Levítico 22 - Li Santil hu

¹ Li Ka̱cuaꞌ quia̱tinac riqꞌuin laj Moisés ut quixye re:

² —Ta̱ye re laj Aarón ut reheb li ralal nak teꞌxqꞌue xlokꞌal li santil mayej li nequeꞌxkꞌaxtesi chicuu eb laj Israel re nak incꞌaꞌ teꞌxmux ru lin santil cꞌabaꞌ. La̱in li Ka̱cuaꞌ ninyehoc re aꞌin.

³ Chalen anakcuan ut chi junelic cui muxbil ru junak ralal xcꞌajol nak ta̱oc chixqꞌuebal li lokꞌlaj mayej li queꞌxkꞌaxtesi cue eb laj Israel, laj tij aꞌan ta̱isi̱k chi cꞌanjelac chicuu. La̱in li Ka̱cuaꞌ ninyehoc re aꞌin.

⁴ Ma̱ jun reheb li ralal xcꞌajol laj Aarón li cuan li yajel saklep chirix malaj ut na-el xyaꞌal lix tzꞌejcual naru tixtzaca li lokꞌlaj mayej chi toj ma̱jiꞌ xsantobresi rib. Joꞌcan ajcuiꞌ li tixmux rib riqꞌuin xchꞌeꞌbal li cꞌaꞌru quinak camenak chiru malaj ut cui xchꞌeꞌ li ani yo̱ chi e̱lc xyaꞌal lix tzꞌejcual.

⁵ Ut incꞌaꞌ naru tixtzaca li lokꞌlaj mayej cui xchꞌeꞌ junak li xul xcomoneb li nequeꞌxjucuqui ribeb malaj ut junak li cristian muxbil ru, aꞌ yal cꞌaꞌru li xmux cuiꞌ rib.

⁶ Cui junak laj tij tixchꞌeꞌ li cꞌaꞌru muxbil ru, li jun aꞌan muxbil ru ta̱cana̱k toj ta̱oc li kꞌojyi̱n. Ut incꞌaꞌ naru tixtzaca li mayejanbil tzacae̱mk toj ta̱ati̱nk.

⁷ Nak ac x-oc li kꞌojyi̱n, incꞌaꞌ chic muxbil ru ut naru tixtzaca li tzacae̱mk santobresinbil xban nak aꞌan xtzacae̱mk.

⁸ Incꞌaꞌ naru tixtzaca xtibel li xul li yal xcam chi joꞌcan, chi moco tixtzaca xtibel li xul li quicamsi̱c xban joskꞌ aj xul. Cui tixtzaca, tixmux rib. La̱in li Ka̱cuaꞌ ninyehoc re aꞌin.

⁹ Chixjunileb laj tij teꞌxba̱nu li chakꞌrab li quinqꞌue reheb. Cui incꞌaꞌ teꞌxba̱nu teꞌma̱cobk ut teꞌca̱mk xban nak teꞌxkꞌet li chakꞌrab. La̱in li Ka̱cuaꞌ. La̱in ninsantobresin reheb.

¹⁰ Ma̱ ani naru tixtzaca li santobresinbil tzacae̱mk cui ma̱cuaꞌ xcomon laj tij. Chi moco li rulaꞌ chi moco lix tojbil mo̱s naru nequeꞌtzacan re.

¹¹ Abanan naru nequeꞌxtzaca li mayejanbil tzacae̱mk lix lokꞌbil mo̱s laj tij ut eb li mo̱s li queꞌyoꞌla saꞌ li rochoch.

¹² Cui lix rabin laj tij nasumla riqꞌuin junak cui̱nk ma̱cuaꞌ aj tij, li ixk aꞌan incꞌaꞌ naru tixtzaca li santobresinbil tzacae̱mk.

¹³ Abanan cui lix rabin laj tij xma̱lcaꞌan, malaj ut xjachom rib riqꞌuin lix be̱lom ut ma̱cꞌaꞌ xcocꞌal, li ixk aꞌan ta̱sukꞌi̱k saꞌ rochoch lix yucuaꞌ joꞌ nak quicuan saꞌ xsa̱jilal ut naru tixtzaca lix tzacae̱mk lix yucuaꞌ. Abanan ma̱ jun junak jalan naru natzacan re li santobresinbil tzacae̱mk.

¹⁴ Cui junak tixtzaca li santobresinbil tzacae̱mk chi incꞌaꞌ naxnau nak incꞌaꞌ us xba̱nu, tento nak tixqꞌue re̱kaj re laj tij ut tixqꞌue li ju̱nk may ral li ju̱nk ciento chokꞌ xtzꞌakob.

¹⁵ Eb laj tij incꞌaꞌ teꞌxqꞌue chi muxecꞌ li santobresinbil tzacae̱mk li nequeꞌxqꞌue eb laj Israel re li Ka̱cuaꞌ.

¹⁶ Teꞌxqꞌue chi xtojbal xma̱c li cristian cui teꞌxqꞌue chixtzaca li tzacae̱mk santobresinbil. La̱in li Ka̱cuaꞌ. La̱in ninsantobresin reheb li tzacae̱mk aꞌan.

¹⁷ Li Ka̱cuaꞌ quia̱tinac riqꞌuin laj Moisés ut quixye re:

¹⁸ —Tat-a̱tinak riqꞌuin laj Aarón ut riqꞌuineb li ralal joꞌ eb ajcuiꞌ laj Israel ut ta̱ye reheb chi joꞌcaꞌin: Cui junak aj Israel malaj junak jalan xtenamit saꞌ e̱ya̱nk tixqꞌue lix cꞌatbil mayej, li xul li tixqꞌue chokꞌ xmayej tzꞌakalak re ru ut ma̱cꞌaꞌak re̱cꞌ, usta naxqꞌue xban nak x-ala saꞌ xchꞌo̱l malaj ut xban nak cuan li cꞌaꞌru quixyechiꞌi.

¹⁹ Tento nak li xul te̱lom ut ma̱cꞌaꞌak re̱cꞌ, usta toro, usta carner, malaj ut chiba̱t re nak li Ka̱cuaꞌ tixcꞌul.

²⁰ Abanan incꞌaꞌ ta̱cꞌulekꞌ li mayej cui te̱mayeja junak li xul li cuan re̱cꞌ.

²¹ Cui junak tixqꞌue lix mayej re xcꞌambal rib saꞌ usilal riqꞌuin li Ka̱cuaꞌ, tento nak li xul tzꞌakalak re ru, usta namayejac xban nak x-ala saꞌ xchꞌo̱l xba̱nunquil, malaj ut xban nak cuan li cꞌaꞌru quixyechiꞌi. Tento nak ma̱cꞌaꞌ re̱cꞌ li xul, usta toro, usta carner, re nak ta̱cꞌulekꞌ li mayej xban li Ka̱cuaꞌ.

²² Me̱mayeja chiru li Ka̱cuaꞌ junak li xul li mutzꞌ ru, malaj ut tokol rok, malaj ut tochꞌol, malaj ut sal rix, malaj ut xox rix malaj ut cuan xpat. Li xul aꞌin incꞌaꞌ naru te̱qꞌue chokꞌ e̱cꞌatbil mayej saꞌ xbe̱n lix artal li Ka̱cuaꞌ.

²³ Cui junak tixqꞌue jun li toro malaj ut jun li carner chokꞌ xmayej xban nak x-ala saꞌ xchꞌo̱l xqꞌuebal, naru tixqꞌue junak li xul li incꞌaꞌ xniman chi us malaj ut incꞌaꞌ tzꞌakal re ru. Abanan incꞌaꞌ naru xqꞌuebal li xul aꞌan cui cuan li cꞌaꞌru quixyechiꞌi xban nak li mayej aꞌan incꞌaꞌ ta̱cꞌulekꞌ.

²⁴ Incꞌaꞌ naru xmayejanquil chiru li Ka̱cuaꞌ junak li xul cui tochꞌol lix nakꞌ xtzꞌejcual malaj ut setbil, malaj ut pucꞌul, malaj ut isinbil. Incꞌaꞌ naru xba̱nunquil aꞌan saꞌ le̱ naꞌaj.

²⁵ Incꞌaꞌ naru te̱mayeja li xul li xecꞌul riqꞌuin junak li jalan xtenamit. Eb li xul aꞌan incꞌaꞌ tzꞌakal re ruheb ut incꞌaꞌ teꞌcꞌulekꞌ xban li Ka̱cuaꞌ.

²⁶ Li Ka̱cuaꞌ quixye re laj Moisés:

²⁷ —Nak ta̱yoꞌla̱k junak cuacax, junak carner, malaj ut junak chiba̱t, ta̱cana̱k riqꞌuin lix naꞌ chiru cuukub cutan. Chalen saꞌ lix cuakxak li cutan ta̱cꞌulekꞌ joꞌ jun li cꞌatbil mayej chiru li Ka̱cuaꞌ.

²⁸ Me̱camsi junak li cuacax rochben li ral saꞌ jun chi cutan. Chi moco te̱camsi li carner ut li ral saꞌ jun chi cutan.

²⁹ Nak texmayejak re bantioxi̱nc chiru li Ka̱cuaꞌ, te̱ba̱nu joꞌ naxye li chakꞌrab re nak ta̱cꞌulekꞌ le̱ mayej.

³⁰ Saꞌ ajcuiꞌ li cutan aꞌan te̱tzaca ut incꞌaꞌ te̱canab re xcab cutan. La̱in li Ka̱cuaꞌ ninyehoc re aꞌin.

³¹ Te̱ba̱nu li chakꞌrab li xinqꞌue e̱re ut te̱ba̱nu li nequexintakla cuiꞌ. La̱in li Ka̱cuaꞌ ninyehoc re aꞌin.

³² Me̱mux ru lin santil cꞌabaꞌ re nak ta̱cꞌutu̱nk lin santilal saꞌ xya̱nkeb laj Israel xban nak la̱in li Ka̱cuaꞌ ut la̱in ninsantobresin e̱re.

³³ La̱in quin-isin chak e̱re saꞌ li tenamit Egipto re nak la̱inak le̱ Dios. La̱in li Ka̱cuaꞌ, chan.