Levítico 21 - Li Santil hu

Li chakꞌrab chokꞌ reheb laj tij

¹ Li Ka̱cuaꞌ quixye re laj Moisés: —Tat-a̱tinak riqꞌuineb laj tij li ralal xcꞌajol laj Aarón ut ta̱ye reheb nak eb laj tij incꞌaꞌ teꞌxmux ribeb riqꞌuin xchꞌeꞌbal li camenak li ta̱ca̱mk saꞌ lix tenamiteb.

² Abanan naru teꞌxchꞌeꞌ li camenak cui aꞌan lix naꞌ, lix yucuaꞌ, li ralal ut lix rabin, ut li ras ut li ri̱tzꞌin.

³ Joꞌcan ajcuiꞌ naru naxchꞌeꞌ li ranab li ma̱cꞌaꞌ xbe̱lom li cuan saꞌ rochoch. Riqꞌuineb aꞌin naru naxmux rib riqꞌuin xchꞌeꞌbal xban nak xcomoneb rib.

⁴ Incꞌaꞌ naru tixmux rib riqꞌuin xchꞌeꞌbal yalak ani chi camenak saꞌ li tenamit.

⁵ Laj tij incꞌaꞌ tixbes li rismal xjolom chixcꞌatk lix xic, chi moco tixset ruꞌuj lix mach, chi moco tixset lix tibel xban xrahil xchꞌo̱l.

⁶ Tento nak santakeb laj tij re nak incꞌaꞌ teꞌxcꞌut xxuta̱n lin cꞌabaꞌ xban nak aꞌaneb li nequeꞌxqꞌue li cꞌatbil mayej ut nequeꞌmayejac li caxlan cua chicuu la̱in lix Dioseb. Joꞌcan nak tento nak santakeb.

⁷ Junak laj tij incꞌaꞌ naru ta̱sumla̱k riqꞌuin junak ixk naxcꞌayi rib, chi moco ta̱sumla̱k riqꞌuin junak ixk li ac cuanjenak riqꞌuin cui̱nk, chi moco ta̱sumla̱k riqꞌuin junak ixk jachom rib riqꞌuin lix be̱lom xban nak laj tij kꞌaxtesinbil chi cꞌanjelac chicuu la̱in lix Dioseb.

⁸ Eb laj tij teꞌoxlokꞌi̱k xban nak eb aꞌan li nequeꞌmayejac caxlan cua chicuu. La̱in li Ka̱cuaꞌ. La̱in santo ut la̱in ninsantobresin e̱re.

⁹ Cui junak xrabin laj tij tixtiquib xcꞌayinquil rib, li jun aꞌan tixcꞌut xxuta̱n lix yucuaꞌ. Cꞌatbil ta̱uxk re nak ta̱camsi̱k.

¹⁰ Lix yucuaꞌil eb laj tij, aꞌan quiqꞌueheꞌ li aceite saꞌ xjolom. Ut aꞌan kꞌaxtesinbil chirocsinquil li rakꞌeb laj tij. Joꞌcan nak incꞌaꞌ ta̱risi li tꞌicr li bacꞌbo saꞌ jolom ut incꞌaꞌ tixpej li rakꞌ xban xrahil xchꞌo̱l.

¹¹ Incꞌaꞌ naru na-oc cua̱nk cuiꞌ junak camenak, usta xnaꞌ usta xyucuaꞌ. Incꞌaꞌ naru tixmux rib riqꞌuineb aꞌan.

¹² Chi moco ta̱e̱lk saꞌ li tabernáculo, chi moco tixmux ru, xban nak aꞌan sicꞌbil ru chi cꞌanjelac chicuu la̱in li Ka̱cuaꞌ lix Dios ut qꞌuebil li aceite saꞌ xjolom. La̱in li Ka̱cuaꞌ xinyehoc re aꞌin.

¹³ Tento nak ta̱sumla̱k riqꞌuin junak ixk toj ma̱jiꞌ cuanjenak riqꞌuin cui̱nk.

¹⁴ Incꞌaꞌ ta̱sumla̱k riqꞌuin junak xma̱lcaꞌan, chi moco riqꞌuin junak ixk jachom rib riqꞌuin xbe̱lom, chi moco riqꞌuin junak ixk li naxcꞌayi rib. Tento ban nak ta̱sumla̱k riqꞌuin junak ixk li ma̱jiꞌ cuanjenak riqꞌuin cui̱nk ut xcomonakeb li ralal xcꞌajol laj Leví.

¹⁵ Tento nak tixba̱nu chi joꞌcan re nak incꞌaꞌ tixmux ruheb li ralal xcꞌajol saꞌ lix tenamiteb. La̱in li Ka̱cuaꞌ li ninsantobresin re, chan li Dios.

¹⁶ Li Ka̱cuaꞌ quia̱tinac riqꞌuin laj Moisés ut quixye re:

¹⁷ —Tat-a̱tinak riqꞌuin laj Aarón ut ta̱ye re chi joꞌcaꞌin: Chalen anakcuan ut chi junelic cui incꞌaꞌ tzꞌakal re ru la̱ cualal a̱cꞌajol, li jun aꞌan incꞌaꞌ naru ta̱cꞌanjelak chixqꞌuebal li mayej caxlan cua chicuu.

¹⁸ Ma̱ jun reheb laj tij li cuan re̱cꞌ naru teꞌcꞌanjelak re xqꞌuebal li mayej chicuu. Incꞌaꞌ naru nequeꞌcꞌanjelac chi qꞌuehoc mayej li mutzꞌ, chi moco li ye̱k rok, chi moco li incꞌaꞌ tzꞌakal re ru li ruꞌuj, malaj ut lix xic.

¹⁹ Incꞌaꞌ naru nequeꞌcꞌanjelac chi qꞌuehoc mayej li tokol rokeb chi moco li tokol rukꞌeb.

²⁰ Chi moco li cꞌutzcꞌu rix, chi moco li metꞌ aj cui̱nk, chi moco li cuan xyajel li xnakꞌ ru, chi moco li cuan xox chirix, chi moco li sal rix, chi moco li tochꞌol xnakꞌ xtzꞌejcual naru nequeꞌcꞌanjelac chi qꞌuehoc mayej.

²¹ Ma̱ jun reheb li ralal xcꞌajol laj Aarón laj tij li cuan re̱cꞌ naru tixmayeja chicuu li cꞌatbil mayej ut li mayej caxlan cua.

²² Naru nequeꞌxtzaca li mayej caxlan cua li kꞌaxal lokꞌ ut li cꞌaꞌak re ru li santobresinbil,

²³ abanan incꞌaꞌ naru teꞌnachꞌok riqꞌuin li artal chi moco naru teꞌxic jun pacꞌal li tꞌicr re nak incꞌaꞌ teꞌxmux ru lin tabernáculo xban nak la̱in xinsantobresin re, chan li Dios.

²⁴ Ut laj Moisés quixye aꞌin re laj Aarón ut reheb li ralal ut reheb chixjunileb laj Israel.