Levítico 20 - Li Santil hu

Lix tojbal rix li ma̱c

¹ Li Ka̱cuaꞌ quia̱tinac riqꞌuin laj Moisés ut quixye re:

² —Ta̱ye ajcuiꞌ reheb laj Israel chi joꞌcaꞌin. Yalak ani li cui̱nk aj Israel tixyechiꞌi li ralal xcꞌajol chokꞌ xmayej chiru li yi̱banbil dios Moloc, li cui̱nk aꞌan ta̱camsi̱k chi pec xbaneb li tenamit. Relic chi ya̱l ta̱camsi̱k usta aj Israel, usta jalan xtenamit li cuan arin Israel.

³ La̱in tinjoskꞌokꞌ saꞌ xbe̱n li cui̱nk li tixqꞌue li ralal xcꞌajol chokꞌ xmayej re xlokꞌoninquil li yi̱banbil dios Moloc. Riqꞌuin aꞌan teꞌxmux ru lin tabernáculo ut teꞌxmux ajcuiꞌ ru lin santil cꞌabaꞌ. Cui teꞌxba̱nu chi joꞌcan, la̱in tincuisiheb saꞌ xya̱nkeb laj Israel.

⁴ Cui eb laj Israel incꞌaꞌ teꞌxqꞌue retal li ma̱usilal li xba̱nu nak xmayeja li ralal xcꞌajol ut incꞌaꞌ teꞌxcamsi,

⁵ la̱in tinjoskꞌokꞌ saꞌ xbe̱n li cui̱nk, ut saꞌ xbe̱neb li cuanqueb saꞌ rochoch, joꞌ eb ajcuiꞌ li teꞌoque̱nk riqꞌuin chixlokꞌoninquil li yi̱banbil dios Moloc. Ut tincuisiheb saꞌ xya̱nkeb laj Israel.

⁶ La̱in xicꞌ nacuileb li nequeꞌxsicꞌ xnaꞌleb riqꞌuineb li nequeꞌa̱tinan musikꞌej, joꞌqueb ajcuiꞌ li nequeꞌtzꞌekta̱nan cue ut nequeꞌxsicꞌ xnaꞌleb riqꞌuineb laj kꞌe. Tincuisiheb saꞌ xya̱nkeb laj Israel.

⁷ Joꞌcan nak ti̱cak e̱chꞌo̱l ut santakex xban nak la̱in li Ka̱cuaꞌ le̱ Dios.

⁸ Cheqꞌuehak retal li chakꞌrab li xinqꞌue e̱re ut cheba̱nu li cꞌaꞌru naxye xban nak la̱in li Ka̱cuaꞌ ninsantobresin e̱re.

⁹ Li ani tixmajecua lix naꞌ, malaj ut lix yucuaꞌ, ta̱camsi̱k. Ut aꞌan cuan xma̱c nak ta̱camsi̱k.

¹⁰ Cui junak cui̱nk naxchꞌic rib riqꞌuin li rixakil li ras ri̱tzꞌin, li cui̱nk ut li ixk teꞌcamsi̱k xban nak queꞌxmux ru lix sumlajiqueb.

¹¹ Li cui̱nk li tixchꞌic rib riqꞌuin li rixakil lix yucuaꞌ naxcꞌut xxuta̱n lix yucuaꞌ. Li cui̱nk ut li ixk teꞌcamsi̱k.

¹² Li cui̱nk li tixchꞌic rib riqꞌuin lix ralib, chixcabichaleb teꞌcamsi̱k. Eb aꞌan cuanqueb xma̱c nak teꞌcamsi̱k xban nak kꞌaxal yibru queꞌxba̱nu.

¹³ Cui junak li cui̱nk tixchꞌic rib riqꞌuin li rech cui̱nkilal, nimla ma̱c li queꞌxba̱nu. Chixcabichaleb teꞌcamsi̱k. Ut eb aꞌan cuanqueb xma̱c nak teꞌcamsi̱k.

¹⁴ Cui junak cui̱nk tixcꞌam chokꞌ rixakil junak li ixk ut tixcꞌam ajcuiꞌ chokꞌ rixakil lix naꞌ li ixk, nimla ma̱c li teꞌxba̱nu. Teꞌcamsi̱k chi roxichaleb. Cꞌatbil nak teꞌosokꞌ re nak incꞌaꞌ chic ta̱uxma̱nk li ma̱usilal aꞌan saꞌ e̱ya̱nk la̱ex.

¹⁵ Cui junak cui̱nk tixchꞌic rib riqꞌuin junak xul, ta̱camsi̱k li cui̱nk ut ta̱camsi̱k li xul.

¹⁶ Cui junak ixk tixchꞌic rib riqꞌuin junak xul, li ixk aꞌan ta̱camsi̱k ut ta̱camsi̱k ajcuiꞌ li xul. Ut eb aꞌan cuanqueb xma̱c nak teꞌcamsi̱k.

¹⁷ Cui junak cui̱nk tixchꞌic rib riqꞌuin li ranab, malaj ut lix cab ranab, nimla ma̱c teꞌxba̱nu ut teꞌcamsi̱k chixcabichaleb. Li cui̱nk aꞌan quixmux ru li ranab ut tento nak aꞌan tixtoj rix lix ma̱c.

¹⁸ Cui junak cui̱nk tixchꞌic rib riqꞌuin junak ixk nak yo̱ xyajel re li po, yo̱queb chixcꞌutbal xxuta̱neb. Ut li ixk xqꞌue chi naꞌecꞌ li cꞌaꞌru yo̱ chixcꞌulbal. Chixcabichaleb teꞌisi̱k saꞌ xya̱nkeb laj Israel.

¹⁹ Cui junak cui̱nk tixchꞌic rib riqꞌuin li ranab lix yucuaꞌ malaj ut riqꞌuin li ras malaj ut riqꞌuin li ri̱tzꞌin lix naꞌ, teꞌxcꞌut xxuta̱neb xban nak rechꞌalaleb rib. Chixcabichaleb teꞌxtoj rix li ma̱usilal teꞌxba̱nu.

²⁰ Cui junak cui̱nk tixchꞌic rib riqꞌuin li ras malaj ut riqꞌuin li rixakil li rican, li cui̱nk aꞌan tixcꞌut xxuta̱n li rican. Li cui̱nk joꞌ ajcuiꞌ li ixk teꞌxtoj rix li ma̱c queꞌxba̱nu. Teꞌca̱mk chi incꞌaꞌ teꞌcua̱nk ralal xcꞌajoleb.

²¹ Cui junak cui̱nk tixchꞌic rib riqꞌuin li rixakil li ras malaj ut li rixakil li ri̱tzꞌin, li cuib aꞌan teꞌca̱mk chi ma̱cꞌaꞌ ralal xcꞌajoleb. Li cui̱nk aꞌan quixmux rib ut quixcꞌut xxuta̱n li ras malaj ut li ri̱tzꞌin.

²² Joꞌcan nak cheba̱nu chixjunil li chakꞌrab li yo̱quin chixqꞌuebal e̱re ut te̱pa̱b le̱ taklanquil re nak incꞌaꞌ tex-isi̱k saꞌ li naꞌajej Canaán li texincꞌam cuiꞌ la̱in.

²³ Me̱tzol e̱rib chixba̱nunquil li cꞌaꞌru nequeꞌxba̱nu li jalan xtenamiteb. La̱in tincuisiheb aꞌan saꞌ li naꞌajej li tex-oc cuiꞌ la̱ex. Eb aꞌan queꞌxba̱nu li ma̱usilal aꞌin. Joꞌcan nak xebintzꞌekta̱na.

²⁴ La̱in quinyechiꞌi e̱re li cha̱bil naꞌajej aꞌin li na-el cuiꞌ chi us li acui̱mk. La̱ex tex-e̱chani̱nk re li naꞌajej xban nak la̱in tinqꞌue e̱re re texcua̱nk. La̱in li Ka̱cuaꞌ le̱ Dios. La̱in quinsicꞌoc e̱ru saꞌ xya̱nkeb chixjunileb li xni̱nkal ru tenamit.

²⁵ Joꞌcan ut tento nak te̱nau cꞌaꞌru li xul li naru te̱tzaca xtibel ut cꞌaꞌru li xul li incꞌaꞌ naru te̱tzaca joꞌ li nequeꞌrupupic ut eb li nequeꞌbe̱c saꞌ chꞌochꞌ ut eb li nequeꞌxjucuqui ribeb. Incꞌaꞌ te̱mux e̱rib riqꞌuin xtzacanquil li xul li xinye nak incꞌaꞌ naru te̱tzaca.

²⁶ Santakex xban nak santin la̱in li Ka̱cuaꞌ li nimajcual Dios. La̱in xinsicꞌoc e̱ru saꞌ xya̱nkeb chixjunileb li xni̱nkal ru tenamit re nak la̱exak li cualal incꞌajol.

²⁷ Cui cuanqueb cui̱nk ut ixk saꞌ e̱ya̱nk li naa̱tinac riqꞌuineb li musikꞌej malaj ut nakꞌehin, tento nak teꞌcamsi̱k chi pec. Ut eb aꞌan cuanqueb xma̱c nak teꞌcamsi̱k.