Levítico 26 - Li Santil hu

Li Ka̱cuaꞌ ta̱rosobtesiheb li nequeꞌxba̱nu li cꞌaꞌru naxye

¹ Li Ka̱cuaꞌ Dios quixye: —Me̱yi̱b e̱jalanil dios chi moco e̱pechꞌbil dios, chi moco te̱yi̱b e̱dios pec re te̱lokꞌoniheb. Chi moco chiruheb li pec te̱yi̱b junak retalil e̱dios xban nak la̱in li Ka̱cuaꞌ le̱ Dios.

² Cheqꞌuehak ban xlokꞌal li hiloba̱l cutan ut che-oxlokꞌihak lin tabernáculo. La̱in li Ka̱cuaꞌ ninyehoc re aꞌin.

³ Cui te̱ba̱nu li cꞌaꞌru naxye saꞌ li chakꞌrab li xinqꞌue e̱re, ut cui te̱ba̱nu li cꞌaꞌru xinye e̱re,

⁴ la̱in tintakla li hab saꞌ ruchichꞌochꞌ saꞌ xkꞌehil. Ta̱e̱lk chi us li acui̱mk saꞌ li chꞌochꞌ. Ut eb li cheꞌ teꞌu̱chi̱nk.

⁵ Nabal li ru li trigo tixqꞌue. Toj yo̱kex ajcuiꞌ chixsicꞌbal nak ta̱cuulak xkꞌehil xsicꞌbal ru li uvas. Ut nabal ru li uvas tixqꞌue. Toj ma̱ji ajcuiꞌ nequechoy xsicꞌbal ru li uvas nak ta̱cuulak xkꞌehil li a̱uc. Textzaca̱nk chi us toj retal ta̱cꞌojla̱k e̱chꞌo̱l. Sahak saꞌ le̱ chꞌo̱l ut cua̱nkex saꞌ xya̱lal saꞌ le̱ naꞌaj.

⁶ La̱in texinqꞌue chi cua̱nc saꞌ tuktu̱quil usilal saꞌ le̱ naꞌaj. Sa texcua̱rk xban nak ma̱ ani ta̱seꞌbesi̱nk e̱re. La̱in tincuisi li joskꞌ aj xul saꞌ le̱ tenamit ut ma̱ ani ta̱oc e̱riqꞌuin chi pletic.

⁷ La̱ex te̱ra̱linaheb li xicꞌ nequeꞌiloc e̱re ut te̱camsiheb chi chꞌi̱chꞌ.

⁸ Yal o̱b ajcuiꞌ e̱re la̱ex te̱ra̱linaheb jun ciento li xicꞌ nequeꞌiloc e̱re. Ut jun ciento e̱re la̱ex teꞌra̱linaheb laje̱b mil. Ut te̱camsiheb chi chꞌi̱chꞌ li xicꞌ nequeꞌiloc e̱re.

⁹ La̱in tinba̱nu usilal e̱re. Texcuosobtesi ut texnabalokꞌ. Junelic xakxo̱k xcuanquil li contrato li quinba̱nu e̱riqꞌuin.

¹⁰ Toj yo̱kex ajcuiꞌ chixtzacanquil li xesicꞌ jun haber ut li joꞌ qꞌuial chic li ma̱jiꞌ nequechoy te̱risi saꞌ li cab li nequexoc cuiꞌ li ru le̱ racui̱mk re te̱xoc cuiꞌ li toj yo̱kex chixsicꞌbal.

¹¹ La̱in tincua̱nk saꞌ e̱ya̱nk ut incꞌaꞌ texintzꞌekta̱na.

¹² La̱in junelic cua̱nkin e̱riqꞌuin. La̱inak le̱ Dios ut la̱exak lin tenamit.

¹³ La̱in li Ka̱cuaꞌ le̱ Dios. La̱in quin-isin chak e̱re Egipto re nak incꞌaꞌ chic texcua̱nk chokꞌ rahobtesinbil mo̱s. Chanchan nak cuan li yugo saꞌ e̱cux nak quexcuan rubel xcuanquileb. Abanan la̱in quexcuisi rubel xcuanquileb. Anakcuan naru te̱taksi le̱ riloba̱l nak texbe̱k.

Li Ka̱cuaꞌ tixqꞌue chixtojbal xma̱queb li tenamit cui teꞌxkꞌet lix chakꞌrab

¹⁴ Abanan cui la̱ex incꞌaꞌ nequerabi li cꞌaꞌru ninye ut cui incꞌaꞌ nequeba̱nu li naxye saꞌ li chakꞌrab li xinqꞌue e̱re, texinqꞌue chixtojbal e̱ma̱c.

¹⁵ Cui la̱ex te̱tzꞌekta̱na lin chakꞌrab ut incꞌaꞌ te̱cꞌu̱luban ut cui incꞌaꞌ nequeqꞌue saꞌ e̱chꞌo̱l li cꞌaꞌru ninye ut cui la̱ex te̱risi xcuanquil li contrato li quinba̱nu e̱riqꞌuin,

¹⁶ la̱in texinqꞌue chixtojbal rix le̱ ma̱c. Xiu xiu chic cua̱nkex. Ut la̱in tintakla chak li raylal saꞌ e̱be̱n. Tintakla li yajel li incꞌaꞌ naru xbanbal. Ut tintakla li caki yajel saꞌ e̱be̱n tixlubtesi le̱ tibel ut ta̱rocsi xyajel li xnakꞌ e̱ru. Tex-a̱uk raj chic, abanan moco te̱tzaca ta chic. Aꞌaneb ban chic li xicꞌ nequeꞌiloc e̱re teꞌtzaca̱nk re.

¹⁷ La̱in incꞌaꞌ chic texintenkꞌa. Texincanab e̱junes re nak li xicꞌ nequeꞌiloc e̱re teꞌnumta̱k saꞌ e̱be̱n ut teꞌtakla̱nk saꞌ e̱be̱n. Tex-e̱lelik chiruheb usta incꞌaꞌ yo̱keb che̱ra̱linanquil.

¹⁸ Abanan cui toj incꞌaꞌ ajcuiꞌ tex-abi̱nk chicuu nak acak xecꞌul chixjunil li raylal aꞌin, la̱in tinqꞌue xtzꞌakob lix tojbal rix le̱ ma̱c. Cuukub sut chic te̱toj rix le̱ ma̱c.

¹⁹ La̱in tincuisi le̱ kꞌetkꞌetil ut incꞌaꞌ chic te̱nimobresi e̱rib. Incꞌaꞌ chic tixqꞌue li hab. Ut ta̱chakik le̱ chꞌochꞌ ut ta̱cacuu̱k joꞌ xcacuil li chꞌi̱chꞌ bronce.

²⁰ Ma̱cꞌaꞌak aj e nak te̱tacuasi e̱rib chi cꞌanjelac xban nak incꞌaꞌ chic ta̱e̱lk li acui̱mk saꞌ le̱ naꞌaj ut incꞌaꞌ chic teꞌu̱chi̱nk li cheꞌ.

²¹ Ut cui toj yo̱kex ajcuiꞌ xkꞌetkꞌetinquil e̱rib chicuu ut incꞌaꞌ te̱ba̱nu li cꞌaꞌru ninye, la̱in texinqꞌue cuiꞌchic cuukub sut chixtojbal e̱ma̱c.

²² Tintakla li joskꞌ aj xul saꞌ e̱ya̱nk ut telajeꞌxcamsiheb le̱ cocꞌal ut teꞌxcamsi le̱ queto̱mk. Moco qꞌuihex ta chic texcana̱k. Ut ma̱ ani chic teꞌnumekꞌ saꞌ eb li be.

²³ Ut cui ac xecꞌul chixjunil li raylal aꞌin, abanan cui toj incꞌaꞌ nequecꞌul le̱ kꞌusbal ut xicꞌ nequine̱ril,

²⁴ la̱in tinjoskꞌokꞌ e̱riqꞌuin ut cuukub sut chic li raylal li tintakla saꞌ e̱be̱n re xtojbal rix le̱ ma̱c.

²⁵ La̱in tintaklaheb li xicꞌ nequeꞌiloc e̱re chi pletic e̱riqꞌuin re xtojbal rix le̱ ma̱c nak xekꞌet lin contrato. Nak texxic saꞌ eb li tenamit chixcolbal e̱rib, la̱in tintakla li rax ca̱mc saꞌ e̱be̱n ut la̱ex te̱kꞌaxtesi e̱rib saꞌ rukꞌeb li xicꞌ nequeꞌiloc e̱re.

²⁶ Incꞌaꞌ chic ta̱cua̱nk chi tzꞌakal le̱ tzacae̱mk. Laje̱b chi ixk teꞌxyi̱b li caxlan cua saꞌ jun chi horno. Ajlanbil chic li caxlan cua li te̱cꞌul. Ut nak ac xecuaꞌ chixjunil, incꞌaꞌ ta̱tzꞌaklok e̱re.

²⁷ Cui toj te̱kꞌetkꞌeti e̱rib chicuu nak ac xecꞌul li raylal aꞌin, ut incꞌaꞌ te̱ba̱nu li cꞌaꞌru ninye,

²⁸ ta̱numta̱k lin joskꞌil saꞌ e̱be̱n. Cuukub sut chic li raylal li tinqꞌue saꞌ e̱be̱n.

²⁹ Textzꞌoca̱k toj retal te̱tiu xtibeleb le̱ ralal e̱cꞌajol.

³⁰ La̱in tintꞌan li naꞌajej li najt xteram li nequexlokꞌonin cuiꞌ. Ut tinjucꞌ li artal li nequecꞌat cuiꞌ le̱ pom. Ut la̱in tintu̱b le̱ camenak saꞌ xbe̱neb le̱ yi̱banbil dios, li moco yoꞌyo̱queb ta. Ut xicꞌ chic texcuil.

³¹ La̱in tinjuqꞌuiheb le̱ tenamit ut tinsacheb chi junaj cua eb li naꞌajej li nequexlokꞌonin cuiꞌ. Ut incꞌaꞌ chic tincꞌul le̱ sununquil ban li nequecꞌat chicuu.

³² La̱in tinsach ru le̱ naꞌaj. Ut teꞌsach xchꞌo̱leb li xicꞌ nequeꞌiloc e̱re li cuanqueb aran.

³³ La̱in tinjeqꞌui e̱ru saꞌ xya̱nkeb li xni̱nkal ru tenamit. Ut tebinqꞌue li xicꞌ nequeꞌiloc e̱re che̱ra̱linanquil riqꞌuin chꞌi̱chꞌ. Tinsach ru le̱ naꞌaj ut juqꞌuinbilakeb chic le̱ tenamit.

³⁴ Ut li chꞌochꞌ ta̱sahokꞌ xchꞌo̱l chi hila̱nc chixjunil li chihab nak cua̱nkex chak saꞌ xtenamiteb li xicꞌ nequeꞌiloc e̱re. Li chꞌochꞌ aꞌin ta̱hila̱nk.

³⁵ Chixjunil li chihab nak ma̱ anihakex saꞌ li naꞌajej aꞌin, li chꞌochꞌ ta̱sahokꞌ xchꞌo̱l ut ta̱hila̱nk xban nak la̱ex incꞌaꞌ xeqꞌue chi hila̱nc saꞌ li chihab nak tento raj xhilan.

³⁶ Ut eb li incꞌaꞌ teꞌsachekꞌ ru la̱in tinqꞌue xxiuheb saꞌ li naꞌajej li cua̱nkeb cuiꞌ. Teꞌxucuak chiruheb li xicꞌ nequeꞌiloc reheb. Ut teꞌe̱lelik yal xban xya̱b li xak cheꞌ nak na-ecꞌasi̱c xban li ikꞌ. Teꞌa̱linak xban xxiuheb ut teꞌtꞌanekꞌ xban xxiuheb usta ma̱ ani yo̱k chi a̱lina̱nc reheb.

³⁷ Nak yo̱keb chi e̱lelic teꞌxtichi ribeb chi ribileb rib usta ma̱ ani yo̱k chi a̱lina̱nc reheb. Ut incꞌaꞌ teꞌru̱k chixcolbal ribeb chiruheb li xicꞌ nequeꞌiloc reheb.

³⁸ La̱ex tex-osokꞌ saꞌ xya̱nkeb li xni̱nkal ru tenamit. Ut tex-osokꞌ saꞌ xnaꞌajeb li xicꞌ nequeꞌiloc e̱re.

³⁹ Li joꞌ qꞌuialex li incꞌaꞌ tex-osokꞌ kꞌaxal ra te̱cꞌul ut tacuasinbilakex saꞌ lix naꞌajeb li xicꞌ nequeꞌiloc e̱re xban le̱ ma̱c ut xban lix ma̱queb le̱ naꞌ e̱yucuaꞌ.

⁴⁰ La̱ex ta̱yotꞌekꞌ e̱chꞌo̱l xban li ma̱c queba̱nu ut xban li ma̱c queꞌxba̱nu chak le̱ naꞌ e̱yucuaꞌ nak quineꞌxtzꞌekta̱na ut queꞌxkꞌet lin chakꞌrab.

⁴¹ Ut la̱ex te̱qꞌue retal nak xma̱c aꞌan nak quebintakla saꞌ xtenamiteb li xicꞌ nequeꞌiloc e̱re. Nak te̱cubsi e̱rib ut te̱cꞌu̱luban saꞌ e̱be̱n lix tojbal rix le̱ ma̱c,

⁴² ta̱julticokꞌ cue li contrato li quinba̱nu riqꞌuineb laj Jacob, laj Isaac, ut laj Abraham. Ut ta̱julticokꞌ cue li chꞌochꞌ.

⁴³ Ma̱ ani chic cua̱nk aran ut li chꞌochꞌ ta̱sahokꞌ saꞌ xchꞌo̱l chi hila̱nc. Tento nak la̱ex aj Israel te̱cꞌu̱luban saꞌ e̱be̱n xtojbal rix li ma̱c queba̱nu nak quekꞌet lin chakꞌrab ut xicꞌ queril li quexintakla cuiꞌ.

⁴⁴ Usta xetzꞌekta̱na lin chakꞌrab ut usta cuanquex saꞌ xtenamiteb li xicꞌ nequeꞌiloc e̱re, abanan la̱in incꞌaꞌ texintzꞌekta̱na, chi moco texsachk saꞌ inchꞌo̱l. Incꞌaꞌ tinsach e̱ru xban nak toj cuan saꞌ inchꞌo̱l li contrato quinba̱nu riqꞌuineb le̱ xeꞌto̱nil yucuaꞌ. La̱in li Ka̱cuaꞌ le̱ Dios.

⁴⁵ Ta̱julticokꞌ ban cue li contrato li quinba̱nu riqꞌuineb le̱ xeꞌto̱nil yucuaꞌ nak queꞌcuisi chak saꞌ li tenamit Egipto chiruheb li xni̱nkal ru tenamit re nak la̱inak chic lix Dioseb, chan li Ka̱cuaꞌ.

⁴⁶ Aꞌaneb aꞌin li chakꞌrab, li tijleb ut lix taklanquileb li quixqꞌue li Ka̱cuaꞌ re laj Moisés saꞌ li tzu̱l Sinaí chokꞌ reheb laj Israel.