Levítico 25 - Li Santil hu

Li chihab re hila̱nc ut li chihab re sahil chꞌo̱lejil

¹ Li Ka̱cuaꞌ quia̱tinac riqꞌuin laj Moisés saꞌ li tzu̱l Sinaí ut quixye re:

² —Ta̱ye reheb li ralal xcꞌajol laj Israel chi joꞌcaꞌin: Nak tex-oc saꞌ li naꞌajej li tinqꞌue e̱re, tento te̱qꞌue chi hila̱nc li chꞌochꞌ re xqꞌuebal xlokꞌal li Ka̱cuaꞌ.

³ Cuakib chihab naru tex-a̱uk saꞌ li chꞌochꞌ ut te̱sabesi ru li acui̱mk uvas ut te̱sicꞌ ajcuiꞌ li ru.

⁴ Abanan saꞌ li xcuuk chihab te̱qꞌue chi hila̱nc li chꞌochꞌ re xqꞌuebal xlokꞌal li Ka̱cuaꞌ. Incꞌaꞌ tex-a̱uk saꞌ li chꞌochꞌ chi moco te̱sabesi li acui̱mk uvas.

⁵ Incꞌaꞌ te̱xoc li ru li trigo li yal nayoꞌla xjunes xban li iyaj li natꞌaneꞌ nak nequexoc ru li acui̱mk. Ut incꞌaꞌ te̱sabesi li uvas, chi moco te̱sicꞌ li ru. Tento nak ta̱hila̱nk li chꞌochꞌ chiru li chihab aꞌan.

⁶ Usta incꞌaꞌ xex-au, abanan ta̱tzꞌaklok le̱ tzacae̱mk li ta̱yoꞌla̱k yal xjunes. Aꞌan li ta̱tzaca la̱at joꞌ eb ajcuiꞌ chixjunileb la̱ mo̱s, li lokꞌbileb joꞌ eb ajcuiꞌ li incꞌaꞌ lokꞌbileb. Ut aꞌan ajcuiꞌ li teꞌxtzaca li jalaneb xtenamit li cuanqueb saꞌ e̱ya̱nk.

⁷ Ut aꞌan ajcuiꞌ teꞌxtzaca le̱ queto̱mk ut li xul li cuanqueb saꞌ qꞌuicheꞌ. Chixjunil li ta̱e̱lk saꞌ li chꞌochꞌ chi incꞌaꞌ aubil, ta̱cꞌanjelak chokꞌ re le̱ tzacae̱mk.

⁸ Yo̱kex rajlanquileb li chihab chi cuukutk toj retal ta̱cuulak li bele̱b roxcꞌa̱l (49) chihab.

⁹ Ut saꞌ li laje̱b xbe li xcuuk li po re li chihab aꞌan, te̱ya̱basiheb li trompeta saꞌ chixjunil li tenamit. Aꞌan li cutan nak nequexninkꞌei̱c ut nequexmayejac re xtojbal rix le̱ ma̱c.

¹⁰ Te̱qꞌue xlokꞌal li xlaje roxcꞌa̱l li chihab (50) xban nak li chihab aꞌan santobresinbil ut re jun sahil chꞌo̱lejil. Saꞌ li chihab aꞌan te̱ye resil nak chixjunileb le̱ lokꞌbil mo̱s teꞌcana̱k libre re nak teꞌsukꞌi̱k riqꞌuineb li rechꞌalal. Ut te̱ye ajcuiꞌ resil nak eb li queꞌxcꞌayi xchꞌochꞌeb teꞌre̱chani cuiꞌchic.

¹¹ Li chihab aꞌan re jun sahil chꞌo̱lejil. Saꞌ li chihab aꞌan incꞌaꞌ tex-a̱uk chi moco te̱sicꞌ ru li trigo li nayoꞌla yal xjunes, chi moco te̱sicꞌ ru li uvas li incꞌaꞌ te̱sabesi.

¹² Chixjunil li chihab aꞌan re jun sahil chꞌo̱lejil ut santobresinbil chokꞌ e̱re la̱ex. Ut te̱tzaca ru li acui̱mk li xyoꞌla yal xjunes.

¹³ Saꞌ li chihab aꞌin, li re sahil chꞌo̱lejil, la̱ex te̱re̱chani cuiꞌchic le̱ chꞌochꞌ.

¹⁴ Cui te̱cꞌayi le̱ chꞌochꞌ reheb le̱ rech tenamitil, malaj ut te̱lokꞌ e̱chꞌochꞌ, me̱balakꞌi e̱rib chi ribil e̱rib.

¹⁵ Lix xtzꞌak li chꞌochꞌ aꞌan aꞌ yal joꞌ najtil ta̱cua̱nk li chꞌochꞌ riqꞌuin li ani ta̱lokꞌok re ut aꞌ yal jarub sut ta̱e̱lk li racui̱mk saꞌ li chꞌochꞌ aꞌan toj ta̱cuulak li chihab re sahil chꞌo̱lejil.

¹⁶ Cui toj cuan nabal li chihab, toj ta̱cuulak li chihab re sahil chꞌo̱lejil, terto xtzꞌak li chꞌochꞌ. Abanan cui incꞌaꞌ chic qꞌui li chihab, cubenak xtzꞌak li chꞌochꞌ xban nak moco nabal sut ta chic teꞌkꞌolok saꞌ li chꞌochꞌ aꞌan.

¹⁷ Me̱balakꞌi e̱rib chi ribil e̱rib. Chexucua ban cuu la̱in li Ka̱cuaꞌ le̱ Dios.

¹⁸ Cheba̱nu chixjunil li chakꞌrab li quinqꞌue e̱re ut chepa̱b le̱ taklanquil inban re nak ma̱cꞌaꞌ ta̱chꞌiꞌchꞌiꞌi̱nk e̱re saꞌ le̱ naꞌaj.

¹⁹ Ta̱e̱lk chi us li acui̱mk saꞌ le̱ chꞌochꞌ ut ta̱cua̱nk chi nabal le̱ tzacae̱mk. Ut texcua̱nk chi tuktu le̱ chꞌo̱l saꞌ li naꞌajej aꞌin.

²⁰ Ma̱re te̱ye, “¿Cꞌaꞌru takatzaca saꞌ xcuuk li chihab cui incꞌaꞌ naru toa̱uk chi moco ta̱ru̱k takaxoc ru li kacui̱mk saꞌ li chihab aꞌan?”

²¹ La̱in texcuosobtesi saꞌ cuak li chihab re nak ta̱cua̱nk nabal le̱ tzacae̱mk re oxib chihab.

²² Nak yo̱kex chi a̱uc saꞌ li xcuakxak li chihab toj yo̱kex ajcuiꞌ chixtzacanquil li xexoc saꞌ xcuak li chihab. Ut toj yo̱kex ajcuiꞌ chixcuaꞌbal li xexoc nak tex-oc cuiꞌchic chi kꞌoloc saꞌ li xbele li chihab.

²³ Incꞌaꞌ naru te̱cꞌayi li chꞌochꞌ chi junaj cua xban nak cue la̱in. La̱ex yal numelex arin. Chanchanex cuulaꞌ.

²⁴ Chijulticokꞌ e̱re nak nacꞌayiman junak chꞌochꞌ, laj e̱chal re naru tixlokꞌ cuiꞌchic xcaꞌ sut li naꞌajej.

²⁵ Cui ta̱nebaꞌokꞌ junak la̱ cuech tenamitil toj retal nak tixcꞌayi lix chꞌochꞌ, tento nak li tzꞌakal rechꞌalal tixlokꞌ cuiꞌchic li chꞌochꞌ re tixcol rix li chꞌochꞌ li quixcꞌayi li rechꞌalal.

²⁶ Cui junak cui̱nk ma̱cꞌaꞌ li rechꞌalal li ta̱lokꞌok re li chꞌochꞌ, cui tixtau xtumin mokon, ta̱ru̱k tixlokꞌ cuiꞌchic li naꞌajej.

²⁷ Tixtoj lix tzꞌak li chꞌochꞌ li joꞌ qꞌuial chic li tento tixtoj. Tixbir rix jarub chihab chic ma̱jiꞌ nacuulac li chihab re sahil chꞌo̱lejil nak tixcꞌul raj cuiꞌchic lix naꞌaj.

²⁸ Abanan cui incꞌaꞌ ta̱ru̱k tixtau lix tumin re tixlokꞌ cuiꞌchic lix chꞌochꞌ, li naꞌajej aꞌan ta̱cana̱k chokꞌ re li quilokꞌoc re toj ta̱cuulak li chihab re sahil chꞌo̱lejil. Saꞌ li chihab aꞌan, li chꞌochꞌ ta̱kꞌaxtesi̱k cuiꞌchic re laj e̱chal re.

²⁹ Cui junak li cui̱nk tixcꞌayi li rochoch li cuan saꞌ junak li tenamit sutsu saꞌ tzꞌac, li cui̱nk aꞌan naru naxlokꞌ cuiꞌchic li rochoch li ac xcꞌayi. Chiru li jun chihab naru tixlokꞌ cuiꞌchic li rochoch.

³⁰ Abanan cui incꞌaꞌ tixlokꞌ chiru li jun chihab, incꞌaꞌ chic naru tixlokꞌ cui ta̱numekꞌ li jun chihab. Li cab ta̱cana̱k chi junaj cua chokꞌ re li ani xlokꞌoc re ut reheb li ralal xcꞌajol. Incꞌaꞌ chic ta̱kꞌaxtesi̱k saꞌ li chihab re sahil chꞌo̱lejil.

³¹ Abanan eb li cab li cuanqueb saꞌ eb li cocꞌ tenamit li moco sutsu̱queb ta saꞌ tzꞌac, chanchanakeb li cꞌaleba̱l. Laj e̱chal re naru tixlokꞌ cuiꞌchic li cab ut ta̱kꞌaxtesi̱k cuiꞌchic re saꞌ li chihab re sahil chꞌo̱lejil.

³² Ut chirix lix tenamiteb laj levita, joꞌcaꞌin teꞌxba̱nu. Naru teꞌxlokꞌ cuiꞌchic lix naꞌajeb yalak jokꞌe saꞌ li naꞌajej li queꞌtzꞌak eb aꞌan.

³³ Cui junak cui̱nk tixlokꞌ li rochoch laj levita, li cui̱nk aꞌan tento ta̱e̱lk saꞌ li cab nak ta̱cuulak li chihab re sahil chꞌo̱lejil xban nak lix tenamiteb aꞌan, aꞌan li qꞌuebil reheb laj levita saꞌ xya̱nkeb laj Israel.

³⁴ Abanan lix naꞌajeb lix queto̱mk li cuan chixjun sutam lix tenamit incꞌaꞌ naru teꞌxcꞌayi xban nak li naꞌajej aꞌan reheb laj levita chi junaj cua.

³⁵ Cui junak le̱ rech tenamitil ta̱nebaꞌokꞌ ut tixtzꞌa̱ma xtenkꞌanquil e̱riqꞌuin, tento nak la̱ex te̱tenkꞌa re nak ta̱ru̱k ta̱cua̱nk saꞌ e̱ya̱nk. Te̱ba̱nu re joꞌ nequeba̱nu reheb li jalaneb xtenamit malaj ut li yal numecꞌ re, re nak ta̱ru̱k ta̱cua̱nk saꞌ e̱ya̱nk.

³⁶ Me̱patzꞌ ral li tumin li te̱qꞌue chi toꞌ re le̱ rech tenamitil chi moco te̱makꞌ li cꞌaꞌru reheb. Qꞌuehomak ban xnaꞌaj le̱ rech tenamitil saꞌ le̱ rochoch. Ut chexucua ru li Ka̱cuaꞌ le̱ Dios.

³⁷ Me̱patzꞌ ral li tumin li te̱qꞌue chi toꞌ re le̱ rech tenamitil, chi moco te̱qꞌue chi terto lix cua.

³⁸ La̱in li Ka̱cuaꞌ le̱ Dios. La̱in quin-isin chak e̱re saꞌ li naꞌajej Egipto re nak tinqꞌue e̱re li naꞌajej Canaán ut re nak la̱inak le̱ Dios.

³⁹ Cui junak le̱ rech tenamitil ta̱nebaꞌokꞌ nak cuan saꞌ le̱ rochoch ut tixcꞌayi rib chi cꞌanjelac chokꞌ e̱mo̱s, me̱qꞌue saꞌ cacuil cꞌanjel joꞌ junak lokꞌbil mo̱s.

⁴⁰ Te̱cꞌul joꞌ junak tojbil mo̱s malaj ut joꞌ jun li jalan xtenamit. Ta̱cꞌanjelak che̱ru toj saꞌ li chihab re sahil chꞌo̱lejil.

⁴¹ Saꞌ eb li cutan aꞌan, li cui̱nk rochbeneb li ralal xcꞌajol teꞌe̱lk saꞌ e̱rochoch ut teꞌxic cuiꞌchic saꞌ xnaꞌajeb lix te̱paleb lix xeꞌto̱nil yucuaꞌeb.

⁴² Eb laj Israel, aꞌaneb lin mo̱s la̱in li Ka̱cuaꞌ. La̱in quin-isin chak reheb saꞌ li naꞌajej Egipto. Incꞌaꞌ naru teꞌcꞌayi̱k chokꞌ lokꞌbil mo̱s.

⁴³ Incꞌaꞌ naru textakla̱nk saꞌ xbe̱neb saꞌ joskꞌil. Te̱xucua ban cuu la̱in le̱ Dios.

⁴⁴ Naru te̱lokꞌ le̱ mo̱s, joꞌ ixk joꞌ cui̱nk, saꞌ xya̱nkeb li jalan xtenamiteb li cuanqueb che̱jun sutam.

⁴⁵ Naru te̱lokꞌ chokꞌ e̱mo̱s li jalan xtenamiteb li cuanqueb saꞌ e̱ya̱nk. Ut naru ajcuiꞌ te̱lokꞌ li ralal xcꞌajol eb aꞌan li teꞌyoꞌla̱k saꞌ le̱ tenamit.

⁴⁶ Eb aꞌan teꞌcana̱k chi cꞌanjelac chiruheb le̱ ralal e̱cꞌajol chi junelic. Abanan incꞌaꞌ textakla̱nk chi cau saꞌ xbe̱neb le̱ rech tenamitil.

⁴⁷ Ma̱re junak li jalan xtenamit ta̱biomokꞌ saꞌ e̱ya̱nk. Ut ma̱re junak aj Israel ta̱nebaꞌokꞌ ut tixcꞌayi rib joꞌ mo̱s re li jalan xtenamit li xbiomoꞌ malaj ut tixcꞌayi rib riqꞌuin junak li rechꞌalal li jalan xtenamit.

⁴⁸ Nak ac xcꞌayi rib, toj naru ta̱lokꞌekꞌ cuiꞌchic. Junak li ras malaj li ri̱tzꞌin naru nalokꞌoc re.

⁴⁹ Li rican malaj ut junak li ralal li rican, malaj ut jalan rechꞌalal naru tixlokꞌ. Malaj ut cui naxtau lix tumin li cui̱nk aꞌan naru tixtoj li tumin li quixcꞌayi cuiꞌ rib.

⁵⁰ Li cui̱nk tixbir rix jarub chihab ac xcꞌanjelac ut jarub chihab chic ma̱jiꞌ nacuulac li chihab re sahil chꞌo̱lejil. Ut lix tojbal li tixcꞌul, aꞌan juntakꞌe̱t riqꞌuin xtojbal junak li mo̱s.

⁵¹ Cui toj nabal li chihab ma̱jiꞌ nacuulac li chihab re sahil chꞌo̱lejil, tento nak tixtoj nabal aꞌ yal joꞌ nimal li quitojeꞌ cuiꞌ nak quilokꞌeꞌ.

⁵² Cui yal cuib oxib chihab chic ma̱ nacuulac li chihab re sahil chꞌo̱lejil, tixbir rix joꞌ nimal tixtoj aꞌ yal jarub chihab quicꞌanjelac riqꞌuin li quilokꞌoc re.

⁵³ Laj e̱chal re tixba̱nu re joꞌ naxba̱nu reheb li mo̱s li xqꞌue xcꞌanjel re jun chihab. Ut incꞌaꞌ naru tixrahobtesi.

⁵⁴ Cui incꞌaꞌ nalokꞌeꞌ cuiꞌchic saꞌ eb li cutan aꞌan, li cui̱nk rochbeneb li ralal xcꞌajol teꞌcana̱k libre saꞌ li chihab re sahil chꞌo̱lejil.

⁵⁵ Eb laj Israel, aꞌaneb lin mo̱s la̱in. Cueheb la̱in. La̱in quin-isin reheb aran Egipto. La̱in li Ka̱cuaꞌ lix Dioseb.