Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Levítico 4 - Li Santil hu


Li mayej re xtzꞌa̱manquil xcuybal xma̱queb

1-2 Li Ka̱cuaꞌ quixye re laj Moisés: —Tat-a̱tinak riqꞌuineb li ralal xcꞌajol laj Israel ut ta̱ye reheb chi joꞌcaꞌin: Cui junak nama̱cob chi incꞌaꞌ naxnau xya̱lal lin chakꞌrab tento nak tixba̱nu chi joꞌcaꞌin.

3 Cui nama̱cob junak li xbe̱nil aj tij, lix ma̱c nacana saꞌ xbe̱neb li tenamit. Tento nak li xbe̱nil aj tij tixmayeja jun li toro toj sa̱j ut tzꞌakal re ru. Joꞌcaꞌin nak tixtoj rix lix ma̱c chiru li Ka̱cuaꞌ.

4 Laj tij tixcꞌam li toro chire li oqueba̱l re li tabernáculo. Ut tixqꞌue li rukꞌ saꞌ xjolom, tojoꞌnak tixcamsi chiru li Ka̱cuaꞌ Dios.

5 Ut laj tij tixcꞌam caꞌchꞌinak xquiqꞌuel li toro saꞌ li tabernáculo.

6 Tixtzꞌa li ruꞌuj rukꞌ saꞌ li quicꞌ ut chiru li Ka̱cuaꞌ tixrach cuukub sut nachꞌ riqꞌuin li tꞌicr li naramoc re li Lokꞌlaj Santil Naꞌajej.

7 Chirix aꞌan tixqꞌue caꞌchꞌinak li quicꞌ saꞌ xbe̱n li xucub li cuanqueb saꞌ li artal li nacꞌateꞌ cuiꞌ li sununquil pom chiru li Ka̱cuaꞌ saꞌ li tabernáculo. Li relaꞌ li quicꞌ tixhoy saꞌ xto̱n li artal re li cꞌatbil mayej li cuan saꞌ li oqueba̱l re li tabernáculo.

8 Ut ta̱risi lix xe̱bul li toro li xmayeja chokꞌ re xtzꞌa̱manquil xcuybal lix ma̱c. Tixqꞌue lix xe̱bul li cꞌamcꞌot ut tixqꞌue ajcuiꞌ li xe̱b li cuan chi saꞌ.

9 Tixqꞌue lix que̱nkꞌ cuib ut lix xe̱bul ut tixqꞌue ajcuiꞌ li xe̱b li cuan chixcꞌatk xsaꞌ. Ut tixqꞌue ajcuiꞌ li xe̱b li letzlo chiru lix chꞌochꞌ.

10 Ta̱risi lix xe̱bul joꞌ nak nequeꞌrisi lix xe̱bul li toro li nequeꞌxqꞌue chokꞌ xmayej re xcꞌambaleb rib saꞌ usilal riqꞌuin li Dios. Ut laj tij tixqꞌue saꞌ xbe̱n li artal ut tixcꞌat.

11 Tixcꞌam lix tzꞌu̱mal li toro, lix tibel, lix jolom, li rok, lix cꞌamcꞌot ut lix cꞌot.

12 Chixjunil li relaꞌ li chꞌina toro tixcꞌam chirix li naꞌajej li cuanqueb cuiꞌ lix muheba̱leb li tenamit. Ut aran saꞌ li naꞌajej li moco muxbil ta tixcꞌat chixjunil saꞌ li naꞌajej li naqꞌueman cuiꞌ li cha.

13 Cui chixjunileb laj Israel teꞌma̱cobk ut teꞌxkꞌet inchakꞌrab chi incꞌaꞌ nequeꞌxnau nak ma̱c li yo̱queb chixba̱nunquil, cua̱nk xma̱queb usta incꞌaꞌ nequeꞌxnau.

14 Ut nak teꞌxnau nak ma̱c li xeꞌxba̱nu, li tenamit teꞌxqꞌue junak li sa̱j toro chokꞌ xmayej re xtzꞌa̱manquil xcuybal lix ma̱queb. Li mayej aꞌan teꞌxcꞌam chiru li tabernáculo.

15 Ut eb li nequeꞌtaklan saꞌ li tenamit teꞌxqꞌue li rukꞌ saꞌ xjolom li toro chiru li Ka̱cuaꞌ ut teꞌxcamsi.

16 Ut li xbe̱nil aj tij tixcꞌam caꞌchꞌinak xquiqꞌuel li toro saꞌ li tabernáculo.

17 Tixtzꞌa li ruꞌuj rukꞌ saꞌ li quicꞌ ut chiru li Ka̱cuaꞌ tixrach cuukub sut nachꞌ riqꞌuin li tꞌicr li naramoc re li Lokꞌlaj Santil Naꞌajej.

18 Chirix aꞌan tixqꞌue caꞌchꞌinak li quicꞌ saꞌ xbe̱n li xucub li cuanqueb saꞌ li artal li cuan chiru li Ka̱cuaꞌ saꞌ li tabernáculo. Li relaꞌ li quicꞌ tixhoy saꞌ xto̱n li artal li nacꞌatman cuiꞌ li mayej li cuan saꞌ li oqueba̱l re li tabernáculo.

19 Ut ta̱risi chixjunil lix xe̱bul li toro ut tixcꞌat saꞌ xbe̱n li artal.

20 Juntakꞌe̱t tixba̱nu riqꞌuin li chꞌina toro aꞌin joꞌ quixba̱nu riqꞌuin li toro li quixmayeja re xtzꞌa̱manquil xcuybal lix ma̱c aꞌan. Chi joꞌcaꞌin laj tij tixqꞌue li mayej re xtojbal rix lix ma̱queb li tenamit ut ta̱cuyekꞌ lix ma̱queb.

21 Chirix aꞌan tixcꞌam li toro chirix li naꞌajej li cuanqueb cuiꞌ lix muheba̱leb li tenamit. Ut tixcꞌat chixjunil joꞌ nak quixcꞌat li toro jun. Li mayej aꞌin, aꞌan re xtzꞌa̱manquil xcuybal lix ma̱queb li tenamit.

22 Cui junak aj cꞌamol be ta̱ma̱cobk riqꞌuin xkꞌetbal junak reheb lix chakꞌrab li Ka̱cuaꞌ lix Dios, aꞌan cuan xma̱c usta incꞌaꞌ naxnau nak ma̱c xba̱nu.

23 Ut nak tixqꞌue retal nak ma̱c xba̱nu, tento nak tixqꞌue chokꞌ xmayej junak te̱lom chiba̱t toj sa̱j ut tzꞌakal re ru.

24 Tixqꞌue li rukꞌ saꞌ xjolom li chiba̱t ut tixcamsi saꞌ li naꞌajej li nequeꞌcamsi̱c cuiꞌ chiru li Ka̱cuaꞌ li xul li nequeꞌcꞌateꞌ. Li mayej aꞌin, aꞌan re xtzꞌa̱manquil xcuybal lix ma̱c li nacꞌamoc be chiruheb li tenamit.

25 Chirix aꞌan, laj tij tixcꞌam caꞌchꞌinak li quicꞌ ut riqꞌuin ruꞌuj rukꞌ tixqꞌue saꞌ xbe̱neb li xucub li cuanqueb saꞌ li artal li nacꞌateꞌ cuiꞌ li mayej. Ut li ta̱elaꞌa̱nk tixhoy saꞌ xto̱n li artal.

26 Tixcꞌat chixjunil lix xe̱bul saꞌ li artal joꞌ nak quixcꞌat lix xe̱bul li xul li queꞌxmayeja re xcꞌambaleb rib saꞌ usilal riqꞌuin li Ka̱cuaꞌ. Riqꞌuin li mayej li tixcꞌat laj tij, tixtoj rix lix ma̱c laj cꞌamol be ut ta̱cuyekꞌ xma̱c.

27 Cui cuan junak cristian ma̱cꞌaꞌ xcuanquil saꞌ li tenamit li naxkꞌet lix chakꞌrab li Dios chi incꞌaꞌ naxnau nak ma̱c li yo̱ chixba̱nunquil, aꞌan cuan xma̱c usta incꞌaꞌ naxnau nak ma̱c xba̱nu.

28 Nak tixqꞌue retal nak ma̱c li quixba̱nu, tixqꞌue junak li ixki chiba̱t tzꞌakal re ru chokꞌ xmayej re nak li Ka̱cuaꞌ tixcuy li ma̱c li quixba̱nu.

29 Tixqꞌue li rukꞌ saꞌ xjolom li xul li tixqꞌue chokꞌ xmayej re xtzꞌa̱manquil xcuybal xma̱c, ut tixcamsi saꞌ li naꞌajej li nequeꞌcamsi̱c cuiꞌ li xul li nequeꞌcꞌateꞌ chokꞌ mayej.

30 Ut chirix aꞌan laj tij tixcꞌam caꞌchꞌinak li quicꞌ ut riqꞌuin ruꞌuj rukꞌ tixqꞌue li quicꞌ saꞌ xbe̱neb li xucub li cuanqueb saꞌ li artal li nacꞌateꞌ cuiꞌ li mayej. Ut li quicꞌ li ta̱elaꞌa̱nk tixhoy saꞌ xto̱n li artal.

31 Ut ta̱risi lix xe̱bul joꞌ nak nequeꞌrisi lix xe̱bul li xul li nequeꞌxqꞌue chokꞌ xmayej re xcꞌambaleb rib saꞌ usilal riqꞌuin li Dios. Ut laj tij tixqꞌue saꞌ xbe̱n li artal ut tixcꞌat. Ut aꞌanak jun li sununquil mayej ta̱cuulak chiru li Ka̱cuaꞌ. Riqꞌuin li mayej li tixcꞌat laj tij, tixtoj rix lix ma̱c li xma̱cob ut ta̱cuyekꞌ lix ma̱c.

32 Cui tixqꞌue junak li sa̱j carner chokꞌ xmayej, tento nak tixqꞌue jun li ixki carner tzꞌakal re ru.

33 Tixqꞌue li rukꞌ saꞌ xjolom li xul li tixmayeja re xtojbal rix lix ma̱c. Ut tixcamsi saꞌ li naꞌajej li nequeꞌcamsi̱c cuiꞌ li xul li teꞌcꞌatekꞌ chokꞌ mayej.

34 Ut chirix aꞌan laj tij tixcꞌam caꞌchꞌinak li quicꞌ ut tixqꞌue li quicꞌ saꞌ xbe̱neb li xucub li cuanqueb saꞌ li artal li nacꞌateꞌ cuiꞌ li mayej. Ut li quicꞌ li ta̱elaꞌa̱nk tixhoy saꞌ xto̱n li artal.

35 Ut ta̱risi lix xe̱bul li xul joꞌ nak nequeꞌrisi lix xe̱bul li xul li nequeꞌxqꞌue chokꞌ xmayej re xcꞌambaleb rib saꞌ usilal riqꞌuin li Dios. Ut laj tij tixqꞌue saꞌ xbe̱n li artal ut tixcꞌat. Ut aꞌanak jun li cꞌatbil mayej chiru li Ka̱cuaꞌ. Riqꞌuin li mayej li tixcꞌat laj tij, tixtoj rix lix ma̱c li quima̱cob ut ta̱cuyekꞌ xma̱c.

© 2019, Wycliffe Bible Translators. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ