Levítico 27 - Li Santil hu

Li cꞌaꞌak re ru kꞌaxtesinbil re li Dios

¹ Li Ka̱cuaꞌ quia̱tinac riqꞌuin laj Moisés ut quixye re:

² —Tat-a̱tinak riqꞌuineb laj Israel ut ta̱ye reheb chi joꞌcaꞌin. Cui junak li cristian naxyechiꞌi li cꞌaꞌak re ru re li Ka̱cuaꞌ naru naxtoj riqꞌuin tumin li cꞌaꞌru quixyechiꞌi. Aꞌan aꞌin li joꞌ qꞌuial tento xtojbal:

³ Cui li quiyechiꞌi̱c, aꞌan cui̱nk li ac xba̱nu junmay chihab toj ta̱cuulak oxcꞌa̱l chihab (60) tento xtojbal laje̱b roxcꞌa̱l (50) chi tumin plata joꞌ xbisbal li tumin re lix tabernáculo li Ka̱cuaꞌ.

⁴ Abanan cui li quiyechiꞌi̱c, aꞌan ixk, tento xtojbal laje̱b xcaꞌcꞌa̱l (30) chi tumin plata.

⁵ Abanan cui li quiyechiꞌi̱c, aꞌan chꞌina al ut cuan o̱b chihab re nacuulac toj saꞌ li junmay chihab, tento xtojbal junmay chi tumin plata. Abanan, cui xkaꞌal li quiyechiꞌi̱c, tento xtojbal laje̱b chi tumin plata.

⁶ Abanan cui li quiyechiꞌi̱c, aꞌan te̱lom ut cuan jun po re nacuulac toj saꞌ li o̱b chihab tento xtojbal o̱b chi tumin plata. Abanan cui xkaꞌal, tento xtojbal oxib chi tumin plata.

⁷ Cui li jun aꞌan cui̱nk ut cuan numenak oxcꞌa̱l (60) chihab re, tento xtojbal oꞌlaju (15) chi tumin plata. Abanan cui ixk tento xtojbal laje̱b chi tumin plata.

⁸ Ut cui li quiyechiꞌin re li Ka̱cuaꞌ nebaꞌ ut incꞌaꞌ tixcuy xtojbal, tento nak ta̱cꞌamekꞌ riqꞌuin laj tij. Ut laj tij, aꞌan li yal re saꞌ xbe̱n joꞌ nimal naru tixtoj.

⁹ Abanan cui li cꞌaꞌru teꞌxyechiꞌi, aꞌan xul xcomoneb li naqꞌueheꞌ chokꞌ mayej chiru li Ka̱cuaꞌ, li xul li qꞌuebil re li Ka̱cuaꞌ santobresinbilak.

¹⁰ Ut li cui̱nk li quixyechiꞌi li xul incꞌaꞌ naru naxjal ru li xul li tixqꞌue, usta cha̱bil raj li tixjal usta incꞌaꞌ. Cui ut naxba̱nu, li cuib chi xul kꞌaxtesinbilakeb re li Ka̱cuaꞌ.

¹¹ Cui ut li cui̱nk tixqꞌue junak li xul xcomon li incꞌaꞌ naqꞌueheꞌ chokꞌ mayej, tento nak li cui̱nk tixcꞌam li xul riqꞌuin laj tij.

¹² Ut laj tij tixye joꞌ nimal xtzꞌak aꞌ yal chanru li xul, ma cha̱bil malaj ut incꞌaꞌ cha̱bil. Joꞌ tixye laj tij, joꞌcan ta̱tojekꞌ.

¹³ Ut cui li cui̱nk ta̱raj tixlokꞌ cuiꞌchic li xul aꞌan, tixtoj chi tzꞌakal lix tzꞌak, ut tixqꞌue ju̱nk may ral li ju̱nk ciento saꞌ xbe̱n lix tzꞌak.

¹⁴ Cui junak naxyechiꞌi li rochoch re li Ka̱cuaꞌ, laj tij, aꞌan li ta̱yehok re joꞌ nimal xtzꞌak aꞌ yal chanru li cab, ma cha̱bil malaj ut incꞌaꞌ. Joꞌ tixye laj tij, joꞌcan ta̱tojekꞌ.

¹⁵ Cui ut li jun li quixyechiꞌi li rochoch naraj tixlokꞌ cuiꞌchic, tento nak tixtoj chi tzꞌakal lix tzꞌak ut tixqꞌue ju̱nk may ral li ju̱nk ciento saꞌ xbe̱n lix tzꞌak.

¹⁶ Cui junak naxyechiꞌi lix chꞌochꞌ re li Ka̱cuaꞌ, lix tzꞌak aꞌan aꞌ yal joꞌ qꞌuial li iyaj ta̱oc saꞌ li chꞌochꞌ. Lix tzꞌak, aꞌan laje̱b roxcꞌa̱l (50) chi tumin plata re li cuib ciento riqꞌuin junmay litro li cebada.

¹⁷ Cui ut naxyechiꞌi lix chꞌochꞌ saꞌ li chihab re sahil chꞌo̱lejil, aꞌ yal joꞌ nimal lix tzꞌak, aꞌan li tixtoj.

¹⁸ Abanan cui naxyechiꞌi lix chꞌochꞌ nak ac xnumeꞌ li chihab re sahil chꞌo̱lejil, laj tij aꞌan li ta̱yehok re joꞌ nimal lix tzꞌak, aꞌ yal jarub chihab toj ta̱cuulak li chihab re sahil chꞌo̱lejil.

¹⁹ Cui li cui̱nk li quixkꞌaxtesi lix chꞌochꞌ re li Ka̱cuaꞌ ta̱raj tixlokꞌ cuiꞌchic, tento nak tixtoj chi tzꞌakal lix tzꞌak. Ut tixqꞌue ju̱nk may ral li ju̱nk ciento saꞌ xbe̱n lix tzꞌak.

²⁰ Abanan cui ut li cui̱nk incꞌaꞌ tixlokꞌ cuiꞌchic lix chꞌochꞌ re tixcol rix, malaj ut ma̱re ta̱cꞌayi̱k re jalan cui̱nk, incꞌaꞌ chic naru tixlokꞌ.

²¹ Ut nak ta̱cana̱k libre li chꞌochꞌ saꞌ li chihab re sahil chꞌo̱lejil, li chꞌochꞌ aꞌan kꞌaxtesinbil re li Ka̱cuaꞌ. Ut ta̱cana̱k chokꞌ reheb laj tij.

²² Cui junak li cui̱nk tixkꞌaxtesi re li Ka̱cuaꞌ junak li chꞌochꞌ li quixlokꞌ, ut ma̱cuaꞌ xcomoneb li quire̱chani riqꞌuin lix yucuaꞌ,

²³ laj tij, aꞌan li ta̱yehok re joꞌ nimal xtzꞌak, aꞌ yal jarub chihab ta̱cua̱nk riqꞌuin toj ta̱cuulak li chihab re sahil chꞌo̱lejil. Ut saꞌ ajcuiꞌ li cutan aꞌan li cui̱nk tixtoj lix tzꞌak li ac yebil. Ut lix tzꞌak li chꞌochꞌ aꞌan kꞌaxtesinbil re li Ka̱cuaꞌ.

²⁴ Ut saꞌ li chihab re sahil chꞌo̱lejil li chꞌochꞌ ta̱cana̱k cuiꞌchic chokꞌ re laj e̱chal re li quicꞌayin re.

²⁵ Chixjunil lix tzꞌak li cꞌaꞌak re ru ta̱qꞌuehekꞌ aꞌ yal chanru li bisleb li nacꞌanjelac saꞌ li tabernáculo.

²⁶ Ma̱ ani naru tixyechiꞌi re li Ka̱cuaꞌ li xbe̱n xul li nayoꞌla, xban nak aꞌan ac re li Ka̱cuaꞌ. Usta cuacax, usta carner li xbe̱n li nayoꞌla, aꞌan re li Ka̱cuaꞌ.

²⁷ Cui aꞌan jun li xul li incꞌaꞌ naqꞌueheꞌ chokꞌ mayej, li cui̱nk naru tixlokꞌ cuiꞌchic ut tixtoj lix tzꞌak li naxye laj tij. Ut tixqꞌue ju̱nk may ral li ju̱nk ciento saꞌ xbe̱n lix tzꞌak li xul. Cui ut li cui̱nk incꞌaꞌ tixlokꞌ, li xul ta̱cꞌayi̱k re jalan cui̱nk ut tixtoj li joꞌ nimal xtzꞌak.

²⁸ Abanan li cꞌaꞌak re ru kꞌaxtesinbil re li Ka̱cuaꞌ chi junaj cua incꞌaꞌ naru xcꞌayinquil chi moco naru xlokꞌbal, usta cristian, usta xul, usta chꞌochꞌ, xban nak aꞌan ac kꞌaxtesinbil chi junaj cua re li Ka̱cuaꞌ.

²⁹ Cui junak cristian ac tenebanbil ca̱mc saꞌ xbe̱n incꞌaꞌ naru ta̱lokꞌekꞌ re xcolbal rix. Tento nak ta̱camsi̱k.

³⁰ Li junju̱nk saꞌ xlaje̱tkil li ru li acui̱mk li na-el saꞌ li chꞌochꞌ, joꞌ ajcuiꞌ li junju̱nk saꞌ xlaje̱tkil li ru li cheꞌ re li Ka̱cuaꞌ. Ac chꞌolchꞌo nak aꞌan re li Ka̱cuaꞌ.

³¹ Cui junak cui̱nk ta̱raj tixlokꞌ cuiꞌchic chokꞌ re, tento tixtoj chi tzꞌakal xtzꞌak ut tixqꞌue ajcuiꞌ ju̱nk may ral li ju̱nk ciento saꞌ xbe̱n lix tzꞌak.

³² Li junju̱nk saꞌ xlaje̱tkil li queto̱mk, usta cuacax usta carner, re li Ka̱cuaꞌ. Nak yo̱ rajlanquileb li xul, li junju̱nk saꞌ xlaje̱tkil re li Ka̱cuaꞌ.

³³ Laj e̱chal re li xul incꞌaꞌ naru tixjal ruheb li xul, chi moco tixqꞌue ru̱chileb. Cui ut naxjal ruheb li xul, li cuib chi xul kꞌaxtesinbilakeb re li Ka̱cuaꞌ ut incꞌaꞌ chic naru tixlokꞌeb.

³⁴ Aꞌaneb aꞌin li chakꞌrab li quixqꞌue li Dios reheb laj Israel, li quixqꞌue re laj Moisés saꞌ li tzu̱l Sinaí.