌue chiru li Ka̱cuaꞌ. Ut aꞌanak jun sununquil mayej chiru.

²² Ut laj tij li ta̱xakaba̱k chokꞌ re̱kaj laj Aarón saꞌ xya̱nkeb li ralal tixqꞌue li mayej aꞌin joꞌ quixba̱nu laj Aarón xban nak aꞌin jun xchakꞌrab li Ka̱cuaꞌ tento teꞌxba̱nu junelic. Ut ta̱cꞌatekꞌ chixjunil li mayej li tixqꞌue.

²³ Chixjunil li mayej cꞌaj li teꞌxqꞌue laj tij saꞌ xcꞌabaꞌeb aꞌan ta̱cꞌatekꞌ chixjunil. Incꞌaꞌ naru teꞌxtzaca.

Joꞌcaꞌin nak teꞌxqꞌue li mayej re xtzꞌa̱manquil xcuybal lix ma̱queb

²⁴ Li Ka̱cuaꞌ quia̱tinac riqꞌuin laj Moisés ut quixye re:

²⁵ —Ta̱ye re laj Aarón ut eb li ralal: Aꞌan aꞌin li chakꞌrab chirix li mayej li teꞌxqꞌue re xtzꞌa̱manquil xcuybal li ma̱c. Li xul li teꞌxqꞌue chokꞌ xmayej teꞌxcamsi chiru li Ka̱cuaꞌ saꞌ li naꞌajej li nequeꞌxcamsi cuiꞌ li xul li nequeꞌxqꞌue chokꞌ cꞌatbil mayej. Li mayej aꞌin, aꞌan santobresinbil.

²⁶ Li mayej li tixqꞌue laj tij re xtzꞌa̱manquil xcuybal xma̱queb, aꞌan ta̱ru̱k tixtzaca li tib aꞌan. Tento nak tixtzaca saꞌ li naꞌajej santo saꞌ li neba̱l re li tabernáculo.

²⁷ Cui li tib aꞌin ta̱nak saꞌ xbe̱n cꞌaꞌak re ru, santobresinbil chic ta̱cana̱k li cꞌaꞌak re ru ta̱nak cuiꞌ. Ut cui li quicꞌ ta̱nak chiru li rakꞌeb tento nak teꞌxpuchꞌ saꞌ junak naꞌajej santo.

²⁸ Cui saꞌ chꞌochꞌ ucꞌal teꞌxchik li mayej tib, tento nak teꞌxjor li ucꞌal aꞌan. Abanan cui teꞌxchik li tib saꞌ junak ucꞌal chꞌi̱chꞌ, tento nak teꞌxjiꞌ xsaꞌ chi us ut teꞌxchꞌaj.

²⁹ Li mayej aꞌin santobresinbil. Caꞌaj cuiꞌ eb laj tij ut eb li ralal naru nequeꞌtzacan re.

³⁰ Incꞌaꞌ naru nequeꞌxtzaca li mayej tib li quicꞌameꞌ lix quiqꞌuel saꞌ li Lokꞌlaj Santil Naꞌajej re xtzꞌa̱manquil xcuybal xma̱queb. Tento nak teꞌxcꞌat chixjunil li mayej aꞌin.